BOLOD.MN сайт долоо хоног бүрийн ням гарагт улс төр, эдийн засаг, нийгмийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд иргэдийн хамгийн их анхаарлын төвд байсан төмс болон хүнсний ногооны үнэ буулаа. Учир нь шинэ ургацын ногоо нийлүүлэлтэд гарсан бөгөөд одоо байгаа үнээсээ дахин хямдрах төлөвтэй байгааг мэргэжлийн байгууллагаас онцолсон. Түүнчлэн 5-11 насны хүүхдийн ковидын эсрэг дархлаажуулалт эхэлсэн. Дархлаажуулалтыг зөвхөн эцэг эх, асран хамгаалагчын зөвшөөрөлтэйгөөр хийх бөгөөд одоогоор дархлаажуулалтад хамрагдах хүүхдийн тоо бага байна хэмээн мэргэжлийн байгууллагаас мэдээллээ.

5-11 насныханд коронавирусийн эсрэг дархлаажуулалт хийж эхэллээ

Наймдугаар сарын 1-ний өдрөөс эхлэн 5-11 насны хүүхдэд коронавирусийн эсрэг вакцинаар дархлаажуулах ажил эхэлж байна.

Дархлаажуулалтыг эцэг эх, асран хамгаалагчдынх нь зөвшөөрлөөр, зөвшөөрлийн хуудас бөглөсөн тохиолдолд хүүхдэд хийнэ хэмээн ЭМЯ-наас мэдээлсэн. 5-11 настай хүүхдүүдэд зориулж АНУ-аас хандивласан 300 мянган тун Pfizer вакциныг ХӨСҮТ-ийн вакцин биобэлдмэлийн агуулахын гүн хөлдөөгчид хадгалж буй юм. Түүнчлэн дархлаажуулалтын вакциныг хийлгээгүй сурагчдыг хичээлд хамруулахгүй гэх мэдээлэл нь худал болохыг холбогдох байгууллагаас мэдээлсэн бөгөөд вакциныг зөвхөн эцэг эхийн 100 хувийн зөвшөөрөлтэйгөөр хийлгэхийн онцолж байв.

Хүннү Моллоос Шинэ өргөө хороолол хүртэлх замын хөдөлгөөнийг түр хугацаанд өөрчилнө

Хан-Уул дүүргийн Засаг даргын Тамгын газрын захиалгаар Наадамчдын гудамж дахь Яармагийн авто замд явган хүний нүхэн гарц байгуулах гэж буй юм.

Уг ажлын хүрээнд “Хүннү молл”-ын баруун урд талын уулзвараас “Шинэ өргөө” хороолол хүртэлх 200 метр замын хөдөлгөөний зохион байгуулалтад түр хугацаанд өөрчлөлт оруулах болсон.

Тодруулбал,

Наймдугаар сарын 1-11-ний хооронд зүүнээс баруун чиглэлийн,

Наймдугаар сарын 11-22-ны хооронд баруунаас зүүн тийш чиглэсэн хөдөлгөөний зохион байгуулалтад тус тус өөрчлөлт оруулах юм.

Иймд иргэд жолооч та бүхэн дээрх хугацаанд замын тэмдэг тэмдэглэгээний дагуу хөдөлгөөнд оролцохыг анхааруулж байна.

017-р ангийн дэд ахлагч тогонд цохиулж нас баржээ

Наймдугаар сарын 1-ны оройн 21 цагийн үед Зэвсэгт хүчний 065-р ангийн байлдагч 22 настай "З" тогонд цохиулж нас баржээ гэх мэдээлэл хэвлэл мэдээллийн хэрэгслээр цацагдсан билээ.

Бид энэ мэдээлэлтэй холбогдуулж Зэвсэгт Хүчний Жанжин Штаб аас тодруулахад: 065 дугаар ангийн байлдагч нас барсан гэдэг ташаа мэдээлэл. Харин 017 дугаар ангийн дэд ахлагч аюулгүйн ажиллаагааны заавирчилгааг мөрдөн ажиллаагүйн улмаас нас барсан байна. Тодруулбал, Зэвсэгт хүчний барилга инженерийн цэргийн удирдах газрын шинээр баригдаж байгаа барилга дээр ажиллаж байсан 017 дугаар ангийн дэд ахлагч "З" ослын шалтгаанаар нас барсан харамсалтай хэрэг гарлаа. Дэд ахлагч "З" Цэргийн төв эмнэлэгт очоод нас барсан байна. Удирдлагууд ажилд гарахын өмнө хөдөлмөрийн аюулгүй ажиллагааны зааварчилгааг тогтмол өгч байсан" гэлээ.

Төмсний үнэ ойрын хугацаанд дахин хямдарна гэв

Өнгөрсөн долоо хоногийн эхний өдрийн байдлаар монгол төмс "Барс" худалдааны зах дээр бөөний үнэ кг нь 1125₮, жижиглэн кг нь 1500₮, "Хүчит шонхор" зах дээр кг нь 2000₮, "Сансар" сүлжээ дэлгүүрт кг нь 2930₮, " Миний зах" кг нь 2500₮, "ИМарт"-д кг нь 1580₮, "Номин"-д кг нь 2499₮, "Бөмбөгөр" худалдааны төвд кг нь 2500-р тус тус худалдаалагдаж байна.

Эрэлт, нийлүүлэлтийн хуулиар ойрын хугацаанд дахин хямдрах төлөвтэй байна хэмээн холбогдох газраас мэдээлсэн. Ирэх жил зоорины төмс дуусч шинэ ургацын төмс гарах хүртэлх хугацаанд дахин хомсдол үүсгэхгүй байх бодлогын арга хэмжээг авч хэрэгжүүлэх шаардлагатай байгаа талаарх хэрэгжүүлэх арга хэмжээний зөвлөмжийг ХХААЯ-нд хүргүүлэхээр ШӨХТГ-с бэлтгэж байна.

Сургууль цэцэрлэгийн элсэлт, бүртгэлтэй холбоотой авлигын талаарх гомдол, мэдээллийг 110 дугаарын утсаар өгнө үү

Засгийн газрын 2022 оны наймдугаар сарын 3-ны өдрийн ээлжит хуралдаанаар боловсролын салбар дахь авлигатай тэмцэх, түүнийг таслан зогсоох үүрэг бүхий ажлын хэсгийг байгуулахаар шийдвэрлэсэн билээ.

Авлигатай тэмцэх газар боловсролын салбар дахь авлигын шалтгаан, нөхцөлийг арилгах чиглэлээр 2019 оноос иргэдийн өргөдөл, гомдол, мэдээллийн мөрөөр нийслэлийн төрийн өмчийн зарим ерөнхий боловсролын сургууль, цэцэрлэгийн үйл ажиллагаанд хяналт тавьж ажиллан, улмаар Боловсрол, соёл, шинжлэх ухааны сайдад сургууль, цэцэрлэгийн элсэлт, бүртгэлийг журамлах тухай Зөвлөмж хүргүүлэх зэргээр нөлөөллийн арга хэмжээ авсаар ирсэн.

Сургууль, цэцэрлэгийн удирдлагууд аливаа дарамт шахалт, зохимжгүй нөлөөллөөс сэргийлж Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 9 дүгээр зүйлийг мөрдөж ажиллах, нөгөө талаас албан тушаалтны дээр дурдсан үйлдэл нь Авлигын эсрэг хуулийн 7 дугаар зүйлийн 7.1.1, 7.1.6-д заасны дагуу шууд хориглох зөрчилд тооцогдон хариуцлага хүлээхээс гадна Эрүүгийн хуулийн тусгай ангийн 22 дугаар бүлэгт заасан үйлдэл, эс үйлдэхүйн нөхцөл шинжийг хангаж болзошгүй байгааг уг Зөвлөмжөөр анхааруулж байсан билээ.

Засгийн газраас боловсролын салбар дахь авлигатай тэмцэх, түүнийг таслан зогсоох, түүнд хяналт тавих ажлын хэсгийг байгуулж, үүнтэй холбоотой гомдол, мэдээллийг 11-11 төвд өргөтгөсөн байдлаар хүлээн авахаар шийдвэрлэсэн бөгөөд уг ажлын хэсгийн бүрэлдэхүүнд Авлигатай тэмцэх газрын төлөөлөл орж ажиллах юм.

2022-2023 оны хичээлийн жил эхлэх гэж байгаатай холбогдуулан сургуулийн захирал, цэцэрлэгийн эрхлэгч нар хамран сургах тойргийн бус харьяаллын хүүхдүүдийг хувийн ашиг сонирхлын үндсэн дээр элсүүлэн авдаг явдлыг таслан зогсоох, цэцэрлэгийн хүртээмжийг адил, тэгш түвшинд хүргэх шаардлагатай.

Сургуулийн захирал, цэцэрлэгийн эрхлэгч нар авлигатай тэмцэх Засгийн газрын үндсэн чиг үүргийг хэрэгжүүлж ажиллах үүрэгтэй албан тушаалтнууд. Доод, дунд шатанд байгаа авлигыг таслан зогсоох цаг тулж ирсэн талаар Хууль зүй, дотоод хэргийн сайд Х.Нямбаатар сэтгүүлчдэд мэдээлсэн.

Авлигатай тэмцэх газрын гомдол, мэдээлэл хүлээн авах 110 тусгай дугаарын утсаар сургууль, цэцэрлэгийн элсэлт, бүртгэлтэй холбоотой авлигын асуудлаар гомдол, мэдээллээ ирүүлэхийг иргэдэд уриалж байна хэмээн Авлигатай Тэмцэх Газраас мэдэгдлээ.

“Төрөөд сар болж байгаа хүүг өргүүлнэ” гэх зарыг цагдаагийн байгууллагаас шалгаж байна

“Төрөөд сар болж байгаа хүүг өргүүлнэ. Авах хүн байвал аваарай. Тэжээж өсгөхөд бэрх байна” гэсэн зар фэйсбүүк дэх зарын групп хуудсанд тавигдсан.

Уг мэдээллийн мөрөөр цагдаагийн байгууллага бусад холбогдох байгууллагуудтай хамтран шалгалтын ажиллагааг эхлүүлсэн талаар албаны эх сурвалж хэллээ. Мөн Гэр бүл, хүүхэд, залуучуудын хөгжлийн газраас тухайн хэрэг дээр ажиллаж эхэлсэн байна.

Н.Түвшинбаяр 16 жилийнхээ хорих ялыг хүлээн зөвшөөрчээ

Хөдөлмөрийн баатар, Олимпын аварга Н.Түвшинбаярт холбогдох хэргийн шүүх хурал сар гаруйн өмнө /2022.06.09/ Хан-Уул дүүргийн Эрүүгийн хэргийн анхан шатны шүүхэд болж, шүүх бүрэлдэхүүн шийдвэрээ гаргасан.

Тодруулбал, шүүх бүрэлдэхүүн шүүгдэгч Н.Түвшинбаярыг гэм буруутайд тооцож, 16 жилийн хорих ял оноосон юм. Ингэхдээ түүний давж заалдах эрхийг нээлттэй орхисон билээ. Тэгвэл Н.Түвшинбаяр давж заалдалгүй, ялаа эдлэхийг хүлээн зөвшөөрсөн талаар эх сурвалж мэдээллээ.

Тэрбээр 16 жилийн хорих ялаа нээлттэй хорих ангид эдлэх юм. Дашрамд дурдхад, өнгөрсөн хугацаанд хохирогч Э.Энхбат агсны ар гэрт олгосон нөхөн төлбөр болох 2.7 тэрбум төгрөгийг тооцож, шүүгдэгч Н.Түвшинбаярыг ямар нэгэн хэлбэрээр дахин нөхөн төлбөр өгөх шаардлагагүй гэж үзсэн билээ.

Харин хохирогчийн ар гэрийнхэн шүүгдэгч Н.Түвшинбаяраас нөхөн төлбөр авах шаардлагатай бол нотлох баримтаа цуглуулан, иргэний хэргийн шүүхэд нэхэмжлэл гаргах эрхтэй юм.

BOLOD ДОЛОО ХОНОГИЙН ТОЙМ: Хүүхдийн дархлаажуулалт эхэлж, төмс хүнсний ногооны үнэ буусан ДОЛОО ХОНОГ
Tweet
Bolod.mn