Bolod.mn сайт долоо хоног бүрийн ням гарагт улс төр, эдийн засаг нийгмийн хүрээнд болж буй үйл явдлуудыг тоймлон хүргэдэг уламжлалтай. Эдгээр өдрүүдэд 2022-2023 оны хичээлийн шинэ жил эхэллээ. Түүнчлэн энэ жилийн хувьд ихээхэн онцлог үйл явдал болж байгаа бөгөөд БСШУЯ-ны сайдын хэрэгжүүлж буй бүх хүүхдийг цэцэрлэгт хамруулах ажил идэвхтэй үргэлжилж байна. Өмнөх жилүүдэд олны дургүйцлийг ихээхэн хүргэж байсан сугалааны зарчмыг халж, цоожтой хаалганы цаана ганц ч хүүхэд үлдээхгүйгээр зохицуулж буй юм. Цэцэрлэгийн бүртгэлийг наймдугаар сарын 10-аас 25-ны хооронд эхлүүлсэн бол хоёрдахь удаагын бүртгэлийг 9-р сарын 10-аас болон 10-р сарын 1-н зэрэг гурван үе шаттайгаар үргэлжлэх юм. Эдгээр болон бусад мэдээ мэдээллийг BOLOD.MN сайтын ДОЛОО ХОНОГИЙН ТОЙМ-оос хүлээн авч үзнэ үү.

Монгол Улсын Засгийн газар 16 яамтай, 21 сайдтай ажиллана

Засгийн газрын "давхар дээлтэй" гишүүдийн тоог хязгаарлахгүй болсноор Засгийн газрын зарим гишүүнийг өнгөрсөн долоо хоногт шинээр томилсон. Монгол Улсын сайд, ЗГХЭГ-ын даргаар Д.Амарбаясгаланг, түүнчлэн шинэ хоёр яам болон Уул уурхай, Хүнд үйлдвэр, Эрчим хүчний сайдын албан тушаалд шинэ хүмүүс томиллоо. Тухайлбал: Эдийн засаг, хөгжлийн сайдаар УИХ-ын гишүүн Ч.Хүрэлбаатар, Цахим хөгжил, харилцаа холбооны сайдаар УИХ-ын гишүүн Н.Учрал, Эрчим хүчний сайдаар УИХ-ын гишүүн Б.Чойжилсүрэн, Уул уурхай, Хүнд үйлдвэрийн сайдаар УИХ-ын гишүүн Ж.Ганбаатар нарыг томилсон байна. Ардчилсан сонгууль явуулж эхэлснээс хойш Засгийн газрын бүрэн эрх хэрэгжүүлсэн дундаж хугацаа 1.8 жил байжээ. Өөрөөр хэлбэл Засгийн газар тогтворгүй байсныг судлаачид шүүмжилж ирсэн юм. Үүнийг залруулахаар 2019 онд "давхар дээл"-тэй гишүүдийн тоог дөрвөөр хязгаарлах заалт оруулж байв. Хэдий тийм боловч түүнээс хойш гурван жилийн дараа дахин өөрчлөлт оруулж, Засгийн газарт халаа сэлгээ хийгээд байна. Ийнхүү Монгол Улсын Засгийн газар 16 яам, 21 сайдтайгаа ажиллах болоод байгаа юм.

Хавдар судлалын үндэсний төв бүх ажилтандаа гурван сая төгрөгийн урамшуулал өгчээ

Эрүүл мэндийн сайдын 2018 оны А/295 дугаар тушаалаар жил бүрийн 8 дугаар сарыг “Эрүүл мэндийн ажилтны нийгмийн хамгааллыг дэмжих сар” болгон зарласан. Сарын хүрээнд Хавдар Судлалын Үндэсний Төв/ХСҮТ/ албан тушаал үл харгалзан бүх хүнд 3 сая төгрөгийн урамшуулал өгчээ. Энэ нь ажил үүргээ гүйцэтгэж буй бүх ажилтны нийгмийн баталгааг хангах, ажиллах урам зоригийг нэмэгдүүлсэн явдал бөгөөд иргэдэд чанартай, сайн тусламж үйлчилгээг үзүүлэхийн төлөө тогтмол цалинтай эмнэлгийн ажилтнуудыг идэвхжүүлэх, бүтээмжтэй, чанартай, үр дүнтэй хөдөлмөрлөснийхөө хэрээр үнэлэгддэг цалин урамшуулал авдаг тогтолцоог бий болгохын төлөө ХСҮТ хичээн ажиллаж байгааг мэдээлэв. Сувилагч, тусгай мэргэжилтэн нийт 198 ажилтанд эмнэлгийн нэмэгдэл үндсэн цалингийн 20%-ийг наймдугаар сарын 1-нээс олгожээ. Үүнээс гадна тус төвд хөдөлмөрийн гэрээгээр ажиллаж буй хөгжлийн бэрхшээлтэй ажилтан тус бүрд 670,900 төгрөгийн үнэ бүхий эрүүл мэндийг дэмжих багц бүтээгдэхүүнийг нэг удаа өгсөн гэв. ХСҮТ 530 гаруй эмч ажилтантай бөгөөд жилд дунджаар 100,000 орчим хүнд эмнэлгийн тусламж үйлчилгээ үзүүлдэг байна.

Хорих ангиас оргосон Б.Баянбаатарыг олж баривчилжээ

Сэлэнгэ аймгийн Мандал сум дахь ШШГХ-413 дугаар нээлттэй, хаалттай хорих ангид ял эдэлж байсан хоригдол Б.Баянбаатар нь 2022 оны 08 дугаар сарын 29-ний өдөр оргосон. Эрэн сурвалжлах ажиллагааг Шүүхийн шийдвэр гүйцэтгэх байгууллага Цагдаагийн байгууллагатай хамтран зохион байгуулж, хоригдол Б.Баянбаатарыг өнөөдөр 09 цагийн орчимд олж баривчилсан талаар Шүүхийн шийдвэр гүйцэтгэх ерөнхий газраас мэдээллээ.

Хуурамч дипломтай багш нарыг ирэх долоо хоногт зарлана

Хичээлийн шинэ жил эхэлж, Ерөнхий сайд Л.Оюун-Эрдэнэ, Боловсрол шинжлэх ухааны сайд нар Баянзүрх дүүргийн “Нарны үрс” цэцэрлэгтэй танилцсан. Энэ үеэр сугалаагаар цэцэрлэгт авдаг тогтолцоог халж, нэг ч хүүхдийг цэцэрлэгийн гадна үлдээхгүй байхаар ажиллаж байгааг албаныхан онцолсон. Мөн Боловсрол, шинжлэх ухааны сайд Л.Энх-Амгалан хуурамч дипломтой багш нарын асуудлыг ирэх долоо хоногт зарлахаар болсноо дуулгав. Тэрбээр “Нийт 35 мянган багш нарын дипломын шалгалтыг хийж дуусч байна. Ирэх долоо хоногт мэдээлэл хийж ЕБС-д ажиллаж буй хуурамч дипломтой багш нарыг зарлах гэж байгаа.
Хоёрдугаарт, их, дээд сургуульд багшилж буй эсвэл докторын зэрэг хамгаалахдаа бусдын бүтээлийг хуулбарлаж хийсэн хүмүүсийг “бусдын бүтээлийг хулгайлах” буюу плагиаризмын шалгалтад хамруулж, үнэхээр магистр, докторын диплом нь хуурамч байх юм бол орон даяар зарлах ажлыг эхлүүлж байна” гэсэн юм. Дашрамд дуулгахад, өнөөдрийн байдлаар улсын хэмжээнд 67 их, дээд сургууль үйл ажиллагаагаа явуулж байгаа аж.

Тэгш сондгойгоор хязгаарлах эсэхийг НИТХ шийднэ

Автомашины хөдөлгөөнийг наймдугаар сарын 27-ноос есдүгээр сарын 3-ны өдрийг хүртэл улсын дугаарын сүүлийн орны тэгш, сондгойгоор ангилж хөдөлгөөнд оролцуулах шийдвэрийг гаргасан. Энэхүү зохицуулалт өглөө 08:00-20:00 цаг хүртэл үйлчилж буй. Хязгаарлалтын үед хөдөлгөөний эрчим өмнөх жилээс 16 хувиар буурсан дүн гарч, энэ ажил үр дүнтэй үргэлжилж байна гэж өчигдөр мэдээлж байсан. Тэгвэл түгжрэлийн асуудлыг цэгцэртэл энэ шийдвэрийг хэрэгжүүлэхээр төлөвлөж байгаа талаар Хотын дарга Д.Сумъяабазар мэдэгдсэн. Уг асуудлыг энэ сарын 7-нд болох НИТХ-аар хэлэлцэх аж. Түүнчлэн хөдөө орон нутгийн иргэд хотын дугаар авч ачааллыг улам нэмэгдүүлдэг үйлдлийг зогсоохоор төлөвлөж байгаа юм.

1956 онд ашиглалтад орсон СЭЗИС-ын төв байрны хана нуржээ
Санхүү эдийн засгийн их сургуулийн төв байранд урсгал засвар хийж байх үед барилгын баруун талын хана нурсан үйл явдал болсон. Хичээлийн шинэ жил эхлэхийн өмнөх өдөр сургуулийн хуучин барилгад нуралт үүссэн тул тус сургуулиас мэдэгдэл гаргасан юм. Тус мэдэгдэлд хичээлийн төв байранд нуралт үүссэн ч сургалтын үйл ажиллагаа хэвийн явагдах болно гэдгийг мэдээлсэн байв. Тус нуралт үүссэн байр нь СЭЗИС-ийн 1956 онд ашиглалтад орсон А байр ба барилгын нүүрэн хэсэгт урсгал засвар, үйлчилгээ хийх үед нурсан байна. Нийслэл, дүүргийн Мэргэжлийн хяналтын газрын өгсөн зөвлөмжийн дагуу А байрны дотоод болон гадаад орчны аюулгүй байдлыг цаг алдалгүй хангаж, зорчих хөдөлгөөнийг хязгаарлажээ. Нуралтаас шалтгаалж хүний амь нас, эрүүл мэндэд хохирол учраагүй ба СЭЗИС нь багш, ажилтан, оюутан, зочдын аюулгүй байдлыг хангах үүргээ гүнээ ухамсарлаж, холбогдох мэргэжлийн байгууллагатай хамтран ажиллаж байгаа гэдгээ мөн онцолсон байна. Сургуулийн үйл ажиллагаа хичээлийн бусад байруудад товлосон хугацаандаа хэвийн явагдахыг СЭЗИС-ийн захиргаа цахим хуудастаа мэдээлжээ.

BOLOD ДОЛОО ХОНОГИЙН ТОЙМ: 2022-2023 оны хичээлийн шинэ жил эхэлж, шинээр томилогдсон сайдууд тангараг өргөлөө
Tweet
Bolod.mn