BOLOD ДОЛОО ХОНОГИЙН ТОЙМ: ОХУ-ын уран гулгагчид Монгол ирж, Англи хэлийг нэгдүгээр ангиас эхлэн заах санал дэмжигдсэн ДОЛОО ХОНОГ

2023-05-06

Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явцыг тоймлон хүргэдэг уламжлалтай. Эдгээр өдрүүдэд нэр бүхий УИХ-ын гишүүдийн дэвшүүсэн нэгдүгээр ангид англи хэлийг үзэх санал байнгын хороогоор дэмжигдсэн. Улмаар цахим сүлжээнд иргэдийн дунд уг асуудлыг зөв, буруу гэх олон асуудал хөвөрлөө. Түүнчлэн шувуу ажиллагаагаар Флиппин улсаас авчирсан сайд асан Т.Бадамжунайг хориг хугацааг дахин нэг сараар сунгах шийдвэр гаргасан байна. Эдгээр болон бусад онцлох үйл явдлыг тоймлож байна.

Ч.Ундрам: Англи хэлийг нэгдүгээр ангиас эхлэн заах саналдэмжигдлээ

УИХ-ын гишүүн Ч.Ундрам Г.Амартүвшин, Х.Булгантуяа, Э.Батшугар, Т.Доржханд, Ц.Мөнх-Оргил, Ц.Мөнхцэцэг, Ч.Хүрэлбаатар, Ж.Чинбүрэн, Д.Цогтбаатар нарын гишүүдийн хамт "Англи хэлний боловсролыг дэмжих" лобби бүлгийг өнгөрсөн онд байгуулжээ. Тэгвэл байнгын хорооны хурлын дараа англи хэлийг нэгдүгээр ангиас нь заах асуудал дэмжигдсэн талаар УИХ-ын гишүүн Ч.Ундрам мэдээлэв.

Тэрээр, "Англи хэлний боловсролын лобби бүлэг байгуулж ажилласны үр дүн өнөөдөр гарч бүх сургууль 1-р ангиас англи хэл заах асуудал Байнгын хороогоор дэмжигдлээ. Энэ зорилгыг минь мохоож янз бүрийн байдлаар дайрах, доромжлох, харлуулах ажил зөндөө хийгдсэн ч бууж өгөөгүй. Дэлхийд өрсөлдөх чадвартай монгол хүн бэлдэх чухал заалтаа авч гарлаа. Дэмжиж ойлгосон бүх хүмүүст баярлалаа" хэмээн мэдээлжээ.

Жолооч нар маргалдаж, санаатайгаар нэгнийхээ машиныг мөргөжээ

Нийслэлийн Баянгол дүүргийн 9 дүгээр хороонд байрлах орон сууцны гадна, хүүхдийн талбайн зогсоол дээр "Хүмүүс нэгнээ автомашинаар мөргөөд байна" гэх дуудлага цагдаагийн байгууллагад өчигдөр 21:05 цагийн үед иржээ.

Дуудлагын дагуу шалгахад Lexus-470, Hyundai Porter маркийн автомашины жолооч нар хоорондоо маргалдаж санаатайгаар нэгнийхээ автомашиныг мөргөсөн байв. Дээрх хоёр автомашины жолооч нарын согтуурлын зэргийг хэмжих багажаар шалгахад архи, согтууруулах ундааны зүйл хэрэглээгүй байв. Зөрчлийг БГД-ийн цагдаагийн газраас шалгаж байна.

Сайд асан Т.Бадамжунай цагдан хорих хугацааг 30 хоногоор сунгажээ

Сайд асан Т.Бадамжунайг өнгөрсөн дөрөвдүгээр сард Филиппин улсаас авчирч “гэмт хэрэг үйлдэж болзошгүй талаар үндэслэл бүхий баримт, мэдээлэл байгаа” гэсэн үндэслэлээр нэг сарын хугацаагаар цагдан хорьсон.

Эх сурвалжийн мэдээлснээр, тавдугаар сарын 2-нд шүүх хурал болж, түүний цагдан хоригдох хугацааг 30 хоногоор сунгах шийдвэр гаргасан байна. Нийслэлийн прокурорын газраас Т.Бадамжунайг эрх мэдэл, албан тушаалын байдлаа урвуулан ашиглах, хахууль өгөх, мөнгө угаах гэмт хэрэгт холбогдуулан яллагдагчаар татжээ.

“Уран гулгалтын одод Монголд” шоу тоглолтод оролцох уран гулгагчид Монголд ирлээ

Олимп нийтийн биеийн тамир спортын үндэсний хороо, Биеийн тамир спортын улсын хорооны санаачлагатай, Монгол Улсын засгийн газрын дэмжлэгтэй ОХУ-ын шилдэг уран гулгагчдын шоу үзүүлбэр энэ сарын 6,7 ны өдрүүдэд Мөсөн өргөөнд болно. Уг үйл ажиллагаанд оролцох ОХУ-ын уран гулгагчид энэ сарын 4-ны өдөр Монголд ирлээ.

Засгийн газрын хэрэгжүүлэгч агентлаг-Биеийн тамир, спортын улсын хороо /БТСУХ/ хөрш орнуудтай хамтын ажиллагаагаа өргөжүүлэх зорилгоор өнгөрсөн жилийн дундаас эхлэн яриа хэлэлцээр хийж ирсний үр дүн ийнхүү шоу тоглолт Монголд анх удаа болох гэж байна.

Биеийн тамир спортын улсын хороо, “Стэп Арэна” ХХК хамтран энэхүү шоу тоглолт болон уран гулгалтын мастер класс арга хэмжээнд ОХУ-ын олимп, дэлхий, Европ, Азийн уран гулгалтын аварга, медальтнууд оролцож, ганцаарчилсан, хосын, бүжгийн төрлөөр үзүүлбэр үзүүлэхээр болсон.

Тухайлбал, ганцаарчилсан төрлөөр Олимпын аварга, Европын аварга Камила Валиева, Дэлхийн болон Европын аварга Елизабета Туктамышева, Европын аварга Евгений Семененко, Дмитрий Алиев, хосын төрлөөр Европын 2 удаагийн аварга, олимпын мөнгөн медальт Евгения Тарасова, Владимир Морозов нар бидний зүрх сэтгэлийг хөглөж, нүдийг баясгана.

Таван жилийн өмнө 13 настай охиныг хөнөөж нуусан ноцтой хэргийн сэжигтнийг олж тогтоожээ

Цагдаагийн байгууллагад 2018 оны наймдугаар сарын 07-ны өдөр Хөвсгөл аймгийн Рэнчинлхүмбэ сумын Далайн зах 4 дүгээр баг, Товгын ар гэх газраас 13 настай охин “М” хонь хариулахаар яваад сураггүй алга болсон мэдээлэл бүртгэгдэж байжээ. Тухайн үед охин гэрээсээ дөрөв орчим км-ын зайд битүү ой тайга бүхий газар хонио хариулж байсан гэдэг. Улмаар тус аймгийн цагдаагийн газраас сумын Засаг даргын тамгын газар болон нутгийн иргэд, мэргэжлийн анги, байгууллагуудтай хамтран эрэн хайх ажиллагааг 150 хүний бүрэлдэхүүнтэйгээр зохион байгуулж, үр дүнд хүрээгүй учир хэрэг бүртгэлтийн хэрэг нээн, тус хэргийг шалгах ажлын хэсэг байгуулж, мөрдөн шалгах ажиллагааг тасралгүй зохион байгуулсан байна.

Мөрдөн шалгах ажиллагааны явцад хохирогчийн амь насыг өмнө нь хүчиндэх гэмт хэрэгт 2 удаа ял шийтгэгдэж байсан 38 настай, эрэгтэй “Б” гэгч хохироосон байж болзошгүй нөхцөл байдал тогтоогдсон бөгөөд сэжигтэй этгээдийг эрэн сурвалжлах ажиллагааг зохион байгуулж, түүнийг Өмнөговь аймгийн Ханбогд сумын Цагаан хад гэх газраас олж тогтоожээ. Гэмт этгээд 5 жилийн өмнө хохирогчийн амь насыг хохироон хэргийн газраас 3 километр газарт зөөвөрлөн модон дунд нуусан байсныг илрүүлэн мөрдөн шалгах ажиллагааг үргэлжлүүлж байна.

Дэлхийн хэвлэлийн эрх чөлөөний өдөр тохиолоо

НҮБ-ын Ерөнхий Ассамблейн шийдвэрээр 1993 онд жил бүрийн тавдугаар сарын 3-ны өдрийг Дэлхийн хэвлэлийн эрх чөлөөний өдөр болгон тэмдэглэх шийдвэр гаргасан билээ.

Дэлхийн хэвлэлийн эрх чөлөөний өдрийг тэмдэглэх санаачилгыг Африкийн төлөөлөгчид анх гаргасан. Тавдугаар сарын 3-ны өдрийг ч тохиолдлоор сонгоогүй. 1991 оны энэ өдөр Намибийн нийслэл Виндхук хотод Африкийн орнуудын чөлөөт хэвлэлийн төлөөлөгчид чуулж, дэлхийн улс орнуудад хэвлэлийн эрх чөлөөг хангахыг уриалж байжээ.

Энэ өдөр хэвлэлийн эрх чөлөөний ач холбогдлыг олон нийтэд сурталчлан ойлгуулах, улс орнуудын төр, засагт иргэд олон нийтийн үзэл бодлоо илэрхийлэх эрхийг хүндэтгэх үүргийг сануулах, мөн ажил үүргээ гүйцэтгэж яваад амиа алдсан сэтгүүлчид, хэвлэл мэдээллийн салбарын ажилтнуудыг дурсан хүндэтгэдэг юм.