Bolod.mn сайт долоо хоног бүр улс төр, нийгэм, эдийн засгийн хүрээнд болж буй үйл явдлуудыг тоймлон хүргэдэг. Нэгдүгээр сарын 1-нээс эхлэн хөдөлмөрийн хөлсний доод хэмжээ 550 мянган төгрөг болж нэмэгдлээ. Ингэснээр иргэдийн ЭМД-ийн хураамж мөн адил нэмэгдэж нэг жил 66 мянган төгрөгийг төлөх болж байгаа юм. Мөн түүнчлэн Ерөнхий сайд Л.Оюун-Эрдэнэ танхимаа сэлгэн зарим шинэ сайдуудыг томиллоо. Эдгээр болон бусад онцлох үйл явдлуудын мэдээ мэдээллийн хүргэж байна.

Хөдөлмөрийн хөлсний доод хэмжээ 550 мянган төгрөг болж өслөө

Улсын хэмжээнд мөрдөх хөдөлмөрийн хөлсний доод хэмжээг 2023 оны нэгдүгээр сарын 1-нээс эхлэн нэг цагт 3273 төгрөг, сард 550 мянган төгрөг болгохоор Хөдөлмөр, нийгмийн түншлэлийн гурван талт Үндэсний хорооноос тогтсон. Хөдөлмөрийн хөлсний доод хэмжээ 420 мянган төгрөг байсныг 31 хувь буюу 130,000 төгрөгөөр нэмлээ. Уг шийдвэр энэ оны нэгдүгээр сарын 1-нээс хэрэгжиж эхэлж байгаа юм. Өнгөрсөн оны арваннэгдүгээр сарын байдлаар манай улсад нийт 73 235 хүн хөдөлмөрийн хөлсний доод хэмжээгээр цалинжиж байв. Тэд нийт ажиллах хүчний ердөө 9.7 хувийг бүрдүүлдэг. Өнгөрсөн оны нэгдүгээр сард ахмадуудын тэтгэврийг нэмснээр бүрэн тэтгэврийн дундаж нь 550 мянган төгрөг болсон юм. Иймд хөдөлмөрийн хөлсний доод хэмжээ тэтгэврийн дунджаас бага байна гэх шүүмжлэл өрнөсөн юм.

Улмаар Цалингийн доод хэмжээ нэмэгдснээр эрүүл мэндийн даатгалийн мөнгө хэрхэн нэмэгдэх талаар Эрүүл мэндийн даатгалын ерөнхий газраас тодруулахад, “Эрүүл мэндийн даатгалын тухай хуулийн 4.2-т “Монгол Улсын иргэн эрүүл мэндийн улмаас учирч болзошгүй санхүүгийн эрсдэлээ хуваалцах зорилгоор эрүүл мэндийн албан журмын даатгалд заавал даатгуулна гэж заасан байдаг. Энэ дагуу эрүүл мэндийн албан журмын даатгалд заавал даатгуулах үүрэг хүлээх бөгөөд өмнө онд сарын 4200, жилийн 50,400 төгрөгийг төлдөг байсан. Тэгвэл Хөдөлмөрийн хөлсний доод хэмжээ 550 мянган төгрөг болж нэмэгдсэнтэй холбоотойгоор сард 5500, жилд 66 мянган төгрөгийг төлөхөөр болсон” гэлээ.

Эрүүл мэндийн даатгалын тухай хуулиар 19 нас хүрсэн өдрөөс эхлэн эрүүл мэндийн даатгалын шимтгэл төлөгч болж ЭМД-ын тухай хуульд заасны дагуу эрүүл мэндийн албан журмын даатгалд заавал хамрагдах үүрэгтэй. Хэдийгээр өвдөөгүй ч ирээдүйд учирч болох эрсдлээс сэргийлэн ЭМД-ын шимтгэлээ тогтмол төлснөөр бүх төрлийн эрүүл мэндийн чанартай тусламж, үйлчилгээг хэрэгцээтэй үедээ санхүүгийн эрсдэлд орохгүйгээр авах боломжтой юм.

Нэгдүгээр сарын 8-наас эхлэн БНХАУ-руу зорчих иргэдэд үйлчлэх журам

Ирэх ням гарагт буюу нэгдүгээр сарын 8-ны өглөөний 08.00 цагт Эрээн хотын боомт нээгдэж буйтай холбоотойгоор өнгөрсөн лхагва гарагт ГХЯ-ны холбогдох албаныхан олон нийтэд мэдээлэл өгсөн. Энэ үеэр монголын болоод БНХАУ-ын иргэдийн хилээр гарч, орох журмыг танилцуулсан юм.

МОНГОЛ УЛСААС БНХАУ-ЫГ ЗОРИХ ИРГЭДИЙН ХУВЬД:

48 цагийн өмнө өгсөн PCR шинжилгээний "Сөрөг" хариутай байх
БНХАУ-ын гаалийн апплейкшнийг гар утас дээрээ татаж авч, англи эсвэл хятад хэлээр урьдчилан бөглөж мэдүүлэх ёстой юм байна. Хэрэв утсан дээрээ бөглөх боломжгүй бол цаасан хэлбэрээр бөглөсөн байх журмыг мөрдөх юм.

Түүнчлэн өндөр халуурсан, биеийн байдалд ковидын шинж тэмдэг илэрсэн иргэнийг БНХАУ-ын хилээр нэвтрүүлэхгүй байхаар шийдвэрлэсэн байна.

БНХАУ-ААС МОНГОЛ УЛСАД НЭВТРЭХ ИРГЭДИЙН ХУВЬД ямар нэгэн шинжилгээ өгөхгүй бөгөөд эрүүл мэндийн асуумж бүхий хуудсыг үнэн зөв бөглөсний үндсэн дээр хилээр нэвтрэх эрхтэй болох аж. Энэхүү журам Монгол Улсад орж ирж буй монгол, хятадын бүх иргэнд хамаатай юм бөгөөд цаашид БНХАУ руу тээвэр хийж буй иргэдийн хувьд өмнө нь баримталж байсан хууль тогтоомж, журмын хүрээнд зохицуулагдах ажээ.

Юанийн ханш өсч, 500 төгрөг давлаа

Валютын ханш Засгийн газрын бодлогын үйлдлүүдээс шууд хамааралтай байдаг. Монгол, Хятадын хилийн Замын-Үүд-Эрээн авто замын боомтын зорчигч тээврийн хөдөлгөөнийг нэгдүгээр сарын 8-ны өдрөөс сэргээхээр болсон. Энэхүү мэдээлэлтэй зэрэгцэн төгрөгтэй харьцах юанийн ханш чангарлаа. Шинэ оны эхний өдөр 495.40 төгрөг байсан юанийн ханш өдгөө 500 даваад байна. Монголбанкны нэгдүгээр сарын 5-ны өдөр зарласан ханшаар, нэг юань 501.94 төгрөгтэй тэнцэж буй бол “Найман шарга” валютын захад 504.80 төгрөг, Төрийн банкинд 506.50 төгрөг, Хаан банкинд 503.20 төгрөг, Худалдаа хөгжлийн банкинд 503 төгрөг, Голомт банкинд 504.50 төгрөгөөр тус тус борлуулагдаж байна.

Л.Оюун-Эрдэнийн засгийн газар дан дээлтэй сайд нараа давхар дээлтэй сайдуудаар танхимаа сэлгэлээ

МАН-ын удирдах зөвлөл өнгөрсөн пүрэв гарагт буюу нэгдүгээр сарын 5-ны өдөр хуралдаж, хэд хэдэн гэнэтийн томилгоо хийлээ. Тодруулбал, М.Ганбаатарыг БОАЖЯ-ны дэд сайд, С.Энхболдыг Эрүүл мэндийн яамны дэд сайд, Г.Түвдэндоржийг Эдийн засгийн хөгжлийн яамны дэд сайд, О.Цэндсүрэнг Уул уурхай хүнд үйлдвэрийн яамны, Ж.Эрхэмбаатарыг Цахим хөгжлийн яамны дэд сайдаар тус тус томилохыг дэмжиж, Монгол Улсын Ерөнхий сайд Л.Оюун-Эрдэнэ Засгийн газрын зарим гишүүдийг томилох тухай захирамжид гарын үсэг зурж шинэ сайд нарыг томиллоо.

Харин танхимын сэлгэлтээр УИХ-ын гишүүн С.Чинзориг эрүүл мэндийн сайдаар томилогдсон бол, Барилга хот байгуулалтын сайдаар Ц.Даваасүрэн, Боомтын сэргэлтийн сайдаар Х.Булгантуяа, Шадар сайд бөгөөд Эдийн засаг, хөгжлийн сайдаар Ч.Хүрэлбаатар нарыг дэвшүүлсэн юм. ,

УБТЗ-ын орлогч дарга С.Батдөл болон түүний хамаарал бүхий этгээдүүдийн гэрээс 7.3 тэрбум төгрөг хураажээ

Ерөнхий сайд Л.Оюун-Эрдэнэ УИХ-ын чуулганы нэгдсэн хуралдаанаар дараагийн бөмбөг тэслэх салбарыг төмөр зам гэдгийг тодотгон хэлж байсан. Тэгвэл уг асуудлын дагуу нэгдүгээр сарын 1-наас 6-нд шилжих шөнө Эрүүгийн цагдаагийн газраас хойшлуулашгүй ажиллагаа явуулж, УБТЗ-ын орлогч дарга С.Батдөлийн гэр болон түүний хамаарал бүхий этгээдүүдийн гэрээс 7.3 тэрбум төгрөгийг хураан авч, С.Батдөлийг 48 цагийн хугацаатай баривчилжээ. Мөн дөрвөн тэрбум гаруй төгрөгийн үл хөдлөх хөрөнгийг үндэслэлгүйгээр олж авсан гэх асуудлаар мөрдөн шалгах ажиллагаа үргэлжилж байна.

С.Батдөл нь УБТЗ-д Тээвэр зохион байгуулалтын албаны орлогч даргын албан тушаалыг 2021 онд хүлээн авсан бөгөөд энэ хугацаанд өөрийн хамаарал бүхий компаниудад давуу эрх олгон , их хэмжээний шан харамж авч, нүүрс тээврийн үйл ажиллагаа явуулдаг байж болзошгүй хэмээжээ.

“Video call хийнэ” гэх луйвраас болгоомжлохыг анхааруулж байна

Фэйсбүүк орчинд садар самууныг сурталчилсан группуудэд эмэгтэй хүний зураг ашигласан хуурамч хаягаар “Video call хийнэ”, “Видео чат” хийнэ гэх мэт утгатай зар байршуулж, урьдчилгаа мөнгө авах замаар бусдыг залилан мэхэлдэг, мөн хохирогч өөрийн жинхэнэ хаягаар харилцсан тохиолдолд бичсэн чат мэдээлэл болон илгээсэн зураг зэргийг гэр бүл, найз нөхөд рүү тараана гэх мэтээр мөнгө нэхэн заналхийлэх үйлдэл бүртгэгдэж байна.

Иймд иргэд фэйсбүүк орчинд өөрийн аюулгүй байдлаа хангаж, шаардлагагүй тохиолдолд, нэр хаяг тодорхойгүй, хуурамч фэйсбүүк хэрэглэгчтэй ямар нэг байдлаар харилцахгүй байх, хувийн мэдээллээ бусдад өгөхгүй, урьдчилгаа хэлбэрээр мөнгө шилжүүлэхгүй байхыг цагдаагийн байгууллагаас анхааруулж байна.

BOLOD ДОЛОО ХОНОГИЙН ТОЙМ: Хятад улс хилээ нээхтэй зэрэгцэн юаны ханш өсч, Хөдөлмөр хөлсний доод хэмжээ нэмэгдсэн ДОЛОО ХОНОГ
Tweet
Bolod.mn