Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд МУ-ын Ерөнхий сайд Л.Оюун-Эрдэнэ Илан Макстай ногоон машины хэрэглээ, ногоон технологийг Монгол улсад нэвтрүүлэх тухай ярилцлаа. Мөн түүнлчэн "Шувуу ажиллагаа"-гаар гадаад улсад оргон зайлсан хүмүүсийг авчрах ажил үргэлжилж байгаа талаар ХЗ-н сайд мэдээлэв. Эдгээр болон бусад онцлох үйл явдлыг тоймлон хүргэж байна.

Улаан шугам татсан сургуулиудад хариуцлага тооцно

Дунд ангиас ахлах ангид элсэн суралцах сурагчдад босго тогтоож, улаан шугам татаж байгааг олон эцэг, эх буруутгаж байгаа юм. Учир нь энэ төрлийн асуудлаас болж хүүхдүүдийг эрэмбээр ангилах нь сэтгэлзүйн болоод бие махбодийн хувьд эрсдэл үүсгэж байгаа аж. Тиймээс “улаан шугам”-ын хязгаарлалт тогтоохгүй байх, анги дэвшин үргэлжлүүлэн суралцах сонирхолтой бүх сурагчийг сургах тогтолцоог яам нь бий болгосон. Тодруулбал, Боловсрол, шинжлэх, спортын сайдын Элсэлтийн тухай 2020 оны А/201 тоот тушаалын нэгдүгээр заалтаар ерөнхий боловсролын сургуулийн IX ангийг тухайн жил өдрөөр төгссөн сурагчдыг X ангид элсүүлэх тоонд хязгаарлалт тогтоохгүйгээр хүсэлт гаргасан суралцагчийг үргэлжлүүлэн суралцуулж байхыг сургуулийн захирлуудад үүрэг болгосон байдаг.
Энэ тушаал өнөөдөр ч хүчин төгөлдөр үйлчилж байгаа бөгөөд "Улаан шугам" татах зэргээр хүүхдүүдийн сурах эрхийг хязгаарлаж, сайдын тушаал зөрчсөн тохиолдолд тухайн албан тушаалтанд холбогдох хуулийн дагуу хариуцлага тооцохыг БШУЯ-наас мэдэгдсэн.
Хэрэв ямар нэгэн байдлаар сурагчдыг эрэмбэлж, эрсдэл үүсгэсэн тохиолдолд тухайн сургуулийн захирлыг ажлаас чөлөөлөх хүртэл арга хэмжээ авах аж. Гэхдээ дээрх тушаалын хэрэгжилт үргэлжилж байгаа ч орон нутгийн болоод нийслэлийн зарим сургуулиудад одоо ч анги дэвших эсэхийг дүнгээр эрэмбэлэх тогтолцоо хэвээр байгаа болохыг эцэг эхчүүд цахим хуудастаа бичжээ. Тиймээс Боловсрол шинжлэх ухааны яамнаас иргэдийн гомдлын дагуу шалгаж, арга хэмжээ авах зохицуулалт хийхээр болсон байна.

ЕБС-ИЙН ЗАХИРЛУУД ХҮСЭЛТ ГАРГАСАН СУРАГЧ БҮРИЙГ ҮРГЭЛЖЛҮҮЛЭН СУРАЛЦУУЛАХ ҮҮРЭГТЭЙ
“Элсэлтийн тухай” 2020 оны А/201 тоот тушаалын дагуу анги дэвшин суралцах хүсэлтэй сурагч бүр үргэлжлүүлэн сурах эрхтэй. Мөн хүүхдийг үргэлжлүүлэн суралцуулах үүргийг ч сургууль хүлээдэг байна.
Тиймээс улаан шугамтай холбоотой асуудал үүссэн тохиолдолд салбар яаманд хандах боломжтой аж.

Ерөнхий сайд Илон Масктай цахилгаан машины хэрэглээ, ногоон технологийг нэвтрүүлэхээр ярилцлаа

Монгол Улсын Ерөнхий сайд Л.Оюун-Эрдэнэ өнөөдөр АНУ-ын “Tesla”, “SpaceX” компанийн гүйцэтгэх захирал, “Twitter” компанийн технологи хариуцсан захирал Илон Масктай цахимаар уулзаж, хамтын ажиллагааны талаар санал солилцлоо.
Уулзалтын үеэр Ерөнхий сайд “Tesla” компанийн салбарыг Монгол Улсад байгуулбал татвар болон эрх зүйн орчноор дэмжихээ илэрхийллээ.
Дэлхий дахинд цахилгаан машины хэрэглээ, ногоон технологийг нэвтрүүлэх түүний үйлсийг дэмжиж буйгаа онцлов. Иргэдээ цахилгаан машины хэрэглээнд уриалж Ерөнхий сайдын хувиар хувь нэмрээ оруулахаа илэрхийллээ. Мөн “Тesla” компанийн бүтээгдэхүүний гол түүхий эд болох зэс болон газрын ховор элементийг хамтарч ашиглах судалгааны ажлыг эхлүүлэх, уул уурхайн том оврын авто машиныг цахилгаан хөдөлгүүртэй болгоход дэмжлэг үзүүлэх, Монгол Улсын шилдэг IT инженерүүдийг сургах тэтгэлэгт хөтөлбөр санаачлахыг Илон Маскаас хүслээ.Илон Маск Монгол Улсын Ерөнхий сайдтай цахимаар анх удаа уулзаж буйд талархал илэрхийлээд баялаг түүхтэй Монгол орныг сонирхдог, боломжтой цагтаа Монголд зочилно. Монголд цахилгаан авто машины хэрэглээг нэмэгдүүлж, хамтарч ажиллахдаа таатай байх болно гэлээ.
Ерөнхий сайд Л.Оюун-Эрдэнэ 2023 оны долдугаар сард Улаанбаатар хотод болох Монголын Эдийн засгийн форум ноён Илон Маскийг хүрэлцэн ирэхийг урилаа.

"Шувуу" ажиллагаагаар авч ирсэн 4 хүний хэргийг шүүхэд шилжүүлсэн"
Хууль зүй, дотоод хэргийн сайд Х.Нямбаатар өнөөдөр /2023.06.07/ Засгийн газраас хэрэгжүүлж буй "Шувуу" ажиллагааны талаар мэдээлэл хийлээ.Тэрбээр “Бид олон улсын байгууллагад Монголын авлигын төсөөллийн индексийг гаргаж байгаа ажлуудыг өдөр тутам хийж байна. Дээр нь мөнгө угаах, терроризмтай тэмцэх олон улсын санхүүгийн хориг арга хэмжээ авах байгууллага болох ФАТФ-т манайх тайлангаа танилцуулж буй. Хариуцсан ажлуудыг багцлаад яамны байранд мэдээлэл өгч байя. Засгийн газраас 2023 оныг авлигатай тэмцэх жил болгон зарлаж, "5Ш" төлөвлөгөө гарган ажиллаж байгаа.

"Шувуу" ажиллагаагаар хэрэгт шалгагдах ёстой этгээдүүдийг эх оронд нь авч ирж, гэм буруугүйн асуудлыг тогтоох зорилготой. Бид анх авлига албан тушаалын гэмт хэрэг болон бусад төрлийн гэмт хэрэгт шалгагдаж байхдаа оргон зайлсан 92 хүнийг танилцуулж байсан. Энэ тоо 127 болж өссөн. ""Шувуу” ажиллагааны хүрээнд интерполын улаан булант зар мэдээгээр 22, хөх булант зар мэдээгээр 70 хүнийг эрэн сурвалжилж байна. Мөн дөрвөн хүний хэргийг шүүхэд шилжүүлсэн" гэв. Зургадугаар сарын 5-ны өдрийн байдлаар улаан булант зар мэдээгээр гурав, хөх булант зар мэдээгээр 42 хүнийг олж тогтоосон. Мөрдөн шалгах байгууллагаас олж, тогтоон авч ирсэн таван хүн бий. Сайн дураараа хэргээ шийдвэрлүүлэхээр 12 хүн ирсэн. Нэмж 10 орчим хүмүүсийг авч ирнэ. Интерполын улаан булант зар мэдээгээр эрэн сурвалжилж байгаа 47 хүнээс байгаа газар нь тогтоогдсон 25 хүн байна. Тодруулбал, Казахстанд гурав, Туркт дөрөв, БНСУ-д зургаа, АНУ-д нэг, Австралид нэг, Францад нэг, Испанид нэг, Беларусьт нэг, Хонгконгт хоёр, Японд нэг, Швейцарь, Швед, Малайз, Киргиз улсад тус бүр нэг байна. Эдгээр 25 хүний гадаад паспортыг бүхэл нь хүчингүй болгох бүртгэлийг хийж, холбогдох байгууллагад шилжүүлсэн. Мөн эдгээрийн 12 хүнийг шилжүүлэн авч ирэх, хаяг тогтоогдсон 13 этгээдийг санамж бичгийн хүрээнд тус улсын хууль сахиулагчидтай хамтран ажиллана. Цаашид 22 этгээдийг эрэн сурвалжилж байна. Сонирхуулахад, Монгол Улс Зорчигчийн мэдээллийн төвийг байгуулсан. Энэ нь НҮБ-ын Аюулгүйн зөвлөлөөс "Go travil" гэдэг программ хангамж байгаа. Энийг гэмт хэрэг үйлдсэн хүмүүсийн мэдээллийг хайдаг программ хангамжийг өөр дээрээ авч, хянана гэсэн үг. Сүүлд Наранхүү гэж нүүрсний гэх хэрэгт холбогдон шалгагдах ёстой хүн Хятад руу гарч БНСУ-д очсон байсныг авч ирэхээр ажиллаж байна. Ерөнхий сайд асан Ч.Сайханбилэгийг АНУ-аас авч ирэхээр ажиллаж байна гэлээ.

С.Эрдэнэд хилийн хориг тавьжээ

Нийслэлийн прокурорын газраас яллагдагч С.Эрдэнийг улс төрд нөлөө бүхий Монгол Улсын Засгийн газрын гишүүн, Хүн амын хөгжил, нийгмийн хамгааллын сайд бөгөөд Нийгмийн даатгалын үндэсний зөвлөлийн даргаар ажиллаж байхдаа Нийгмийн даатгалын тухай хууль зөрчиж нийгмийн даатгалын сангийн хөрөнгөөс мөнгөн хөрөнгийг Капитал банкны харилцах болон хадгаламжийн дансанд байршуулах шийдвэр гаргаж, “Капитал банк” ХХК-д эдийн засгийн давуу байдал бий болгосон гэх үйлдэлд 2002 оны Эрүүгийн хуулийн тусгай ангид заасан төрийн албан тушаалтан албаны эрх мэдлээ буюу албан тушаалын байдлаа урвуулан их хэмжээний хохирол учруулсан гэх хэрэгт эрүүгийн хэрэг үүсгэж яллагдагчаар татаж мөрдөн шалгах ажиллагаа явуулж байна.

Тухайн хэргийн мөрдөн байцаалтыг яллагдагч С.Эрдэнийг оргон зайлсан, улсын хил нэвтрэн гарсан гэх үндэслэлээр түдгэлзүүсэн байсныг прокурорын тогтоолоор мөрдөн байцаалтын ажиллагааг сэргээжээ.
Нийслэлийн прокурорын газраас яллагдагч С.Эрдэнэд Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авах тухай санал ирүүлсэнийг Чингэлтэй дүүргийн Эрүүгийн хэргийн анхан шатны шүүх 2023 оны зургадугаар сарын 8-ны өдөр хянан хэлэлцээд Эрүүгийн хэрэг хянан шийдвэрлэх тухай хуульд заасан үндэслэлээр буюу. яллагдагч эрүүгийн хэрэг хянан шийдвэрлэх ажиллагаанд саад учруулахгүй байх, түүнийг дахин гэмт хэрэг үйлдэхээс урьдчилан сэргийлэх зорилгоор яллагдагч С.Эрдэнэд Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авч шийдвэрлэв.

Аялагч Амай буюу Ж.Золбаярыг 1 жил 5 сар хорино
Аялагч Амай буюу Ж.Золбаярт нэг жил таван сарын хугацаагаар хорих ял оногдуулжээ. Чингэлтэй дүүргийн Эрүүгийн хэргийн анхан шатны шүүхээс түүнд оноосон ялыг нээлттэй хорих байгууллагад эдлүүлэхээр шийдвэрлэсэн байна. Түүнийг цагдаагийн байгууллагаас гуравдугаар сард хар тамхи хэрэглэсэн гэдгийг тогтоосон. Тодруулбал, цагдаагийн байгууллагад гуравдугаар сарын 24-ний өдөр “Чингэлтэй дүүргийн нисдэг машины урд байрлах байранд иргэн хар тамхи хэрэглээд байна” гэх дуудлага, мэдээлэл бүртгэгдэж байв.Дуудлага, мэдээллийн дагуу цагдаагийн байгууллагаас шалгалтын ажиллагаа явуулахад Чингэлтэй дүүргийн тавдугаар хороонд оршин суух хаягтай иргэн З нь сэтгэцэд нөлөөт бодис болох өвс /мариухан/-ийг хууль бусаар олж авсан, хадгалсан байсныг илрүүлсэн. Мөн тухайн иргэний биологийн дээжид тавьсан сорилоор дээрх мансууруулах төрлийн бодисыг хэрэглэсэн нь урьдчилсан байдлаар тогтоогдсон тул нарийвчилсан шинжилгээ хийлгэхээр шинжээч томилуулан холбогдох мөрдөн шалгах ажиллагааг явуулж байгаа талаар цагдаагийн байгууллагаас мэдээлж байв.

Энэ жил 40-өөд мянган шалгуулагч ЭЕШ өгөхөөр бүртгүүлжээ

ЭЕШ эхлэхэд 6 хоног үлдсэнтэй холбоотой бид Боловсролын үнэлгээний төвийн Хэвлэлийн төлөөлөгч Ц.Шинэбаяраас тодруулахад, "Энэ жил 39500гаад сурагч төгсөж байгаагаас 35 мянгаас 36 мянган шалгуулагч өмнөх оны 4 мянгаас 5 мянган шалгуулагчтай цуг 40-өөд мянган шалгуулагч ЭЕШ өгөхөөр бүртгүүлсэн. Энэ сарын 15ны өдөр Монголын түүх хичээлээр 10:00 цагаас элсэлтийн ерөнхий шалгалт эхлэх ба шалгуулагч 9 цагт өөрийн шалгалт өгөх газар ирсэн байх шаардлагатай бөгөөд шалгуулагч дараах 4 бичиг баримт зайлшгүй авчирсан байх ёстой Үүнд:
-Иргэний үнэмлэх
-Бүрэн Дунд Боловсролын гэрчилгээ
-Суудлын хуваарь
-Бүртгэлийн дугаар
Боловсролын үнэлгээний төвөөс харандаа,баллуур гэх мэт шаардлагатай зүйлсийг хангадаг тул эдгээр бичиг баримтаас бусад зүйлийг авчрах шаардлагагүй. Шалгалт явагдаад дууссаны дараа шууд засалтаар дүн оноог харах боломжтой эцсийн дүн оноог 24 цагийн дараа цахим сайтад байршуулдаг. Дүн оноотой батламж хуудсыг ecc.mn emongolia.mn цахим сайтаас харах,хэвлэж авах боломжтой" гэв.

Засаг даргын орлогчийн хэргийг БНСУ-ын хуулиар шийдвэрлэнэ

Монголын нэр бүхий төрийн албан хаагч ажлын айлчлал хийж байх үедээ бэлгийн хүчирхийллийн хэрэгт сэжигтнээр татагдсан болохыг Өмнөд Солонгосын "KBS"телевиз /2023.06.05/ мэдээлсэн. Тодруулбал, Сэлэнгэ аймгийн Мандал сумын Засаг даргын орлогчийг Чэжү аралд хийсэн айлчлалынхаа үеэр бэлгийн хүчирхийлэл үйлдсэн хэрэгт буруутган цагдаа нар баривчилсан.
Энэ хэргийн явцын талаар Монгол Улсаас БНСУ-д суугаа Элчин сайдын яамны Консулын хэлтсийн дарга Б.Тэнүүнээс тодруулахад "Хохирогчийн талтай холбогдож ажиллаж байгаа. Суугаа орны хуулийн дагуу шийдвэрлэгдэнэ. Хэрэг мөрдөн байцаалтын шатанд үргэлжилж байна" гэсэн юм.
Монголын язгуур урлагийн тоглолт, үзүүлбэрийн хамт зочилсон албаныхныг тус арлын удирдлагууд хүндэтгэлтэй хүлээн авч уулзсан байна. Тэд үйл ажиллагаа дуусаад буудалд амрахдаа архидан согтуурч улмаар орлогч дарга орчуулагчаар ажиллаж байсан монгол эмэгтэйд бэлгийн хүчирхийлэл үйлдсэн хэрэгт буруутгагдаад байгаа аж.БНСУ-ын томоохон хэвлэл мэдээллийн хэрэгслээр уг хэргийн талаар мэдээлэхдээ “Тухайн үед хохирогч өрөөнөөсөө гарч буудлын ажилчдаас тусламж хүссэн бөгөөд тэр даруй цагдаа дуудсан. Сэжигтэн нь өнгөрсөн дөрөвдүгээр сард болсон Чежү арлын чуулганд айлчилсан Монгол Улсын Сэлэнгэ аймгийн Засаг даргын төлөөлөгчдийг мөн дагалдан явсан хүн юм. Тэрбээр үйлдвэрлэл, соёлын солилцоог өргөжүүлэхэд манлайлан оролцож байсан хүн“ гэж мэдээлж байв.

BOLOD ДОЛОО ХОНОГИЙН ТОЙМ: Л.Оюун-Эрдэнэ Илон Макстай ногоон машин, ногоон хэрэглээг нэвтрүүлэх тухай ярилцлаа
Tweet
Bolod.mn