Bolod.mn сайт долоо хоног бүр улс төр, эдийн засаг, нийгмийн хүрээнд өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд МУ-ын Ерөнхийлөгч У.Хүрэлсүх эхчүүдэд алдар эхийн одон гардууллаа. Түүнчлэн 2 жилийн хугацаанд нүүрсний уртын тээврийг хориглосон байсан бол энэ сарын 25-наас эхлэн уртын тээвэр эхэллээ. Эдгээр болон бусад онцлон мэдээ мэдээллийг тоймлон хүргэж байна.

Их дэлгүүрийн зүүн талын замыг шинэчилжээ

Нийслэлд Чингэлтэй дүүрэг Баруун Сэлбийн гудамжны авто замын шинэчлэлтийн ажил хийгдэж байна. Тодруулбал Улсын Их Дэлгүүрийн/УИД/ зүүн урд талын уулзвараас ТЭДИ төвийн зүүн хойд уулзвар хүртэлх авто замын асфальт бетон хучилтыг хийж дуусган, замын хөдөлгөөнийг нээжээ.Уг замын хөдөлгөөнийг тавдугаар сарын 20-ны орой хааж засварын ажлыг гүйцэтгэж байсан юм.Үүнээс гадна нийслэлийн хэмжээнд авто замын 17,749 ам метр талбайн хэвтээ тэмдэглэгээг шинэчлэх ажил хийгдэж байна.

Мөнгө угаасан хэргээр Эрээн боомтын хил гаалийн удирдлагуудыг баривчиллаа

БНХАУ-аас хилийн тээвэрлэлт тэг зогссон талаар мэдээлэл цацагдаад буй. Хэдийгээр Гадаад харилцааны яамнаас "Тээвэрлэлт хэвийн явагдаж буй" гэх мэдээллийг өгсөн ч тэг зогсолт хийж байгаа зураг нь цахим орчинд цацагдаж үнэний ортой болох нь батлагдаад байгаа юм.Тэгвэл тэг зогсолт хийсэн нь Эрээн хотын хэмжээнд хууль хүчний байгууллагууд томоохон баривчилгаа, нэгжлэг, шалгалт эхэлсэнтэй холбоотой гэнэ. Энэ тухай Өдрийн сонинд мэдээлснээр "Монгол Улс БНХАУ-ын хооронд хийгдэж эхэлсэн чингэлэг тээвэртэй холбоотойгоор урд хөршид авлигын томоохон асуудал үүсчээ. Үүний улмаас өнгөрсөн долоо хоногт Хөх хотын төмөр замын томоохон албан тушаалтай 10 гаруй хүнийг баривчилсан байна. Мөн Эрээн боомтын гаалийн ажилтнуудыг нийтээр нь чөлөөлсөн" гэжээ. Тодруулбал, баривчлагдаж чөлөөлөгдсөн албан тушаалтнууд чингэлэг тээвэр нэрийн дор авлигын томоохон сүлжээ үүсгэсэн аж.

Зургадугаар сарын 1-нээс Монголын агаарын тээвэр нээгдэнэ

Коронавирусын халдварын улмаас 2020 оны нэгдүгээр сарын 27-ноос Монгол-Хятадын олон улсын нислэг зогсож агаарын хил хаагдсан. Монголын талаас агаарын хил нээх, хуваарьт нислэгийг хийх саналыг Хятадын талд удаа дараа хүргүүлсний үр дүнд зургаадугаар сарын 1-нээс агаарын хил нээгдэхээр болжээ. Эхний ээлжинд Монгол, Хятад улсын агаарын тээвэрлэгчид хоёр долоо хоногт 1 удаа нислэг үйлдэх боломжтойг мэдэгджээ.

МУ-ын ерөнхийлөгч ээжүүдэд алдарт эхийн одон гардуулж, баяр хүргэлээ

Олон улсын хүүхдийн эрхийг хамгаалах өдрийг угтан, Олон хүүхэд төрүүлж өсгөсөн эхийг урамшуулах тухай хууль болон Монгол Улсын Үндсэн хуульд заасан бүрэн эрхийнхээ хүрээнд Монгол Улсын Ерөнхийлөгч У.Хүрэлсүх зарлиг гаргаж, алдарт эхчүүдэд одон гардууллаа.Хуульд зургаан хүүхэд төрүүлж өсгөсөн эхийг I зэргийн одонгоор, дөрвөн хүүхэд төрүүлж өсгөсөн эхийг II зэргийн одонгоор шагнана гэж заасан.Энэ жил алдарт эхийн одонгоор улсын хэмжээнд нийт 12,559 ээж, үүнээс I зэргийн одонгоор 912 ээж, II зэргийн одонгоор 11,647 ээжийг шагнах тухай Монгол Улсын Ерөнхийлөгчийн зарлиг гарсан юм.МОНГОЛ УЛСЫН ЕРӨНХИЙЛӨГЧИЙН ЗАРЛИГААР:Нийслэлийн 9 дүүргээс нийт 5,429 ээж, үүнээс I зэргийн одонгоор 349 ээж, II зэргийн одонгоор 5,080 ээж;21 аймгаас нийт 7,056 ээж, үүнээс I зэргийн одонгоор 560 ээж, II зэргийн одонгоор 6,496 ээж;Гадаадад оршин суугаа нийт 74 ээж, үүнээс I зэргийн одонгоор 3 ээж, II зэргийн одонгоор 71 ээжийг тус тус шагнах юм.Монгол Улсын Ерөнхийлөгч У.Хүрэлсүх одон гардуулсныхаа дараа ээжүүдэд баяр хүргэн Монголын бүх ээжид удахгүй болох Олон улсын хүүхдийн эрхийг хамгаалах өдрийн баярын мэндийг хүргэлээ.

Сүхбаатарын талбайд шөнийн парад боллоо

Монгол цэрэг энхийг сахиулах үйлсэд оролцож эхэлсний 20 жилийн ой болон “Олон улсын энхийг сахиулагчдын өдөр”-ийг тохиолдуулан Зэвсэгт хүчний болон ХХЕГ, ОБЕГ, ШШГЕГ-ын 1500 орчим алба хаагч ёслолын жагсаалд жагсахаар бэлтгэлээ базааж байна.Тус нэгдсэн бэлтгэлийн хүрээнд шөнийн парадыг 5-р сарын 27-ний үүрийн 04.00 цагт Сүхбаатарын талбайд хийлээ. Ёслолын жагсаалд Онцгой байдлын албаны эрэгтэй, эмэгтэй 73 алба хаагч оролцож байгаа юм гэж Онцгой байдлын ерөнхий газраас мэдээллээ.

Д.Монголхүүд зорчих эрхийг хязгаарлах ял оногдуулав

МоАХ-ны дарга Д.Монголхүүд холбогдох хэргийн шүүх хурал өнөөдөр /2022.05.25/ Сүхбаатар дүүргийн анхан шатны шүүхэд болов. Шүүхээс түүний Баянзүрх дүүргийн нутаг дэвсгэрээс нэг жил гарах эрхийг хязгаарлах шийдвэр гаргасан тухай Д.Монголхүү хэлсэн юм. Тэрбээр "Шүүх шийдвэрээ гаргаж, намайг гэм буруутайд тооцон нэг жил БЗД-ийн нутаг дэвсгэрээс гарахыг хориглов. Үндэслэл нь бүртгэлгүй жагсаал цуглааныг зохион байгуулагч гэсэн" гэв.Нийслэлийн прокурорын газраас иргэн Д.Монголхүүд Эрүүгийн хуулийн тусгай ангийн 23.1 дүгээр зүйлийн нэг дэх хэсэгт заасан “Хууль сахиулагчийг эсэргүүцэх” гэмт хэрэгт яллах дүгнэлт үйлдэж, шүүхэд ирүүлсэн байдаг. Тус эрүүгийн хэргийг өмнө нь нэг удаа хэлэлцээд, мөрдөн шалгах ажиллагааг дахин хийлгэхээр Нийслэлийн прокурорын газарт буцаагаад байсан юм.Д.Монголхүү "Манай гэрт /2022.05.16/ гурван залуу нэвтэрч, биед минь халдсан хэрэг гарсан. Дараа нь Э.Одбаярыг намынхаа байранд байхад шөнийн 03:00 цагт /2022.05.25/ халдаж, чулуу шидсэн байна. Энэ бол маш ноцтой асуудал. Миний хувьд цагдаагийн байгууллагад хүсэлт өгч, Баянгол дүүргийн цагдаагийн Нэгдүгээр хэлтэс хэргийг мөрдөн шалгаж байна" гэв.

Нүүрсний уртын тээвэр эхэллээ

"Цагаан хад" дахь халдвар хамгааллын дэглэм сайжирч, Ганц мод боомт дахь шинжилгээгээр богино тээврийн жолооч нараас сүүлийн хоёр долоо хоног эерэг тохиолдол илрээгүй байна. Иймд (2022.05.25)-өөс нүүрсний уртын тээврийг эхлүүлж, тавдугаар сарын 31-нээс задгай нүүрсний тээврийг эхлүүлэхээр болсон талаар Уул уурхай, хүнд үйлдвэрийн яамнаас мэдээллээ.Халдвар хамгааллын дэглэм сахиж, ариутгал хяналтын ажил шат дараатайгаар хийгдсэн тул эхний өдрийн байдлаар уртын тээврийн 100 машин өглөөний 05.00 цагт гарсан байна. Хэрэв дахин эерэг тохиолдол гарахгүй бол өдөрт 400 машин татан авах саналтай байгааг БНХАУ-ын ӨМӨЗО-ы Баяннуур хотын Гадаад харилцааны хэлтэс, Боомтын зөвлөлөөс мэдээлсэн байна. Хилийн боомтын үндэсний зөвлөл газар дээр нь ажиллаж байгаа аж. Улсын төсөв бүрдүүлэх төлөвлөгөөнд энэ жил 36.5 сая тонн нүүрс экспортлох зорилт тавьснаас гүйцэтгэл 5 сая байна гэж УИХ-ын гишүүн Н.Наранбаатар хэлсэн.Ерөнхий сайд Л.Оюун-Эрдэнэ маргааш Өмнөговь аймагт ажиллана. Тэрбээр Ханбогд сум болон Шивээхүрэн, Гашуунсухайтын боомтод очиж, Тавантолгой уурхайгаас Цагаан хад хүртэлх тээврийг эхлүүлэх мэдээлэл байна.

БСШУЯ: Сурагчдын амралтыг наашлуулаагүй

2021-2022 оны хичээлийн жил цар тахлын улмаас гурван улиралтай байгаа. Сурагчдын зуны амралт нийслэл, орон нутагт зэрэг эхэлнэ. Тухайлбал,Бага ангийн буюу 1-3 дугаар ангийн сурагчид зургадугаар сарын 3-нд хичээллээд,Дунд, ахлах /4-12/ ангийн сурагчид зургадугаар сарын 13-нд хичээллээд амрах хуваарьтайГэтэл өчигдрөөс эхлэн цахим хуудаст сурагчдын амралтыг наашлуулж ирэх зургадугаар сарын 1-нд эхлүүлэхээр болгосон талаар мэдээлэл гарав. Энэ талаар Боловсрол шинжлэх ухааны яамнаас тодруулахад “Ерөнхий боловсролын сургуулийн сурагчид сайд А/38 тоот тушаалын дагуу амарна. Нийслэлийн боловсролын газраа чиглэл өгөөгүй. Амралтыг наашлуулсан гэдэг ташаа мэдээлэл” гэв. Тэгэхлээр сурагчид дээрх заасан хугацаанд буюу бага анги ирэх сарын 4-нөөс эхэлж амрах юм байна.Сурагчдын өвлийн амралт сунгагдсан тул зуны амралт долоо хоногоор хойшилж эхлэхээр болсон. Энэ хичээлийн жилд улсын хэмжээнд ерөнхий боловсролын 854 сургуульд 718,817 сурагч суралцаж байна.Боловсрол, шинжлэх ухааны сайдын А/38 дугаар тушаалаар Ерөнхий боловсролын сургуулийн 2021-2022 оны хичээлийн жилийн II, III дугаар улирал буюу хоёрдугаар хагас жилийн эхлэх, дуусах хугацааг тогтоосон билээ. Энэхүү хуваарийн дагуу ерөнхий боловсролын сургуулийн II хагас жилийн хичээл 02 дугаар сарын 14-ний-өөс 04 дүгээр сарын 01 хүртэл үргэлжилж, дөрөвдүгээр сарын 4-10-ны өдрүүдэд нэг долоо хоног амарсан.Харин гуравдугаар улирлын хичээл дөрөвдүгээр сарын 11-нээс эхэлсэн бөгөөд дараах хуваарийн дагуу зуны амралт эхэлнэ. Үүнд:1-3 дугаар ангийн сурагчдын амралт 06 дугаар сарын 06-ны өдрөөс4-5 дугаар ангийн сурагчдын амралт 06 дугаар сарын 13-ны өдрөөс6-12 дугаар ангийн сурагчдын амралт 06 дугаар сарын 20-ны өдрөөс эхэлнэ.

Дархан-Уул аймагт 6-7 насны хоёр хүүхэд тогтоол усанд живжээ

Дархан-Уул аймгийн Орхон сумын нутагт тогтоол усанд хоёр хүүхэд живсэн харамсалтай осол гарчээ. Тус сумын цагдаагийн байгууллагад тавдугаар сарын 22-ны оройн 20:00 цагт "Хоёр хүүхэд тогтоол усанд живж нас барсан байна” гэсэн дуудлага ирсэн байна.Дуудлага, мэдээллийг тус аймаг дахь цагдаагийн газраас шалгахад тус суманд оршин суух 6-7 настай хоёр эрэгтэй хүүхэд тогтоол усанд живж нас барсан нь тогтоогджээ. Шалгалтын явцад 1.4 метрийн гүнтэй байгалийн тогтоол усанд хүүхдүүд тоглохоор ороод живсэн нь тогтоогдсон байна.Өмнө нь 2020 онд долоо хоногийн дотор таван хүүхэд тогтоол усанд живж нас барсан осол нийслэл Улаанбаатарт гарч байв.Иймд эцэг эх, асран хамгаалагчид бага насны хүүхдүүддээ ахуйн осол гэмтлийн талаар мэдээлэл өгөх, хараа хяналт тавих, орчны эрсдлээс урьдчилан сэргийлэхийг цагдаагийн байгууллагаас зөвлөж байна.

BOLOD ДОЛОО ХОНОГИЙН ТОЙМ: Нүүрсний уртын тээвэр эхэлж, алдарт эхчүүд одонгоо гардаж авлаа
Tweet
Bolod.mn