Мөнгө л ялна

Tweet

Мөнгө л ялна

2023-05-25

Х.Баттулга гудамжинд "лааз өшиглөж" явахдаа МАН-ын аппаратыг ялж Монгол Улсын Ерөнхийлөгчөөр сонгогдож байлаа. Тэр ямар ч хүн байж болно. Ямар ч шийдвэр гаргасан байж болно. Тэр бүхэн Монголын төрд сургамж, санах ой болж үлдсэн. Гэхдээ хувь улстөрчийн хувьд түүний 2016 оны Ерөнхийлөгчийн сонгуулийн ялалт Монголын төдийгүй, дэлхийн улс төрд "phenomenon" гэж тодорхойлогдох байх. Харин ялалтын цөм нь "Монгол ялна" гэх сонгуулийн уриа үг байсан.

Гэхдээ эргээд харахад Монгол үнэхээр ялсан уу. Хариулт нь бэлэн. ЖДҮХС, ХААДС, ТЭДС, Хөгжлийн банк, нүүрсний хулгай, Боловсролын зээлийн сан гээд ар араасаа ил болсон скандалууд өнөөдөр Монгол биш мөнгө, мөнгөний схем ялж ирсний нотолгоо.

Ерөнхийлөгч У.Хүрэлсүх, ЕТГ-ын дарга Я.Содбаатар, ҮАБЗ-ийн нарын бичгийн дарга Ж.Энхбаяр, ЗГХЭГ-ын дарга Д.Амарбаясгалан, ЦХХХ-ны сайд Н.Учрал, ХХААХҮ-ын сайд Х.Болорчулуун тэргүүтэй өнөөдөр төрд өндөр албан тушаал хашиж байгаа эдгээр хүмүүс болон тэдгээрийн хамаарал бүхий этгээдүүд ЖДҮХС-гаас нэн хөнгөлөлттэй зээл авсан. ЖДҮХС-д холбогдсон өмнөх болон одоогийн парламентын гишүүдийг тоолсны оронд нэр нь холбогдоогүй хүмүүсийг тоолох нь цаг хэмнэнэ.

Эдийн засгийн хэллэгээр УИХ-ын гишүүдийн дунд эзлэх ЖДҮ-гийн хулгайчдын тоо парламентын олонхи болсон нь ард түмний төрдөө итгэх итгэл алдрах эхлэл байсан.

Гэтэл улсын төсөв, төрийн өмч, төрийн сан дахь хулгайтай тэмцэж, таслах ёстой АТГ, прокурор, Үндэсний аудитын удирдлага нь ЖДҮХС-г хамтран тонолцсон байж таарсан. АТГ-ын дэд дарга асан Б.Хурц, УЕПГ-ын орлогч асан Б.Амгаланбаатар, ҮАГ-ын дарга асан Д.Хүрэлбаатар гээд ЖДҮХС-гаас хамт хумсалсан хууль, хяналтын байгууллагын удирдлагыг цааш бичихээс ч залхуутай.

Хулгай хулгайг илрүүлэхгүй. ЖДҮХС-гаас зээл авсан улстөрчид, тэдний хамаарал бүхий хүмүүст өнөөдрийг болтол хариуцлага тооцоогүй. Харин ч эсрэгээрээ тэд улам дэвшиж, халдашгүй эрх дагалддаг зөөлөн суудалд тухалсан.

Уг нь, ЖДҮХС жижиг дунд бизнесийг дэмжиж, дундаж давхаргыг бий болгох ёстой байв. Харамсалтай нь, жижиг дундууд нийлээд ДНБ-ий 5.5 хувийг л бүрдүүлж байна. Дундаж давхарга боломжоо хулгайд алдсан.

Гэтэл улсаараа урагш алхах боломжийг бас л нам, улс төр-монополь бизнес-хууль, хүчний байгууллага дамнасан бүлэглэл ТЭДС, ХААДС, Хөгжлийн банкаар дамжуулан хулгайлсан. Нам харгалзахгүй ТЭДС, ХААДС, Хөгжлийн банкийг тоносон хүн нэг бүрийг дурдах нь залхуутай бөгөөд хэвлэлийн хуудсанд хайран. Хулгай яагаад илрээгүй, хэнд ч хариуцлага тооцоогүй өдий хүрснийг ярихын оронд АТГ-ын дэд дарга нь Хөгжлийн банкнаас зээл аваад энхэрийнхээ компанийн арилжааны банкны өрийг дарчихсан асуудлыг л дурдахад хангалттай.

Дараа нь, төсвийн гол орлогыг бүрдүүлдэг Тавантолгойн ордын нүүрсний экспортод бас л хулгай нүүрлэсэн. Нүүрсний хулгайд голцуу эрх баригч МАН-ынхан өөрсдөө холбогдсон. Залуус олон өдөр Төв талбайд жагссан шаардлага өнөөдрийг хүртэл бүрэн биелсэнгүй. Нүүрсний Түр хорооны дарга нь хэвлэлд "заавал сонсгол хийх шаардлагагүй" гэж яриад зогсож байна. Агентлагийн үгэнд орж, гүйцэтгэх байгууллагын хэлснээр явдаг парламент бол гутамшиг. Г.Ганболд тэргүүтний эс үйлдэл бол ард түмний төрд итгэх итгэл, төлөөллийн ардчилалд дайсагнасан дэндүү хорлонтой үйлдэл.

Монголчуудын ирээдүйд итгэх ганц итгэл нь боловсрол, хойч үе болж хоцров. Харамсалтай нь, Боловсролын зээлийн сангийн асуудал боловсролд итгэх итгэлийг авч одов. Аяны шувуу нисэн үл хүрэх газраас хүний хүү эрдэм өвөрлөн ирнэ гэж найдсан. Гэтэл Боловсролын зээлийн санг мөн л хулгайн замаар цувчуулж, дарга анги бэлддэг кастын бэлтгэл болгон хувиргажээ. Боловсролыг хүртэл хулгайлдаг энэ тогтолцоо сүүлийн 30 жил төрийн эрх барьсан хоёр том намын нэгнээ дайлж, шагнадаг соёл болтлоо тогтсон байж. Идээ бээр нь задрахад итгэж найдсан ХҮН-ий хөрс нь хүртэл боловсролын хулгай байв.

Ерөнхийлөгч, үе үеийн Ерөнхий сайд, сайд, салбарын сайд, УИХ-ын гишүүд, том бизнесийн өв залгамжлагчдыг бэлдэхийн тулд татвар төлөгчид хоолоо хасаж, өөрийн хүүхдээс харамлаж ирэв. Гэтэл хулгайг илрүүлж, хариуцлага ярих ёстой АТГ, прокурор, цагдаа, хууль, хяналтын байгууллагын удирдлага нь бас л Боловсролын зээлийн санг хамт тоносон байх юм. АТГ-ын дэд дарга Б.Хурц, АТГ-ын Мөрдөн байцаах хэлтсийн дарга Э.Амарбат, ЦЕГ-ын дарга сан Р.Чингис, С.Баатаржав нарын хүүхдүүд Боловсролын зээлийн сангийн мөнгөөр гадаадад суралцжээ.

Энэ бүхнийг нэгтгээд харахад төрийн өмч, төрийн сан бүхнийг хулгайлж, хулгай бүрд нь хууль, хяналтын байгууллага хутгалдаж иржээ. "Иднэ тат, ар нь түц" байхад хумсалж чадаагүй бол бараг хохь гэлтэй. Ийм амь бөхтэй схемийг мөнгө л санхүүжүүлдэг. Эцэстээ мөнгө л ялдаг. Тийм байж ч ирсэн. Төрийн сангийн хулгай, луйвар ил байна. Хариуцлага, шударга ёс зоосны нүүхээр харж байна.

https://itoim.mn/a/2023/05/21/article/olr