Bolod.mn сайт долоо хоног бүрийн амралтын өдөр улс төр, нийгэм, эдийн засгийн хүрээнд өрнөж буй үйл явдлуудыг тоймлон хүргэдэг. Эдгээр өдрүүдэд УИХ-ын гишүүн Н.Учралын санаачилсан "Олон нийтийн сүлжээнд хүний эрхийг хамгаалах тухай хууль" УИХ-ын намрын чуулгын хаалтын хэлэлцүүлгийн үеэр батлагдлаа. Уг хууль нь иргэдийн мэдэх эрх болох, олон нийтийн сүлжээний мэдээллэх эрхэд халдаж буй хэрэг хэмээн олон нийт дургүйцэж байгаа юм. Мөн түүнчлэн АН-ын олон удаагийн маргаан эцэс болж Л.Гантөмөр АН-ын даргаар томилогдлоо. Эдгээр болон бусад онцлох үйл явдлуудыг тоймлон хүргэж байна.

УИХ-ын гишүүн Н.Учралын санаачилсан "Олон нийтийн сүлжээнд хүний эрхийг хамгаалах тухай" УИХ-д дэмжигдэн батлагдлаа

Энэ сарын 20-нд УИХ-ын намрын чуулган хаалтаа хийсэн. Уг хуралдаанаар олон нийтийн сүлжээнд хүний эрхийг хамгаалах тухай хуулийн эцсийн хэлэлцүүлгийг явуулж, баталсан нь олон нийтийн шүүмжлэлийг дагуулаад буй. Энэ үеэр Цахим хөгжил, харилцаа холбооны сайд Н.Учрал уг хуулийг 2017 боловсруулсан бөгөөд олон улсын байгууллагуудын саналыг хангалттай авсан ажээ. Цахимаар залилах гэмт хэрэг нэг жилийн дотор 93.8 хувиар, цахимаар хүүхдэд садар самууныг сурталчлах гэмт хэрэг 2.8 дахин өссөн байна. Эдгээр тоо өдөр тутам өссөөр байгаа тул ийм төрлийн гэмт хэргээс урьдчилан сэргийлэх шаардлагатай байгаа талаар тэрээр мэдээллээ. Мөн түүнчлэн тэрээр "Нийтийн албан тушаалтан хүний хувийн мэдээллийг олон нийтийн сүлжээнд зөвшөөрөлгүйгээр нийтлэх, түгээхийг хориглоно" гэсэн 6.3 дахь заалтыг нийгэм буруу ойлгож шүүмжилсэн тул хассан. Мөн нэр бүхий сэтгүүлчдийн санал болгосноор "олон нийтэд нөлөө бүхий этгээдүүд" гэдэг энэ заалтыг хуулийн төслөөс хассан" гэсэн тайлбарыг хийсэн юм.

Л.Гантөмөр АН-ын даргаар томилогдлоо

Ардчилсан Намын даргыг сонгох санал хураалтын тооллого дуусахад Л.Гантөмөр АН-ын даргаар сонгогдлоо. УИХ-ын гишүүн асан С.Баярцогт, З.Нарантуяа нар түүнтэй өрсөлдсөн юм. Л.Гантөмөр мөрийн хөтөлбөрөө танилцуулахдаа “Зургаан жилийн өмнө намын даргад нэр дэвшиж байхдаа 21 аймгийг тойрч намын гишүүд, дэмжигчидтэй уулзаж байсан. Аймгийн соёлын төвд болсон хурал ч ийм замбараагүй болоогүй. Өнөөдрийн хурлыг би эв нэгдлийн хурал гэж харж байна. С.Эрдэнэ, Х.Баттулга нарыг ирээсэй гэж хүссэн.

Миний намын даргад өрсөлдөж байгаа шалтгаан бол бөөнөөрөө ард түмнээсээ дараагийн сонгуульд санал авахын тулд хүчээ нэгтгэх. Ардчиллыг буцаан сэргээе гэж бодож байгаа бол өнгө мөнгөнд битгий хууртаарай. Би Сүхбаатар дүүргээс дөрвөн удаа УИХ-д сонгогдохдоо мөнгө тарааж байгаагүй. Харин ард түмэнтэйгээ гар барьсан" гэсэн юм. Мөн намын дарга болбол хамгийн түрүүнд сонгуулийн тогтолцоог өөрчлөх амлалт өгчээ.

Сангийн яаманд ажиллаж байсан мэргэжилтэн М.Дөлгөөнийг нүүрсний хэргээр баривчиллаа

Нүүрсний хэрэгт холбогдуулан нэр бүхий 17 хүний нэрийг АТГ-аас өнгөрөгч арванхоёрдугаар сарын 13-нд олон нийтэд зарласан билээ. Тэдний долоо нь УИХ-ын гишүүн байснаас зарим нь эрүүгийн хэрэг үүсгэж, яллагдагчаар татах саналыг НПГт гаргасан.Үндсэндээ 50 гаруй хүн нүүрсний хэрэгт холбогдон шалгагдаж байна. Хамгийн сүүлд буюу нэгдүгээр сарын 18-наас 19-ныг шилжих шөнө АТГ-аас нүүрсний хэрэгт холбогдуулан М.Дөлгөөнийг сэжигтнээр татан баривчилжээ.

Ц.Хуланг нэг сарын хугацаанд цагдан хорих шийдвэр гарлаа

Яруу найрагч, зохиолч Ц.Хуланг тагнуулын байгууллагаас 461 дүгээр хорих ангид 48 цаг саатуулсан. Түүнийг үргэлжлүүлэн хорих эсэхийг өчигдөр /2023.01.19/ Сүхбаатар дүүргийн Эрүүгийн хэргийн анхан шатны шүүхэд хэлэлцэж, түр хойшлуулсан. Улмаар шүүх 2023.01.20-ны өдөр хэлэлцэж, нэг сарын хугацаагаар цагдан хорих шийдвэр гаргалаа.

Энэхүү баривчилгааны талаар Хууль зүй, дотоод хэргийн сайд Х.Нямбаатарын мэдээлснээр ТЕГ-ын дарга П.Одонбаатартай утсаар холбогдсон. Яруу найрагч Ц.Хуланг баривчилсан асуудлыг тодруулахад манай харъяаллын хэрэг дээр шалгах шаардлага үүссэн тул баривчилсан. Эрүүгийн хуульд заасан Төрийн эсрэг гэмт хэрэгт холбогдуулан шалгаж байгаа хэмээх хариу өгчээ. Түүнийг 2017 онд Монгол Улсын Ерөнхийлөгч Х.Баттулга захирамж гаргаж, Соёл, шашны бодлогын зөвлөхөөр томилж байв.

Эрүүгийн хэргийн 19.4 дүгээр зүйл.Гадаадын тагнуулын алба, байгууллага, иргэнтэй хууль бусаар хамтран ажиллах заалтад "Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс 15 жил хүртэл хугацаагаар хорих ял шийтгэнэ.

Энэ гэмт хэргийг төрийн өндөр албан тушаалтан, төрийн нууцыг итгэмжлэгдэн хариуцсан, албан тушаал, ажил үүргийн хувьд мэдсэн этгээд үйлдсэн бол 12 жилээс 20 жил хүртэл хугацаагаар, эсхүл бүх насаар хорих ял шийтгэнэ. Тайлбар нь гадаад улсын тагнуулын албатай хамтран ажиллахаар тохиролцсон боловч төрийн зохих байгууллагад сайн дураараа даруй мэдэгдсэн, учирч болзошгүй хохирлоос урьдчилан сэргийлэхэд туслалцаа үзүүлсэн иргэний үйлдэл нь өөр гэмт хэргийн шинжгүй бол ялаас чөлөөлнө" гэж заасан.

М.Анхцэцэг 12 дахь удаагаа аварга боллоо

“UNC-2023” 15 спорт холбооны нэгдсэн УАШТ-ий хүндийг өргөлтийн эмэгтэйчүүдийн -87 кг-ын жинд Монгол Улсын Гавьяат тамирчин Мөнхжанцангийн Анхцэцэг торолгүй түрүүллээ. Тэрээр огцмоор 95, түлхэлттэй 100 кг-ыг эхний өргөлтөөрөө амжилттай болгоход хангалттай байв. Тэрээр 76 кг-аас дээш бүх жинд Монгол Улсын дээд амжилтыг эзэмшдэг билээ. Түүний жинд “Увс нуур” клубийн Г.Чинболор, Г.Марал нар мөнгө, хүрэл медалийн болзол хангалаа. Харин +87 кг-ын жинд “Увс нуур”-ын О.Баянтуул ойрын өрсөлдөгчөөсөө 37 кг илүү өргөж, алтан медаль хүртлээ.

Замын-Үүдэд зам тээврийн ноцтой осол гарлаа

Замын-Үүдээс Эрээн рүү орох том оврын машинуудын оочер нэмэгдэж дөрвөн урсгалтай замын нэг чиглэлийн урсгалыг нийтэд нь машинууд хааснаас болж жолоочид урсгал сөрж байгаа аж. Үүнээс болж өнөөдөр /2023.01.17/ 22:30 цагийн үед зам тээврийн ноцтой осол гарч олон хүн бэртэж гэмтэж, эд хөрөнгөөрөө хохирчээ. Эх сурвалжийн мэдээлж буйгаар цагдаа нар дуудлага авсан даруйдаа 10-15 минутын дараа ослын газар ирсэн бөгөөд бэртэж гэмтсэн хүмүүсийг яаралтай тусламжаар эмнэлэг рүү авч явсан байна. Мөн осол гаргасан жолооч согтуу зугтаасан ажээ.

Одоогоор ослын газар хэмжилтүүдийг хийж байгаа аж. Урьдчилсан байдлаар урсгал сөрсөн машинуудаас болж осол гарсан гэдгийг эх сурвалж хэлэв. Хятад хилээ нээснээс хойш хил гарахаар дугаарлаад байсан 730 тээврийн автомашиныг өдөрт 50-60-аар гаргасаар өнөөдөр дуусч байгаа аж. Ингээд энэ өдрөөс хойш дугаар олгохгүйгээр буюу түрүүлж ирсэн нь түрүүлж хил гарах журмаар зорчих болсныг мэдэгдсэн байна. Ингэж дугаарлалтыг үгүй болгосныг мэдэгдсэний дараа олон тооны автомашинууд зам дээр оочерлож, нэг урсгалыг хаасан байна. Мөн жолоочдод:

Улсын хилээр нэвтрэх ачааны авто машинууд хүнд даацын замын нэгдүгээр эгнээнд цувж зогсоно. Цагаан зураас давсан болон давхарлаж зогссон авто машинуудыг дарааллаас гаргана.
Бүртгэгдсэн 753 ачааны авто машины дараалал дууссан тул хоцорсон, орох хугацаандаа орж чадаагүй авто машинууд шинээр дараалалд зогсоно.
Дарааллын гадуур зогссон (давхарлаж зогссон, цагаан зураас давсан, Шунхлай клонкын баруун талд зогссон, Дардан логистекийн төвийн үүдэнд зогссон, оочер дайрах санаа зорилготой) тээврийн хэрэгслүүд маргааш өглөөний 08:00 цагаас өмнө машинаа авахгүй бол улсын дугаарыг тэмдэглэж, Авто тээврийн байгууллагаас олгосон биржийн бичгээ цуцлах, Цагдаагийн байгууллага торгуулын арга хэмжээ авна.
Замын-Үүд олон улсын авто замын боомт хэвийн горимд шилсэн тул оочер дараалал бүртгэх ажил дахиж хийгдэхгүй.
Бослого хөдөлгөөнд уриалан дуудаж боомтын хөдөлгөөнд саад учруулсан иргэдийг олж тогтоон, хуулийн хариуцлага хүлээлгэнэ гэдгийг зохицуулагчдаас анхааруулжээ.

Зайсан тойрууг нэг чигийн хөдөлгөөнд орууллаа

Кайсан тойруугын гудамжны замын хөдөлгөөнд өөрчлөлт оруулж байгаа талаар Замын хөдөлгөөний удирдлагын төвөөс мэдээлсэн. Замын хөдөлгөөний удирдлагын төвийн хөдөлгөөн зохицуулалт, хяналтын хэлстийн дарга Б.Намуу "Зайсан тойрууг нэг чигийн хөдөлгөөнд оруулах, ХААИС-ийн зүүн хойд уулзварын хөдөлгөөнийг өөрчлөлт нэгдүгээр сарын 21-ны 06.00 цагаас эхлэх бөгөөд Улаанбаатар хотын гол төвлөрлийн бүс болох Их, бага тойруугаас урагшаа буюу Зайсан чиглэлтэй зорчих хөдөлгөөн их байдаг. Туулын гүүрний нэг эгнээ замын урсгал нь Зайсан чиглэлийн хөдөлгөөн зохион байгуулалт хийх явцад хүндрэл учруулдаг. Тэгвэл энэ өөрчлөлтийг хийснээр ХААИС-ийн уулзвар дээр огтлолцол үүсэхгүйгээр Зайсан тойруугаар тойрч, баруунаас зүүн чиглэлд зорчих тээврийн хэрэгслүүд ХААИС-ийн гэрлэн дохион дээр хүлээлтгүйгээр баруун эргэж явах боломжтой болох юм. Энэ нь уулын замын ачааллыг бууруулаад зогсохгүй, бусад зорчих хэсгийн ачааллыг мөн бууруулж, уулзварын нэвтрэх чадвар 35.5 хувиар сайжирна" гэлээ.

BOLOD ДОЛОО ХОНОГИЙН ТОЙМ: Ардчилсан нам даргатай болж, сошиал орчин дахь "хяналт"-ын тухай хуулийг баталлаа
Tweet
Bolod.mn