2023-05-28Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд БЗС-тай холбоотой асуудлууд үргэлжилсээр байв. Түүнчлэн тус сангаас зээл авсан зээлдэгчид төлөлтөө хийж эхэлсэн ба 5Ш ажиллагаар бусад сангуудын мэдээлэл шилэн болсон юм. Эдгээр болон бусад онцлох үйл явдлуудын мэдээллийг тоймлон хүргэж байна.
Боловсролын зээлийн сантай холбоотойгоор хэрэг нээжээ
Авлигатай тэмцэх газар бол Эрүүгийн хуулийн 22 дугаар зүйлд заасан авлигын гэмт хэрэгт мөрдөн шалгах ажиллагаа явуулах чиг үүрэгтэй. Бид өнөөдөр 800 гаруй хэрэгт хэрэг бүртгэлийн ажиллагаа явуулж байна. Манайх 50 орчим мөрдөгчтэй. Ажлын ачаалал маш их байна. Энэ хүрээнд Боловсролын зээлийн сантай холбоотойгоор хэрэг нээсэн. Өмнө нь 1992 оноос хойш яагаад шалгаагүй юм бэ гэж асууж байна. Нөхцөл байдал, хуулийн зохицуулалт нь гомдол мэдээлэл ирсэн цагт мөрдөн шалгадаг. Бид мөрдөлтийг бүрэн шуурхай хийх үүрэгтэй. Энэ дагуу ажлын хэсэг гаргаад ажиллаж байна гэдэг хариултыг албаныхан өглөө.
Харин цагдаагийн байгууллагаас 2023 оны тавдугаар сарын 19-нд Тэргүүн дэд даргын тушаал гарч, Эрүүгийн цагдаагийн албаны дарга Т.Сүхболдоор ахлуулсан ажлын хэсэг гарчээ.
Цахим орчинд гарч байгаа Боловсролын зээлийн сантай холбоотой гэмт хэргийн шинжтэй үйлдлүүд үнэхээр байна уу гэдгийг шалгаж байна. Үе үеийн захирлууд нь лбан тушаалаа урвуулан ашигласан үйлдэл байна уу, улс төрийн нөлөө бүхий хүмүүс мэдээлэлд ойр байдлаа ашигласан уу гэдгийг шалгаж, АТГ-руу шилжүүлж ажиллана. Тухайн асуудалд хуурамч бичиг баримт ашиглаж, зориулалтын бусаар ашигласан бол ажлын хэсгүүд шалгаж ажиллана гэдэг хариултыг өгөв. Өмнө нь энэ дагуу шалгалт хийж байсан. Өнгөрсөн долоо хоногоос л олон нийтийн сүлжээнд энэ талаар цацагдаж байна гэдгийг албаныхан мэдээллээ. Хэрэг бүртгэлт мөрдөн байцаалтаар шалгагдаж байгаа учраас олон нийтэд тодорхой мэдээлэл өгөх боломжгүй байна гэв.
Мөн энэ үеэр АТГ-ын Мөрдөн шалгах хэлтсийн албаны дарга, ахлах комиссар Б.Батбилэг мэдээллийг өгөхдөө "Ерөнхийлөгч асан Х.Баттулгаас мэдүүлэг авсан" гэсэн юм.
БЗС-ын зээлээ чөлөөлүүлж, өөртөө урамшуулал олгосон гэх Д.Гандид хэрэг нээн шалгаж байна
Авлигатай тэмцэх газраас Боловсролын зээлийн сангийн зээлийн асуудлаар мэдээлэл хийлээ.
Боловсролын зээлийн сангийн Ажлын албаны дарга Д.Гарди нь 2022 оны дөрвөөс зургадугаар сарын хооронд нийт 1 сая 544 мянган төгрөгийн урамшуулал болон нэмэгдлийг өөртөө олгох шийдвэр гаргажээ. Ингэхдээ Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 8 дугаар зүйлд заасан мэдэгдэл, тайлбарыг гаргаагүй байна.
Мөн түүнийг БШУС-ын сайдын тушаалаар баталсан "Албан тушаалын тодорхойлолт"-д заасан албан тушаалын нэр зөрүүтэй, албан тушаалд тавигдах тусгай шаардлагын мэргэжил \нягтлан бодох бүртгэл, санхүү, эдийн засаг\ мэргэшлийн шаардлагыг хангаагүй байхад томилсон байна.
Түүнчлэн Д.Гарди нь ОХУ-д 2014-2016 онд зээлээр суралцжээ. Улмаар БШУС-ын сайд 2022 оны гуравдугаар сарын 14-ний өдрийн тушаалаар 32 мянган ам.долларын зээлийг чөлөөлж, тус тушаалыг үндэслэж Д.Гарди “Барьцаа хөрөнгө чөлөөлүүлэх тухай” өөрийн гарын үсэг бүхий албан бичгийг 2022 оны дөрөвдүгээр сарын 20-ны өдөр Баянзүрх дүүргийн бүртгэлийн хэлтэст хүргүүлж, барьцаа хөрөнгийг чөлөөлүүлж байжээ.
Энэ үйлдэл нь Нийтийн албанд нийтийн болон хувийн ашиг сонирхлыг зохицуулах ашиг сонирхлын зөрчлөөс урьдчилан сэргийлэх тухай хуульд заасан журмуудыг зөрчсөн гэж АТГ-аас үзсэн байна. Иймд Боловсролын зээлийн сангийн одоогийн гүйцэтгэх удирдлага буюу тус сангийн Ажлын албаны дарга Д.Гардид хэрэг нээн шалгаж, эхэлжээ.
Дөнгөж төрсөн нярайн амь насыг хохироож, гудамжинд хаясан байжэ
Өнгөрөгч долоо хоногт Дархан-Уул аймгаас гаднын нөлөөтэй нас барсан нярайн цогцос олджээ. Тодруулбал, тус аймгийн Дархан сумын тавдугаар баг, айлын хашаанаас гар нь тасарсан нярайн цогцос олдсон байна. Албаныхан шалгалтын ажиллагаа явуулахад төрөөд хоёр хоносон нярай эрэгтэй хүүхдийн аманд цаас чихэж, амь насыг нь хохироосон болох нь урьдчилсан байдлаар тогтоогджээ.
Үхлийн шалтгааныг механик бүтэлт гэж дүгнэсэн бөгөөд нярайг нас барсны дараа гудамжинд хаясныг нохой зууж, баруун гарыг тасалсан байж болзошгүй байгаа аж. Нярайн эцэг эхийг тогтоох шалгалтын ажиллагааг Дархан-Уул аймгийн цагдаагийн газраас явуулж эхэлжээ.
Э.Оюунболд допинг хэрэглэсэн нь тогтоогджээ
Монголын Үндэсний Бөхийн Холбооны Удирдах зөвлөл буюу Тэргүүлэгчид, Ёс зүй сахилга хариуцлагын зөвлөлийн гишүүд, Барилдааны дүрмийн зөвлөлийн гишүүд, Гүйцэтгэх удирдлага болон Ажлын албаныхан дасгалжуулагчид, бөхчүүд, бөх сонирхогчид, хэвлэл мэдээллийн төлөөллүүдтэй нээлттэй уулзалт хийлээ.
Энэ үеэр МҮБХ-ы тэргүүн Ц.Магалжавын мэдээлснээр " Улсын арслан Э.Оюунболдоос допинг буюу сэргээшийн төрлийн S1 ангиллын бодис илэрсэн бөгөөд түүний эрх ашгийг хамгаалах үүднээс ирж уулзан, тайлбар өгөх болов уу хэмээн хоёр сар хүлээсэн боловч ирж уулзаагүй, огт холбоо бариагүй гэсэн юм.
Улсын арслан Э.Оюунболдын шинжилгээнээс оксандролин, метандиенон гэсэн анаболик стериод төрлийн бодис илэрчээ. Энэ нь түүнээс допинг илэрч буй анхны тохиолдол биш юм. Өмнө нь допинг илэрч аварга цолоо хураалгаж, барилдах эрхээ найман жилээр хасуулсан байдаг. Гэвч тэрээр уг шийдвэртэй холбоотойгоор 2021 оны арванхоёрдугаар сарын 30-ны өдөр спортын арбитрын шүүхэд нэхэмжлэл гаргасан юм.
Арбитр шүүх 2022 оны дөрөвдүгээр сарын 28-нд Э.Оюунболдын барилдах эрхийг найман жилээр хассан гэх хэсгийг хүчингүй болгож, барилдах эрхийг нь сэргээх шийдвэр гаргасан юм. Улмаар 2022 оны зургаадугаар сарын 23-нд Шүүхийн шийдвэр гарч Э.Оюунболдын барилдах эрхийг сэргээсэн.
Гэсэн ч дахин сэргээш хэрэглэсэн учир түүхий барилдах эрхийг бүх насаар нь хязгаарлана гэх мэдээлэл нийгмийн сүлжээнд цацагдаад буй. Энэ талаар Монголын үндэсний бөхийн холбооноос тодруулахад "Допинг илэрсэн бөхийн нэрийг зарлан барилдах эрхийг нь насаар нь эсвэл тодорхой хугацаанд хасах эсэхийг шууд дүгнэх боломжгүй. Тэргүүлэгчдийн хуралдаанаар хэлэлцээд, шийдвэрлэнэ. Засгийн газраас баталдсан "Допингийн эсрэг дүрэм зөрчсөн бөхөд хариуцлага тооцох журам" гэж бий. Тус журмын хүрээнд шийдвэрлэнэ. Журамд бүх насаар нь барилдах эрхийг нь хасна гэх заалт байгаа гэж хэлж чадахгүй байна" гэсэн хариулт өглөө.
ИНЕГ-ын тэтгэлгээр гадаадад сурсан хүмүүсийн мэдээллийг ил болголоо
Боловсролын зээлийн сангийн хөрөнгөөр гадаадад сурсан хүмүүсийн асуудал олны анхаарлыг татаж татвар төлөгчдийн мөнгөөр гадаадад сурсан бүх хүмүүсийн мэдээллийг ил болгохыг шаардаж эхэлсэн. Үүнтэй холбоотойгоор Иргэний нисэхийн ерөнхий газрын тэтгэлгээр гадаадад сурсан хүмүүсийн мэдээллийг ил болгохоор болсон юм. Зам, тээврийн хөгжлийн сайд С.Бямбацогтын мэдээлснээр ИНЕГ-ын зардлаар 2005-2022 онд гадаадад нийт 367 суралцагч суралцсан байна. Үүнд нийт 11 сая 376 мянган доллар буюу 28 тэрбум төгрөг зарцуулжээ.
Үүнд:
- Салбарын мэргэжлээр 332
- Нийтлэг мэргэжлээр суралцсан 35
- Сургалтын гэрээ нь цуцлагдсан 11
- Хувийн зардлаар үргэлжлүүлэн суралцаж байгаа 16
- Одоо суралцаж байгаа 14
- Салбартаа ажиллаж байгаа 262
- Ажлын байр хүлээж, хүний нөөцөд бүртгэлтэй байгаа 63 гэсэн статистик мэдээлэл байна.
ИНЕГ 2005-2022 онд 28 сая ам.долларын сургалтын тэтгэлгийг нийт 375 мэргэжилтэй боловсон хүчин бэлтгэх зорилгоор олгосон байна. Энд мэргэжилтэй албан хаагч болон тэдний хамааралтай хүмүүс багтсан талаар салбарын сайд мэдээлэв. Мөн түүнчлэн үүнээс дийлэнх нь салбартаа ажиллаж байгаа төдийгүй онгоцны нисгэгч, нислэгийн удирдлагч, техник, засварын мэргэжилтэн зэргээр ажиллаж байгаа аж. Гэвч үүн дунд ашиг сонирхлын зөрчил, албан тушаал нөлөө, сонирхлын байдлаа ашигласан хүмүүс байж болзошгүй ба ИНЕГ-ыг зардлаар сурсан хүмүүсийн нэрийг баасан гаригт танилцуулсан.
Мөн салбарын сайдын хэлснээр гэрээгээр хүлээсэн үүргээ биелүүлж, салбартаа ажиллаж байгаа хүмүүсийг буруутгах шалтгаан байхгүй. Харин сурчихаад ажлаа хийгээгүй, эрх ашиг албан тушаалын байдлаараа хамааралдаа аваад өгсөн бол асуудал ярьж болно. Тиймээс ялгаж салгаж хандахыг хүсье" гэсэн юм.
Д.Кекүшюүзанбатбаярыг 15 хоног баривчилжээ
Шүүхээс Д.Кекүшюүзанбатбаярт зөрчлийн хэрэг үүсгэж, 15 хоног баривчлах шийтгэл оноожээ. Хан-Уул дүүргийн Эрүүгийн хэргийн анхан шатны шүүх энэ сарын 26-нд болж, Д.Кекүшюүзанбатбаярт холбогдох зөрчлийн хэргийг хэлэлцсэн байна.
Тодруулбал, гэр бүлийн хүчирхийлэл үйлдсэн, танхайрсан үндэслэлээр Д.Кекүшюүзанбатбаярт зөрчлийн хэрэг нээсэн бөгөөд эхнэр, Монгол Улсын Гавьяат жүжигчин, дуучин Т.Баясгалангийн гомдлын дагуу Хан-Уул дүүргийн Цагдаагийн газарт шалгасан юм байна. Улмаар тус дүүргийн Прокурорын газраас шийтгэвэр ногдуулах үндэслэлтэй гэж үзэн шүүхэд шилжүүлсний дагуу хэлэлцээд танхайрсан үйлдэлд нь 100 000 төгрөгөөр торгох, гэр бүлийн хүчирхийлэл үйлдсэн зөрчилд нь 15 хоног баривчлах шийтгэл оноожээ.
Хорих ангид эргэлтээр ирсэн эхнэрээ хөнөөгөөд өөрийгөө боомилжээ
Энэ сарын 22-ны шөнө 425-р хорих ангид цагдан хоригдож байсан хоригдол эргэлтээр ирсэн эхнэрээ хөнөөгөөд өөрийгөө боомилсон хэрэг гарсан. Тусм хоригдол нь 31 настай, эхнэр нь 27 настай байжээ. Тухайн хоригдол хулгайн гэмт хэргээр 3,5 жил нээлттэй хорих ангид хоригдож байсан аж. Тодруулбал, Говьсүмбэр аймгийн Сүмбэр сум 1-р баг ШШГЕГ-ын 425-р нээлттэй хорих ангид хүн нас барсан байна гэх мэдээллийг тавдугаар сарын 23-ны өдрийн 09:55 цагт хүлээн авч шалгажээ.
Тус хорих ангийн эргэлтийн байранд Хэнтий аймаг Жаргалхаант сумын багт оршин суух 27 настай эмэгтэйг, Төв аймгийн харъяат тус аймагт цагдан хоригдож байсан байсан хоригдол 31 настай эрэгтэй амь насыг нь хохироож, эргэлтийн байрны хувцасны өлгүүрээс цагаан өнгийн даавуун уяагаар боомилж нас барсан хэрэг гарсан байна.
Амь хохирогч задлан шинжилгээний урьдчилсан дүгнэлтээр ямар нэгэн эд зүйлээр дарсны улмаас механик амьсгал бүтэлт болж нас барсан нөхцөл байдал тогтоогдсон. Амь хохирогч нь энэ сарын 22-ны өдөр нөхөр болох хоригдол дээр ирж уулзалтын байранд хоносон бөгөөд тухайн хоригдол нь ЭХТА-ийн 17.1.2-р зүйлээр 3 жил 5 сарын хорих ял эдэлж байсан.