Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнл болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд олны шүүмжлэл дагуулаад байсан Чингис хаан онгоцны буудал хүртэлх тээврийн хэрэгслийг үнийг бууруулж, цагийн хуваарийг шинэчилжээ. Мөн түүнчлэн ЗГ-аас нэг сач болон түүнээс доош цалинтай иргэдийн НДШ-ийн 50 хувийг буцаан олголтын ажил эхэлж иргэдийг дансанд орж эхэллээ. Эдгээр болон бусад онцлох үйл явдлуудыг BOLOD ДОЛОО ХОНОГИЙН ТОЙМ-оос хүлээн авна уу.

Үндэсний их баяр наадмын тухай хуулийн шинэчилсэн найруулгын төслийг эцэслэн баталлаа

ИХ-ын чуулганы нэгдсэн хуралдаан зургадугаар сарын 28-нд болж Үндэсний их баяр наадмын тухай хуулийн шинэчилсэн найруулгын төсөл болон хамт өргөн мэдүүлсэн, холбогдуулан боловсруулсан хуулийн төслүүдийг эцэслэн батлах санал хураалт явууллаа. Дээрх хуулийн төслүүдийн эцсийн хэлэлцүүлгийг УИХ-ын чуулганы 2022 оны 06 дугаар сарын 17-ны өдрийн хуралдаанаар хийж эцэслэн батлуулах бэлтгэл хангуулахаар Төрийн байгуулалтын байнгын хороонд шилжүүлээд байсан юм.

УИХ-ын нийт гишүүдийн олонхын саналаар Үндэсний их баяр наадмын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг эцэслэн баталсан бөгөөд нийт гишүүдийн олонх дээрх хуулийн төсөлтэй холбогдуулан боловсруулсан Үндэсний их баяр наадмын тухай хуулийг дагаж мөрдөх журмын тухай хуулийн төслийг эцэслэн батлахыг дэмжсэнгүй. Тиймээс уг хуулийн төслийг Төрийн байгуулалтын байнгын хороонд буцааж, дахин боловсруулах чиглэл өглөө.

УИХ-ын дарга Г.Занданшатар Үндэсний их баяр наадмын тухай хуулийн шинэчилсэн найруулгын төслийг эцэслэн баталснаар үндэсний эв нэгдлийн бэлгэ тэмдэг болсон монгол наадмаа зөрчилгүйгээр зохион байгуулах боломж бүрдэж буйг дурдаад, энэ чиглэлээр холбогдох яамд, ажлын хэсэг, холбоод онцгой анхаарч, баяр наадмаа ёслол төгөлдөр тэмдэглэхэд хүчээ нэгтгэн ажиллахыг уриалав.

Мөн хуралдаанаар Шүүхийн шийдвэр гүйцэтгэх тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг эцэслэн баталж, эцэслэн баталсан хуулиудын эцсийн найруулгыг сонссоноор хуралдаан өндөрлөлөө хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.

Орон нутгаас Улаанбаатар луу шилжих хөдөлгөөнийг 2027 он хүртэл зогсоох саналаа буцаан татжээ

Орон нутгаас Улаанбаатар рүү шилжих иргэдийн шилжилт хөдөлгөөнийг 2027 он хүртэл зогсоох саналыг хотын дарга гаргаад байв.

Уг асуудлыг Нийслэлийн Иргэдийн Төлөөлөгчдийн Хурлаар хэлэлцсэн бөгөөд санаачлагч талаас уг саналаа буцаан татсан тухай эх сурвалж мэдээллээ. Ташрамд дурдахад, нийслэлд ирэх шилжилт хөдөлгөөнийг ийм удаан хугацаанд зогсоох санал анх удаа гарсан ч дэмжигдсэнгүй.

Өмнө нь 2017 онд хүн амын хэт өсөлтөөс хамаарч иргэдийн эрүүл, аюулгүй орчинд амьдрах эрх зөрчигдөн, орчны болон агаарын бохирдол, замын хөдөлгөөний түгжрэл нэмэгдэж байгаагаас үүдэн эрүүл мэндийн тусламж, үйлчилгээ авах зайлшгүй шаардлагатай болон албан томилолтоор нийслэлд зургаан сараас дээш хугацаагаар ажиллах төрийн албан хаагч, түүний гэр бүл, Улаанбаатар хотод орон сууц худалдан авснаас бусад тохиолдолд хөдөө орон нутгаас нийслэлд ирэх шилжилт хөдөлгөөнийг 2020 оны нэгдүгээр сарын 1-нийг хүртэл буюу гурван жилийн хугацаанд зогсоох шийдвэрийг Засгийн газар гаргаж байв

НДШ-ийн 50 хувийн буцаан олголт иргэдийн данс руу оржээ

Засгийн газраас баталсан журмын дагуу нэг сая ба түүнээс доош төгрөгийн цалинтай иргэдийн НДШ-ийн шимтгэлийн 50 хувийг энэ оны 5-12 дугаар сарын хооронд сар бүр буцаан олгохоор болсон.

Энэ талаар Хөдөлмөр, Нийгмийн Хамгааллын сайд А.Ариунзаяа "Нийгмийн Даатгалын Шимтгэлийн 50 хувийн буцаан олголт газрын тос болон уул уурхайн салбарт ажилладаг иргэдэд хамаарахгүй бөгөөд эдгээрээс бусад салбарын ажилтнуудад хамаарна. Өөрөөр хэлбэл иргэн өөрийн төлдөг 9.5 хувийн шимтгэлийн 50%-ийг он дуустал буцаан авна. Хувиараа НДШ төлөгч нарт мөн адил буцаан олголт өгнө. Энэ нь түр зуурын арга хэмжээ. Харин Эрүүл Мэндийн Даатгалын шимтгэлд өөрчлөлт ороогүй” гэж хэлж байсан юм.

Чингис хаан онгоцны буудал руу явах автобусны үнэ цагийн хуваарьт өөрчлөлт орлоо

Хөшигийн хөндий дэх “Чингис хаан” олон улсын нисэх онгоцны буудлыг зорих иргэдэд нийтийн тээврийн үйлчилгээг хүргэх зорилгоор зургадугаар сарын 24-нөөс автобус үйлчилгээнд явж эхэлсэн.

Тодруулбал, “Чингис хаан” олон улсын нисэх онгоцны буудал-Драгон авто вокзал-5 шар”, “Чингис хаан” олон улсын нисэх онгоцны буудал-Улсын их дэлгүүр-120 мянгат” гэсэн чиглэлд үйлчилж эхлээд байна. Эдгээр чиглэлийн цагийн хуваарь болоод үйлчилгээний үнэд өөрчлөлт орлоо.

Үйлчилгээний цагийн хуваарийг нислэгийн цагийн хуваарьтай уялдуулан боловсруулсан бөгөөд нэг талдаа 80-100 минут зарцуулна гэж тооцоолж зорчилтоо төлөвлөн үйлчлүүлэхийг Нийслэлийн Нийтийн тээврийн газраас анхаарууллаа.

Үйлчилгээний үнэ тариф:

Том хүн 10.000 төгрөг
Хүүхэд 5.000 төгрөг

Жэжүгээс саатуулагдсан Монголыг иргэнийг албадан гаргана

Жэжү арал руу дөрвөн шөнө, таван өдрийн аяллаар явсан 150 монгол иргэний 23 нь сураггүй болсон талаар БНСУ-ын хэвлэл мэдээллийн хэрэгслүүд мэдээлсэн

Тэгвэл холбоогүй болсон 23 иргэний нэг нь Жэжү усан боомтоос Мугпу руу зорчих гэж байгаад саатуулагджээ. Тухайн үед тэрээр биеийн байцаалт, ямар нэгэн бичиг баримтгүй байжээ.Түүнд туслахаар оролдсон монгол танил нь мөн баригдсан байна. Өмнөд Солонгосын талаас хоёр монгол иргэнийг БНСУ-ын хилээр албадан гаргах шийдвэр гаргажээ.

Өмнөд Солонгосын хэвлэлүүдийн мэдээлж байгаагаар Жэжүд эрүүл мэндийн аялалд ирсэн 150 монгол жуулчны 23 нь энэ сарын 26-ны өдөр байрнаасаа гарч яван, холбоо барилгүй алга болсон гэх мэдээлэл бий.

Холбоо тасарсан гэх Монголын бусад 22 иргэн ирэх долоодугаар сарын 21-нийг хүртэл БНСУ-д жуулчны хэвийн статусаа хадгалах боломжтой бөгөөд долоодугаар сарын 9, 14-нд Монгол руу буцах захиалгат нислэгтэй тул БНСУ-ын тал одоогоор эдгээр хүмүүсийг "харласан" буюу хууль бус үйлдэл гаргасан гэж дүгнэхэд эрт байгаа талаар мэдэгдээд байна.

Харин Долоодугаар сарын 21-нээс хэтэрвэл хууль бусаар оршин суугч болж хувирах монгол иргэдийн талаарх мэдээлэл БНСУ-ын хэвлэлүүдээр гарсаар байна.

Байшин барихаар суурь ухаж байсан хоёр иргэн барилгын материалд даруулж амиа алдлаа

Нийслэлийн Баянгол Дүүргийн 11 дүгээр хорооны "Хувьсгалчид"-ын 2 дугаар гудамжинд байшин барихаар суурийн нүх ухаж байсан 2 хүн барилгын материалд даруулж нас барсан харамсалтай хэрэг гарчээ.

Тодруулбал, иргэн Ө-ийн 2 давхар байшингийн суурийг цутгаж байсан Архангай аймгийн Хотонт сумын харьяат иргэн Д /24 настай, эрэгтэй/, Хөвсгөл аймгийн Тосонцэнгэл сумын харьяат иргэн Э /18 настай, эрэгтэй/ нар барилгийн суурийн 1 метрийн гүнтэй нүхний ирмэг дээрх суурийн блокод даруулж нас барсан байна.

Тус хэргийг дүүргийн ЦЕГ хянан шалгалтыг ажиллагаа үргэлжилж байна.

Долоон аймагт 66 удаа орон байрны хулгай хийсэн этгээдийг баривчиллаа

Эрүүгийн цагдаагийн албаны Хулгайлах гэмт хэрэгтэй тэмцэх хэлтсийн алба хаагчид Завхан аймаг дахь цагдаагийн газрын Эрүүгийн цагдаагийн тасгийн алба хаагчидтай хамтран энэ оны 2 дугаар сараас 6 дугаар сарын 15-ны өдрийг хүртэлх хугацаанд 66 удаагийн үйлдлээр хулгайлах гэмт хэрэг үйлдсэн 23 настай, эрэгтэй “Д” гэгчийг илрүүлэн Баянзүрх дүүргийн нутаг дэвсгэрээс баривчилж мөрдөн шалгах ажиллагаа явуулж байна.

Уг этгээд Архангай аймгийн нутаг дэвсгэрт 10, Баянхонгор аймгийн нутаг дэвсгэрт 8, Дархан-Уул аймгийн нутаг дэвсгэрт 22, Дундговь аймгийн нутаг дэвсгэрт 5, Сэлэнгэ аймгийн нутаг дэвсгэрт 5, Өвөрхангай аймгийн нутаг дэвсгэрт 13, Завхан аймгийн нутаг дэвсгэрт 3 нийт 66 удаагийн үйлдлээр бусдын орон байранд хууль бусаар нэвтэрч алт, мөнгөн эдлэл, зөөврийн компьютер, гар утас зэрэг овор багатай эд зүйл хулгайлж Улаанбаатар хотод “Нарантуул” зах болон “Урт цагаан” худалдааны төв, Дархан-Уул аймгийн ченжүүдэд худалдан борлуулсан нь мөрдөн шалгах ажиллагаагаар тогтоогдоод байна.

Иймд дээрх аймгууд болон ойролцоох орон нутагт нь энэ төрлийн гэмт хэргийн улмаас хохирсон, цагдаагийн байгууллагад мэдээлээгүй иргэд Эрүүгийн цагдаагийн албанд мэдээлэл хүргүүлэх шаардлагатай байгааг Эрүүгийн цагдаагийн албанаас мэдээллээ. Мөн өөрийн орон байр, албан байгууллага болон хувийн өмчдөө найдвартай хаалга цоож, цонхны хаалт хийх, хөршийн хяналтын холбоогоо сайжруулж хулгайлах гэмт хэргээс урьдчилан сэргийлэхийг цагдаагийн байгууллагаас анхаарууллаа.

BOLOD.MN ДОЛОО ХОНОГИЙН ТОЙМ: Үндэсни ИХ БАЯР НААДМЫН төслийг баталж, НДШ-ийн 50 хувийн буцаан олголт иргэдийн дансанд орж эхэллээ
Tweet
Bolod.mn