Bolod.mn сайт долоо хоног бүр улс төр, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд үер усны улмаас үүссэн бохирдол цэвэрлэгээний ажил болон, үерийн усанд хийсэн шинжилгээний хариу зэргийг шинжлэн мэдээлэв. Түүнчдлэн ЭМДС-аас хүүхдийн шүдний эмчилгээнд нэг 60 мянган төгрөгөөр тооцож, жилд 3 шүд эмчлүүлэх зардлыг гаргахаар болсон байна. Эдгээр болон бусад онцлох үйл явдлуудыг тоймлон хүргэж байна.

Хүүхдийн нэг шүдний эмчилгээг 60 мянган төгрөгөөр тооцож, жилд 3 шүд эмчлүүлэх мөнгийг ЭМДС-аас гаргана

Эрүүл мэндийн даатгалын сангаас олгох санхүүжилтийн чиглэлээр хэрэгжиж байгаа журам, тогтоолуудад шаардлагатай өөрчлөлтүүдийг Эрүүл мэндийн даатгалын үндэсний зөвлөлийн энэ оны зургаадугаар сарын 28-ны өдрийн хуралдаанаар баталсан байна.

Тус өөрчлөлтөөр лавлагаа шатлалын эрүүл мэндийн байгууллагад хүүхдийн шүд эмчлүүлэх зардлыг эрүүл мэндийн даатгалын сангаас санхүүжүүлэхээр болжээ.

Нийслэл, аймаг, дүүрэгт хүүхдийн нэг шүдний эмчилгээг 60,000 төгрөгөөр, жилдээ гурван шүд
Сум, тосгоны эрүүл мэндийн төвд хүүхдийн нэг шүдийг 90,000 төгрөгөөр, жилдээ гурван шүд эмчлүүлэх зардлыг эрүүл мэндийн даатгалын сангаас санхүүжүүлэхээр болсон байна.

Мөн тус өөрчлөлтөөр эрүүл мэндийн байгууллагууд жирэмсэн эхэд үзүүлэх тусламж, үйлчилгээг цогцоор нь үзүүлэхгүй, өөр эмнэлэгт оношилгоо, шинжилгээ хийлгэхээр илгээж чирэгдүүлдэг байсныг шинэчилжээ. Тодруулбал

Жирэмсний хяналтыг багцыг харьяа лавлагаа шатлалын эрүүл мэндийн байгууллагад үзүүлсэн тохиолдол бүрийг 60,000 төгрөгөөр,
Тухайн жирэмсэн эхийн биеийн эрүүл мэндийн байдлаас шалтгаалж нэмэлтээр өндөр өртөгт оношилгоо, шинжилгээ, шүдний тусламж, үйлчилгээнд хамрагдах тохиолдолд эрүүл мэндийн даатгалын сангаас нэмэлтээр санхүүжүүлэхээр болсныг Эрүүл мэндийн даатгалын ерөнхий газраас мэдээллээ.

Туул, Сэлэнгэ, Дунд голоос гэдэсний савханцар, бичил биетэн илэрлээ

Нийслэл хотод үер усны аюулын улмаас үүссэн 41 газраас үеийн усны чанар, найрлагаас дээж авч шинжилсэн шинжилгээний дүгнэлт гарчээ.

Байгаль орчин, аялал жуулчлалын сайд Б.Бат-Эрдэнийн 2023 оны А/253 дугаар тушаалаар Нийслэл хотод үер усны аюулын улмаас үүссэн хөрсний бохирдлын эсрэг хариу арга хэмжээ төлөвлөх, зохион байгуулах үүрэг бүхий ажлын хэсэг байгуулан ажилласан юм. Ажлын хэсгийнхэн долоодугаар сарын 07-09-ний өдрүүдэд Цаг уур, орчны шинжилгээний газар (ЦУОШГ)-ын харьяа Байгаль орчин, хэмжил зүйн төв лаборатори (БОХЗТЛ)-ийн 3 хүний бүрэлдэхүүнтэй баг газар дээр нь ажиллаж, голын уснаас 18, үерт автсан газруудын халиа, тогтоол уснаас 21, Төв цэвэрлэх байгууламжийн оролт, гаралтын хэсгээс 2, нийт 41 сорьцийг зааврын дагуу авч, Усны газрын “Усны хяналтын төв лаборатори”-д хүргүүлэн, усны физик, химиийн шинжилгээг 8, бичил амь судлалын шинжилгээг 6 үзүүлэлтээр хийсэн байна.

Шинжилгээний дүнгээр эдгээр уст цэгүүдийн ус сул хүчиллэгээс сул шүлтлэг орчинтой (рН=5.9-8.4), эрдэсжилтийг тусгайлан тодорхойлоогүй тул цахилгаан дамжуулах чанар (EC)-ыг хэмжсэн үзүүлэлтээс тоймлон харахад ялимгүй эрдэсжилттэйгээс их эрдэсжилттэй (32.6.0-1851.0), бохирдолтыг тодорхойлогч үзүүлэлтүүдийн нэг болох хялбар исэлдэгч органик бодисуудын агууламж (ПИЧ), шим бохирдлыг илэрхийлэгч азотот нэгдлүүд (NH4, NO2, NO3) ихтэй ус байна. Голуудын усны чанарыг тухайн сорьц авсан цэгүүд дээрх химийн шинжилгээний дүнг үндэслэн бохирдлын индексээр үнэлбэл Туул голын ус IV зэрэг буюу “Бохирдолттой” ангилалд багтаж байсан бол Сэлбэ, Улиастай, Дунд голууд нь V зэрэг буюу “Бохир” ангилалд багтаж байна.

Скүүтерийн компанийн ажилтанг бусдын гэрт зөвшөөрөлгүй орж, бичлэг хийн цахим орчинд нийтэлсэн асуудлаар шалгаж байна

Энэ сарын 15-ны өдөр “JET” скүүтерийн компанийн ажилтан Т нь Сонгинохайрхан дүүргийн нутаг дэвсгэрт байрлах нэр бүхий иргэний гэрт зөвшөөрөлгүй орж, дуу дүрсний бичлэг хийн, цахим орчинд нийтэлсэн. Энэ үйлдэл нь Зөрчлийн тухай хуулийн 6.22 дугаар зүйлд заасан зөвшөөрөлгүй гэрэл зураг авах, дууны дүрсний бичлэг хийх /1.Оршин суугчийн зөвшөөрөлгүйгээр орон байранд, эсхүл гадна талаас орон байрны доторх орчны гэрэл зураг авсан, дууны, дүрсний, дуу-дүрсний бичлэг хийх заалтыг зөрчиж байгаа аж. Тиймээс зөрчил шалган шийдвэрлэх ажиллагааг нутаг дэвсгэр хариуцсан цагдаагийн байгууллага явуулж эхэлсэн байна.

Тодруулбал, тус заалтад хоёр зуун нэгжтэй тэнцэх хэмжээний төгрөгөөр, хуулийн этгээдийг хоёр мянган нэгжтэй тэнцэх хэмжээний төгрөгөөр торгоно гэж заасан байдаг аж. Сануулахад, бусдын эд зүйлийг орон байрандаа хадгалсан нь хулгайлах гэмт хэргийн хувьд хуулиар хариуцлага хүлээлгэх боломжтой аж.

Орон нутгийн чиглэлд үйлчилгээ үзүүлдэг автобусны жолооч явган зорчигч дайрч амийг нь хөнөөсөн хэрэг гарчээ

Улаанбаатар-Увс аймгийн чиглэлийн зорчигч тээврийн үйлчилгээ үзүүлдэг автобусны жолооч зургаадугаар сарын 22-нд явган зорчигч дайрч амийг нь хохироосон хэрэг гарчээ. Энэхүү осол Архангай аймагт гарсан бөгөөд осол гаргасан тээврийн хэрэгслийн жолооч тухайн үед хэргийн газрыг орхиж явсан байна. Одоогийн байдлаар хэргийн эзэн холбогдогчийг олж тогтоон Архангай аймаг дахь цагдаагийн газарт шалгаж байгаа аж.

Богдхан Уулын дархан цаазат газар бамбай хоншоорт могой ихээр үзэгдэх болсон тул сэрэмжлүүлэхийг анхааруулж байна

Богдхан уулын дархан цаазат газар болон Нийслэлийн суурьшлын бүсэд бамбай хоншоорт могой ихээр үзэгдэх болсон тул иргэдийг сонор сэрэмжтэй байхыг анхааруулж байна.

Бамбай_хоншоорт могой нь ихэвчлэн хад асгатай газраар амьдардаг 70 орчим см урттай, ерөнхий зүс хул шарга юм уу хар хүрэн өнгөтэй, өнгө нь маш хувирамтгай байдаг. Ой сан, мод бүхий нутгийнх ихэвчлэн тод хар хүрэн, говь цөлийн бүсийнх цайвар юм уу бор шарга өнгөтэй байна. Нуруу ба сүүлний дагуу хөндлөн цагаан судалтай байх судал заримдаа дундуураа тасархайтсан, биеийн хоёр хажуугаар тууш эгнэсэн цайвар бараан толботой, хүүхэн хараа нь босоо байна

Мөн нүд хамрын хооронд гүнзгий хонхортой тул зэрвэс ажиглахад хамрын 4 сүвтэй мэт байдгаараа бусад могойноос хялбар ялгагдана. Иймд бамбай хоншоорт могойтой таарсан болон хатгуулсан тохиолдолд нэн яаралтай хамгийн ойр байрлах эмнэлэгт очих, мэргэжлийн байгууллагад хандахыг анхааруулж байна.

Баярын өдрүүдэд 15 хүн зам тээврийн ослоор нас баржээ

Улсын хэмжээнд 2023.07.09-нөөс 2023.07.15-ны өдрийн хооронд зам тээврийн ослын шинжтэй дуудлага, мэдээлэл 972, зам тээврийн осол 408 бүртгэгдэж нийт зам тээврийн ослын улмаас 15 хүний амь нас хохирч, 70 хүн гэмтсэн байна. Тухайлбал:

Нийслэлд зам тээврийн ослын улмаас 2 хүний амь нас хохирч, 26 хүн хүнд, хөнгөн хэлбэрээр бэртэж, 7 хүүхэд зам тээврийн осолд өртөж хохирсон байна.
Харин орон нутагт 13 хүний амь нас хохирч, 44 хүн хүнд, хөнгөн хэлбэрээр бэртэж, 14 хүүхэд зам тээврийн ослын улмаас өртөж хохирсон байна.

Энэ хугацаанд цагдаагийн байгууллагаас согтууруулах ундааны зүйл хэрэглэсэн үедээ тээврийн хэрэгсэл жолоодсон 513, жолоодох эрхгүй үедээ тээврийн хэрэгсэл жолоодсон 195 зөрчлийг тус тус илрүүлж, эрэн сурвалжлагдаж байсан 11 хүн, эд зүйлийг олж тогтоон, гэмт хэрэг, зөрчлийн шинжтэй 2 үйлдлийг таслан зогсоож ажилласан байна.

Хүний амь нас хохирсон зам тээврийн ослын голлох шалтгаан согтуугаар тээврийн хэрэгсэл жолоодох, тээврийн хэрэгслийн хурдыг зөв тохируулж яваагүйн улмаас онхолдох, аюултай нөхцөлд буюу замын үзэгдэлт хязгаарлагдмал хэсэгт /Өгсүүр, эргэлт, өөдөөс автомашинтай үед болон явж байгаа чиглэлд гүйцэж түрүүлээд буцаад байр эзлэх боломжгүй цуварсан олон автомашинтай үед/ гүйцэж түрүүлэх үйлдлийг хийх явцдаа өөдөөс яваа автомашинтай мөргөлдөх гэсэн ослын улмаас хүний амь нас хохирсон байна.

BOLOD ХОНОГИЙН ТОЙМ: Хүүхдийн шүдний эмчилгээнд жилд 180 мянган төгрөгийг улсаас даана
Tweet
Bolod.mn