Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд хамгийн их сенсаци дагуулсан койны асуудлыг шалган, IHC койны эзэд болох О.Мөнхжин, Б.Гантиг, Б.Эрхэмбаяр нарыг 48 цагийн хугацаатай хорьж, шалгасан. Улмаар тэдний гэр болон ажлын байранд нэгжлэг хийжээ. Мөн түүнчлэн цахим орчинд олны шүүмжлэлд өртөөд байсан цахим орчинд хүний эрхийг хамгаалах тухай хууль болон түүний дагалдах 4 хуульд Монгол Улсын Ерөнхийлөгч У.Хүрэлсүх бүхэлд нь хориг тавьсан. Улмаар 2 дугаар сарын 1-нээс хуулийн үйлчлэл түдгэлзэхийг Монгол Улсын Ерөнхийлөгчийн Тамгын газрын дарга Я.Содбаатар онцоллоо.

Олон нийтийн сүлжээнд хүний эрхийг хамгаалах тухай хуульд хориг тавьснаар үйлчлэх хугацаа нь түтгэлзлээ

Монгол Улсын Ерөнхийлөгч У.Хүрэлсүх Үндсэн хуульд заасан бүрэн эрхийнхээ хүрээнд Олон нийтийн сүлжээнд хүний эрхийг хамгаалах тухай хууль, түүнийг дагалдах 4 хуульд хориг тавилаа. Тус хуулийг дагалдуулан Харилцаа холбооны тухай хуульд нэмэлт өөрчлөлт оруулах тухай, Кибер аюулгүй байдлын тухай хуульд нэмэлт өөрчлөлт оруулах тухай, Хувь хүний мэдээллийг хамгаалах тухай хуульд нэмэлт өөрчлөлт оруулах тухай, Татварын ерөнхий хуульд нэмэлт өөрчлөлт оруулах тухай хуулийг УИХ-ын чуулганаар нэгдүгээр сарын 20-ны өдөр эцэслэн баталсан юм. Монгол Улсын Ерөнхийлөгч хуульд бүхэлд нь хориг тавьсан талаар Ерөнхийлөгчийн Тамгын газрын дарга Я.Содбаатар өнөөдөр хэвлэлийн хурал хийж, "Дээрх нэр бүхий хуулийг хэлэлцэх явцад олон нийт, судалгааны болон мэргэжлийн байгууллага, иргэдийн санаа бодлыг бүрэн тусгаагүй гэж үзсэн. Хүний эрх, эрх чөлөөтэй холбоотой хуулийн заалт дээр хүний эрхийг хамгаалахад тодорхой бодлогоор, хуулийн хүрээнд ажиллаж, хуулийг хэлэлцэн батлахдаа, тухайн эрх ашиг нь хөндөгдөж буй хуулийн этгээд, эрдэмтэн судлаач, мэргэжлийн байгууллага, ард иргэдийн санаа бодол, оролцоог хангах ёстой"-г дурдав.

УИХ дарга чуулганы хуралдааны дэгийн тухай хуульд заасны дагуу эдгээр хуулийг 2023 оны 1 дүгээр сарын 26-нд ирүүлснээр Ерөнхийлөгч У.Хүрэлсүх нэр бүхий хуульд бүхэлд нь хориг тавьсан үндэслэлийг Ерөнхийлөгчийн Хууль зүйн бодлогын зөвлөх А.Бямбажаргал тайлбарлалаа. Тэрбээр, “Хуулиудыг 1 дүгээр сарын 18-нд УИХ-ын даргад өргөн мэдүүлсний дараа хэлэлцэж, 2 хоногт эцэслэн баталсан. Ингэхдээ олон нийтийн оролцоог хангаагүй, хууль ёсны ашиг сонирхол нь хөндөгдөж буй этгээдийн саналыг аваагүй. Үндсэн хуульд заасан “Иргэд, байгууллага, хуулийн төслийн талаарх саналаа хууль санаачлагчид уламжилна” гэсэн зүйл, “Ардчилсан ёс, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим”-ыг зөрчсөн. Төр иргэнийхээ өмнө хүний эрх, эрх чөлөөг хангахуйц эдийн засаг, нийгэм, хууль зүйн болон бусад баталгааг бүрдүүлэх, хүний эрх, эрх чөлөөтэй тэмцэх, хөндөгдсөн эрхийг сэргээн эдлүүлэх үүргийг хүлээдэг. Хүн эрх, эрх чөлөөгөө эдлэхдээ, үндэсний аюулгүй байдал, бусад хүний эрх, эрх чөлөөг хохироож, нийгмийн хэв журмыг гажуудуулж болохгүй хэмээн үндсэн эрхээ эдлэх хязгаарлалтыг тогтоосон байдаг. УИХ хүний эрх, эрх чөлөөтэй холбоотой хууль тогтоомжийг батлахдаа ард олон, эрдэмтэн судлаач, мэргэжлийн байгуулагын санал авч, хэлэлцүүлэг зохион байгуулж, хууль дээдлэх суурь зарчимд нийцүүлэн батлах ёстой”-г тэмдэглэсэн юм. УИХ-ын Дэгийн тухай хуульд зааснаар Ерөнхийлөгч хуулийг хүлээн авснаас хойш ажлын 5 өдөрт багтаан хориг тавих зохицуулалттай.

Дээрх хуулийг 1 дүгээр 26-ны өдөр хүлээн авснаас хойш ажлын 5 хоног гэвэл 2 дугаар сарын 1-нд хориг тавих сүүлийн хугацаа дуусна. Гэтэл УИХ хуулийг дагаж мөрдөх хугацааг батлахдаа 2 дугаар сарын 1-ний өдөр буюу Ерөнхийлөгчийн хориг тавьж болох, Үндсэн хуулиар олгогдсон үндсэн бүрэн эрхэд халдах байдлаар зохицуулсныг буруутгаж байгаа аж. Монгол Улсын Ерөнхийлөгч УИХ-ын чуулганы завсарлагааны үеэр хориг тавьбал хаврын чуулганаар хэлэлцэнэ. Чуулган 3 дугаар сарын 15-нд эхэлснээс хойш 14 хоногт хоригийг хэлэлцэх ёстой. Хоригийг хүлээж авах эсэх нь УИХ-ын асуудал. Хуульд бүхэлд нь хориг тавьсан тул 2 дугаар сарын 1-нээс хуулийн үйлчлэл түдгэлзэхийг Монгол Улсын Ерөнхийлөгчийн Тамгын газрын дарга Я.Содбаатар онцоллоо.

Өргөө амаржих газрын дарга асан Ж.Энхцэцэгийг албан тушаалд нь эргүүлэн томилох санал тавьжээ

Эрүүл мэндийн сайд С.Чинзориг өнгөрсөн долоо хоногт "Өргөө амаржих" газрын захирал асан Ж.Энхцэцэгийг албан тушаалд нь эргүүлэн тавих санал тавьжээ. Гэхдээ одоогоор албан ёсны шийдвэр гараагүй байгаа юм байна. ЗГХЭГ-аас тус газарт хяналт шалгалт хийсэн бөгөөд шалгалтын шийдвэр дүн хараахан гараагүй байгаа юм байна.

Эргэн сануулахад, Ж.Энхцэцэгийг ёсзүйн алдаа гаргасан, эмч ажилчдыг шалтгаангүй ажлаас халсан гэх үндэслэлээр эрүүл мэндийн сайд асан С.Энхболд ажлаас халах тушаал гаргасан байдаг.

Таксины жолоочийг хутгалж гэмтээн, орон нутаг руу авч зугтжээ

Цагдаагийн байгууллагад энэ оны нэгдүгээр сарын 31-нээс хоёрдугаар сарын 1-нд шилжих шөнө “Орхон аймгийн Баян-Өндөр суманд байрлах Бүсийн оношилгоо эмчилгээний төвд хутгалуулсан хүн ирлээ” гэх дуудлага, мэдээлэл бүртгэгджээ. Дуудлага, мэдээлэлд тус аймгийн цагдаагийн газраас шалгалтын ажиллагаа явуулахад 19 настай, эрэгтэй А гэгч нь нэгдүгээр сарын 31-ний өдрийн 23.00 цагийн орчим Баянзүрх дүүргийн нутаг дэвсгэрээс "Тоёота" маркийн тээврийн хэрэгсэлд сууж, Чингэлтэй дүүргийн нутаг дэвсгэр 5 буудлын орчим хүргүүлэхдээ жолооч 24 настай эрэгтэй З гэгчтэй төлбөрөөс үүдэн маргалджээ.

Улмаар хохирогчийг зодож, хоолой хэсэгт нь нэг удаа зүсэж, хэвлий болон гарын хэсэгт нийт дөрвөн удаа хутгалан, гарыг нь хүлж, түүнийг тээврийн хэрэгслийн тээшинд хийн, Улаанбаатараас Орхон аймгийн чиглэлд авч явсан байна. Гэмт этгээд Дархан-Уул аймгийн нутаг дэвсгэрээр дайран өнгөрөх үедээ хохирогчийг машины тээшнээс гарган, суудалд суулгаж, цааш явсаар Орхон аймгийн Бүсийн оношилгоо эмчилгээний төвд “Найзтайгаа хувийн таарамжгүй харилцаанаас болж маргалдаад, хутгалчихлаа” гэж хэлэн, хохирогчийг үлдээгээд гарчээ. Энэ үед нь Орхон аймгийн цагдаагийн газрын алба хаагчид түүнийг саатуулан, хэрэгт мөрдөн шалгах ажиллагаа явуулж байна. Хохирогч одоогоор эмнэлэгийн тусламж үйлчилгээ авч байна гэж Цагдаагийн ерөнхий газраас мэдээллээ.

Мөнгөн ус худалдан борлуулахаар завдсан хэргийг илрүүллээ

Экологийн цагдаагийн албанаас энэ оны 01 дүгээр сарын 30-ны өдөр Химийн хорт аюултай бодис болох “Мөнгөн ус”-ыг Улсын хилээр нууцаар нэвтрүүлэн бусдад их хэмжээний мөнгөөр худалдан борлуулах гэж байсан Г.Б нарын үйлдлийг илрүүлэн 2 кг мөнгөн усыг хураан авч, мөрдөн шалгах ажиллагаа явуулж байна. Дээрх иргэдийн үйлдэл нь Эрүүгийн хуулийн 24.3 дугаар зүйлд заасан “Химийн хорт, аюултай бодисыг хууль бус эргэлтэд оруулах” гэмт хэрэг юм. Монгол Улсын Засгийн газрын 2007 оны 95 дугаар тогтоолоор мөнгөн ус болон мөнгөн усны органик, органик бус нэгдлүүдийг “Монгол Улсад ашиглахыг хязгаарласан химийн бодисын жагсаалт”-д оруулж, Байгаль орчны сайдын 2008 оны тушаалаар мөнгөн усыг ашигт малтмалын олборлолт, боловсруулалтад ашиглахыг хориглосон. Мөнгөн ус болон түүний нэгдэл агуулсан бодис нь хүрээлэн байгаа орчныг ноцтой бохирдуулж, хүн, мал, амьтны биед амьсгалын зам, арьс болон хоол хүнс, идэш, тэжээлээр дамжин нэвчин орж, амьсгалын тогтолцоо, нүд, арьс салстыг хордуулж, төв мэдрэлийн системийг гэмтээж, удмын санд нөлөөлж удаан хугацааны туршид хордуулдаг онцгой хортой бодис юм. Мөнгөн ус нь Дэлхийн хэмжээнд 1 сая гаруй химийн хорт аюултай бодис байдгаас хүн, амьтан, мал, байгаль орчинд үзүүлэх хортой чанараар 6-д эрэмбэлэгддэг бөгөөд хүний амьсгалын тогтолцоо, нүд, арьс салстыг хордуулж, төв мэдрэлийн системийг гэмтээж, удмын санд нөлөөлдөг химийн хорт аюултай бодис юм.

"Их Бит" ХХК-ийн хувьцаа эзэмшигчид О.Мөнхжин, Б.Гантиг, Б.Эрхэмбаяр нарыг саатуулан шалгаж эхэллээ

Зах зээлд IHC койн гаргах замаар иргэдээс 30 тэрбум төгрөг татан төвлөрүүлсэн "Их бит" ХХК-ийн хувьцаа эзэмшигч нарыг цагдаагийн байгууллагаас шалгаж эхэлсэн талаар бид өмнө мэдээлсэн. Тэднийг койноор татан төвлөрүүсэн хөрөнгийг зориулалтын бусаар зарцуулсан болон зах зээлд манифуляци хийж олсон орлогыг угаасан гэх хэрэгт холбогдуулан шалгаж буй юм. Ингэхдээ өчигдөр О.Мөнхжин болон бусад хэд хэдэн хүний гэр, оффист нэгжлэг хийсэн. Тэгвэл өнгөрсөн шөнө тус хэрэгт шалгагдаж байгаа О.Мөнхжин, Б.Гантиг, Б.Эрхэмбаяр нарыг баривчлан 461-р ангид саатуулан шалгаж эхэлсэн байна. Харин Б.Идэр-Одын хувьд өнгөрөгч оны гуравдугаар сарын 30-нд Автрали улс руу гарсан байна. Түүний хувьд эл компанийн 25 хувийн хувьцааг эзэмшдэг байсан.

Золбин нохой буугаар устгахгүй үйлдвэрт унтуулахыг иргэд дэмжлээ

Нийслэлийн удирдах ажилтнуудын шуурхай зөвлөгөөний үеэр Улаанбаатар хотын Ерөнхий менежер М.Баяраа Цагаан даваанд нохой унтуулдаг үйлдвэр байгуулах талаар ярив. Тэрбээр, нэг хэсэг мөнгөний асуудалтай холбоотойгоор нохой устгалын ажил зогссон байсныг сэргээсэн. Нэг нохой устгах зардал 12 мянгыг 16 мянган төгрөг болгох саналыг холбогдох байгууллагаас ирүүлсэн. Нийслэлийн хэмжээнд дөрвөн компани нохой устгадаг. Цагаан даваанд нохой унтуулдаг үйлдвэр байгуулахаар ажиллаж байгаа. Буу барьж нохой устгах нь зохисгүй гэсэн юм. Иргэд ч үүнийг дэмжиж байгаагаа олон нийтийн сүлжээнд илэрхийлжээ. Мөн үүнтэй зэрэгцээд иргэд цахим хуудастаа өнгөрсөн саруудад нохой, муур устгал хийгдэхгүй байсан бол энэ сараас хашаандаа байгаа нохойг зөвшөөрөлгүй устгаж байгаа талаар бичиж байгаа. Үүнд Улаанбаатар хотын Захирагчийн ажлын албаны Орчны бохирдол, хог хаягдлын удирдлагын газраас дараах тайлбарыг өгсөн юм. Тодруулбал, өнгөрсөн намар Орос, Украины дайн болон шатахууны үнэ нэмэгдсэнтэй холбоотойгоор бууны сум хомсдож, өнгөрсөн наймдугаар сард үнэ нь нэмэгдсэн. Тиймээс тухайн үед нохой, муурыг бага хэмжээгээр буюу дуудлагын дагуу устгаж байсан. Харин одоо золбин нохой, муур устгах ажил хэвийн үргэлжилж байна. Нийтийн эзэмшлийн гудамж талбайд явж байгаа нохой хүзүүвч, ямар нэгэн таних тэмдэггүй тохиолдолд эзэнгүй, золбин нохой гэж устгах арга хэмжээ авдаг. Үүнд хариуцлага хүлээх боломжгүй. Түүнээс айлын хашаанд байгаа гэрийн тэжээвэр амьтныг бид устгадаггүй. Иргэн зайлшгүй шаардлагатай тохиолдолд дуудлага өгч, мал эмнэлгийн газарт хандаж эм, тариагаар унтуулах, эсвэл манайд хандаж устгуулах тохиолдол бий. Эзэнтэй нохойг устгалын компани дур мэдэж бусдын хашаанд байгаа эзэнтэй нохойг устгадаггүй болохыг нийслэлийн Захирагчийн ажлын албанаас мэдээллээ.

Нийтийн байранд гал гарч нэг иргэн угаартан амиа алджээ

Нийтийн байранд гал гарч нэг иргэн угаартан амиа алджээ Тодруулбал, Цагдаагийн байгууллагад 2023 оны хоёрдугаар сарын 01-ний өдрийн 08:49 цагт "Баянзүрх дүүргийн хоёрдугаар хорооны нэг дүгээр гудамжны нийтийн байранд гал гарч байна” гэх дуудлага, мэдээлэл бүртгэгдсэн. Энэ дагуу тус дүүргийн цагдаагийн газрын хоёрдугаар хэлтсээс шалгахад тус нийтийн байрны галлагааны өрөөнд гал гарч улмаар 50 настай, эмэгтэй ” гэгч угаартан нас барж, 19 настай, эрэгтэй М угаартсан байсныг эмнэлгийн байгууллагад хүргэжээ. Түүнчлэн гал гарсан шалтгааныг тогтоохоор мөрдөн шалгах ажиллагаа явуулж байгаа аж. Иймд иргэд та бүхэн гарч болзошгүй галын аюулаас урьдчилан сэргийлэхийг холбогдох байгууллагаас анхаарууллаа.