Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд өрнөж буй онцлох үйл явдлуудыг тоймлон хүргэдэг уламжлалтай. Эдгээр өдрүүдэд Их Эзэн Чингис хааны мэндэлсэн өдөр тохиож, улс орон даяар амралтын өдөр болгон цохон тэмдэглэв. Түүнчлэн хөдөө орон нутаг болон Улаанбаатар хотын цаг уурын байдал эрс хүйтэрч, зарим нутгаар цасан шуурга шуурч 36-41 хэм хүртэл хүйтрэх хандлагатай байгааг ЦУОШГ-аар анхааруулсан. Улмаар цэцэрлэг болон ЕБСын үйл ажиллагаа ирэх даваа гараг буюу 28нд цахим хэлбэрээр орохыг Хотын захиргаа дэмжлээ. Эдгээр болон бусад онцлох үйл явдлуудыг Bolod.mn-ийн долоо хоногийн тоймоос хүлээн авч үзээрэй.

Монгол бахархалын өдөр тохиолоо

Өнгөрсөн долоо хоногийн пүрэв гарагт буюу арваннэгдүгээр сарын 24нд Их эзэн Чингис хааны мэндэлсэн билгийн тооллын өвлийн тэргүүн сарын шинийн нэгэн буюу Монгол бахархалын өдөр тохиолоо. Монгол Улсын Ерөнхийлөгчийн 2012 оны нэгдүгээр сарын 9ний өдрийн тоот зарлигаар богд Чингис мэндэлсэн огноог холбогдох ажлын хэсгийн дүгнэлт болон ШУА-ны саналд үндэслэн албан ёсны болгож, билгийн тооллын өвлийн тэргүүн сарын шинийн нэгэн гэж тогтоон уг өдрийг ‘Монгол бахархалын өдөр’ болгон тэмдэглэн өнгөрүүлж байна.

Энэ өдрийг тохиолдуулан жил бүр улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан нэг иргэнийг Монгол Улсын төрийн дээд шагнал-тэргүүн зэргийн одон “Чингис хаан” одонгоор шагнадаг уламжлалтай.

Монгол Улсын Ерөнхийлөгч Ухнаагийн Хүрэлсүх зарлиг гарган энэ жил төрийн дээд шагнал “Чингис хаан” тэргүүн зэргийн одонг АНУ-ын эрдэмтэн Жак Уэтерфорд, Шинжлэх ухааны гавьяат зүтгэлтэн, доктор, профессор, академич Д.Доржготов нарт нарт төрийн одонг хүртээлээ.

Дулааны шугамын худгаас нэр, хаяг, нас тодорхойгүй эрэгтэй хүний цогцос олджээ

Хан-Уул дүүргийн гуравдугаар хороонд дулааны шугам сүлжээний худаг дотроос нэр, нас, хаяг тодорхойгүй 1 хүний цогцос олджээ. Энэ тухай дуудлага мэдээлэл арваннэгдүгээр сарын 20-ны өдрийн 21:14 цагт ОБГ-т ирсэн бөгөөд Нийслэлийн Аврах ангийн алба хаагчид 4 км замыг туулан 21:18 цагт очиход 2.5 метрийн гүнтэй дулааны шугам сүлжээний худагт эрэгтэй хүний цогцос байсныг 10 минут ажиллан гаргаж, тус дүүргийн цагдаагийн 1 дүгээр хэлтэст шилжүүлэн өгсөн байна. Одоогоор Цагдаагийн байгууллага тухайн иргэний мэдээллийг тодруулахаар ажиллаж байна.

Ирэх даваа гарагт сургууль цэцэрлэгийн үйл ажиллагааг цахимаар хичээллүүлнэ

Цаг агаарын хүндрэлээс үүдэн гарах эрсдэлийг бууруулах зорилгоор 2022 оны арваннэгдүгээр сарын 28-ны өдөр нийслэлийн төрийн болон төрийн бус өмчийн бүх шатны сургууль, цэцэрлэгийн үйл ажиллагааг цахимаар хичээллүүлэх нийслэлийн Засаг дарга Д.Сумъяабазар захирамж гарчээ.

Нийслэлийн Засаг дарга бөгөөд Улаанбаатар хотын Захирагч Д.Сумъяабазар Боловсрол, шинжлэх ухааны сайд Л.Энх-Амгалантай зөвшилцсөний үндсэн дээр 2022 оны арваннэгдүгээр сарын 28-ны өдөр буюу ирэх даваа гарагт нийслэлийн хэмжээнд бүх шатны сургууль, цэцэрлэгийг цахимаар хичээллүүлэх захирамж гаргалаа.

Монгол Улсын сайд, Түгжрэлийг бууруулах Үндэсний хорооны дарга Ж.Сүхбаатар ирэх өдрүүдэд сургууль, цэцэрлэгийн хичээлийг цахимаар оруулах санал гаргасан. Тэрбээр мэдэгдэлдээ “Цаг уур, орчны шинжилгээний газраас Улаанбаатар хот орчимд арваннэгдүгээр сарын 24, 27, 28-нд цас орж, 28-аас арванхоёрдугаар сарын 1-ний өдрүүдэд хүйтний эрч эрс чангарах цаг агаарын урьдчилсан мэдээг танилцууллаа.

Иймд цас ихээр орох, цаг агаарын гэнэтийн үзэгдлээс үүдэн Улаанбаатар хотын авто замын түгжрэл ноцтой түвшинд хүрч, тэг зогсолт хийх нөхцөл байдал үүсэж байгаатай холбогдуулан Нийслэлийн засаг дарга бөгөөд Улаанбаатар хотын захирагч Д.Сумъяабазарт албан бичиг хүргүүлжээ. Хоёр өдрийн өмнө хүргүүлсэн албан бичигт:

1. Цас их хэмжээгээр орсны улмаас авто замын түгжрэл ноцтой түвшинд хүрч болзошгүй тухай иргэд, олон нийтэд тогтмол урьдчилан мэдээлж байх,

2. Цаг агаарын үзэгдлийн улмаас авто замын түгжрэл ноцтой түвшинд хүрч болзошгүй үед ажилтан, албан хаагчдын ажлын цагт уян хатан зохицуулалт хийх,

3. Цаг агаарын ноцтой үзэгдлийн үед сургууль, цэцэрлэгийн үйл ажиллагааг цахимаар болон нөхөн хичээллэх бололцоотойгоор зохион байгуулах арга хэмжээ авч ажиллахыг төрийн байгууллагууд, хувийн хэвшлийн аж ахуйн нэгжүүдэд үүрэг болгох.

Нийслэл Улаанбаатар хотын авто замын түгжрэлийг бууруулахад байгууллага хоорондын уялдааг хангах хүрээнд Нийслэл Улаанбаатар хотын авто түгжрэлийг бууруулах Үндэсний хорооны ажлын албанд энэ талаарх ажлын биелэлт, үр дүнгийн мэдээллийг шуурхай ирүүлж байх талаар илгээлээ” гэсэн юм.

Тэгвэл БШУ-ны сайд Л.Энх-Амгалан "Ерөнхий боловсролын сургуулийн нэгдүгээр улирлын хичээл арванхоёрдугаар сарын 16-ны Баасан гаригт хичээллэснээр дуусгавар болно. Нэгдүгээр улирлын амралт зургаан 7 хоногийнтурш үргэлжилнэ. Амралт тун удахгүй эхлэх гэж байгаа учраас ирэх долоо хоногт цаг агаар хүйтрэх, үүнээс үүдэлтэй түгжрэл нэмэгдэх зэрэг шалтгааны улмаас хичээл сургалтын үйл ажиллагааг зогсоох боломжгүй юм. Цар тахлын нөхцөл байдлын үед сургуулиуд хангалттай урт хугацаанд үйл ажиллагаагаа зогсоосон. Зайн сургалт нь танхимын хичээлийг нөхөхүйц үр дүнтэй байж чадаагүй. Тиймээс аль болох сургууль хаах, хичээлийг зогсоох шийдвэрээс татгалзана" гэж мэдэгдсэн.

Хан-Уул дүүргийн нэгдсэн эмнэлэг анх удаа цусан хурааг авах мэс засал хийлээ

Хан-Уул дүүргийн Нэгдсэн эмнэлгийн Мэс заслын тасаг анх удаа тархины цусан хурааг авах мэс заслыг Мэдрэлийн мэс заслын зөвлөх эмч Х.Хусаянтай хамтран амжилттай хийжээ. 2022 оны 11 дүгээр сарын 19-ний өдөр хоёрдугаар зэргийн цусны даралт ихсэх өвчинтэй, эрсдэл өндөр оноштой хэвтэн эмчлүүлж байх хугацаанд эмийн эмчилгээ хийлгэх явцдаа толгойн өвдөлт намдахгүй байсан учраас толгойн компьютер томографийн шинжилгээ хийлгэж, тархины эдийн цус харвалт оношлогдож, Мэдрэлийн мэс заслын зөвлөх эмч Х.Хусаянаас зөвлөгөө авч, Улсын Гуравдугаар Төв эмнэлгийн баг хамт олонтой хамтарч, дүүргийн эмнэлэгтээ цусан хураа авах мэс заслыг хийжээ. Мэс заслын явцад хүндрэл гараагүй, өвчтний биеийн байдал тогтвортой байна.

Дарга нар зам хааж,түгжрэл үүсгэдэг асуудлыг зогсоох саналаа хуулийн төсөлд оруулахаар албан ёсоор явуулжээ

Цас орсны улмаас баасан гарагт Нийслэлчүүд олон цагаар зам дээр түгжирч, тэг зогсолт хийсэн. Энэхүү үйл явдалтай холбоотойгоор Монгол Улсын сайд, Түгжрэлийг бууруулах үндэсний хорооны дарга .Сүхбаатар өөрийн твиттер хаягаараа байр сууриа илэрхийлжээ.

Тэрбээр “Архаг түгжрэлийг нэг өвлийн хугацаанд бууруулах үндсэн хоёр арга зам бий.

– Иргэд, албан тушаалтнууд бүгд сайн дураар идэвх санаачилгатай өөрийн чадах хувь нэмрээ оруулах;

-Тодорхой хугацаанд машины тоог дугаарын хязгаарлалт (албадлага) зэрэг захиргааны аргаар зохицуулах” хэмээн жиргэсэн байна.

Мөн тэрбээр “Нийтийн тээврийн салбар дөнгөн данган аргацаасан байдалд орсон байхад бид дараа дараачийн ямар ч том арга хэмжээнүүдийг авах боломж хязгаарлагдмал болчхоод байгаа юмаа. Хотын нийтийн тээврийн унхиагүй байдал, сэтгэлгүй ажилтай холбоотой. Удирдлагыг нь сольж байж өөрчлөлт оруулна. Тэрийг мэдээд байгаа учраас дараа жил энэ байдлыг засах арга хэмжээнүүдээ анхаараад ажиллаж байна.Нөхцөл байдал одоо бол унасан байгаа” гэжээ.

Түүнээс гадна дарга нар зам хааж, түгжрэл үүсгэдэг асуудлыг зогсоох талаар саналаа өнгөрсөн долоо хоногт хуулийн төсөлд албан ёсоор явуулсан гэжээ.

BOLOD ДОЛОО ХОНОГИЙН ТОЙМ: Монгол бахархалын өдөр тохиож, хүйтний эрч эрс нэмэгдэх учир сургууль цэцэрлэгийг ЦАХИМААР хичээллүүлнэ
Tweet
Bolod.mn