Bolod.mn сайт долоо хоног бүрийн ням гарагт улс төр, нийгэм эмдийн засгийн хүрээнд болж өрнөсөн онцлох үйл явдлуудыг хүргэж байна. Иргэдийн жагсаал эхнээсээ үр дүнгээ өгч нүүрсний хэрэг холбогдсон 17 хүнийг нэрсийг АТГ-аас зарлалаа. Мөн түүнчлэн 22.1 буюу авилга албан тушаалын багц хуулинд нэмэлт өөрчлөлт оруулж, уг хэрэгт холбогдсон хүнийг уучлахгүй хатуу чанд арга хэмжээ авах болно хэмээжээ. Мөн түүнчлэн 16 жилийн турш шийдэгдээгүй өдийг хүртэл Ш.Алтантуяагийн  онц ноцтой гэмт хэрэг Сингапурын дээд шүүхэд ялалт байгуулж тус улсын Засгийн газраас талийгаачийн ар гэрт нөхөн төлбөр олгуулахаар болсон байна. Эдгээр болон бусад онцлох үйл явдлуудыг BOLOD.MN сайт тоймлон хүргэж байна.

Ерөнхий Боловсролын сурагчид нэгдүгээр сарын 30-н хүртэл амарна

ЕБС-ын сурагчид өчигдөр буюу Баасан гарагт хичээллээд амарч байгаа. Улсын хэмжээнд сурагчдын нэгдүгээр улирлын амралтанд 2023 оны нэгдүгээр сарын 29-нийг дуустал үргэлжилнэ. Тодруулбал, ирэх оны нэгдүгээр сарын 30-ны Даваа гарагт хоёрдугаар улирлын хичээл эхэлнэ. БШУЯ-наас мэдээлснээр энэ хичээлийн жилд улсын хэмжээнд 854 сургуульд 746,653 хүүхэд сурдаг. Үүнээс нэгдүгээр ангид 77,752 хүүхэд элсэн орсон бол 33,459 нь төгсөх буюу 12 дугаар ангийн сурагчид байна.

Нүүрсний хэрэт холбогдсон 17 хүний нэрсийг зарлалаа

Нүүрсний хэрэгт холбогдуулан шалгагдаж буй албан тушаалтнуудын талаар Авлигатай тэмцэх газраас мэдээллээ. Авлигатай тэмцэх газрын Мөрдөн шалгах хэлтсийн орлогч дарга, ахлах комиссар М.Даваатогтох "Авлигатай тэмцэх газар, Тагнуулын Ерөнхий газар, Цагдаагийн Ерөнхий газрын хамтарсан ажлын хэсэг нүүрсний олборлолт, борлуулалт, тээвэрлэлт, төрийн өмчийн хөрөнгөөр бараа, ажил үйлчилгээ авахтай холбоотой хэрэгт мөрдөн шалгах ажиллагаа явуулж байна. Одоогоор нийт 22 хэрэгт мөрдөн шалгах ажиллагаа явуулж байна. Мөрдөн шалгах ажиллагааны явцад нийт 47 обьектд нэгжлэгийн ажиллагаа хийсэн.

Нүүрсний хэрэгт холбогдуулан шалгагдаж буй хүмүүсийн нэрс:

1. Монгол Улсын Ерөнхийлөгч асан Х.Баттулга
2. Ерөнхийлөгчийн тамгын газрын даргаар ажиллаж байсан Ө.Шижир
3. Зам тээврийн хөгжлийн сайд асан Д.Ганбат
4. УИХ-ын гишүүн А.Адьяасүрэн
5. УИХ-ын гишүүн Д.Бат-Эрдэнэ
6. УИХ-ын гишүүн Ц.Анандбазар
7. Ерөнхийлөгчийн тамгын газрын даргаар ажиллаж байсан З.Энхболд
8. УИХ-ын гишүүн Б.Наранбаатар
9. УИХ-ын гишүүн Б.Баттөмөр
10. УИХ-ын гишүүн Ц.Сэргэлэн
11. УИХ-ын гишүүн Ш.Раднаасэд
12. Өмнөговь аймгийн засаг дарга Р.Сэддорж
13. Өмнөговь аймгийн ИТХ-ын төлөөлөгч Б.Эрдэнэ-Очир
14. Өмнөговь аймгийн засаг дарга асан Бадраа
15. Эрдэнэс Тавантолгой ХК-ийн гүйцэтгэх захиралаар ажиллаж байсан А.Ариунболд
16. Эрдэнэс Тавантолгой ХК-ийн гүйцэтгэх захиралаар ажиллаж байсан Б.Ганхуяг
17. Эрхэт Монгол группийг үүсгэн байгуулагч Х.Мандахбаяр гэсэн мэдээллийг одоогоор танилцуулж байна.

Монгол Улсын Үндсэн хуулиар гэмт хэрэг үйлдсэн гэм буруутныг тогтоох онцгой эрх гагцхүү шүүхэд хадгалагдаж буй. Эдгээр хүмүүс бол нүүрстэй холбоотой ажиллагаанд шууд болон шууд бусаар холбогдсон. Тиймээс мөрдөн шалгах үндэслэл үүсэж байна. Дэлгэрэнгүй мэдээлэл өгөх боломж байхгүй. Боломжит хэмжээнд мэдээллээ. Эдгээр нэр дурдагдсан хүмүүсийн заримаас мэдүүлэг авсан. Шаардлагатай хүмүүст хилийн хориг тавьсан. Ерөнхийлөгч асан Х.Баттулгад хилийн хориг тавиагүй" гэв.

Гурилын үнэ нэмсэн компаниудад зөрчлийн хэрэг нээн шалгаж байна

Шударга өрсөлдөөн, хэрэглэгчийн төлөө газраас буудайн гурилын үнийн өсөлтийн шалтгаан нөхцөл, нөөц хангамжийн  байдлыг судлан тогтоох, дүгнэлт гаргах, холбогдох хууль тогтоомжийн хэрэгжилтийг хангуулах зорилгоор агентлагийн даргын удирдамжтай хяналт шалгалт хийжээ.

Гурил үйлдвэрлэгч 10 аж ахуй эрхлэгч, хоёр ТББ-ыг хамруулж хяналт шалгалтыг явуулсан бөгөөд Хүнс, хөдөө аж ахуй, хөнгөн үйлдвэрийн яам, Гаалийн ерөнхий газраас ирүүлсэн мэдээлэл болон гурил үйлдвэрлэгчдээс ирүүлсэн санхүүгийн баримтуудад шалгалт хийсэн байна. Хяналт шалгалтын явцад шаардлагатай тайлбар мэдээлэл, баримт материалыг дурдсан хугацаанд ирүүлээгүй “Өгөөж гурил” ХХК болон “Монголын гурил үйлдвэрлэлийн бодлого төлөвлөлтийн нэгдсэн холбоо”, “Монголын тариаланчид, гурил үйлдвэрлэгчдийн холбоо” ТББ-д хяналт шалгалтад саад учруулсан үндэслэлээр Зөрчлийн тухай хуулийн 10.7 дугаар зүйлийн 6-д заасны дагуу торгуулийн арга хэмжээ авчээ.

Шалгалтын явцад “Улаанбаатар гурил”, “Алтан тариа”, “Од групп” ХХК-ууд буудайн гурилын үнийг нэгэн зэрэг нэмсэн үйлдэл нь нийтийн ашиг сонирхолд харшилсан эсхүл өрсөлдөөнийг хязгаарлах нөхцөлийг бүрдүүлсэн гэж үзэхээр байх тул зөрчлийн хэрэг нээж, хэрэг бүртгэлтийн ажиллагаа явуулж эхэлсэн аж.

Хоёр хүүхэд гэмтээн, долоон машин мөргөсөн М-д холбогдох хэргийг яллах дүгнэлт үйлдэн шүүхэд шилжүүлжээ

Тээврийн прокурорын газраас долоон автомашин мөргөж, хүүхэд дайрсан иргэн М-д холбогдох хэргийг яллах дүгнэлт үйлдэн шүүхэд шилжүүлжээ.

Тодруулбал, М нь 2022 оны аравдугаар сарын 10-ны өдөр Баянзүрх дүүргийн 26 дугаар хороо, “Олимп” хотхоны хойд замд “Toyota Landcruiser 200” маркийн тээврийн хэрэгслийг жолоодон замын хөдөлгөөнд оролцохдоо урсгал сөрөн явган зорчигч 12 настай С, Э нарыг дайрч, эрүүл мэндэд нь хохирол учруулж, долоон автомашин мөргөсөн ослыг гаргасан.

Түүнд Эрүүгийн хуулийн 27.10 дугаар зүйлийн 2 дахь хэсгийн 2.2, 2.4 дэх хэсэгт зааснаар /Автотээврийн хэрэгслийн хөдөлгөөний аюулгүй байдал, ашиглалтын журам зөрчих/ яллах дүгнэлт үйлдэн, Баянзүрх дүүргийн эрүүгийн хэргийн анхан шатны шүүхэд шилжүүлсэн байна.

Яллах дүгнэлт үйлдсэн Эрүүгийн хуулийн заалт:

27.10 дугаар зүйл.Автотээврийн хэрэгслийн хөдөлгөөний аюулгүй байдал, ашиглалтын журам зөрчих

2.Энэ гэмт хэргийг:

2.1.согтуурсан, мансуурсан үедээ;

2.2.тээврийн хэрэгсэл жолоодох эрхгүй хүн;

2.3.хүний эрүүл мэндэд хүнд хохирол учруулж;

2.4.их хэмжээний хохирол учруулж үйлдсэн бол тээврийн хэрэгслийг жолоодох эрхийг нэг жилээс гурван жил хүртэл хугацаагаар хасаж зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ. Өмнө нь уг хэргийг нэмэлт мөрдөн байцаалтад буцаагаад байсан юм.

Авилга, албан тушаалын хэрэг өршөөл, уучлал үзүүлэхгүй байхаар Эрүүгийн хуулийн нэмэлт, өөрчлөлтөд тусгалаа

Засгийн газрын ээлжит хуралдаан 2022 оны арванхоёрдугаар сарын 14-нд Авлига, албан тушаалын хэрэгт өршөөл, уучлал үзүүлэхгүй байхаар Эрүүгийн хуулийн нэмэлт, өөрчлөлтөд тусгалаа. Эрүүгийн хуульд нэмэлт, өөрчлөлт оруулах тухай хуулийн төсөл болон дагалдуулан боловсруулсан бусад хуулийн төслийг Засгийн газрын хуралдаанар хэлэлцээд УИХ-д өргөн мэдүүлэхээр тогтлоо. Хууль зүй, дотоод хэргийн Төрийн нарийн бичгийн дарга П.Сайнзориг мэдээлэл хийж, тус хуулийн нэмэлт, өөрчлөлтөд туссан зарим асуудлаар тайлбар хийхдээ нүүрсний хулгайтай тэмцэж буй жагсагчдын төлөөллөөс гаргасан шаардлагуудыг Эрүүгийн хуульд нэмэлт, өөрчлөлт оруулах тухай хуулийн төсөлд тусгасан гэдгийг тодотгоод, авлига албан тушаалын хэрэгт өршөөл, уучлал үзүүлэхгүй гэдгийг онцоллоо. Тэрбээр, Эрүүгийн хуулийн 22.1 – р зүйл буюу  эрх мэдэл, албан тушаалаа урвуулан ашиглах гэмт хэрэг үйлдсэн бол торгох ялаар зүйчилдэг байсныг хасаж, албан тушаалаа урвуулан ашигласан тохиолдолд торгох ял эдлүүлэхгүй байхаар тусгасан.

Тус хуулийн 22-р бүлэгт заасан гэмт хэрэг үйлдсэн этгээдийн эрхийг хасах ялыг нэмэгдүүлж байна. Өөрөөр хэлбэл, авлигын гэмт хэрэгт холбогдсон этгээдийг төрийн албанд бүх насаар нь ажиллуулахгүй байхаар тусгалаа. Энэ нь сонгуулийн тухай хууль тогтоомж дээр заасанчлан авлига, албан тушаалын гэмт хэрэгт холбогдсон этгээд бүх шатны сонгуульд нэр дэвшихгүй байх заалттай уялдаж байгаа юм. Мөн авлига, албан тушаалын хэргийг хялбаршуулах байдлаар хэрэг хянан шийдвэрлэх ажиллагаа явуулахгүй байхаар зааж байна. Ял наймаалцахгүй гэсэн үг.

Түүнчлэн Эрүүгийн хуулиар халдашгүй байдлыг баталгаажуулсан албан тушаалтны бүрэн эрхийг эрх бүхий байгууллага, албан тушаалтан түдгэлзүүлээгүй бол гэмт хэргийг хөөн хэлэлцэх хугацааг зогсоож, бүрэн эрх дуусгавар болсны дараа тоолж эхэлнэ гэсэн заалтыг нэмж орууллаа. Эрүүгийн хуулийг дагалдуулаад Авлигын эсрэг хуульд өөрчлөлт оруулж, УИХ-ын гишүүдийн ХАСХОМ-ыг УИХ-ын Ёс зүйн дэд хороо шалгадаг байсныг АТГ шалгадаг байхаар өргөн мэдүүлэхээр болж байна гэв.

ЭМЯ-нд ажиллаж байсан иргэд их хэмжээний мөнгө хахуульд авсан хэргийг АТГ шалгаж байна

Эрүүл мэндийн яаманд ажиллаж байсан гэх “Ч”, “Б” нар нь удаа дараагийн үйлдлээр нэр бүхий аж ахуйн нэгжүүдээс тусгай  зөвшөөрлийн хүсэлт, төслийг хүлээн авч, шаардлага хангахгүй байна гэх байдлаар хясан боогдуулж, их хэмжээний мөнгийг хахуульд авч байв. Ингэхдээ өөрийн хамаарал бүхий шинжээч нарыг аж ахуйн нэгж, байгууллагуудад томилон дүгнэлт гаргуулж, дүгнэлтийг тусгай зөвшөөрлийн хурлаар оруулдаг байсан аж. Тухайн хэргийг 2020 оноос эхлэн шалгаж байгаа юм байна. Уг хэргийг АТГ-аас шалгаж шүүхэд шилжүүлэх саналтайгаар прокурорын байгууллагад хүргүүлсэн байна.

Гавьяат тамирчин М.Анхцэцэг ДАШТ-ээс мөнгөн медаль хүртлээ

Колумб улсын Богата хотод хүндийн өргөлтийн насанд хүрэгчдийн дэлхийн аварга шалгаруулах тэмцээн болж байна. Тэмцээнд манай улсаас гавьяат дасгалжуулагч Ц.Хосбаярын удирдлага дор Үндэсний шигшээ багийн дөрвөн тамирчин өрсөлдөж байгаа юм.  Өнөөдөр эмэгтэйчүүдийн 87 кг-ын жинд гавьяат тамирчин М.Анхцэцэг түлхэлттэй өргөлтийн төрөлд 143 кг-ыг өргөснөөр мөнгөн медаль хүртлээ. М.Анхцэцэг ДАШТ-ээс дөрөв дэх медалиа хүртлээ. Тэрбээр 2021 алт, 2017, 2019 онд хүрэл медаль хүртэж байв гэж Биеийн тамир, спортын улсын хорооноос мэдээллээ.

Малайзад онц хэрцгийгээр амь насаа алдсан Ш.Алтантуяагийн гэр бүлд 1.5 сая сингапур доллар олгох шүүхийн шийдвэр гарчээ

2006 онд Малайз улсын цагдаагийн тусгай албанд ажилладаг Азилах болон Сирул Азхар Умар гэх этгээдүүд Монгол улсын иргэн Ш.Алтантуяаг хүчээр автомашиндаа суулган авч явж буудан хөнөөгөөд цогцсыг нь дэлбэлсэн онц ноцтой хэрэг гарсан билээ. 

Энэ хэрэг олон шалтгаанаас болж 16 жилийн турш шийдэгдээгүй өдийг хүрсэн. Тэгвэл Малайзын дээд шүүхийн шийдвэрээр талийгаач Ш.Алтантуяагийн гэр бүл ялж шүүхээс 1.5 сая сингапур долларыг гэр бүлд нь олгох шийдвэр гаргалаа. Энэ мөнгийг Малайз улсын Засгийн газар болон хэрэгт холбогдсон этгээдүүдээс гаргуулах юм. Аллага үйлдсэн хоёр этгээд 2015 онд Малайзын холбооны шүүхээс цаазаар авах ял сонссон. Гэхдээ Азилах энэ аллагыг Малайзын Ерөнхий сайд асан Нажиб Разакын захиалгаар гүйцэтгэсэн гэдгээ хэлснээр дахин шүүх процесс явагдсан билээ. Ийнхүү 16 жил өрнөсөн хэрэгт эцэст нь хохирогчийн ар гэр ялалт байгууллаа.

Ирэх оны нэгдүгээр сарын 1-нээс хөдөлмөрийн хөлсний доод хэмжээ нэмэгдэнэ