Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд Төр нийгмийн нэрт зүтгэлтэн Б.Зориг агсны мэндэлсэн өдөр тохиож мөр зэрэгцэн зүтгэж байсан улс төрчид Зориг агсны хөшөөнд цэцэг өргөлөө. Түүнчлэн Б.Зориг агсны амь насыг хохироосон хэрэгт гүтгэгдэж байсан Т.Чимгээ, Б.Содномдаржаа нарыг хэргийг хэрэгсэхгүй болголоо.

Т.Чимгээ, Б.Содномдаржаа нарын хэргийг хэрэгсэхгүй болгожээ

ХЗДХ-ийн сайд Х.Нямбаатар Б.Содномдаржаа, Т.Чимгээ нарт холбогдох хэргийг хэрэгсэхгүй болгосон бөгөөд хохирлоо нэхэмжлэх боломжтой гэж мэдээллээ. Энэ үеэрээ 2022 оны тавдугаар сарын 16, зургадугаар сарын 30, арваннэгдүгээр сарын 8, мөн 2023 оны нэгдүгээр сарын 18-нд мөрдөгчөөс энэ хэрэгт яллагдагчаар татсан Б.Содномдаржаа, Т.Чимгээ нарт хамаарах тогтоолыг хэрэгсэхгүй болгох саналаа дөрвөн удаа Нийслэлийн прокурорын газарт явуулсан. Нийслэлийн прокурорын газраас тодорхой ажиллагаа хийгдэх талаар даалгаврууд бичигдэж ирж байсан талаар мэдээлсэн. Мөн түүнчлэн хамгийн сүүлд буюу 2023 оны гуравдугаар сарын 23-нд Нийслэлийн прокурорын газарт Цагдаагийн ерөнхий газраас Т. Чимгээ, Б.Содномдаржаа нарт холбогдох үйлдлийг хэрэгсэхгүй болгох саналаа дахин хүргүүлсэн юм байна.

Өнөөдөр Нийслэлийн прокурорын газраас мөрдөгчийн ирүүлсэн санлыг үндэслэн Цагдаагийн ерөнхий газраас Т.Чимгээ, Б.Содномдаржаа,Ц. Амгаланбаатар нарт эрүүгийн хэрэг дээр яллагдагчаар татсан тогтоллыг хэрэгсэхгүй болгож шийдвэрлэж байгаа аж. Ингэснээр хэрэг нь хэрэгсэхгүй болсон хүмүүсийн тухайд удаан хугацаанд зөрчигдсөн эрхээ хамгаалуулах, шүүгч, прокурорын хууль бус үйл ажиллагаанаас үүссэн хохирлыг иргэний хувиар нэхэмжлэх эрх зүйн үндэс бүрдэж байгаа ажээ. Түүнчлэн энэ хэрэг дээр Гүйцэтгэх хуулийн хууль тогтоомж зөрчсөн гэдэг асуудал давхар шалгагдаж байгаа бөгөөд хууль бусаар бусдыг мөрдөн шалгасан гэх эрүүгийн хэрэг бүртгэлийн хэрэг үүсгэх саналаа цагдаагийн байгууллагаас прокурорт тавихаар бэлтгэл ажил хангагдаж байгаа юм байна. .

Хууль зүйн сайд энэ үеэрээ энэхүү кейс олон улсын хүний эрхийн байгууллагуудын цаашид судалж, дахин ийм үйлдэл гаргахгүй байх маш том кейс болж байгаа. Хүнийг хэлмэгдүүлж, хүчээр эрүүдэн шүүж, гүйцэтгэх ажлын хууль тогтоомж зөрчиж, мөрдөн шалгасан, ял оногдуулсан хэргийг үргэлжлүүлж шалгана гэдгийг хэлсэн ба улс төрийн зорилготой энэ хэргийг хэн үйлдэв гэдгийг цаашид мөрдөн шалгах ажиллагаа үргэлжилж байгаа гэдгийг онцоллоо.

“Жи Тайм Корперэйшн” ХХН-ын хохирогч нарт мөнгийг нь буцаан олгожээ

Хоёр жилийн хугацаанд 12,000 иргэнд 22 тэрбум төгрөгийн хохирол учруулсан “Жи тайм” сүлжээний хэргийг гурван шатны шүүхээр хэлэлцсэн.

Шүүхийн шийдвэрийн дагуу уг хэргийн хохирогч нарт Мөрдөн байцаах албаны төрийн сан дахь тусгай дансанд байршуулсан 7,089,588,699.37 төгрөгийг (Долоон тэрбум наян есөн сая таван зуун наян найман мянга зургаан зуун ерэн ес төгрөг гучин долоон мөнгө) хувь тэнцүүлэн олгох шийдвэрийг гаргасан юм.

Ерөнхий сайд 2012 оны 4-р сараас хойш төрсөн хүүхэд бүрийг 1072 хувьцаа эзэмшигч болгох үүрэг өгчээ

“Эрдэнэс Тавантолгой” компанийн 1072 хувьцаатай холбоотой асуудлуудыг шийдвэрлэх үүргийг холбогдох газруудад Ерөнхий сайд өгчээ. Энэ талаар ЗГХЭГ-ын дарга Д.Амарбаясгалан дараах мэдээллийг өглөө. Монгол Улсын Засгийн газраас УИХ-ын 8 дугаар тогтоолын дагуу 1072 хувьцаа эзэмшигчдийн асуудлыг нэг мөр шийдэх асуудлыг судлаад өнгөрсөн 7 хоногийн Засгийн газрын хуралдаанаар Монгол Улсын Ерөнхий сайдын зүгээс тодорхой үүрэг чиглэл өгсөн.

Монгол Улсын иргэн бүр 1072 хувьцаа эзэмшигч болох, 2012 оны 04 дүгээр сарын 11-нээс хойш төрсөн хүүхэд бүрийг 1072 хувьцаа эзэмшигч болгохыг үүрэг болгосон. “Эрдэнэс таван толгой” компанийн хувьцааг нээлттэй хөрөнгийн биржээр арилжаалагдах боломжгүйгээр гаргасан байна. Энэ том уул уурхайн компанийн хувьцаа нэг дор төвлөрөхөөс урьдчилан сэргийлэх, иргэн бүр тус компаниас ногдол ашиг хүртдэг байх боломжийг бүрдүүлэх зорилготой байсан учраас арилжаалах боломжгүй юм.

2015 онд Оюутны сургалтын төлбөр, ахмадуудын хувьцааг нь шууд худалдаж авах зэрэг 1072 хувьцааг мөнгөжүүлэх ажлыг тодорхой түвшинд хийсэн.. Энэ нь цаашдаа бүх иргэн хувьцаа эзэмшигч болоод явах нөхцөлд доголдол үүсгээд байгаа. 1072 хувьцаа эзэмшигчид ногдол ашгийг хүртэж чадахгүй явдал ч байсан. Тиймээс Засгийн газрын зүгээс иргэн бүр хувьцаа эзэмшдэг байх, жил бүр ногдол ашгийг тогтмол авдаг байх асуудлыг шийдэхээр байгаа гэдгийг мэдээлсэн. Монгол Улсад иргэн бүр “Эрдэнэс таван толгой” компанийн хувьцаа эзэмшигч болох ба нас нөгчсөн, Монгол Улсын иргэншлээс гарсан тохиолдолд хувьцаа эзэмшигчийн эрх хаагддаг байх зохицуулалт хийх аж.

Хөгжлийн банкийг шалгах түр хороо татан буугдлаа

Хөгжлийн банкийг шалгах УИХ-ын Түр хороо байгуулагдаад жил гаруй болж байна. Тэгвэл УИХ-ын мөрдөн шалгах хорооны

хянан шалгагч, шинжээч нар УИХ-ыд тайлангаа тавьснаар өчигдөр буюу энэ сарын 20-д татан буугдлаа. Түр хорооны дарга Б.Энхбаяр “Бид ганцхан Хөгжлийн банкийг шалгаагүй юм байна лээ. Сүүлийн 20-30 жилийн улс төр-бизнес-банк санхүүгийн бүлэглэлүүдийг илчилсэн. Идэж уугаад байна гээд байсан болохоос биш ЯАЖ гэдгийг мэдэхгүй байсан юм. Тэдний схемийг нь илчилсэн. Ард түмнийхээ нүдийг нээсэн юм. Ард түмнээ сэрээсэн юм. Энэ зориг шаардсан ажил байсан юм шүү” гэсэн байр суурийг илэрхийлсэн юм.

С.Эрдэнэ АН-ын Тамгыг албан ёсоор Л.Гантөмөрт хүлээлгэн өглөө

Ардчиллын алтан хараацай Төр нийгмийн нэрт зүтгэлтэн С.Зориг агсаны мэндэлсэн өдрөөр АН нэг зорилгын төлөө нэгдмэл байр суурьтай ажиллахаа илэрхийллээ. Энэ өдөр АН-ын дарга асан С.Эрдэнэ намынхаа шинэ удирдлага Л.Гантөмөрт тамгаа албан ёсоор хүлээлгэн өгөв. Тэрээр "Монгол оронд ардчиллын салхийг хагалж, ардчиллыг эхлүүлж байсан лидерүүдийн маань нэг С.Зориг агсны төрсөн өдөр өнөөдөр тохиож байна.

Өнөөдрийн ардчилал, шударга ёс, эрх чөлөө, хувийн өмч гээд Ардчилсан намын үнэт зүйл, үзэл санааны эзэн болсон энэ хүнийхээ төрсөн өдөр хүндэтгэл үзүүлж байна. Энэ өдөр бид АН-ын дотоодод үүсээд байсан зарим үл ойлголцолд цэг тавьж, нэгдмэл, нэг удирдлагатай, нэг зорилготой, цаашаа улс эх орны өмнө тулгамдаад байгаа нийгэм, эдийн засгийн олон чухал асуудалд ханцуй шамлан бэлдэж орох ажлыг эхлүүлсэн өдөр тохиож байна. Олон чухал асуудлын шийдлийг олж, улс орны ардчилал шударга ёсны тугийг өргөж манлайлж явж чадна гэж итгэж байна. Цаашдаа улс орныхоо сайн сайхны төлөө хамт нэгдмэл, нэг санаа зорилготойгоор тэмцэх болно гэдгээ илэрхийлье” гэсэн юм.

Монголоос БНХАУ-руу иргэд суудлын автомашинтайгаа нэвтрэх журмын төслийг хүргүүлжээ

Хилийн боомт нээлттэй болсноос хойш манай иргэд суудлын автомашинаараа БНХАУ руу зорчих хүсэлт их гаргаж байгаа юм байна. Тиймээс Зам, тээврийн хөгжлийн яамнаас Монгол, Хятадын хооронд иргэд суудлын автомашинаар зорчих нөхцлийг бүрдүүлэхээр ажиллаж байна гэдгээ мэдээллээ. Энэ хүрээнд хоёр талын холбогдох байгууллагуудын төлөөллийг оролцуулсан уулзалт зохион байгуулж, “Монгол, Хятадын хилийн авто замын боомтоор суудлын автомашиныг нэвтрүүлэх журам”-ын төслийг танилцуулжээ.

Энэхүү журмын төслийг Гадаад харилцааны яамаар дамжуулан Хятадын талтай тохирохоор ажиллаж байна. Түүнчлэн Монгол Улсын Засгийн газар, БНХАУ-ын Засгийн газар хоорондын автотээврийн хэлэлцээрт суудлын автомашинаар харилцан зорчих зохицуулалтыг тусгахыг зорьж байгаа гэдгээ дуулгасан юм. Энэ асуудал ажил хэрэг болвол Замын-Үүд, Булган, Бичигт зэрэг урд хөрштэй хиллэдэг боомтуудаар иргэд суудлын автомашинтайгаа чөлөөтэй нэвтрэх бололцоо бүрдэнэ.

Мөн БООМТЫН СЭРГЭЛТ-ийн хүрээнд Байтаг боомтыг нээж байнгын ажиллагаатай болгосноор баруун хилээр жилд 5 сая тн нүүрс экспортлох, БНХАУ-ын ШУӨЗО-ны Цонж аймагтай иргэд ААН-ийн хамтын ажиллагаа өргөжиж эдийн засаг тэлэх нөхцөл бүрдэнэ гэж тооцоолжээ.

BOLOD ДОЛОО ХОНОГИЙН ТОЙМ: Ардчилсан нам албан ёсоор даргатай болж, Т.Чимгээ Б.Содномдаржаа нарыг хэргийг хэрэгсэхгүй болгосон ДОЛОО ХОНОГ
Tweet
Bolod.mn