Bolod.mn сайт долоо хоног бүр нийгэмд өрнөж буй үйл явдлуудын талаар тойм мэдээлэл бэлтгэн хүргэдэг. Эдгээр өдрүүдэд Пап Францисын манай улсад хйиж буй 4 өдрийн айлчлал өндөрлөлөө. Мөн түүнчлэн хичээл сургууль эхэлсэнтэй холбоотойгоор эцэг эхүүдийг хүүхэддээ тавих анхаарлаа сулруулж болохгүйг сануулах үйл явдал болов. Түүнчлэн голын гольдролыг боосон барилгуудыг НЗДТГ-аас буулгахыг шаардан, хууль тогтоомж гарсан хэдий ч “Aqua Garden” барилгын ажил одоог хэр нь үргэлжилсээр байгаа аж. Эдгээр болон бусад үйл явдлыг тоймлон хүргэж байна.

Пап Францисын Монгол Улсад хийж буй төрийн айлчлал өндөрлөлөө

Гэгээн ширээт Улсын төрийн тэргүүн Пап Францисын Монгол Улсад хийж буй төрийн айлчлал өнгөрсөн 9-р сарын 4-ны өдөр өндөрлөсөн.Тэрбээр айлчлалынхаа сүүлийн өдөр сайн үйлстнүүдтэй уулзалт хийж, “Нигүүлслийн өргөө”-ний нээлтэд оролцмон юм. Гүюг хааны захидлыг дэвшилтэт технологиор дээд зэргийн чанартайгаар үйлдсэн албан ёсны хуулбарыг хүндэтгэлтэйгээр бэлэг болгон өгсөн нь нь айлчлалын онцлог байлаа. Их хааны монгол бичгээр сийлсэн тамгатай хариу бичгийг олон хэлээр орчуулан илгээсэн нь эдүгээ Ватиканы номын санд хадгалагдаж байгаа аж.Ромын Пап Францис "Та бүхэн ойр тойрныхоо зовлонг амарлиулах үйл хэрэгт босоо монгол бичиг шигээ чигч тууштай байж, хүн төрөлхтөнд хүмүүний мөн чанарыг үлгэрлэн сануулж, хөрст дэлхий хэмээх нэгэн гэртээ хөх тэнгэр шиг орших болтугай" хэмээн нийтэд хандан хэлсэн юм.

S Outlet дэлгүүрийнхэн эсэргүүцлээ илэрхийллээ

Сүхбаатар дүүргийн нэгдүгээр хороо, "S’Outlet" дэлгүүрийнхэн шүүхийн шийдвэргүйгээр барилгыг нураах нь хууль бус гэдгийг хэлж, эсэргүүцлээ илэрхийлж жагсч байна. Тав хоногийн өмнө /2023.08.31/ тус дэлгүүрийн барилгыг үерийн эрсдэлтэй бүсээс чөлөөлж албадан буулгах талаар мэдэгдлийг нийслэлийнхэн танилцуулсан.Тодруулбал, "S’Outlet" дэлгүүрийн барилгыг буулгаж газрыг чөлөөлөхөөс гадна газрын зөвшөөрөл олгосон этгээдүүдийг Авлигатай тэмцэх газар шалгахыг мэдэгдсэн юм. Нийслэлээс мэдэгдэхдээ, газар чөлөөлөхөд гарч байгаа зардлыг аж ахуй нэгж шууд төлөх боломжгүй учир эхний ээлжид төсвөөс гаргана. Үүний дараагаар буруутай этгээдүүд нөхөн төлнө гэсэн. Харин "S’Outlet" дэлгүүрийн удирдлага, ажилчид энэ шийдвэрийг хүлээж авахгүйгээ мэдэгдэж, өнөөдрөөс эсэргүүцлээ илэрхийлж эхлээд байгаа юм. Одоогоор тухайн дэлгүүрийн ойролцоох хэсгийн замыг түр хугацаанд хаасан бөгөөд мэргэжлийн компаниуд техник хэрэгслүүдээ хэдийнэ оруулж, байрлуулжээ. Эргэн сануулахад, өнгөрсөн долдугаар сарын эхээр нийслэл хотод үргэлжлэн орсон борооны улмаас голын урсац хаасан обьектуудыг яаралтай буулгах арга хэмжээ авахыг хотын дарга Д.Сумъяабазар мэдэгдэж, аж ахуй нэгжүүдэд албан шаардлага хүргүүлээд буй. Тухайн үед үерийн эрсдэлээс урьдчилан сэргийлж Сүхбаатар дүүргийн нэгдүгээр хороо, Натурын гүүрнээс "S’Outlet" дэлгүүр хүртэл Сэлбэ гол дагуу элс, хайргаар шороон түр далан босгосон. Энэхүү үерийн даланг зөөвөрлөж, цэвэрлэх ажлыг зохион байгуулахаар өнөөдөр /2023.09.05/ тухайн бүсэд хэсэгчлэн зам хаагаад байгаа юм."S’Outlet" дэлгүүр үер болсноос хойш цахилгаангүй байгаа тул ажиллаагүй, ажилчдынхаа цалинг тавих боломжгүй болсон байна. Тиймээс шүүхийн шийдвэргүй хууль бус хойшлуулашгүй ажиллагааг тус аж ахуй нэгжийнхэн эсэргүүцэж байгаа аж.

Алтай хотхоны урд байрлах ШТС-ыг буулгаж байна

Хан-Уул дүүргийн 3 дугаар хороо, Алтай хотхоны урд байрлах “Шунхлай трейдинг” ХХК-ийн шатахуун түгээх станц нь Сэлбэ, Дунд голын онцгой хамгаалалтын бүс үерийн далан бүсийн онцгой хамгаалалтын зурваст байгаа учир албадан буулгахаар болсон.Иймд тус ШТС-ын үлдэгдэл шатахууныг соруулсан ба онцгой объект учир энгийн барилга байгууламжуудыг өөрсдийн хүчээр холбогдох байгууллагуудтай хамтран буулгана хэмээн нийслэлээс мэдээлж байсан юм. Үлдэгдэл бензин, түлшийг соруулах ажлыг тус компаниас зохион байгуулж, НОБГ-аас газар дээр нь хяналт тавин ажиллаж байгаа аж. Есдүгээр сарын 6-ны өдрийн байдлаар 42,000 литр бензин соруулж дууссан бөгөөд үлдэгдэл дизель түлшийг соруулах ажил хэвийн үргэлжилж байгаа ба Хөдөлмөрийн аюулгүй байдлын ажилтан болон станцын эрхлэгч нарт аюулгүй ажиллагааны зааварчилгыг өгч ажиллаж байна.

Бага насны хоёр хүүхдийг хулгайлахыг завдсан эмэгтэйг ЦЕГ-аас шалгаж байна

Цагдаагийн байгууллагад 2023 оны есдүгээр сарын 2-ны өдрийн 19 цаг 29 минутад Дархан-Уул аймгийн Дархан сум, 10 багт “Манай хоёр хүүхдийг авч явах гээд байна” гэх дуудлага, мэдээлэл бүртгэгджээ.Дуудлага, мэдээллийн дагуу тус аймгийн цагдаагийн газраас шалгалтын ажиллагаа явуулж, байрны гадна тоглоомын талбайд тоглож байсан 4-6 насны хоёр хүүхдийг хөтлөн явсан гэх 23 настай, эмэгтэй “Н” гэгчийг саатуулан, шалгалтын ажиллагаа явуулж байна. Сэрэмжлүүлэг болгох үүднээс тухайн дуудлага өгсөн эмэгтэй өөрийн цахим хуудаснаа видео бичлэг тавьж олон нийтэд мэдээлэл хүргэсэн юм. Иймд эцэг, эх, асран хамгаалагч та бүхэн бага насны хүүхдийн аюулгүй байдлыг хангах, тэдэнд тавих анхаарал, хараа хяналтаа дээшлүүлэхийг цагдаагийн байгууллагаас сэрэмжлүүлж байна.

Хүчин хийж, хил даван зугтсан оюутныг эрэн сурвалжилж байна

Олон нийтийн цахим сүлжээнд “Насанд хүрээгүй охиныг хүчиндэж, жирэмсэн болгосон сонсогч хилээр гарч, хохирогчдыг дарамталж эхэлжээ” гэх мэдээлэл 2023 оны есдүгээр сарын 5-ны өдөр нийтлэгдсэн.Цагдаагийн байгууллагаас Баянзүрх дүүргийн нутаг дэвсгэрт 2015 оны дөрөвдүгээр сард иргэн “Э” нь таксигаар үйлчлүүлэхдээ жолоочид нь хүчиндүүлсэн гэх хэргийг Хууль сахиулахын их сургуулийн оюутан “У” гэгч нь үйлдсэн болохыг илрүүлж, мөрдөн шалгах ажиллагаа дуусгасныг Прокурорын байгууллагаас Баянзүрх дүүргийн Шүүхэд шилжүүлжээ. Хэрэг шүүхэд хянагдаж байх хугацаанд шүүгдэгч “У”-ын өмгөөлөгчийн хүсэлтийн дагуу цагдан хорих таслан сэргийлэх арга хэмжээг өөрчилж, батлан даалтанд өгөх таслан сэргийлэх арга хэмжээ авчээ.Шүүгдэгч “У” гэгч нь Замын-Үүд авто замын боомтоор оргон зугтаж, хэргийг Баянзүрх дүүргийн шүүхээс 2016 оны арваннэгдүгээр сарын 1-ний өдөр түдгэлзүүлжээ. Иргэн “У” гэгч нь гэмт хэрэгт холбогдох үедээ Цагдаагийн байгууллагад ажиллаж байгаагүй ба Хууль сахиулахын их сургуулийн оюутан байжээ.“У”-г Эрүүгийн хэрэг хянан шийдвэрлэх тухай хуульд зааснаар эрэн сурвалжилж байна.

Цахилгаан автоамашиныг дугаарын хязгаарлалтгүй зорчуулах захирамж гаргажээ

Есдүгээр сарын 5-ны Нийслэлийн Засаг даргын захирамжаар цахилгаан автомашинд дугаарын хязгаарлалт хамаарахгүй болжээ. Манай улс агаарын бохирдлоо бууруулах ажлын хүрээнд цахилгаан автомашины хэрэглээг дэмжиж нэгдүгээр эгнээгээр дугаарын хязгаарлалтгүй зорчих зэрэг нөхцөлүүдийг бүрдүүлж өгөх хэрэгтэй байна гэдгийг холбогдох албаныхан өмнө нь хэлж байсан юм.

Дугаарын хязгаарлалт нь дараах автомашинуудад хамаардаггүй юм.

дипломат байгууллага,
тусгай дуут болон гэрлэн дохио тавьж ашиглах зөвшөөрөлтэй,
байлдааны болон тусгай зориулалтын,
Улсын Их Хурлын 2019 оны 19 дүгээр тогтоолоор батлагдсан албан тушаалтнуудын албан ажлын,
“тулгуур эрхтний бэрхшээлтэй хүн” таних тэмдэг бүхий тээврийн хэрэгсэл,
нийтийн тээвэр,
хүүхэд зохион байгуулалттайгаар тээвэрлэсэн болон ажилчдын автобусанд хамаарахгүй. .

Эдгээр дээр өчигдрөөс эхэлж Тээврийн хэрэгслийн хөдөлгөөнд хязгаарлалт тогтоох журамд "албан ажлын" гэсний араас "цахилгаан тэжээлийн" гэж нэмсэн байна.

11-р сараас эхлэн торгуультай автомашиныг замын хөдөлгөөнд оролцуулахгүй

Есдүгээр сарын 15-наас дугаарын тэгш, сондгой зохицуулалт дуусч хөдөлгөөн хэвийн үргэлжилнэ. Улмаар арваннэгдүгээр сард зөвхөн цахим гэрчилгээтэй буюу RFID технологийн системтэй тээврийн хэрэгслийг хөдөлгөөнд оролцуулах юм.Мөн цахим гэрчилгээгүй машинаас гадна торгуультай тээврийн хэрэгслүүдийг ирэх арваннэгдүгээр сараас хөдөлгөөнд оролцуулахгүй гэдгийг албаныхан мэдэгдсэн юм.RFID системийг нэвтрүүлснээр торгуулиа тодорхой хугацаанд төлдөг, заасан хугацаанд төлөөгүй бол алданги тооцдог болохоос гадна татвараа төлөөгүй, даатгалд хамрагдаагүй зэрэг зөрчилтэй тээврийн хэрэгсэл хөдөлгөөнд оролцох боломжгүй гэнэ.

BOLOD ДОЛОО ХОНОГИЙН ТОЙМ: Пап Францисын айчлал өндөрлөж, S outlet дэлгүүр болон шунхлай трейд ХХК-ийн ШТС-ыг буулгах ажил эхэлжээ
Tweet
Bolod.mn