BOLOD.MN сайт долоо хоног бүр улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд эрүүл мэндийн байгууллагын зүгээс умайн хүзүүний хорт хавдраас урьдчилан сэргийлэх вакциныг товлолт вакцинд оруулах болсныг мэдээлэв. Түүнчлэн сошиал хуудаснаа хамгийн их хандалт өгөөд буй зүйл нь дуучин Ануд буу тулган айлган сүрдүүлсэн хэрэг байлаа. Тус хэргийн цагдаагийн байгууллагаас үргэлжлүүлэн шалгаж байгаа аж. Эдгээр болон бусад онцлон үйл явдлуудыг тоймлон хүргэж байна.

Дундговь аймагт 4.9 магнитудын хүчтэй газар хөдлөв

Дундговь аймгийн Өлзийт сумын төвөөс зүүн хойд зүгт 43 километрийн зайд 4.9 магнитудын хүчтэй газар хөдөллөө. Газар хөдлөлт 11.08 цагт болсныг ШУА-ийн Одон орон, геофизикийн хүрээлэн мэдээлэв. Ташрамд мэдээлэхэд, магнитуд гэдэг нь газар хөдлөлтийн төвд багажаар хэмжсэн үзүүлэлт бол, газрын хөрсөн дээр хүн болон барилга байгууламжид нөлөөлөх хүчийг баллаар хэмждэг. Газар хөдлөлтийн баллын хэмжээ 3-4 байвал хүнд мэдрэгдэх боломжтой, 6 баллаас хэтэрвэл барилга байгууламжид эвдрэл үүсэх магадлалтай, арваас хэтэрвэл барилга байгууламж нурах аюултай.

Допингийн эсрэг үндэсний дүрмийг баталлаа

Допингийн эсрэг үндэсний дүрмийг баталж, тус дүрмийг үйл ажиллагаандаа мөрдүүлж ажиллахыг спортын байгууллагуудад зөвлөлөө. Дүрэм батлагдсанаар үндэсний хэмжээнд тэмцээний болон тэмцээний бус үеийн допингийн хяналт явуулах, спортын байгууллагууд допингийн эсрэг хяналтын нэгдсэн дүрэм мөрдөж, үр дагаврыг тооцох, улмаар маргаан үүсэхгүй байх боломж бүрдэнэ. Мөн оролцогч талуудын чиг үүрэг, хэрэгжүүлэх ажил, салбар байгууллагын уялдааг хангах эрх зүйн орчин бүрдэнэ гэж үзэж байна.

Умайн хүзүүний хавдрын эсрэг вакциныг ирэх жилээс товлолт вакцин болно

ДЭМБ-ын 2021 оны тоо мэдээгээр 18 сая хүн хорт хавдраар өвчилж, 9,5 сая хүн хорт хавдрын улмаас нас барж байгаагаас умайн хүзүүний хорт хавдраар 569 847 эмэгтэй өвчилж, 311 365 эмэгтэй энджээ. Монгол улсад жилд дунджаар 300 орчим эмэгтэйчүүд умайн хүзүүний хавдраар нас бардаг ба тохиолдол болон нас баралтын тоогоор тэргүүлж байна. Тодруулбал хавдраар эндэж буй 12 эмэгтэй тутмын нэг нь умайн хүзүүний хавдраас шалтгаалдаг гэсэн харамсалтай тоон мэдээлэл бий. Умайн хүзүүний хорт хавдрын гол эрсдэлт хүчин зүйл нь хүний папиллома вирус (ХПВ) бөгөөд умайн хүзүүний хорт хавдар үүсгэх шалтгааны 99,7 хувийг эзэлдэг байна.

Умайн хүзүүний хорт хавдрыг хянах чиглэл, хүний папиллома вирус (ХПВ)-ийн эсрэг вакциныг нэвтрүүлэх ажил Монгол улсад 2011-2012 онуудад хийгдэж 10,000 гаруй иргэн хамрагдсан байдаг. Тухайн онд вакциныг тухайн иргэний нас хүйс, эрүүл мэндийн эрсдэлд суурилан 1-3 тунгаар хийсэн ба вакцин хоорондын зайг ДЭМБ-ын зөвлөмжийн дагуу 6-12 сар байхаар зохион байгуулж байсан. Гэвч уг вакцины талаар ойлголтгүйгээс болж муйхарлан эсэргүүцэгч хэсэг бүлэг хүмүүс олон нийтийн дунд хуурамч, нотолгоогүй мэдээлэл тарааснаас үүдэн иргэдийн вакцинжуулалт зогссон байдаг.

2019 онд Хавдрын үндэсний зөвлөлийн тэргүүн доктор Б.Цэцэгсайхан нарын судлаачид дээрх онуудад вакцин хийлгэсэн 10000 орчим иргэдэд дагах судалгааг хийж олон улсын томоохон сэтгүүлд хэвлүүлсэн бөгөөд судалгааны үр дүнгээр 75-аас дээш хувиар вирусын халдвараас хамгаалж буй нь нотлогдсон бол 2011 онд энэхүү вакцинжуулалтыг хийсэн Их Британи улс умайн хүзүүний хавдрыг 95 хувь бууруулж чадсанаа өнгөрсөн онд зарлаад байна.

Дэлхийн эрүүл мэндийн байгууллагаас (ДЭМБ)-ын Эрдэмтэдийн зөвлөлөөс 2022 оны 4-р сард зөвлөмж гарсан бөгөөд НЭГ тун хийлгэсэн ч дархлал тогтоц 96-аас дээш хувь байгаа тул НЭГ тунгаар хийх зөвлөмж гаргасан байна. Энэ вакцин нь дэлхий дахинд хамгийн үнэтэй вакцины тоонд ордог бөгөөд Монгол улс НҮБ-ын хүүхдийн сангийн дэмжлэгтэйгээр маш хөнгөлөлтэй үнээр 10,000 тун вакциныг авах боломжтой болсон зэрэг таатай мэдээ сүүлийн үед сонсогдох боллоо.

ХПВ-ийн эсрэг вакциныг дэлхийн 150 гаруй улс нэвтрүүлснээс 120 гаруй улс орон Дархлаажуулалтын үндэсний хөтөлбөрт тусган нэвтрүүлж эхэлсэн бол 2022 онд 13, 2023 онд 18 улс орон нэвтрүүлэхээр болжээ. Харин Эрүүл мэндийн яамнаас санаачлан Дархлаажуулалтын хуульд нэмэлт өөрчлөлт оруулах замаар 2023 оноос тус вакциныг товлолт вакцинд оруулахаар төлөвлөөд байгаа юм.

Сурагчийн дүрэмт хувцасны үнийг хэлцэн тогтоосон байж болзошгүй үйлдэлд зөрчлийн хэрэг нээжээ

Шударга өрсөлдөөн, хэрэглэгчийн төлөө газраас сурагчийн дүрэмт хувцасны үнийн өсөлттэй холбогдуулан хяналт, шалгалтыг хийж дуусгалаа. Шалгалтын явцад “Монголын оёдлын нэгдсэн холбоо” НҮТББ-ын гишүүн аж ахуй эрхлэгчид нь 2022-2023 оны хичээлийн жилд худалдаалагдах сурагчийн дүрэмт хувцасны үнийг тохирч, өрсөлдөөнийг хязгаарлахад чиглэсэн бараа бүтээгдэхүүний үнийг хэлцэн тогтоосон байж болзошгүй үйлдэл илэрсэн тул 2022 оны 8 дугаар сарын 25-ны өдөр зөрчлийн хэрэг нээж хэрэг бүртгэлтийн ажиллагааг 2022 оны 10 дугаар сарын 21-ний өдөр хийж дуусгалаа.

Зөрчлийн хэрэгт авагдсан нотлох баримтуудаар өрсөлдөөнийг хязгаарлахад чиглэсэн бараа бүтээгдэхүүний үнийг хэлцэн тогтоох гэрээ, хэлцэл (картель) байгуулж, Зөрчлийн тухай хуулийн тусгай ангийн 10.7 дугаар зүйлийн 1-ийн 1.1-г зөрчсөн үйлдэл тогтоогдсон тул “Шилмэл загвар” ХХК, “Өүлэн менч” ХХК, “Бүтээлч-Үйлс” ХК-иудыг тус бүр өмнөх жилийн борлуулалтын орлогын 3 хувьтай тэнцэх хэмжээний төгрөгийн торгох шийтгэл оногдууллаа.

Дорнодын эмч нар 6 настай хүүхдийн ходоодонд бөөгнөрсөн үсийг авах мэс засал хийжээ

Дорнод аймаг дахь Бүсийн оношилгоо, эмчилгээний төвийн мэс заслын тасгийнхан өнгөрсөн долоо хоногт зургаан настай хүүхдийн ходоодонд бөөгнөрсөн үсийг авах мэс засал хийсэн байна. Энэ хүүхэд нь үс иддэг зуршилтай бөгөөд хоёр наснаасаа хойш идсэн үс хороодонд нь их хэмжээгээр бөөгнөрснөөс хүүхэд бөөлжиж, ус залгихаас өөр зүйл идэж чадахгүй болсон үедээ аймгийн эмнэлэгт ханджээ. Мэс засал амжилттай болж, хүүхэд мэс заслын дараах эмчилгээ хийлгэж байна.

Дуучин Ч.Уранхолбоог айлган сүрдүүлж их хэмжээний мөнгө нэхжээ

Дуучин Ану буюу Ч.Уранхолбоог айлган сүрдүүлж, дээрэмдэхийг завдсан хэрэг гарчээ. иТодруулбал, ХУД дэх “Happy residens” хотхоны байрны гадаа Mersedes Benz G-class маркын автомашиндаа суух үед нь 20-30 орчим насны, үл таних эрэгтэй автомашинд нь дайрч суун, 80 сая төгрөг өгөхийг шаардан айлган сүрдүүлсэн байна. Хэргийн талаар хохирогч эмэгтэй өөрийн цахим хуудаснаа мэдээлсэн төдийгүй охид эмэгтэйчүүдийг онлайнаар өөрийн мэдээллээ нууцлах, байршлаа тавихгүй байхыг анхааруулсан. Албан бус мэдээллээр тухайн хэргийг үйлдсэн этгээд нь буу ашиглах зөвшөөрөлтэй буюу цэргийн ангийн ахлах байсан гэх мэдээлэл цацагдсан. Түүнчлэн тухайн этгээд нь мөрийтэй тоглоомонд олон сая төгрөг алдсан байсан гэсэн албан бус гэрчийн мэдүүлэг байгаа аж. Хэргийн тус дүүргийн цагдаагийн байгууллага шалгаж байгаа ба шалгалтын ажиллагаа үргэлжилж байгаа аж.

BOLOD ДОЛОО ХОНОГИЙН ТОЙМ: Буу ашиглах зөвшөөрөлтэй ахлах дэслэгч дуучин Ануг айлган сүрдүүлж их хэмжээний мөнгө нэхжээ
Tweet
Bolod.mn