Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Дархан-Уул аймагт гарсан галт түймрээр нэг хүн амиа алдаж, хоёр хүн одоог хэр нь олдохгүй байгаа аж. Мөн түүнчлэн иргэдийн шүүмжлэлд өртөөд буй Сэлбэ голын санхүүжилтийн асуудлыг Нийслэлийн Засаг дарга Сумъяабазар эгүүлэн татахаар болжээ. Эдгээр болон бусад онцлох үйл явдлуудыг BOLOD долоо хоногийн тоймоос хүлээн аваарай.

Тавантолгой түлш ХХК өөрсдийн үйл ажиллагааг тагнуулын байгууллагаар шалгуулахаар болсноо мэдэгдлээ

БНХАУ-аас сайжруулсан шахмал түлш оруулж ирдэг гэх мэдээллийг “Тавантолгой түлш” ХХК няцааж, энэхүү асуудлыг шалгуулах хүсэлтээ 11-р сарын 30-ны өдөр Тагнуулын ерөнхий газарт хүргүүллээ. Тус компанийн Мэдээлэл технологийн хэлтсийн дарга Б.Цэрэнсодномын хэлснээр “ Тавантолгой түлш ХХК БНХАУ-аас түлш худалдан авах ямар ч шаардлага байхгүй. Нэг тонны савлагаатай хагас коксжуулсан нүүрсийг оруулж ирээд 25 кг шуудайд савлаж зардаг гэх мэдээлэл худлаа бөгөөд 25 кг-ын савлагаатай нүүрсийг иргэдэд, нэг тонны савлагаатай нүүрсийг ААН-үүдэд борлуулдаг. Тиймээс Тавантолгой түлш ХХК хятад түлшийг түгээж, борлуулаагүй болохыг тогтоолгоно” гэдгээ мэдэгдлээ.

Ташрамд дурдахад, “Тавантолгой түлш” ХХК өвөлжилтийн бэлтгэл ажлын хүрээнд 120,000 тонн шахмал түлш үйлдвэрлэж, нийслэлийн 97 агуулахад нөөцөлжээ. Компанийн 3,000 ажилтан 24 цагаар үйлдвэрлэлийн үйл ажиллагааг тасралтгүй явуулж байгаа бөгөөд хоногт 14 шугамаар 2500 тонн түлш үйлдвэрлэдэг байна. Аравдугаар сарын 1-нээс өнөөг хүртэл 111,425 тонн түлш үйлдвэрлэн хэрэглэгчдэд борлуулсан гэдгийг албаныхан хэлж байлаа.

Төрийн бүх шатны байгууллага, нийтийн албаныхан “Шинэ жил” тэмдэглэхгүй

Төрийн хэмнэлтийн тухай хуулар төр, түүний бүх шатны байгууллага, нийтийн албаныхан шинэ жил тэмдэглэх боломжгүй. Харин хувиасаа мөнгө, төлбөрийг гаргаж баярлаж болох журамтай гэж нэгэн эх сурвалж тодруулсан байна. Тодруулбал, доорх албан байгууллага, хувь хүмүүс тус хуулийн үйлчлэх хүрээнд хамрагдах юм байна. Энэ хуулийн үйлчлэлд дараах хуулийн этгээд, албан тушаалтан, санхүүжилтийн эх үүсвэр хамаарна.

Төрийн улс төрийн, захиргааны, тусгай болон үйлчилгээний алба хаагч
Төсвийн багууллага, түүний албан тушаалтан
Банк, санхүүгийн болон бусад салбарын төрийн болон орон нутгийн өмчийн 50 болон түүнээс дээш хувийн оролцоотой хуулийн этгээд, түүний албан тушаалтан Төв банк /Монгол банк/
Улсын болон орон нутгийн төсөв
Засгын газрын болон орон нутгийн тусгай сан
Олон улсын гэрээнд өөрөөр заагаагүй бол улсын төсөвт хүлээн авсан болон дамжуулан зээлдүүлсэн гадаад дотоод эх үүсвэрээс авсан зээл
Гадаад болон дотоодын эх үүсвэрээс олгосон хандив, тусламж
Орон нутгийн бүх төрлийн сан
Хуульд заасны дагуу Ерөнхийлөгч, Улсын Их Хурал, Засгийн газар, Ерөнхий сайдаас байгуулсан хороо, комисс, зөвлөл

Ноцтой осол гаргаж, бага насны хүүхдүүдийн хүнд гэмтээсэн Ч.Маралмаад яллах дүгнэлт үйлдэнэ

Өнгөрсөн аравдугаар сард урсгал сөрж долоон машин мөргөж, 12 настай хоёр хүүхэд гэмтээсэн осол гаргасан Ч.Маралмаад холбогдох хэргийн мөрдөн байцаалтын ажиллагаа дуусаж, шүүхэд шилжүүлэх саналтайгаар прокурорт шилжүүлсэн талаар бид өмнө мэдээлж байсан.

Тодруулбал, хэрэгт мөрдөн байцаалтын ажиллагаа явуулж, улмаар шүүхэд шилжүүлэх саналтай Тээврийн прокурорын газарт шилжүүлсэн байна. Хэргийг одоогийн байдлаар прокурор хянаж байна. Өөрөөр хэлбэл, иргэн Ч.Маралмаад яллах дүгнэлт үйлдэх болжээ. Ч.Маралмаад эрүүгийн хуулийн тусгай ангийн 27.10 дугаар зүйлийн 2 дахь хэсгийн 2.2, 2.4 дэх заалтад тус тус заасан эрүүгийн хэрэгт яллагдагчаар татан, шалгасан байна.

Дархан-Уул аймагт 2000 тонн багтаамжтай шатахууны нөөцийн сав шатсаны улмаас нэг хүн амиа алджээ

Арванхоёрдугаар сарын 1-ны өдөр Дархан-Уул аймгийн “Тэс Петролиум” ХХК-ийн шатахууны сав шатаж нэг иргэн амь насаа алдаж, хоёр иргэн олдохгүй байгаа талаар мэдээлэл цацагдсан.

Тодруулбал, тус аймгийн Дархан сумын 3-р баг “Тэс Петролиум” ХХК-д гал түймэр гарлаа гэсэн дуудлага өнөөдөр /2022.12.01/ 09:21 цагт Онцгой байдлын газарт ирсэн байна. Дуудлага мэдээллийн дагуу алба хаагчдыг очиход 2000 тонны багтаамжтай АИ-92 шатахууны нөөцийн саванд гарсан галыг унтраахаар ажиллаж байна. Энэ талаар Дархан-Уул аймгийн засаг дарга Б.Азжаргалаас тодруулахад, "12:00 цагийн байдлаар гал бүрэн унтраагүй байсан бөгөөд урьдчилсан байдлаар гурван ажилтан байсан бөгөөд нэг нь нас барж, хоёр нь олдохгүй байна. Дээрх хоёр иргэн эсэн мэнд олдох боломж тун бага байна. Одоо бусад шатахууны нөөц сав, агуулах руу гал орохоос сэргийлж ажиллаж байна” гэлээ.

Даваа гарагаас нэгдүгээр эгнээгээр зөвхөн “Нийтийн тээвэр” зорчино

Нийслэл Улаанбаатар хотын авто замын түгжрэлийг бууруулах үндэсний хорооны ээлжит II хуралдаан арваннэгдүгээр сарын 30-ны өдөр болсон. Хуралд Ерөнхий сайд Л.Оюун-Эрдэнэ, ЗГХЭГ-ын дарга Д.Амарбаясгалан, Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар, Нийслэлийн Засаг дарга бөгөөд Улаанбаатар хотын Захирагч Д.Сумъяабазар тэргүүтэй албаныхан оролцож, есөн асуудал хэлэлцсэн юм.

Энэ үеэр Ерөнхий сайд Л.Оюун-Эрдэнэ Нийслэл Улаанбаатар хотын авто замын түгжрэл, түүний сөрөг нөлөөллийг бууруулах тухай хууль болон дагалдах хуулиудын төслийг арванхоёрдугаар сард багтаан Засгийн газрын хуралдаанд оруулахыг үүрэг болгосон байна. Мөн Улаанбаатар хотын авто замын түгжрэлийн эсрэг авах арга хэмжээтэй холбоотой хууль, шийдвэрүүдийг дараалал харгалзахгүйгээр Засгийн газрын хуралдаанд оруулан хэлэлцдэг байх чиглэл өгчээ.

Улмаар Нийслэл Улаанбаатар хотын авто замын түгжрэлийг бууруулах үндэсний хорооны ээлжит II хуралдаанаас дараах шийдвэрүүд гаргасан байна.

Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар арванхоёрдугаар сарын 5-н буюу ирэх 7 хоногийн даваа гарагаас эхлэн Нийтийн тээврийг нэгдүгээр эгнээгээр явуулах журмын хэрэгжилтэд онцгой анхаарч, шуурхайлан ажилдаа орохыг холбогдох албан тушаалтнуудад үүрэг болгов.
Олон улсын банк санхүүгийн байгууллагын хамтын ажиллагааны хүрээнд явж байгаа BRT төслийн зээлийн санхүүжилтийг УИХ-аар соёрхон батлуулахад бэлтгэх чиглэл өглөө.
Нийслэлийн төсвийн хөрөнгө оруулалтаар нийтийн тээврийн парк шинэчлэлийн ажлын хүрээнд БНХАУ-аас 2023 оны нэгдүгээр сарын 5-нд 100 автобус, хоёрдугаар сарын эхээр 124 автобус орж ирнэ.
Тээврийн хэрэгслийн "Цахим гэрчилгээ" RFID төсөл амжилттай хэрэгжиж байна. Өнөөдрийн байдлаар 160 орчим уулзварт 380 гаруй тоног төхөөрөмж суурилуулсан. 2023 оны эхний улиралд замын хөдөлгөөнд нэвтрүүлэхээр боллоо.
Улаанбаатар хотод гүүрэн байгууламж бүхий нүхэн гарцууд барих ажлыг шуурхайлна. Нийслэлийн замын хөдөлгөөний нягтралыг бууруулж, авто замын сүлжээг сайжруулах, түгжрэлийн эсрэг арга хэмжээ авахад энэ ажил чухал үр дүнтэй юм. Ерөнхийлөгч У.Хүрэлсүхийн БНХАУ-д хийсэн төрийн айлчлалын үеэр санхүүгийн асуудлыг шийдсэн байна.
Монгол Улсын сайд, Нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар Үндэсний хорооны богино болон дунд хугацааны төлөвлөгөөгөө эрчимжүүлэх, хэрэгжүүлэх чиглэлийг ажлын хэсгүүдэд өглөө. Мөн сар, улирал тутам хийсэн ажлаа эргээд тайлагнадаг байхыг чиглэл болгов.
Нийтийн тээврийн үйлчилгээг төр, хувийн хэвшлийн түншлэлийн хүрээнд хэрхэн явуулж болох талаар санал боловсруулах Ажлын хэсэг байгуулахаар тогтсон байна.

Сэлбэ голын санхүүжилтэд төсөвлөх 3.1 тэрбум төгрөгийг эгүүлэн татлаа

НИТХ дахь МАН-ын бүлэг улс төрийн шийдвэр гаргаж, Сэлбэ голын төсөлтэй холбоотой 3.1 тэрбум төгрөгийн санхүүжилтийг дэмжихгүй болсон байна. Иймээс Нийслэлийн Засаг дарга бөгөөд Улаанбаатар хотын Захирагч Д.Сумъяабазар НИТХ-д өргөн барьсан Нийслэлийн 2023 оны төсвийн төслөөс уг санхүүжилтийг эгүүлэн татахаар боллоо.

Ийнхүү нийгмийн сүлжээний нөлөөлөгч Б.Цэцэгийн удирдсан Туул, Сэлбэ орчмыг сайжруулах төслийн нэгжийн урсгал зардалд төсөвлөсөн 3.1 тэрбум ирэх онд зарцуулагдахгүй болж байна. Энэ тухай Нийслэлийн Засаг даргын хэвлэлийн төлөөлөгч Н.Сугар : “2015 онд Монгол Улс болон БНХАУ-ын Засгийн газар хоорондын зээлийн хэлэлцээрийн хүрээнд 60 сая ам доллароор Сэлбэ голыг тохижуулах, мөн урсцыг нэмэгдүүлэхээр болсон. Түүнчлэн гурван байршилд томоохон хэмжээний цөөрөм байгуулах нь агаарын чийгшлийг нэмэгдүүлэхээс гадна ундны усны нөөцийг нэмэгдүүлэх чухал ач холбогдолтой юм. 60 сая ам.долларын 95 хувийг БНХАУ-аас гаргах бол үлдсэн таван хувийг нийслэлээс гаргах Засгийн газрын шийдвэр гарсан байдаг. Одоогийн байдлаар тус төсөлд улс, нийслэлийн төсвөөс ямар ч мөнгө зарцуулаагүй. Сэлбэ голын төсөл санхүүжилтгүй болж байгаа учраас төслийн нэгжийг татан буулгах тоотыг Сангийн яаманд хүргүүлнэ. Гэхдээ уг асуудлыг дан ганц Засаг дарга шийдэх асуудал биш бөгөөд Сангийн яам татан буулгах эсэхийг эцэслэн шийдэх аж.

Баян-Өлгий аймгийн Засаг дарга Д.Баурыжан албан тушаалаасаа чөлөөлөгдөх хүсэлтээ өгчээ

Баян-Өлгий аймгийн Засаг дарга Д.Баурыжан албан тушаалаасаа чөлөөлөгдөх хүсэлтээ өнгөрсөн Пүрэв гарагт буюу арванхоёрдугаар сарын 1-ны өдөр гаргаж, Ерөнхий сайд Л.Оюун-Эрдэнэд хүргүүлэхээр болжээ. Тэрбээр “УИХ-аас баталсан Хэмнэлтийн хуулийг хэрэгжүүлэхийн тулд Засаг даргын орлогч, мөн Засаг даргын зөвлөхийг чөлөөлсөн. Энэ хуулийг хэрэгжүүлснийхээ төлөө аймгийн Газрын харилцаа хот байгуулалтын газрын дарга н.Болатыг чөлөөлөх, 2003 оноос хамт ажиллаж ирсэн Ж.Курейныг тэтгэвэрт нь гарга гэдэг тулган шаардалт тулгалаа. Хэрэв эдгээр хоёр хүнийг чөлөөлөхгүй бол түүнийг Засаг даргынхаа ажлыг өгөхийг шаардсан ажээ. Тэрээр “Улс орон Эдийн засгийн хямралтай, дайнтай үед намынхаа бүлгийг хагалахыг хүсэхгүй байна. Мөн түүнчлэн эрүүл мэндийн шалтгаан гарсны улмаас эмчлүүлэх шаардлагатай болсон. Ийнхүү чөлөөлөгдөх хүсэлтээ хүргүүлж байна” хэмээлээ.

BOLOD ДОЛОО ХОНОГИЙН ТОЙМ: Дархан-Уул аймагт 2000 тонны багтаамжтай шатахууны сав шатаж нэг хүн амиа алдаж, хоёр хүн ор сураггүй алга болжээ
Tweet
Bolod.mn