BOLOD.MN сайт долоо хоног бүрийн ням гарагт улс төр, эдийн засгийн хүрээнд өрнөж буй онцлох үйл явдлыг тоймлон хүргэдэг уламжлалтай. Эдгээр өдрүүдэд Дорнод аймгийн нутаг дэвсгэрт олон тооны үхсэн зээрийн сэг зэмийг шатаах гэж байгаад баригдсан гэх асуудалд орсон Детрочайн дачин тамсаг ХХК-ийг шалгахаар УИХ-аас ажлыг хэсэг байгуулан шалгалтын ажиллагаа явагдаж байна.

Мөн түүнчлэн виртуал хөрөнгийн зах зээлд койн токен гаргаж бусдыг залиласан байж болзошгүй асуудлаар IHC койн гаргагч О.Мөнхжинг баривчлан саатуулсан. Тэгвэл О.Мөнхжин болон тэдгээрийг цагдан хорих, таслан сэргийлэх арга хэмжээг өөрчилж, Монгол Улсын хилээр гарахыг хязгаарлах хязгаарлалт тогтоон таслан сэргийлэх арга хэмжээ авч шйийдвэрлэсэн байна. Эдгээр болон бусад онцлох үйл явдлуудыг тоймлон хүргэж байна.

Зээрийн сүрэг олноороо үхсэн шалтгааныг тодруулахаар ажиллаж байна

Өнгөрсөн амралтын өдрүүдэд Дорнод аймагт үхсэн зээрийн сүргийг их хэмжээгээр булж байсан үйлдлийг илрүүлжээ. Монгол Улсын Засгийн газар ажлын хэсгийг яаралтай байгуулсан бөгөөд үүнд ХЗДХ-ийн Сайд Х.Нямбаатар, ХХААХҮ-ийн Сайд Х.Болорчулуун, БОАЖ-ын Сайд Б.Бат-Эрдэнэ нар багтжээ.

Тэгвэл энэ үеэр иргэдийн төлөөлөл болох Б.Цэгмидийг “Петрочайна дачинтамсаг” компанийн ажилчид хүч хэрэглэсэн бичлэг цацагдсан. Тэгвэл эл хэргийг шалгаж байгаа эсэхийг цагдаагийн байгууллагаас тодруулахад "Дорнод аймгийн цагдаагийн газраас шалгаж байгаа. Гэмтлийн зэрэг гарвал эрүүгийн хэрэг үүсгэнэ, гэмтлийн зэрэг гарахгүй бол зөрчлийн хэрэг нээж хариуцлага тооцно" гэх мэдээллийг өглөө.

Чингис хаан Музейн ойролцоо зам тээрийн ноцтой осол гарчээ

Чингэлтэй дүүргийн дөрөвдүгээр хорооны нутаг дэвсгэр "Чингис хаан” музейн ойролцоо зам тээврийн ноцтой осол гарчээ. Тодруулбал, өнөөдөр буюу 2023 оны гуравдугаар сарын 25-ны өдрийн өглөөний 09 цаг 40 минутын орчимд хоёр суудлын автомашин мөргөлдсөн зам тээврийн осол гарсан байна.

Энэ дагуу Тээврийн цагдаагийн албаны алба хаагчид хэргийн газрын үзлэг, шинжилгээ хийж, өдгөө мөрдөн шалгах ажиллагаа үргэлжилж байгаа аж. Ослын улмаас нэг иргэн эрүүл мэндийн байгууллагад тусламж үйлчилгээ авч байгаа талаар эх сурвалж мэдээллээ. Тиймээс иргэдийг замын хөдөлгөөнд анхаарал болгоомжтой оролцохыг сэрэмжлүүлэх үүднээс энэхүү мэдээллийг нийтэллээ.

Золбин нохой муур устгах ажлын төлбөрийг 24.000 төгрөг буюу нэг дахин нэмэгдүүлнэ

Золбин нохой, муур устгах ажлын төлбөрийг ₮24,000 болгохоор НИТХ-ын Зөвлөлд өнөөдөр танилцуулжээ. 12,000 төгрөгийн зардал нь тус ажлыг гүйцэтгэхэд хүрэлцэхгүй, устгалын компаниуд алдагдалтай ажиллах болсон байна. Нийслэлийн нутаг дэвсгэрт золбин нохой, муурын тоо ихсэж, нохой муураас үүдэлтэй өвчлөл нэмэгдэх, хүн мал амьтан нохойд хазуулсан тоо өсөх хандлагатай. Золбин нохой муурын тоо буурахгүй, эзэнтэй нохой муурын зохицуулалт байхгүй байгаа нь иргэд нохойд хазуулах, бэртэх нөхцөлийг бий болгож байгаа аж.

НИТХ-ын 2016 оны 96-р тогтоолоор баталсан 12,000 төгрөгийн зардал нь тус ажлыг гүйцэтгэхэд хүрэлцэхгүй, устгалын компаниуд алдагдалтай ажиллах болсон байна. Иймд уг ажлын нэгж тарифыг хөдөлмөрийн хөлс, нийгмийн даатгалын шимтгэл, дизель түлш, сумны үнийн өсөлттэй уялдуулан тооцоо, судалгааг хийж 24,000 төгрөг болгон шинэчлэн батлуулахаар танилцуулсан байна.

ЭЦА-аас бусдыг заналхийлж хутгалсан 20 гаруй бүлэг этгээдийг шуурхай баривчиллаа

ЦЕГ-ын Эрүүгийн цагдаагийн албанаас олон удаагийн дээрэм, заналхийлэл, хүн амьны хэрэгт ял эдэлж байсан 20 гаруй бүлэг этгээдийг шуурхай баривчилжээ. Тодруулбал, 2023 оны 03 дугаар сарын 22-ны өдөр иргэн Г нь бусдын биед санаатайгаар хоёр удаа хутгалж, хүнд гэмтэл учруулсан байна. Иргэн Г нь өмнө нь удаа дараа ял шийтгэл эдэлж байсан бөгөөд бусадтай бүлэглэн дээомийн болоод хүн амьны хэрэг үйлддэг байжээ.

Тухайн бүлэг этгээдүүд нь өөрсдийгөө эрүүгийн тал дээр нөлөө бүхий хэмээн бусдад ярьж, бусдын эд хөрөнгийг авахаар сүрдүүлж, заналхийлдэг нь шалгалтын ажиллагаагаар тогтоогджээ. Дээрх бүлэглэн үйлдсэн хэргийн талаар мөрдөн шалгах ажиллагаа хийгдэж байгаа аж.

Таксины жолоочид халдан амь насыг нь хохироосон ноцтой хэрэг гарчээ

Хан-Уул дүүргийн нутаг дэвсгэрт хүний амь нас хохироож, таксины жолоочид халдсан этгээдийн үйлдлийг цагдаагийн алба хаагчид шуурхай таслан зогсоолоо. Тодруулбал, 2023 оны 03 дугаар сарын 28-ны өдрийн 14 цаг 40 минутын үед иргэн “Г” нь дүү “Б”-ийн хамт такси үйлчилгээнд явж байх үед Баянгол дүүргийн нутаг дэвсгэрээс Хан-Уул дүүргийн нутаг дэвсгэрт хүргүүлэхээр үйлчлүүлсэн 45 настай, эрэгтэй “Б” гэгч нь Хан-Уул дүүргийн 20 дугаар хорооны нутаг дэвсгэрт зорчих үедээ жолоочийн хамт явсан 25 настай, эрэгтэй “Б”-ийн биед хутгаар зүсэж амь насыг нь хохироон, улмаар жолооч “Г”-ийн биед халдахаар хөөж байх үед нь тус дүүргийн цагдаагийн алба хаагчид таслан зогсоож саатуулан мөрдөн шалгах ажиллагаа явуулж байна.

О.Мөнхжин, Б.Гантиг нарыг суллав

“Бүлэглэж, албан тушаалын байдлаа урвуулан ашиглаж виртуал хөрөнгийн үнэ цэнэд нөлөөлөх нийтийн хүртээл болоогүй дотоод мэдээллийг ашиглаж виртуал хөрөнгийн арилжаанд оролцсон” гэх гэмт хэрэгт буруутгагдаж, Эрүүгийн хуулийн тусгай ангийн 18.9 дүгээр зүйлийн 2 дахь хэсгийн 2.1, 2.2-т зааснаар эрүүгийн хэрэг үүсгэн, яллагдагчаар татагдсан О.Мөнхжингийн өмгөөлөгч нараас түүнд авсан цагдан хорих таслан сэргийлэх арга хэмжээг өөрчлүүлж, өөр төрлийн таслан сэргийлэх арга хэмжээ авхуулах тухай хүсэлтийг шүүхэд өгсөн байв. Сүхбаатар дүүргийн Эрүүгийн хэргийн анхан шатны шүүх өчигдөр /2023.03.28/ яллагдагч О.Мөнхжингийн өмгөөлөгч нарын гаргасан хүсэлтийг хянан хэлэлцээд, түүнд авсан цагдан хорих таслан сэргийлэх арга хэмжээг үргэлжлүүлэх бодитой нөхцөл шалтгаан тогтоогдсонгүй гэж үзэж, өмгөөлөгч нараас гаргасан хүсэлтийг хүлээн авч, яллагдагч О.Мөнхжинд авсан цагдан хорих таслан сэргийлэх арга хэмжээг өөрчилж, Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэлээ. Мөн Б.Гантигийг О.Мөнхжинтэй ижил заалтаар яллагдагчаар татсан. Прокуророос яллагдагч Б.Гантигт авсан цагдан хорих таслан сэргийлэх арга хэмжээний хугацааг сунгуулах тухай саналыг Сүхбаатар дүүргийн Эрүүгийн хэргийн анхан шатны шүүхэд ирүүлснийг тус шүүх өчигдөр хянан хэлэлцээд, яллагдагч Б.Гантигийн эрүүл мэндийн байдлыг харгалзан үзэж түүнд авсан цагдан хорих таслан сэргийлэх арга хэмжээний хугацааг сунгахаас татгалзаж шийдвэрлэсэн юм.

BOLOD ДОЛОО ХОНОГИЙН ТОЙМ: Петрочайн Дачин тамсаг ХХК-ийн шалгаж ажлын хэсгийг УИХ-аас томиллоо
Tweet
Bolod.mn