Bolod.mn сайт долоо хоног бүрийн ням гарагт улс төр, нийгэм эдийн засгийн хүрээнд болж өрнөсөн онцлох үйл явдлыг тоймлон хүргэдэг. Эдгээр өдрүүдэд УИХ-ын намрын чуулган нээхтэй зэрэгцэн ЗГ-аас багш мэргэжлээр сурах гэж буй оюутнуудын төлбөрийг 2030 он хүртэл төр даах болсон тухай мэдээлэл цацагдав. Мөн түүнчлэн хичээлийн шинэ жил эхлэх гэж буйтай холбоотойгоор замын хөдөлгөөнийг зохицуулахын тулд автомашинуудыг тэгш сондгойгоор замын хөдөлгөөнд оролцуулж эхэллээ. Энэхүү зохицуулалт нь 20 хоног үргэлжлэх юм байна.

Мотоциклтой хүн экскаватор мөргөж, хавчуулагдан нас баржээ

Нийслэлийн Хан-Уул дүүргийн гуравдугаар хороо, автозамын уулзвар, замын зорчих хэсэгт экскаваторын хойд талаас мотоциклтой хүн мөргөж, хавчуулагдсан ноцтой осол гарчээ. Онцгой байдлын газарт экскаваторын эд ангид хавчуулагдсан, цогцсыг гаргаж чадахгүй байна гэсэн дуудлагыг /2023.08.25/ 02:45 цагт хүлээн авсан байна. Нийслэлийн Аврах ангийн алба хаагчдыг очиход иргэний “Хьюндай R210W-9” загварын экскаваторын хойд талаас “Кавасаки” загварын мотоцикл мөргөж, 25 настай, эрэгтэй экскаваторын хойд хэсэгт хавчуулагдан нас барсан байжээ. Албаныхан “Холматра”-гийн задаргааны багаж ашиглан цогцсыг гаргаж, тус дүүргийн Замын цагдаагийн хэлтсийн зохицуулагчид шилжүүлэн өгсөн.

Багш мэргэжлээр суралцах оюутнуудын төлбөрийг төр даана

Шинэчилсэн хууль, эрх зүйн орчинд анхны хичээлийн жилийг эхлүүлэх гэж байгаатай холбогдуулан өнөөдөр /2023.08.25/ "Боловсролын шинэ сэргэлт" боловсролын удирдлагууд болон боловсролын оролцогч талууд олон нийтэд мэдээлэл өгч байна. Чуулганы үеэр Ерөнхий сайд Л.Оюун-Эрдэнэ багш мэргэжлээр сурах оюутнууд болон багш магистрын зэргээр суралцах бол төр төлбөрийг 100 хувь бүрэн даана гэв. Тодруулбал, тэрбээр 2030 он хүртэл багш мэргэжлийг сонгож байгаа оюутнуудын сургалтын төлбөрийг 100 хувь төр хариуцна, багш магистрт дотоодод суралцах бол сургалтын төлбөрийг 100 хувь төр хариуцна гэсэн юм. Мөн "Боловсролын шинэ сэргэлт"-ийн хүрээнд цогц эрх зүйн орчныг бүрдүүлж байгааг салбар яамнаас мэдээллээ.

Боловсрол, шинжлэх ухааны сайдын зөвлөх Н.БИЛГҮҮДЭЙ:

-Одоогоос 21 жилийн өмнө Боловсролын тухай анхдагч хууль батлагдаж байсан. Улмаар 2009 онд шинэчилсэн найруулга батлагдаж, түүнээс хойш 14 жилийн дараа салбарын эрх зүйн орчин шинэчлэгдэж байна. Мэргэжлийн сургалт үйлдвэрлэлийн төвийн тухайд одоо хийгдсэн эрхзүйн шинэчлэлт цаашид хийх алсын хараатай уялдуулж, МСҮТ гээг нэршлийг халж Мэргэжлийн боловсролын сургууль, Политехник коллеж болгохоор хуульд тусгагдсан. Мэргэжлийн боловсролын сургуульд одоогийн байдлаар 38-40 мянган суралцагч суралцаж байгаа бөгөөд нийгэмд үл ойлголцол бий болгодог сар бүрийн тэтгэмж авах гэж сурдаг зэрэг ойлголтыг эрхзүйн шинэчлэлтийн хүрээнд халж байгаа. Энэ салбарын онцлог нь түншлэл болоод хамтын оролцоо. Өөрөөр хэлбэл зөвхөн төрийн оролцоо биш эцэг эх сурган хүмүүжүүлэгч, ажил олгогчдын оролцоо их.

Мөн суралцагчийн оролцоо хамгийн чухал. Хуульд тусгагдсан томоохон нэмэлт бол түншлэлийг хөгжүүлэх. Ингэснээр хамтын оролцоо, хамтын засаглалыг бий болгож сургалтын хөтөлбөрийг суралцагч, ажил олгогч зэрэг бүхий л талын хамтын оролцоонд түшиглэж цогц байдлаар хөгжүүлж, бий болгоно. Хуулийн нэмэлт өөрчлөлтөд хосмог тогтолцоог оруулж өгч байгаа. Энэ нь сургалтын байгууллага болоод ажлын байран дээр нь зэрэгцэн суралцана гэсэн үг. 2021 онд УИХ-аас баталсан Хөдөлмөрийн тухай хуульд дагалднаар суралцах хөдөлмөрийн гэрээ гэдгийг шинээр оруулсан.

Ингэснээр мэргэжлийн боловсролын байгууллагад суралцагчдад хосолмол байдлаар сурах эрх зүйн орчныг бүрдүүлсэн. МСҮТ есдүгээр анги төгссөн сурагчдыг 2,5 жил сургаад хөдөлмөрийн зах зээл рүү нийлүүлдэг байсан. Энэ тогтолцоог ерөнхий боловсролын суурь системтэйгээ уялдуулж гурван жил болгож байгаа. Гэхдээ цаашид мэргэжлийн боловсрол, политехник коллежид суралцагчдад бид хугацааг нарийн зааж өгөхгүй. Тухайн иргэн хэдий хугацаанд мэргэжлийн ур чадвараа эзэмшинэ тэр хугацаандаа л суралцаад төгсөх боломжийг бүрдүүлнэ.

Барилгаас зүүгдсэн хүүхдийг асран хамгаалагчид нь хүлээлгэн өглөө

Цахим орчинд өнөөдөр /2023.08.25/ бага насны хүүхэд өндөр барилгаас зүүгдэж байна гэх мэдээлэл цацагдсан. Тодруулбал, цагдаагийн байгууллагын 102 тусгай дугаарт 2023 оны наймдугаар сарын 25-ны өдөр 14.19 цагт "Баянзүрх дүүргийн 36 дугаар хороо "Санни таун" хотхоны байшингийн ирмэг дээгүүр 8-9 орчим насны хүүхдүүүд яваад байна" гэх дуудлага мэдээлэл бүртгэгдсэн байна.

Уг мэдээллийг Баянзүрх дүүргийн цагдаагийн газрын нэгдүгээр хэлтсээс жижүүрийн шуурхай бүрэлдэхүүн очиж шалган, хүүхдүүдийг эцэг эх, асран хамгаалагчид нь хүлээлгэн өгч тэдний аюулгүй байдлыг хангаж ажилласан. Иймд иргэд та бүхэн бага насны хүүхдэд тавих хараа хяналтаа сайжруулж, хүүхдийг ахуйн осол гэмтлээс урьдчилан сэргийлэхийг цагдаагийн байгууллагаас зөвлөж байна.

Зургаан настай охиныг зодсон иргэнийг шалгаж байна

Цахим орчинд зургаан настай хүүхдийг "шал дутуу угаасан" гэх шалтгаанаар харгисаар зодож буй бичлэг цацагдсан. Энэ дагуу цагдаагийн байгууллага шалгаж эхэлжээ. Тодруулбал, энэ сарын 23-ны өдөр "Хан-Уул дүүргийн 9 дүгээр хорооны нутаг дэвсгэр ….. дугаар тоотод хүүхэд зодоод байна" гэх дуудлага иржээ. Мэдээллийн дагуу Хан-Уул дүүргийн цагдаагийн газраас иргэн Ч, С нарын үйлдэлд холбогдох шалгалтын ажиллагааг явуулжээ. Улмаар хүүхдүүдийг Түр хамгаалах байранд хамгаалалтад авах ажлыг зохион байгуулж байна гэж Цагдаагийн байгууллагаас мэдээллээ.

Зайсангын Астра Вилла хотхонд тагтнаас гал алджээ

Хан-Уул дүүргийн 11 дүгээр хорооны “Астра вилла” хотхонд өнөөдөр /2023.08.24/ 19:40 цагийн үед гал гарчээ. Албан бус эх сурвалжуудын хэлж байгаагаар гал тагтнаас эхэлж гарсан бөгөөд маш хурдан дээш тархсан гэв. ОБЕГ-аас тодруулахад “19:39 цагт ХУД-ийн 11 дүгээр хороо Астра вилла хотхоны 207 байр нэгдүгээр орцонд айлын өрөө шатаад байна дуудлагаар Хан-Уул дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид ажиллаж галын тархалтыг 20:09 цагт зогсоож, бүрэн унтраахаар ажиллаж байна” гэлээ. Хотхоны оршин суугчид тус байранд байгаа хүүхэд, өндөр настнуудыг байрнаас яаралтай гаргаж байгаа бөгөөд зогсоол дахь машинуудыг холдуулж байгаа аж.

БНСУ-д хүчингийн хэргээр баривчлагдсан Мандал сумын засаг даргын орлогч хэргээ хүлээн зөвшөөрсөн тул шүүх хурлын өдрийг товложээ

БНСУ-ын Чэжү хотод болсон урлагийн арга хэмжээнд оролцож байсан Сэлэнгэ аймгийн Мандал сумын засаг даргын орлогч М нь зургаадугаар сарын 4-ны өдөр 20 гаруй насны орчуулагч эмэгтэйг хүчирхийлсэн байж болзошгүй хэргээр тус улсад баривчлагдаж, яллагдагчаар татагдаад буй. Тэгвэл өчигдөр буюу наймдугаар сарын 24-ний өдөр Чежү хотын эрүүгийн хэргийн анхан шатны 2-р хэлтсийн шүүх хурал дээр хүчингийн хэрэгт буруутгагдаж байсан Мандал сумын засаг даргын орлогч М (46 настай) бүх хэргээ хүлээн зөвшөөрч, хохирогчоос өршөөл үзүүлэхийг хүсчээ. Тэрбээр өөрт холбогдох хэргээ үгүйсгэж байсан ч ийнхүү хүлээн зөвшөөрсөн байна. Улмаар М-д холбогдох хэргийн шүүх хурлыг БНСУ-ын Чэжү хотын шүүхэд есдүгээр сар /2023.09/-д хийхээр товложээ.

Тэгвэл БНСУ-ын Эрүүгийн хуулийн 297 дугаар зүйлд, “Хүчиндэх зүйл ангид хүчирхийлэл, айлгаж сүрдүүлсний улмаас эмэгтэй хүнтэй бэлгийн харьцаанд орсон этгээдийг гурваас доошгүй жил хорих ялаар шийтгэнэ” гэсэн заасан байдаг бол, мөн хуулийн 298 дугаар зүйлд хүчирхийлэл, айлган сүрдүүлэх замаар бусдын эсрэг зүй бус үйлдэл хийсэн хүнийг арван жилээс илүүгүй хугацаагаар хорих, арван таван саяас дээшгүй мөнгөн дүнгээр торгох ял шийтгэнэ. Харин НСУ-ын Эрүүгийн хуулийн 299 дүгээр зүйлд эмэгтэй хүнтэй бэлгийн харьцаанд орсон эсвэл бусдыг ухаан алдсан буюу эсэргүүцэх чадваргүй байдлыг далимдуулсан бол өмнөх хоёр зүйл заасны дагуу шийтгэнэ” гэж заасан байдаг.

Тээврийн хэрэгслийн тэгш, сондгойгоор хязгаарлах зохицуулалт 20 хоног үргэлжилнэ

Сургууль, цэцэрлэгийн бэлтгэлтэй холбоотойгоор замын хөдөлгөөний ачаалал нэмэгдэх үед хийх зохицуулалтын талаар мэдээлэл хийж байна. Наймдугаар сарын 26-наас автомашины улсын дугаарын тэгш, сондгойгоор хөдөлгөөнд оролцуулахаар болсныг мэдээлсэн. Тодруулбал: Сондгой тоо буюу 1, 3, 5, 7, 9-өөр төгссөн автомашиныг 2023 оны наймдугаар сарын 27, 29, 31, Есдүгээр сарын 2, 4, 6, 8, 10, 12, 14-ний өдрүүдэд Тэгш тоо буюу 0, 2, 4, 6, 8-аар төгссөн автомашиныг наймдугаар сарын 26, 28, 30, Есдүгээр сарын 1, 3, 5, 7, 9, 11, 13-ны өдрүүдэд, 08:00-20:00 цагийн хооронд тус тус замын хөдөлгөөнд оролцуулахаар тусгажээ.

Дугаарын хязгаарын бүс нь: Хойд хязгаар нь 32-ын тойрог Урд хязгаар нь 120-ийн уулзвар Зүүн хязгаар нь Чулуун овооны аюулгүйн тойрог Баруун хязгаар Саппорогийн тойргийн хүрээнд тэгш сондгойгоор хөдөлгөөнд зорчуулах аж. Энэ жилийн улсын дугаарын тэгш, сондгойгоор хөдөлгөөнд оролцуулах зохицуулалт 20 хоног үргэлжилнэ гэдгийг НЗД-ын хэвлэлийн төлөөлөгч Н.Сугар хэллээ. "Замын хөдөлгөөний удирдлагын төв" ОНӨТҮГ-ын захирал С.Адъяасүрэн "Өнгөрсөн долоо хоногийн байдлаар Улаанбаатар хотод орон нутгаас 177,540 тээврийн хэрэгсэл орж ирсэн байна. Сүүлийн өдрүүдийн замын хөдөлгөөний нөхцөл байдлыг ажиглахад зах, худалдааны төв рүү чиглэсэн зорчих хөдөлгөөн нэмэгдсэн. Ноднин жил авто машиныг тэгш, сондгойгоор хөдөлгөөнд оролцуулах арга хэмжээ авч байсан. Тухайн үед замын хөдөлгөөн 7-9 километр цагийн хурдтай байсан бол тэгш, сондгой хөдөлгөөнд зорчуулах арга хэмжээ авснаар 15-20 километр цагийн хурдтай зорчиж байсан. Ингэснээр 38 орчим хувиар замын хөдөлгөөний түгжрэл, саатал буурсан үзүүлэлттэй гарсан учраас энэ арга хэмжээг дахин авч байна" гэлээ.

BOLOD ДОЛОО ХОНОГИЙН ТОЙМ: Автомашиныг тэгш, сондгойгоор хөдөлгөөнд оролцуулж, Багш мэргэжлээр суралцах оюутнуудын төлбөрийг төр даана
Tweet
Bolod.mn