"Эко констракшн" ХХК "Улаанбаатар пропертиз" гэж нэрээ сольсон ч хөдөлмөрийн аюултай байдал нь өөрчлөгдөөгүй

2022-07-01

Бүтээн байгуулалтын улирлын үеэр манай барилгын салбарт гардаг хүний амь нас, эрүүл мэндийн хохирол байнгын хэвийн үзэгдэл мэт болох нь. Хамгийн сүүлд дараалсан гурван удаагийн осолд хоёр хоёроороо зургаан хүн өртлөө. Эргэн сануулбал, 2022 оны зургадугаар сарын 22-ны лхагва гарагийн 12:50 цагийн үед ХУД-ийн 18 дугаар хороо, “Хүннү 2222” хорооллын баруун талд "Номин холдинг" ХХК-ийн салбар "Номин реалтор" ХХК-ийн баригдаж буй барилгын дээрээс кран унаж хоёр хүний амь эрсэдсэн.

Маргааш нь МХЕГ-аас тухайн ослын талаарх урьдчилсан дүгнэлтийг мэдээлж байх үеэр ХУД-ийн 17 дугаар хороо, "Маршал таун" хотхоны хашаан дотор баригдаж буй барилгын өргөгч төхөөрөмжийн нэг талын татуурга тасарч, шилэн фасад хийж байсан хоёр хүн унаж, нэг иргэн газар дээрээ нас барж, нэг нь эмнэлэгт хүргэгдсэн юм. Дараалсан ослоос гурав хоногийн дараа буюу 26-ны ням гарагт БГД-ийн 11 дүгээр хороо, “Хувьсгалчид 2” гудамжинд байшин барихаар суурь цутгаж байсан хоёр хүн 1 метрийн гүн нүхний ирмэг дээрх суурийн блокод даруулж, 18-24 настай хоёр иргэн амиа алдсан юм.

Эдгээрээс "Эко констракшн"-ыг онцлохын учир нь барилгын салбарт харьцангуй олон жилийн “муу” туршлагатай ч, хариуцлагаас мултрах онцгой чадвартай нэгэн юм. Тухайлбал, НМХГ-аас мэдээлснээр, 2016-2018 онд барилгын салбарт гарсан ослын судалгаанаас үзэхэд “Эко констракшн” компанийн Хан-Уул дүүргийн нутагт барьж буй барилгад жил бүр осол гарч, 2016 онд хүн гэмтсэн бол, дараагийн хоёр жилд нь тус бүр нэг нэг хүний амь хохирч байжээ. Түүнчлэн 2018 онд Х апартмент хотхоны цахилгаан шатны хаалга цөмөрч хүн унаж бэртсэн, энэ жил бас нэг байрных нь цахилгаан шатны хонгилд 3 настай хүү унаж амиа алдсан гээд тоочвол олон асуудал бий. Гэвч С.Нямдаваа хариуцлага хүлээж байсан удаагүй. Өнгөрсөн жил гэхэд яллагдагчаар татагдсан ч хэргээсээ өршөөлөөр мултарч байсан юм даг.

"Эко констракшн" ХХК-ийн барьж буй барилга дээр ажиллаж байсан хүний амь, эрүүл мэнд хохирсон нэг бус осолтой холбогдуулж захирал С.Нямдаваа, Үйлдвэрлэлийн алба хариуцсан дэд захирал Ж.Бямбахорол, ХАБЭАХ-ын ажилтан И.Цэрэндулам, талбайн инженер Ж.Бямбажаргал, Кинг тауэр-4 барилгын талбайн инженер Э.Энхцацрал, бригадын дарга Т.Буянбаатар, кранч Т.Энхбаяр, “Батсутай” ХХк-ийн захирал Ц.Зулцэцэг нарыг яллагдагчаар татсан бөгөөд С.Нямдаваагаас бусдыг нь шүүхэд шилжүүлсэн байдаг. Дэд захирал тэргүүтэй нөхдийг нь “Эко констракшн” компанийн барьж байсан “Маршал таун” хотхоны барилга дээр ажиллаж байсан иргэн Ч.Б-гийн дээрээс 2018 оны тавдугаар сарын 21-нд суурийн блокын гадна тусгаалалтын хавтан унаж, эрүүл мэндэд нь хүнд хохирол учруулсан, 2018 оны дөрөвдүгээр сарын 6-нд “Кинг тауэр-4” хотхоны барилгын туслах ажилчин байсан О.Г арматур буулгаж байгаад өндөр хүчдэлд цохиулан амь насаа алдсан хэрэгт буруутгасан юм. ХУД-ийн Цагдаагийн газраас Ж.Бямбахорол, И.Цэрэндулам, Ж.Бямбажаргал, Э.Энхцацрал, Т.Буянбаатар, Т.Энхбаяр, Ц.Зулцэцэг нарт Эрүүгийн хуулийн 11.3.1, 10.6.1 дэх хэсгийн заалтыг үндэслэн эрүүгийн хэрэг үүсгэн шалгаж, шүүхэд шилжүүлсэн байв. Гэвч 2021 онд Ардын хувьсгалын 100 жилийн ойг тохиолдуулан баталсан Өршөөл үзүүлэх тухай хууийн үйлчлэлд тэдний хэргийг хамруулан хэрэгсэхгүй болгосон. Захирал С.Нямдаваагийн тухайд, дээрх хэргээс нь тусгаарлан, мөрдөн байцаалтын өөр нэг хавтаст хэрэг нээсэн гэх боловч мөн л өршөөгдөөд өнгөрчээ.

Ер нь тэрбээр өдөр тутмын үйл ажиллагаандаа оролцдоггүй, түүний удирдлага доорх хүмүүс барилгын талбайд болж буй үйлдвэрлэлийн ажлыг мэдэх ёстой хэмээн мэдүүлж буруу бүхнийг бусад руу чихдэг нэгэн аж. Нэг талаараа тийм боловч нөгөө талдаа тэдний барилгын талбайд жил дараалан хүн хохирдог гэх мэргэжлийн хяналтынхны мэдээлэл гарцаагүй анхаарал татдаг. Үйлдвэрлэлийн ослоос гадна бусад хууль бус үйл ажиллагаа, чанар стандартын асуудлыг нь сөхвөл боть ном болох биз. "Эко констракшн" нэрээ сольж "Улаанбаатар пропертиз" болсон ч тэдний үйл ажиллагаа, чанар стандарт, аюулгүй ажиллагаанд нь өөрчлөлт ороогүйг өнгөрсөн жилүүдэд гарсан ослууд нь гэрчилж байна.

Удирдаж буй компанийнх нь хариуцлагагүйгээс хүний эрүүл мэнд, амь нас өчнөөнөөр хохирсоор байтал хэргээс мултарч, худал мэлзэх онцгой чадвартай, олон танилтай, “том ар”-тай түүнийг хашраах зоригтон алга. Энэ удаад ч түүнийг хариуцлагаас гэмгүй мултрах вий гэж хардаж, харамсах хүн олон байна. Учир нь ноцтой осол гарсантай холбогдуулан барилгын ажлыг зогсоосон ч нууцаар ажиллаж байгааг хэвлэл мэдээлсэн. Түүгээр ч зогсохгүй талийгаачийн ажил явдлын үеэр компанийг төлөөлж очсон гэх инженер нь эмгэнэл илэрхийлэх байтугай өөрсдийгөө буруугүй гээд компаниа магтаж байгаад 5 сая төгрөг өгөөд явжээ.

С.Нямдаваа ба түүнтэй хамаарал бүхий албан тушаалтнууд МАН гэх малгай дор гагнаастай бат бөх гинж юм байх. Тиймдээ л 2014 оноос хойш топ 100 аж ахуйн нэгжид багтаж ирсэн биз. Тэгвэл тэр гагнасан гинжийг тас цохих тэнхээтэй аавын хүү байна уу?

BOLOD.MN