Эрүүгийн цагдаагийн албаны Хүнд гэмт хэрэгтэй тэмцэх хэлтсээс 2023 оны 11, 12 саруудад Улаанбаатар хотын Баянгол, Сонгинохайрхан, Баянзүрх дүүргийн нутаг дэвсгэрт нийт 16 удаагийн үйлдлээр бусдын эд зүйлийг дээрэмдсэн хэргийг илрүүлэн шалгаж байна.

Шалгалтаар дээрх хэргүүдийг үйлдсэн иргэн “Г”, “Х”, “С” нар нь бүлэглэн нь шөнө, оройн цагаар архи согтууруулах ундаа хэтрүүлэн хэрэглэсэн иргэдээс гар утсыг булаах, зах, худалдааны төв, хүнсний дэлгүүр, эмийн сангийн худалдагч нараас гар утсаараа яриулаач хэмжээн хуурч мэхлэн гар утсыг нь авч зугтаж, улмаар тухайн гар утсанд байх хувь хүний мэдээллийг ашиглан банкны мэдээлэлд нь нэвтрэн зээл авч, тухайн мөнгөөр цахим мөрийтэй тоглоом тоглох, авто машин худалдан авах зэргээр мөнгө угаах гэмт хэргийг давхар үйлдсэн болохыг урьдчилсан байдлаар тогтоогдоод байна.

Иймд иргэн Та дээрх төрлийн гэмт хэрэгт өртөж, хохирохоос урьдчилан сэргийлж танихгүй нэгэнд өөрийн гар утсаа ашиглуулахгүй байх, өөрийн хувийн мэдээллээ цахим орчинд нээлттэй нийтлэх нь энэ төрлийн гэмт хэрэгт хохирч болзошгүй тул анхаарал, болгоомжтой байж, сэжигтэй үйлдэл, этгээдийн талаарх мэдээллийг цагдаагийн байгууллагын 102 тусгай дугаарт мэдээлэхийг зөвлөж байна.

Зөвшөөрөлгүйгээр таксинд явсан жолоочийг 5, ААН-ийг 50 саяар торгоно

Энэ оны аравдугаар сарын 14-ний өдрөөс эхэлж такси үйлчилгээ үзүүлэх иргэд болон ААН-үүд хууль заасны дагуу тусгай зөвшөөрөл авдаг болно.

Тусгай зөвшөөрлийн төлбөр 3-10 сая төгрөг байна. Хэрэв тусгай зөвшөөрөлгүйгээр такси үйлчилгээ эрхэлсэн тохиолдолд иргэнийг 5,000,000 төгрөг, ААН-ийг 50,000,000 төгрөгөөр торгох хуулийн зохицуулалт үйлчилнэ.

НИЙСЛЭЛ УЛААНБААТАР ХОТЫН ЗАМЫН ХӨДӨЛГӨӨНИЙ ТҮГЖРЭЛИЙГ БУУРУУЛАХ, ГЭР ХОРООЛЛЫГ ОРОН СУУЦЖУУЛАХ ТУХАЙ ХУУЛь

6 дугаар зүйл.Такси үйлчилгээний хяналт, зохицуулалт

6.1.Зөвшөөрлийн тухай хуулийн[8] 8.1 дүгээр зүйлийн 5.12-т заасны дагуу хуулийн этгээд такси үйлчилгээ эрхэлж болно.

6.2.Такси үйлчилгээ эрхлэхэд Автотээврийн тухай хуулийн 15.9, 15.10-т заасан нөхцөл, шаардлагыг хангасан байна.

6.3.Такси үйлчилгээг зорчигч тээвэрлэх дүрэм болон холбогдох стандарт, аюулгүй байдлын шаардлагыг хангасан тээвэрлэгчээр гүйцэтгүүлнэ.

6.4.Нийслэлийн тээврийн асуудал хариуцсан байгууллага такси үйлчилгээнд хяналт тавина хэмээн заажээ.

Хоёр настай хүүхэд онгоцны ачаа жинлэж, зөөвөрлөх урсдаг замаар орж хоёр давхраас нэг давхарт унажээ

Хоёр настай хүүхэд орон нутгийн нислэгийн бүртгэлийн хэсгээр нэвтэрч, ачаа жинлэж, зөөвөрлөх урсдаг замаар орж хоёр давхраас нэг давхарт унажээ

Тодруулбал, 2023 оны арванхоёрдугаар сарын 10-ны өдөр МИАТ-ийн 17.10 цагт СӨҮЛ рүү нисэх гэж байсан хоёр настай хүүхэд өндрөөс унан эрсдэх шахжээ.Хүүхэд ямар ч хараа хяналтгүйгээр орон нутгийн бүртгэлийн хэсгээр нэвтэрч, тээш зөөвөрлөх урсдаг зам руу орж, хоёр давхраас нэг давхарт унасан ч, азаар бэртэж гэмтээгүй байна. Тухайн хүүхдийг унасныг хөндлөнгийн байгууллагын ажилтан анх мэдэж, нисэх буудлын ажилчдад хүлээлгэж өгчээ. Энэхүү үйл явдал нислэггүй үеэр ачаа тээшний тоног төхөөрөмжийг унтраах, аюулгүйн анхааруулга, санамж байршуулж, хаалт хашилт хийж аюулгүй байдлаа хангаагүйгээс үүсжээ.

Шүүхээс нийтэд тустай ажил хөдөлмөр эрхлэх ялаар шийтгэгдсэн 48 настай иргэн замын цас цэвэрлэж байхдаа амиа алджээ

Энэ сарын 9-ны өдрийн 15 цагийн үед Сонгинохайрхан дүүргийн 11 дүгээр хороо 105 дугаар сургууль орчим хүн нас барсан байна гэсэн дуудлага мэдээлэл цагдаагийн байгууллагад ирсэн. Дуудлагын дагуу тус дүүргийн II хэлтсээс ажиллахад нийтэд тустай хөдөлмөр эрхлэх ялаар шийтгэгдсэн 48 настай эрэгтэй Б замын цас цэвэрлэж байхдаа амь насаа алдсан байжээ.

Энэ талаар ЦЕГ-ын Хэвлэл мэдээллийн төвийн мэдээллээр “Нэгдүгээр сарын 9-ны 15:00 цагийн үед Сонгинохайрхан дүүргийн 11 дүгээр хорооны нутаг дэвсгэрт байрлах 105 дугаар сургуулийн ойролцоо хүн нас барсан байна гэх дуудлага мэдээлэл бүртгэгдсэн. Дуудлагын дагуу СХД-ын цагдаагийн хоёрдугаар хэлтсээс шалгалтын ажиллагааг үргэлжлүүлж байна. Тухайн газар 48 настай эрэгтэй Б гэгч нь нийтэд тустай ажил хийх ял шийтгэлийг хэрэгжүүлж, цас цэвэрлэж байх үедээ амиа алдсан байна. Талийгаачийн нас барсан шалтгааныг задлан шинжилгээ, шүүх эмнэлэгийн дүгнэлт гарсаны дараа тогтоохоор ажиллаж байна. Талийгаачийн хамраас цус гарсан байсан. Амь хохирсон шалтгааныг шүүхийн дүгнэлтээс урьдчилан хэлэх боломжгүй ” гэлээ.

Ногоон автобусыг угсарч хийсэн болохыг АТГ-аас тогтоожээ

Авлигатай тэмцэх газраас “Ногоон автобусны” гэх хэргийг шүүхэд шилжүүлэх саналтайгаар прокурорт шилжүүлжээ. Автобуснуудыг үйлдвэрийн технологийн бус аргаар угсарч хийсэн гэдгийг хуулийн байгууллага тогтоосон байна. Хохирол 134.5 тэрбум төгрөг бөгөөд үүнээс мөрдөгчид 11.9 тэрбум төгрөгийг төлүүлж, 71.7 тэрбум төгрөгийн хөрөнгийг битүүмжлэн хамгаалсан гэдэг мэдээллийг өглөө.

Улсын ерөнхий прокурорын газраас байгуулсан Авлигатай тэмцэх газар, Цагдаагийн ерөнхий газрын хамтарсан ажлын хэсэг нийслэлийн авто замын түгжрэлийг бууруулах арга хэмжээний хүрээнд төсвийн хөрөнгөөр нийтийн тээврийн автобус худалдан авах ажиллагаатай холбоотой хэрэгт мөрдөн шалгах ажиллагааг явуулж, Нийслэлийн прокурорын газраас хяналт тавьж ажиллаж байна.

Ажлын хэсэг байгуулагдсанаас хойш хэрэгт ач холбогдол бүхий нөхцөл байдлыг тодруулахаар 141 хүнээс гэрчийн мэдүүлэг авч, прокурорын зөвшөөрлөөр нэр бүхий 11 иргэний орон байр, бусад газарт нэгжлэг хийсэн талаар өмнө нь мэдээлж байв.

Мөн хэрэгт хамаарал бүхий аж ахуйн нэгж байгууллагын хөрөнгийн шилжилт хөдөлгөөнийг хязгаарлан, эд хөрөнгүүдийг нь битүүмжлэх арга хэмжээ авсан. Дээрх яллагдагч нараас нэг хүнд цагдан хорих, 24 хүнд Монгол Улсын хилээр гарахыг хязгаарлах хязгаарлах таслан сэргийлэх арга хэмжээ авчээ. Тодруулбал, "Тэнүүн-Огоо" компанийн захирал А.Ганхуягийн цагдан хорих хугацааг дахин нэг сараар сунгаж, үргэлжлүүлэх хорих шийдвэрийг Чингэлтэй дүүргийн эрүүгийн хэргийн анхан шатны шүүхээс гаргасан байдаг. Мөн нийслэлийн Өмчийн харилцааны газрын дарга асан Ч.Сайханбаярыг үргэлжлүүлэн хорьж, шалгаж байгаа гэх мэдээллийг өгч байв.

Хэрэгт 2023 онд төсвийн хөрөнгөөр 800 ширхэг автобус худалдан авах ажиллагааг зохион байгуулахад эрх мэдэл, албан тушаалын байдлаа урвуулан ашиглаж, бусдад давуу байдал бий болгосон гэж үзэх нөхцөл байдал тогтоогдсон 26 хүнийг яллагдагчаар татан шалгаж байна. Тодруулбал, улс төрд нөлөө бүхий нэг, нийслэлийн Засаг даргын Тамгын газар, Худалдан авах ажиллагааны газар, нийтийн тээврийн газрын албаны 18, хувийн компанийн удирдах, гүйцэтгэх гурван албан тушаалтан, гадаад улсын дөрвөн иргэн яллагдагчаар татагдсан талаар мэдээлж байсан.

“Аз”-ын дугаар зарсан, авлига авсан хэргийг шүүхэд шилжүүлжээ

ЗТХЯ-ны Мэдээллийн технологи, стандартын хэлтсийн мэргэжилтэн автомашины дугаарын шинэ сери задарч, тээврийн хэрэгслийн бүртгэлийн trans.dep системд оруулахад “азын” гэх дугааруудыг хэн нэгэн захиалсан мэтээр өөрчилж, улмаар танил талаараа дамжуулан худалдаж, мөнгийг нь угаасан байж болзошгүй хэрэгт холбогдсон байдаг. Түүний хэрэгт яллах дүгнэлт үйлдэн, Сүхбаатар дүүргийн эрүүгийн хэргийн анхан шатны шүүхэд шилжүүлсэн талаар прокурорын байгууллага мэдээллээ.

Тодруулбал, Зам, тээврийн хөгжлийн яамны Автотээврийн бодлогын хэрэгжилтийг зохицуулах газрын Тээврийн ухаалаг систем, мэдээллийн сан хариуцсан мэргэжилтэн Б.Эрдэнэтуяа нь эрх мэдэл, албан тушаалын байдлаа урвуулан ашиглаж, “М” ХХК-д худалдааны төлөөлөгч Н.Дөлгөөнтэй хамтран, тээврийн хэрэгсэл худалдан авсан иргэдэд “аз”-ын болон сонирхол татахуйц улсын дугаарыг худалдан борлуулж, өөртөө эдийн засгийн давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 2 /Эрх мэдэл, албан тушаалын байдлаа урвуулан ашиглах/-т зааснаар яллах дүгнэлт үйлдэн, Сүхбаатар дүүргийн эрүүгийн хэргийн анхан шатны шүүхэд шилжүүлсэн байна.

Цагдаагийн байгууллагаас 2022 онд хэрэг бүртгэлтийн хэрэг нээж, дөрвөн ч газарт нэгжлэг хийн, Б.Эрдэнэтуяатай хамтрагч байж болзошгүй хүмүүсийг дайчлан баривчилсан байдаг. Тухайн үед Б.Эрдэнэтуяа нь улсын дугаарын шинэ сери задрахад дээрх байдлаар иргэн Н.Дөлгөөнөөр дамжуулан автомашины ченжүүдэд 10-20 сая төгрөгөөр зарж, хамаарал бүхий хүмүүсийнхээ банкны дансанд мөнгийг нь шилжүүлэн авч, 100 орчим сая төгрөгийн ашиг олж мөнгө угаасан нь тогтоогдсон байна.,

Олон мянган дагагчидтай “Инфлүүнсер”-үүд нэр дэвшигчдийн сурталчилгаанд ажиллаж бол заавал ХХЗХ-д бүртгүүлнэ

Сонгуулийн Ерөнхий хорооноос УИХ-ын сонгуулийн тухай хуульд оруулсан нэмэлт, өөрчлөлт болон 2024 оны УИХ-ын сонгуульд нэр дэвшигчийг бүртгэх, сурталчилгааны үед хэвлэл мэдээллийн байгууллагууд хэрхэн ажиллах, бэлтгэл ажлыг хэрхэн хангах талаар мэдээлэл өглөө.

2024 оны УИХ-ын сонгуулийн бэлтгэл ажилд улсын төсвөөс 32 тэрбум төгрөг төлөвлөсөн. Нам, эвслийн нэр дэвшигчийн сонгуулийн сурталчилгаа 17 хоног байх бөгөөд 2024 оны зургадугаар сарын 10-ны өдрөөс зургадугаар сарын 27-ны өдрийг дуустал үргэлжилнэ. УИХ-ын сонгуулийн санал авах өдрийг 2024 оны зургадугаар сарын 29-нд товлосон билээ.

УИХ-ын сонгуульд нэр дэвшигч бүр сурталчилгааны үеэр өөрсдийн мөрийн хөтөлбөр, бодлого, уриа үгээ илэрхийлсэн самбар байршуулдаг. Хүн тус бүр салбар байршуулж, гудамж талбай дүүрдэг. Тэгвэл 2024 оны УИХ-ын сонгуулиар нэр дэвшигч бүр нэгдсэн том салбар дээр өөрсдийн зургаа байршуулж, сурталчлахаар хуульчилжээ. Ингэхдээ мөнгө төлөх шаардлагагүй, зөвхөн зургаа л байршуулах юм байна. Энэ нь сонгуулийн зардлыг бууруулахад чухал ач холбогдолтой гэж СЕХ үзэж байна.

Нэр дэвшигчид сонгуулийн сурталчилгааны үеэр хоёр хуудастай сонин, хоёр хуудастай сэтгүүл, нэг хуудастай ухуулга хуудас тараах эрхтэй байхаар хуульчилсан.

Нэр дэвшигчид дээр дурдсан хэвлэмэл материалаас гадна нийгмийн сүлжээ буюу цахим хуудсаараа сурталчилгаа явуулах бол заавал Харилцаа холбооны зохицуулах хороо/ХХЗХ/-нд бүртгүүлнэ. Ингэхдээ нэр дэвшигчийн болон нам, эвслийн өөрийн тус бүр нэг цахим хуудас, цахим орчин дахь олон нийтийн сүлжээний цахим хуудас, бусад цахим хуудас гэсэн ангилалтай байна. Цахим орчин дахь олон нийтийн сүлжээ болон бусад гэдэгт сошиал орчинд олон дагагчтай олны танил, инфлүүнсерүүдийн /нөлөөлөгч/ хөтлөн явуулдаг пэйж хуудас, цахим сувгууд ч мөн багтаж байгаа аж. Хэрвээ эдгээр хүмүүс хэн нэгэн нэр дэвшигчийг дэмжиж, сурталчлах бол заавал бүртгүүлнэ гэсэн үг.

Хэрвээ бүртгүүлээгүй цахим сүлжээгээр сурталчилгаа явуулбал тэр даруй сошиал хаягийг нь хязгаарлах арга хэмжээ авна. Мөн цахим орчин ашиглан сонгуулийн сурталчилгаа явуулах, түүнд хяналт тавих журмыг цагдаагийн төв байгууллага болон Харилцаа холбооны зохицуулах хорооны саналыг үндэслэн Сонгуулийн Ерөнхий хороо хамтран баталж, мөрдүүлэхээр заажээ.

BOLOD ДОЛОО ХОНОГИЙН ТОЙМ: Сонгуулийн тухай хуульд оруулсан нэмэлт өөрчлөлтийг танилцуулж , Ногоон автобусны хэргийг дахин шалгахаар боллоо
Tweet
Bolod.mn