Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд соёлын салбарынхан цалингаа нэмүүлэхийг шаардан жагслаа. Мөн түүнчлэн Ч.Маралмаагийн давж заалдах шатны шүүх хурал болж түүнд оногдуулсан шүүхийн шийдвэрийг хэвээр үлдээн шийдвэрлэлээ.

“Жолооны үнэмлэх гаргана, ангилал дарж өгнө, эрх сэргээнэ” хэмээн бусдыг мэхэлж 62 сая төгрөг залилжээ

Монгол Улсын хэмжээнд тээврийн хэрэгсэл жолоодох эрх олгох үйл ажиллагаанд ашиглагдаж байсан “Жолоочийн бүртгэл мэдээллийн сан”, “Онолын цахим шалгалтын систем”, “Жолоодох эрх олгох шалгалтад хамрагдах иргэдийн мэдээллийн систем” зэрэг программ хангамжуудыг нэгтгэн, шинэчлэн боловсруулж 2023 оны 01 дүгээр сарын 09-ны өдрөөс үйл ажиллагаанд нэвтрүүлснээр мэдээллийн нууцлал, аюулгүй байдал хангагдаж, жолоодох эрхийн онолын шалгалтыг бүрэн цахимжуулж, тээврийн хэрэгсэл жолоодох эрх олгох сургалтын байгууллагад суралцаагүй иргэдэд жолоодох эрх, ангилал нэмэгдүүлэх боломжийг хязгаарласан.

Цагдаагийн байгууллагаас цахим орчинд “жолооны үнэмлэх гаргана, ангилал дарж өгнө, эрх сэргээнэ” гэх мэдээллийг шалгахад Хэнтий аймагт оршин суух бүртгэлтэй, эрхэлсэн тодорхой ажилгүй иргэн Г.О гэгч нь 130 иргэнээс жолооны үнэмлэх гаргаж өгнө, ангилал нэмэгдүүлнэ гэж залилан мэхэлж 62.470.000 төгрөгний хохирол учруулсан хэрэгт мөрдөн шалгах ажиллагааг явуулж хэргийг 2023 оны 04 дүгээр сарын 22-ны өдөр шүүхэд шилжүүлсэн.

Мөн Дорнод аймагт оршин суух бүртгэлтэй, эрхэлсэн тодорхой ажилгүй иргэн А.А гэгч нь дээрх төрлийн зар мэдээллийг цахим орчинд нийтлэж 12 иргэнийг залилан мэхэлсэн болохыг тогтоон мөрдөн шалгах ажиллагааг явуулж байна. Иргэдийг дээрх төрлийн гэмт хэрэгт өртөж, хохирохоос урьдчилан сэргийлэх зорилгоор “Гэрэгэ киоск” системын төлбөрийн баримтад гэмт хэргээс урьдчилан сэргийлэх сэрэмжлүүлэг байршуулан мэдээллийг тогтмол хүргэж байна.

Иймд иргэд та бүхэн “жолооны үнэмлэх гаргана, ангилал дарж өгнө, эрх сэргээнэ” гэх мэдээлэлд хууртаж, гэмт хэргийн хохирогч болохоос урьдчилан сэргийлэхийг цагдаагийн байгууллагаас сэрэмжлүүлж байна.

Анхан шатны шүүхээс Ч.Маралмаад оноосон ялыг хэвээр үлдээлээ

Долоон машин мөргөж, хоёр хүн гэмтээсэн зам тээврийн ноцтой осол гаргасан Ч.Маралмаад холбогдох эрүүгийн хэргийн давж заалдах шатны шүүх хурал өнөөдөр боллоо.

Шүүх хурлаар түүнд оноосон анхан шатны шүүхийн шийдвэрийг хэвээр үлдээсэн байна. 2023 оны гуравдугаар сард Баянзүрх дүүргийн Эрүүгийн хэргийн анхан шатны шүүхээс Ч.Маралмаад тээврийн хэрэгсэл жолоодох эрхийг гурван жилээр хасах, зорчих эрхийг хоёр жилээр хязгаарлах ял ногдуулсан юм.

"Францын Ерөнхийлөгч Э.Макрон энэ сарын 21-22 нд Монгол Улсад төрийн айлчлал хийнэ" гэж албан ёсоор мэдэгдлээ

Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Франц Улсын Ерөнхийлөгч Эммануэл Макрон Монгол Улсад 2023 оны 05 дугаар сарын 21-22-ны өдрүүдэд төрийн айлчлал хийнэ. Тус айлчлал нь Франц Улсаас Төрийн тэргүүний түвшинд хийж буй анхны түүхэн айлчлал юм.

Айлчлалын үеэр Монгол Улсын Ерөнхийлөгч Ухнаагийн Хүрэлсүх, Бүгд Найрамдах Франц Улсын Ерөнхийлөгч Эммануэл Макрон нар албан ёсны хэлэлцээ, уулзалт хийж хоёр орны харилцааг шат ахиулах, хамтын ажиллагааг өргөжүүлэх, эдийн засаг, хөрөнгө оруулалтыг нэмэгдүүлэх чиглэлээр болон олон улсын харилцааны зарим асуудлаар ярилцана. Мөн хоёр улсын харилцааг ногоон эрчим хүч, зам тээвэр, эрүүл мэнд, хөдөө аж ахуй, соёл, боловсрол, хүмүүнлэг зэрэг салбарт тэлж, харилцан ашигтай хамтарсан төслүүд хэрэгжүүлэх талаар санал солилцоно.

Уулзалт, яриа хэлэлцээний үеэр “Хүнсний хангамж, аюулгүй байдал”, “Тэрбум мод” үндэсний хөдөлгөөн, “Ерөнхийлөгчийн илгээлт 2100” хөтөлбөрийн хүрээнд францын талтай хамтран ажиллах талаар мөн ярилцаж, хэлэлцээний дүнгийн талаар хэвлэлд мэдээлэл өгнө.

Соёл, урлагийн салбарынхан цалингаа нэмэхийг шаардаж, Соёлын сайдад хандлаа
Урлагийн салбарын төлөөллүүд өнөө өглөө яамны гадаа жагсаж байсан боловч Соёлын сайд Ч.Номин салбарын төлөөлөлттэй уулзана хэмээн УДЭТ-т ирсэн. Гэвч эхэндээ Соёлын дэд сайд, төрийн нарийн бичгийн дарга нар уулзахаар ирэхэд тэд хүлээж авахгүй хэмээн эсэргүүцлээ илэрхийлж байсан ч Ч.Номин сайд хэсэг хугацааны дараа уулзалтад ирсэн юм.

Соёл урлагийн салбарынхан цалин хангамж хүрэлцэхгүй, дундаж цалингаас доогуур байгаад анхаарал хандуул, цалингаа нэмүүлэхээр тэдний төлөөлөл өнөө өглөө жагссан юм. Тэдэнтэй Соёлын яамны албаны хүмүүс хүлээн авч уулзаж, асуудлыг хэлэлцлээ. Жагсагчид хөдөлмөрийн хөлсөө нэмэгдүүлэн, дундаж цалингийн түвшинд хүргэж, цалингаа нэмэгдүүлэхийг шаардаж байна.

Соёлын сайд Ч.Номин "Сүүлийн 20 жил соёлын салбар яамгүй байсан учир асуудлууд нь бугшсан, ямар ч бодлого, шийдвэргүй байлаа. Бусад салбараас зөвхөн соёлын салбарынханы цалин нэмэгдүүлэх гэж байна хэмээх шүүмжлэл ирж байна. Соёлын салбарын ажилтнуудын цалинг энэ онд багтаан нэмнэ" гэв.

Цэцэрлэгийн багш хүүхэд зодсон байж болзошгүй хэрэг бүртгэгджээ

Цагдаагийн байгууллагад Баянгол дүүргийн 24 дүгээр хороонд байрлах цэцэрлэгт “Багш нь миний хүүгийн биед халдсан байна” гэх дуудлага, мэдээлэл бүртгэгджээ.

Дээрх мэдээлэлд тус дүүргийн цагдаагийн газрын нэгдүгээр хэлтсээс шалган шийдвэрлэх ажиллагаа явуулж байгаа аж. Мөн хүүхдийн эрх зөрчигдсөн байж болзошгүй талаарх мэдээллийг дүүргийн Гэр бүл, хүүхэд залуучуудын хөгжлийн газар, Хорооны хамтарсан багт хүргүүлээд байна.

BOLOD ДОЛОО ХОНОГИЙН ТОЙМ: Урлаг соёлын салбарынхан Соёлын сайд Ч.Номинд шаардлага хүргүүлж жагслаа
Tweet
Bolod.mn