Дорнод аймгийн Дашбалбар сумын нутагт орших Улааны холимог металлын ордод олборлолтын үйл ажиллагаа явуулдаг Хятадын 100 хувийн хөрөнгө оруулалттай Шинь Шинь ХХК-ийн ажилтан

эрүүл мэндээрээ ноцтой хохирсон асуудлыг иргэн Э.Болд олон нийтэд мэдээлсэн. Ер нь Шинь Шинь ХХК Ерөнхийлөгч асан Н.Багабандийн үед тусгай зөвшөөрлөө авсан цагаас эхлээд тус компанийн нэр холбогдсон хууль бус үйл ажиллагааны талаарх цөөнгүй баримтууд сөхөгдөж байсан ч шүүгч, прокурорууд, гүйцэтгэх эрх мэдлийн томоохон албан тушаалтнуудын нөлөөгөөр өнөөдрийг хүртэл хариуцлага хүлээлгүй явж ирсэн гэх мэдээллүүд байдаг.

Харин энэ удаагийн асуудал эрдэс баяжмал хольц савлагчаар тус компанид ажиллаж байсан иргэн Н 2023 оны нэгдүгээр сарын 06-ны өдөр ээлжийн ахлахынхаа өгсөн үүргийн дагуу гэрэлтүүлэггүй химийн агуулах руу орж азотын хүчилтэй савыг өргөж гарах гэтэл хагархай савнаас хүчил асгарч, түүний нүүр бие нь түлэгджээ. Уг асуудлыг үйлдвэрлэлийн осол гэж Дорнод аймгийн холбогдох шатны байгууллагууд тогтоосон байтал компанийн зүгээс эрүүл мэндээрээ ноцтой хохирч II зэргийн түлэгдэлтэй болсон ажилтандаа тусламж үзүүлэх нь бүү хэл харин ч эсрэгээрээ сахилгын шийтгэл ногдуулсан гэж мэдээлсэн /Энэ талаарх мэдээллийг ЭНД ДАРж үзнэ үү/. Улмаар хохирогчийн ах Э.Болд “Шинь Шинь” ХХК-ийн захирал Ли Жэнгэд хандан Монгол Улсын Хөдөлмөрийн тухай хууль зөрчсөн бүх тушаалуудаа зогсоохыг, мөн Монгол Улсын хууль, тогтоомжийг давсан Хөдөлмөрийн дотоод журмаараа нэг ч Монгол ажилтанд сахилгын шийтгэл ногдуулах, ажлаас чөлөөлөх дарамт, шахалт үзүүлэх, түүнчлэн ажилтныг өөрийн хүсэлтээр нь өргөдөл бичүүлэх нөхцлийг бүрдүүлэхгүй байх зэрэг шаардлагыг хүргүүлсэн байна.

Шаардлагад:

“ШИНЬ ШИНЬ” ГХОХХК-ИЙН ЕРӨНХИЙ ЗАХИРАЛ ЛИ ЖЭНГ ТАНАА

Шаардлага хүргүүлэх тухай

Монгол Улсын иргэн Энхжаргал овогтой Болд миний зүгээс танай компанийг Монгол Улсын Их Хурлаар 2021 оны 07 дугаар сарын 02-ны өдөр батлан мөрдүүлж буй Монгол Улсын Хөдөлмөрийн тухай /Шинэчилсэн найруулга/ хуулийн 8 бүлгийн 120 дугаар зүйл, 121 дүгээр зүйл, 122 дугаар зүйл, 123 дугаар зүйлийг тус тус ноцтой зөрчсөн гэж үзэж байгаа тул танай компанийн Хүний нөөц боловсруулан холбогдох албан тушаалтнаар батлуулж, Монгол Улсын ажилчдад сахилгын шийтгэл ногдуулан хэрэгжүүлж буй бүх тушаалуудыг өнөөдрөөс эхэлж зогсоох шаардлагыг Танд хүргүүлж байна!.

Мөн үүнтэй холбоотой танай Компанийн Монгол Улсын хууль, тогтоомжийг давж шийдвэр гаргадаг “Хөдөлмөрийн Дотоод Журам”-аар дахин “ганц” ч Монгол Улсын ажилтанд сахилгын шийтгэл ногдуулж, ажил олгогчийн санаачилагаар ажлаас чөлөөлөх эсхүл шахалт /Айлгах, дарамтлах, хүчирхийлэх г.м/ үзүүлж, ажилтныг өөрийн хүсэлтээр нь өргөдөл бичүүлэх нөхцөлийг бүрдүүлж, ажлаас чөлөөлөхгүй байх шаардлагыг үүгээр давхар хүргүүлж байна!.

Хэрэв дээрх шаардлагуудыг танай Компанийн Гүйцэтгэх захирал Сонг Гүй Минг тэргүүтэй холбогдох албан тушаалтнууд биелүүлээгүй тохиолдолд, Монгол Улсын хууль, тогтоомжийн дагуу холбогдох нотлох баримтыг хавсралтын хамт шүүхэд хүргүүлж, шийдвэрлүүлнэ гэдгээ үүгээр мэдэгдье!.

Иймд иргэн миний “Монгол хүний төлөө” гаргасан саналуудыг минь хүлээн авч, зохих журмын дагуу шийдвэрлэж, гүйцэтгэлийн тайланг ирүүлхийг шаардаж байна!.

Баярлалаа Шинь Шинь ХХК!.

Хүндэтгэсэн,

Монгол Улсын иргэн /Э.Болд/ гэжээ.

Тэгвэл Шинь Шинь ХХК-иас тухайн ослын талаар энэ сарын 6-ны өдөр мэдэгдэл гаргажээ.

May be an illustration of text

Энэ мэдээлэл үндэслэлтэй эсэхэд эргэлзэх хэд хэдэн шалтгааныг харж болохоор байгаа юм. Тухайлбал, Н нь өглөө болсон явдлын дараа тэр даруйдаа бус, нэлээд хожуу, өдөр эмнэлэгт хүргэгдэж анхны тусламж авсан гэдэг. Н-ийг гэм буруутайд тооцсон анхны дүгнэлтээсээ буцаж үйлдвэрлэлийн осол гэдгийг хүлээн зөвшөөрсөн "компанийн үйлдвэрлэлийн ослыг судлан бүртгэх комисс"-ынхон хэрэв энэ асуудал олон нийтэд ил болоогүй бол анхны дүгнэлт дээрээ хэвээр үлдэх байсан уу? Бас нэгэн асуудал бол хөдөлмөрийн чадвар алдалт тогтоогдоогүй тул нөхөн төлбөр олгогдох эрх зүйн боломжгүй гэжээ. Компанийн гэрэлгүй агуулахад байсан хүчилтэй сав нь хагарсанд Н буруугүй биз дээ? Хүний нүүр маш хүчтэй химийн бодисонд түлэгдсэн хохирлыг хэрхэн яаж тодорхойлж байгаа нь тодорхойгүй? Өөрөөр хэлбэл, комиссын дүгнэлтэд хамгийн чухалд тооцогдох байсан хагарч цуурсан савны тухай огт дурдагдаагүй нь анхаарал татаж байна.

Н-ийн хувьд одоо ч ажлаа хийж байгаа учраас дуудсан цагт нь очиж тайлбар сонссон байж болно. Гэхдээ тус компаниас дур мэдэн дүгнэлт хийж мэдээлэл гаргаж байгаа нь бас л хууль зөрчсөн үйлдэл гэж үзэх боломжтой гэнэ.

Энэ бол сав цуурсан байхад маск зүүгээгүй байжээ гэж ойлголцоод дуусах асуудал биш. Тиймээс иргэн Э.Болд өнгөрсөн долоо хоногт Ерөнхийлөгчийн зөвлөхүүдтэй уулзаж, УИХ-ын зарим гишүүдэд дээрх үйл явдлын баримтуудыг хүлээлгэж өгчээ. Гэвч асуудлыг шийдэхэд багагүй цаг хугацаа ордог, гэхдээ аль болох хурдлуулъя гэхээс өөр дорвитой зүйл олж сонсоогүй байна. Мөн тэрээр өнөөдөр хүний эрхийн байгууллага болон Засгийн газарт баримт материалуудаа хүлээлгэн өгч байгаа юм байна.

“Чи өөрөө мөнгөө гаргаад эмчлүүлчих. Дараа нь баримтаа аваад ирэхээр компани гаргаж өгье” гэсэн Шинь Шинь ХХК болон оношилгоо, эмчилгээгээ хийлгэчих юм сан гэх хүсэл, ажилтайгаа үлдэх сэтгэл хоёртоо шаналж яваа хохирогч ажилтны асуудлыг ингээд дуусгаж болохгүй. Эрх мэдэлтнүүдийн хамгаалалтаар энэ хэргийг дараад өнгөрөх вий.

BOLOD.MN

"Шинь Шинь" ХХК-ийнхны дүгнэлтээр хүчлийн сав цуурсан нь хамаагүй, хохирогч буруутай
Tweet
Bolod.mn