Францын ерөнхийлөгч Э.Макрон "их долоо"-ийн уулзалтаас шууд Монголыг зорьсон нь ОХУ, уран хоёртой холбоотой юу

2023-05-23

Франц Улсын Ерөнхийлөгч Эммануэл Макрон Монголд хийх төрийн айлчлалаа эхлүүллээ. Хоёр орны хамтын ажиллагаа

түншлэлийн талаар хэлэлцэнэ гэгдэж уг айлчлал манай оронтой өөр хэд хэдэн асуудлаар чухал ач холбогдолтой болж байгаа. Ерөнхийлөгч Э.Макрон Японы Хирошима хотод болсон “Их долоо”-гийн бүлгийн уулзалтаас шууд Монголыг зорьж ирж байгаа. Ийн төрийн айлчлал хийж байгаа нь Монголоос илэрсэн шинэ ураны орд, ОХУ-ын асуудалтай холбоотой гэнэ.

-ЕРӨНХИЙЛӨГЧ Э.МАКРОНЫ ЕРӨНХИЙЛӨГЧ У.ХҮРЭЛСҮХТЭЙ ХИЙСЭН ХЭЛЭЛЦЭЭРИЙН ДҮН-

БНФУ-ын Ерөнхийлөгч Э.Макрон өчигдөр Монгол Улсад газардаж, Гадаад харилцааны сайд Б.Батцэцэг, БНФУ-аас Монгол Улсад суугаа Онц бөгөөд Бүрэн эрхт Элчин сайд Себастиен Сүрүн нарын албаны хүмүүс тосож авсан. Ерөнхийлөгч Э.Макроны төрийн айлчлал Ерөнхийлөгч У.Хүрэлсүхтэй хийх хэлэлцээгээр үргэлжилсэн бөгөөд уулзалтын дараа хоёр орны хамтарсан санамж бичиг гаргасан юм. Санамж бичигт онцолсон хэлэлцээрээс дурдвал,

Худалдаа, эдийн засгийн хамтын ажиллагааг өргөжүүлнэ

Европын холбоотой байгуулсан Түншлэл, хамтын ажиллагааны хэлэлцээрийн хүрээнд Франц Улстай худалдаа, эдийн засгийн хамтын ажиллагааг тэлэх, хөрөнгө оруулалтыг нэмэгдүүлэх нь Монгол Улсын улсын гадаад бодлогын чухал стратеги, зорилтуудын нэг гэдгийг Ерөнхийлөгч Ухнаагийн Хүрэлсүх онцолжээ.

Харилцан ашигтай төслүүдийг хамтран хэрэгжүүлнэ

Талууд хоёр улсын харилцааны бэлгэ тэмдэг болсон харилцан ашигтай стратегийн томоохон төслүүдийг хамтран хэрэгжүүлэхээ нотолж, хөдөө аж ахуй, хүнс, эрчим хүч, байгаль орчин, гамшигтай тэмцэх, эрүүл мэнд, боловсрол, соёл, шинжлэх ухаан зэрэг салбарт хамтын ажиллагаагаа улам өргөжүүлэн хөгжүүлэхээр тохиролцсон.

Сансар судлалын салбарт хамтран ажиллана

Талууд энхийн зорилгоор сансар судлал, холбооны хиймэл дагуулын салбарын хамтын ажиллагааг өргөжүүлнэ. Энэ хүрээнд Монгол Улсын сансрын холбооны үндэсний хиймэл дагуул хөөргөх чиглэлээр идэвхтэй хамтран ажиллахаар болов.

Уур амьсгалын өөрчлөлтийн эсрэг хамтран тэмцэнэ

Уур амьсгалын өөрчлөлттэй тэмцэх Парисын хэлэлцээрээр хүлээсэн үүрэг, амлалтаа хэрэгжүүлэх зорилтын хүрээнд цөмийн энерги, сэргээгдэх эрчим хүчний салбарт хамтарч ажиллахаар болов. Монгол Улсын “Тэрбум мод” үндэсний хөдөлгөөн, Франц Улсын “Ойн дээд хэмжээний уулзалт”-аас гаргасан санаачилгыг уялдуулан хамтран ажиллахаар болжээ.

-ХҮЛЭЭЛТ...-

Манай оронд Ерөнхийлөгч Э.Макроны уулзалт Франц Улсын төрийн тэргүүнүүдээс анхны хийж буй төрийн айлчлал гэдгээрээ онцлог болж байгаа бол, “Их долоо”-гийн уулзалтаас шууд Монголыг зорьсон уг айлчлалыг гаднын хэвлэлүүд хэдийнэ онцлоод эхэлжээ. Францын Ерөнхийлөгч Эммануэл Макрон Хирошимад болсон “Их долоо”-гийн уулзалтад очиж, Украины Ерөнхийлөгч Володимир Зеленскийтэй яриа, хэлэлцээ хийсэн талаар олон улсын хэвлэл мэдээлсэн. Франц Улс НҮБ-ын Аюулгүйн зөвлөлийн байнгын гишүүн орон төдийгүй тус байгууллагад гишүүнээр элсээд 78 жил болж байгаа “ууган” гишүүн орнуудын нэг. НҮБ-ын төлөөллийн нэг болсон орны төрийн тэргүүн Зүүн Европ геополитикийн асуудалтай байгаа энэ үед Монголд зүгээр ч нэг айлчлаагүй нь тодорхой. Гаднын хэвлэлүүд, эрх бүхий хүмүүс одоог хүртэл манай орныг БНХАУ эсвэл ОХУ-аас хамааралтай гэж үздэг хэвээр. Дээр нь, ОХУ, Украины дайны асуудалтай, геополитикийн хурц үед Монгол Улс НҮБ-ын Ерөнхий Ассамблей дайны асуудлаар санал хураахад хоёр ч удаа татгалзсан хариулт өгөөд байгаа. Тиймээс НҮБ-ын төлөөлөл гэж хэлж болох Францын Ерөнхийлөгч Э.Макрон манай оронд төрийн айлчлал хийж байгаа нь хойд хөрштэйгөө хэр харилцаатай, ямар холбоотой байгааг “тандаж” яваа юм гэнэ.

Мөн Ерөнхийлөгч Э.Макроны айлчлалтай холбоотойгоор дахин нэг яригдах асуудал байгаа нь уран. Монгол Улсаас хоёр том ураны орд илрүүлсэн ч нууцалж байгаа талаар бид өмнө нь мэдээлсэн. Тэгвэл томчуудын нууцалж байгаа тэр ордтой Францын Ерөнхийлөгчийн айлчлал ч холбоотой байж болзошгүй. Франц Улс дэлхийн уран, цөмийн энергийн гол тоглогчдын нэг. Аль нэг орноос их хэмжээний нөөц, агуулгатай ураны орд илрэхэд “зүгээр өнгөрүүлэхгүй” гэсэн үг. Мөн тус улсын цөмийн энергийн "Орано" компани ч манай орны ураны төсөл дээр ажиллаж байгаа. Нөгөөтээгүүр Э.Макроны төрийн айлчлалыг тохиолдуулан манай улс ураны асуудлаараа яриа, хэлцэлд хүрч чадвал эрчим хүчний асуудлаа шийдэх боломжтой аж. Гэсэн ч Францын талтай уг асуудлаар яриа, хэлцэл хийх үе шат хараахан ирээгүй байна. Өөрөөр, Франц Улсын Ерөнхийлөгч Эммануэл Макрон энэ удаад Монголд анхныхаа төрийн айлчлалыг хийж байгаа нь ОХУ-ын асуудал, уран зэрэг хэд хэдэн салбарыг “тандаж”, танилцах “дадлага” хийж яваа гэж хэлж болох юм.

-ЭММАНУЭЛ МАКРОН ГЭЖ ХЭН БЭ-

Франц Улсын Ерөнхийлөгч Эммануэл Макрон 1977 онд Францын Амьен хотод мэдрэлийн эмгэг судлаач эмч, хүний эмч нарын гэр бүлд төрсөн. Түүнийг багадаа үеийнхэнтэй найзалж, нөхөрлөхөөс илүүтэй ахмад, хөгшидтэй хамт байдаг байсан талаар олон хууч яриа байдаг аж. Э.Макрон төрсөн Амьен хотдоо дунд сургуулиа дүүргэж, хотынхаа консерваторид төгөлдөр хуурын чиглэлээр сурч байжээ. Үүнийхээ дараа тэрбээр Парис хотыг зорьсон ч очоод хоёр ч удаа их сургуульд орж чадалгүй унаж байсан аж. Харин сүүлд Парисын Х-Нантеррийн их сургуулийн философийн ангид элсэж, бүр мэргэжлээрээ магистр хамгаалсан түүхтэй. Тэрбээр ажлын гараагаа философич Пол Рикёрийн туслахаар ажиллах эхэлсэн бөгөөд утга зохиолын сэтгүүлд ч мөн ажиллаж байсан юм байна.

Хожим Эммануэл Макрон олон нийтийн харилцаа, нийтийн удирдлага, эдийн засгийн мэргэжлээр сурч, мэргэжил дээшлүүлсэн бөгөөд төрийн албаны эхний ажлаа Францын Эдийн засгийн яамнаас эхлүүлжээ. Улмаар Франсуа Олландыг Ерөнхийлөгч байх үед Ерөнхийлөгчийн Тамгын газрын Ерөнхий нарийн бичгийн даргын туслахаар албан тушаал дэвшин ажиллаж байгаад 2014 онд Францын Эдийн засгийн сайдаар томилогдсон. Э.Макрон нь Францын “Бүгд найрамдах улс урагшаа” намыг үүсгэн байгуулсан бөгөөд 2017 онд Ерөнхийлөгчөөр сонгогдож, Францын түүхэн дэх хамгийн залуу Ерөнхийлөгч болсон юм.

Ташрамд дурдахад, Францын Ерөнхийлөгч Эммануэл Макрон өөрөөсөө 24 насаар эгч хүнтэй суусан бөгөөд тэдний дундаас хүүхэд төрөөгүй байдаг аж. Харин түүний эхнэр, Францын тэргүүн хатагтай Брижитт Э.Макронтой суухаасаа өмнө гурван хүүхэдтэй байсан бөгөөд долоон ач, зээтэй гэнэ.

Ergelt.mn