2022-07-09Bolod.mn сайт долоо хоног болгоны ням гараг бүрт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд тэгш ойн баяр наадмын тухай хууль шинэчлэгдэн батлагдлаа. Түүнчлэн хурдан морины уралдаан, бөхийн барилдаан, сур, шагайн харвааны дүрмийг тус тус баталлаа. Эдгээр болон бусад мэдээ мэдээллийн онцлох үйл явдлуудыг BOLOD-ийн долоо хоногийн тоймоос хүлээн аваарай.
2023-2024 оныг Монголд зочлох жил болгосныг албан ёсоор зарлалаа
Засгийн газраас 2023-2024 оныг Монголд зочлох жил болгон зарлах тухай Засгийн газрын тогтоол өнөөдөр батлагджээ. Мөн Ойн агентлаг байгуулах тухай Засгийн газрын тогтоолыг батлав.
Энэ талаар Байгаль Орчин, Аялал Жуулчлалын сайдын мэдээлснээр "Ойн тухай хуульд нэмэлт өөрчлөлт оруулах тухай хууль"-ийн төсөл УИХ-ын нэгдсэн чуулганаар 2022.06.03-ны өдөр батлагдаж, ойн асуудал хариуцсан төрийн захиргааны байгууллагын чиг үүргийг хуулиар тогтоосон. Ийнхүү “Ойн агентлаг” байгуулагдах ажил хуулийн дагуу явагдаж өнөөдөр Монгол Улсын Засгийн газраас "Ойн агентлаг" байгуулах тогтоол гаргалаа.
Ингэснээр сүүлийн зургаан сар гаруй саатаад байсан Ойн агентлагтай холбоотой төсвүүд хөдөлж эхэлнэ. Мөн Ойн судалгаа, хөгжлийн төвийн 12 албан хаагч өнгөрсөн зургаан сарын хугацаанд төсвийн эрх нээгдээгүй байсантай холбогдуулж цалингүй ажилласан. Энэ хүмүүсийн цалин олгогдох юм.
Ийнхүү Засгийн газрын хуралдаанаар 2023-2024 оныг Монголд зочлох жил болгон албан ёсоор зарлаж байгаа юм.
Газрын багц хуулийн төслийн хэлэлцүүлгийг хойшлууллаа
УИХ-ын Байгаль орчин, хүнс, хөдөө аж ахуйн байнгын хорооны хуралдаанаар Засгийн газраас зургаадугаар сарын 17-нд өргөн мэдүүлсэн Газрын ерөнхий хуулийн шинэчилсэн найруулгын төсөл,
Кадастрын тухай хуулийн шинэчилсэн найруулгын төсөл, Монгол Улсын иргэнд газар өмчлүүлэх тухай хуулийн шинэчилсэн найруулгын төсөл, Нийгмийн зайлшгүй хэрэгцээг үндэслэн газар чөлөөлөх тухай хуулийн төсөл, Газрын төлбөрийн тухай хуулийн шинэчилсэн найруулгын төслийн хэлэлцэх эсэхийн хэлэлцүүлэг зэрэг таван асуудал хэлэлцэхээр төлөвлөөд байлаа. Гэвч УИХ-ын гишүүд эдгээр төслийн хэлэлцүүлгийг хойшлуулах нь зүйтэй гэж үзсэн юм.
Тэд " УИХ-ын 2022 оны хаврын ээлжит чуулган хаах гэж байгаа энэ үед улс орны оршихуйн чухал асуудал болсон газрын багц хуулийн төслүүдийг хэлэлцэх нь зохимжгүй. Хуулийн төслүүд болон холбогдох мэдээллүүдтэй бүрэн танилцахад тодорхой хугацаа шаардлагатай. Зуслангийн өмчлөлийн газраас эхлээд бэлчээр, төвлөрсөн суурьшил зэрэг бүхий л газрын харилцааг зохицуулах газрын багц хуулийн төсөлд УИХ маш нухацтай, ажил хэрэгч хандах шаардлагатай. Тиймээс D-PARLIAMENT дээр байршуулсан төслүүдийнхээ талаар иргэдийн саналыг сайтар авч, ирэх намрын чуулганаар нухацтай хэлэлцэх нь зүйтэй" гэлээ. Улмаар хэлэлцүүлгийг хойшлуулах санал хураалт явуулахад хуралдаанд оролцсон гишүүдийн 62.5 хувь нь дэмжив.
Улсын наадамд гадаадын 25 бөх зодоглоно
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадам эхлэхэд хэдхэн хоног үлдлээ.
Баяр наадмыг зохион байгуулах хорооноос энэ сарын 4-ны өдөр мэдээлэл хийлээ. Тэгш ойн баяр наадамд гадаадын бөхчүүд барилдах талаар мэдээлэл гарсан. Уг мэдээлэлтэй холбогдуулан Тува бөхчүүд өнгөрсөн сарын эхээс бэлтгэлдээ гарсан талаар мэдээлэл байгаа юм. Бөхийн салбар хорооны тэргүүн, Хууль зүй, дотоод хэргийн яамны Төрийн нарийн бичгийн дарга П.Сайнзориг энэ талаар тодруулга өгөхдөө “Энэ жил Баяр наадмын хуулиа шинэчлэн баталсан байгаа. Энэ жилдээ төрийн байгууллагууд наадмын зохион байгуулалтад оролцоно. Цаашдаа спортын мэргэжлийн байгууллагуудад нь өгөх болно. Үндэсний бөхийн барилдаанд оролцох хүсэлтээ гадаадын 25 бөх илэрхийлсэн. Бүгд монгол туургатан, өөр өөрийн үндэсний бөхтэй улсууд байгаа. Тувагаас 15, Халимаг 4, Буриад 4, Өвөр монголын 2 бөх байна. Баяр наадмаар ялгаварлан гадуурхах явдал байх учиргүй тул хүсэлтийг нь хүлээн авч, барилдуулахаар шийдсэн” гэж ярилаа.
Долоон настай охинд ээжийнх нь элгийг шилжүүлэн суулгажээ
ЭХЭМҮТ-ийн Ерөнхий мэс заслын тасаг болон УНТЭ-ийн дэргэдэх мэс засалч О.Сэргэлэн ахлагчтай Элэг шилжүүлэн суулгах үндэсний багийнхан хамтран хүүхдэд элэг шилжүүлэн суулгах хагалгааг Эх нялхаст анх удаагаа маш амжилттай хийжээ. Ингэснээр цаашид ЭХЭМҮТ элэг шилжүүлэн суулгах мэс заслыг эмнэлэг дээрээ хийх боломжтой болж байгаа юм.
Монгол Улсын хүн амын 10 хувь нь элэгний хатууралтай гэх эмнэлзүйн судалгаа бий. Тэр дундаа сүүлийн жилүүдэд хүүхдүүд элэгний хатуурал, элэгний цусны замын битүүрэл, төрөлхийн гажиг өвчнөөр оношлогдох болсон байна. Харин хүүхдүүдийн дунд тохиолдоод буй тус өвний хамгийн төгс эмчилгээ нь элэг шилжүүлэн суулгах мэс засал байдаг ажээ.
ЭХЭМҮТ-д элэгний цироз оноштой 83 хүүхэд байдгаас 9 хүүхдэд нь зайлшгүй элэг шилжүүлэн суулгах шаардлагатай гэнэ. Тэдний нэг нь болох 7 настай охинд ээжийнх нь элэгийг шилжүүлэн суулгажээ. Үүнээс өмнө нь буюу 2014 оноос хойш УНТЭ-т зургаан хүүхэд элэг шилжүүлэн суулгах мэс засалд орж, одоо ЭХЭМҮТ-ийн хяналтад байгаа ажээ. УНТЭ-т хийсэн тус хагалгааг анх 1.1 настай хүүхдэд хийж байсан байна. Өдгөө тухайн хүүхэд 8 нас хүрээд байгаа гэнэ.
Нийтийн тээврийн автобус дахин шатлаа
Энэ сарын 4-ны 16 цагийн орчим Сүхбаатар дүүргийн IX хороо, Дөлгөөн нуурын уулзвар дээр "Эмсид" ХХК-ийн "Улиастай-Дэнжийн 1000" чиглэлийн зорчигч тээвэрлэж явсан автобус шатлаа.
Тухайн тээврийн хэрэгслийн хувьд 2009 онд үйлдвэрлэгдсэн, ашиглалтын 12 жилийн хугацаа нь дууссан байжээ. Нийтийн тээврийн автобус шатсан тохиолдол ганц энэ биш. Он гарсаар "Эрдэм транс", "Тэнүүн-огоо", "Эмсид" компанийн автобуснууд шатаад байна. Үүнээс харахад, нийтийн тээврийн салбарт яаралтай парк шинэчлэлт хийх шаардлагатайг харуулж байна.
“The Hu” хамтлагийн дурсгалын зоос худалдаанд гарчээ
Монголбанкны Эрдэнэсийн сангаас Монгол Улсын болон олон улсын ач холбогдол бүхий тэмдэглэлт ой зэрэг онцгой чухал үйл явдлыг тохиолдуулан алт, мөнгө, зэс дурсгалын зоос эрхлэн гаргадаг.
Энэ хүрээнд урлаг, спортын алдартнууд цувралын үргэлжлэл болгон “THE HU” 3 төрлийн дурсгалын мөнгөн зоос эрхлэн гаргаад байна. Тус 3 төрлийн дурсгалын зоосыг сүүлийн үеийн smartminting технологиор урлаж, хэсэгчлэн алтаар бүрснээрээ онцлогтой. Хамтлагийн гишүүдийн зураг бүхий дурсгалын зоос нь 3 унцын жинтэй 65 мм диаметртэй, Хүннү гүрэн болон хамтлагийн логотой дурсгалын зоос нь 2 унцын жинтэй 50 мм диаметртэй болно.
“Чингис хаан” одонт “The Hu” хамтлаг нь Монгол Улсын нэр хүнд, үндэсний урлагийн гайхамшгийг дэлхий дахинаа сурталчлан таниулж, хүн төрөлхтний урлаг соёлын санд нэгэн онцгой дүр төрхийг бий болгосон бөгөөд уламжлалт хөгжмийн зэмсгүүд болох морин хуур, товшуур, цуур, лимбэ, төмөр хуур, хөөмий хархираа зэргийг рок урсгалтай хослуулан дэлхийд Монгол онцлог бүхий “Хүннү” рок гэх урсгалыг бий болгоод байна.
Дархан аварга Г.Өсөхбаяр, А.Сүхбат, аварга О.Балжинням, Арслан Э.Оюунболд нар наадмаар зодоглоно
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмаар хүчит 1,024 бөх барилдана.
Баяр наадамд барилдахаар урьдчилсан бүртгэлээр нэр ирүүлсэн болон барилдах боломжтой бөхчүүдийн эрэмбийг Монголын Үндэсний Бөхийн Холбоо баталжээ. “Үндэсний их баяр наадмын тухай” хууль болон Монгол улсын Засгийн газрын 2022 оны зургаадугаар сарын 29-ний өдрийн хуралдаанаар баталсан “Үндэсний их баяр наадмын үндэсний бөхийн барилдаан дүрэм”-д заасны дагуу эрэмбэлсэн байна.
Энэ жилийн наадамд барилдах боломжтой улсын цолтой бөхчүүд:
1. Дархан аварга Г.Өсөхбаяр
2. Дархан аварга А.Сүхбат
3. Даян аварга Н.Батсуурь
4. Улсын аварга О.Балжинням
5. Улсын аварга П.Бүрэнтөгс
6. Улсын аварга Г.Эрхэмбаяр
7. Улсын аварга Ч.Санжаадамба
8. Улсын аварга С.Мөнхбат
9. Улсын арслан Д.Мөнх-Эрдэнэ
10. Улсын арслан Ц.Содномдорж
11. Улсын арслан Д.Ганхуяг
12. Улсын арслан Б.Ганбат
13. Улсын арслан Х.Мөнхбаатар
14. Улсын арслан Э.Оюунболд
15. Улсын арслан Д.Азжаргал
16. Улсын арслан Р.Пүрэвдагва гэх мэт цолоороо эрэмбэлэгджээ.
Ерөнхийлөгчийн зарлигаар Төрийн одон, медаль гардууллаа
Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойг тохиолдуулан
Монгол Улсын Ерөнхийлөгч Ухнаагийн Хүрэлсүх зарлиг гарган нэр бүхий хүмүүсийг төрийн дээд цол, одон, медалиар шагналаа.
Ийнхүү эрхэлсэн ажилдаа олон жил үр бүтээлтэй ажилласан аж үйлдвэр, эрүүл мэнд, хөдөө аж ахуй, барилга, боловсрол, соёл урлаг, нийгэм, үйлчилгээний салбарын нэр бүхий хүмүүст ч мөн адил одон медаль гардууллаа.
.png "Томруулж харах")
