Ойрын өдрүүд орсон борооны улмаас “Москва Апартмент” хотхоны гаднах талбай усанд автаж шилбэ давсан их усыг оршин суугчид туучна. Гадаа гарахаар ус туучиж, гэртээ ормогц таазнаас зогсоо зайгүй ус дусаж үндсэндээ хэдэн сая төгрөгөөр авсан орон сууц нь ая тухгүй байгаад тэд бухимдав. 2021, 2023 онуудад хэсэгчлэн ашиглалтад орсон “Москва Апартмент” хотхон асуудал дагуулаад гурван жилийн нүүрийг үзсэн. Тус хотхон нь зэвтэй ус гардаг, гаднах талбайд ус зайлуулах хоолой муу хийгдсэн, мөн өндөр хүчдэлийн дор баригдсан, хананд нь цууралт өгсөн, дэврээс ус гоожих гээд асуудал мундахгүй. Тухайн бүрд нь СӨХ-оос “Сүмт-Өргөө” компанид ханддаг ч оршин суугчдын нүд, сэтгэлийг хуурсан зүйл хийдэг гэлээ. Тухайлбал, ойрын өдрүүдэд орсон борооноос дээврээс дусаал гоожих асуудал зөвхөн энэ жил биш. Өмнөх жилүүдэд ч байсан. Тухайн үед “Сүмт-Өргөө” ХХК дээврийн засварыг “Чингисийн өргөө” гэх компаниар хийлгэдэг ч сар болохгүй асуудал дагуулдаг байна. Тухайлбал дээврийн засварыг хийхдээ ам.дөрвөлжин хар цаасыг дусаал дусаж буй хэсэгт наажээ.

Ингээд “Москва Апартмент” хотхонд үүссэн асуудлын талаар оршин суугчид болон СӨХ- оос дараах талбарыг өглөө.

Оршин суугчид...

“Сүмт-Өргөө” ХХК-ийн удирдлагууд худал сурталчилгаа хийж биднийг хуурсан

-Манайх хоёр өрөө байрыг 150 сая төгрөгөөр авсан. Гэтэл бид ая тухтай амьдарч чадахгүй байгаа учраас гомдолтой байна. “Москва Апартмент”хотхон нь дөрвөн блок. Манайх 134/1-р байр. Хамгийн их асуудалтай. Одоо наадмаар бороо орж дээврээс ус дусаж эд хөрөнгөөрөө хохирвол хэн хариуцах вэ? Тэрнээс өмнө засварыг чанартай хийлгэмээр байна. “Сүмт -Өргөө” ХХК худал сурталчилгаа хийж биднийг хуурсан.

-Байрандаа ороод зургаан сар болсны дараа хана цуурсан, мөн тагт болон дээврээс борооны ус гоожиж эхэлсэн. “Сүмт-Өргөө” ХХК-ийн удирдлагуудад хэлэхэд цуурсан ханыг өмнө нь цонх байсан гэж тайлбарладаг. Ямар ч шийдэл ярьдаггүй. Энэ цууралттай хана дахиад нэг блок барилгын залгаа ханатай огтолцдог. Анх худалдаж авахад бүрэн цутгамал гэж байсан. Гэтэл энэ хана цуурсныг харвал бүрэн цутгамал гэдэг нь худлаа гэдэг нь мэдэгдэж байна. Эсвэл зөвхөн энэ хэсэгт дүүргэлт хийсэн юм болов уу. Маш гайхалтай.

Барилгын инженерүүд ирж үзүүчихээд яваад өгдөг. Нүд хуурсан байдлаар аргацааж байна.

Д.Цэцэгжаргал “Москва Апартмент” хотхоны СӨХ-ны дарга

“Москва Аапартмент” хотхоны цуурал нэмэгдвэл БХБЯ-нд хандана

“СӨХ-нд олон асуудал, гомдол ирдэг. Кордиор болон айлуудын хана цуурсан байгаа. Мөн өвөл дулаан алдалт ихтэй юм байна лээ. Ус зайлуулах хоолой муу хийгдсэн учраас бороо орсон гадна талбай нуур далай болж байна. Бид нарын өмнөөс энэ байрны чанарыг шалгаж авдаг хүмүүс бол барилга хүлээн авах комисс. Гэтэл тэд нөхцөл байдлыг бодитоор үнэлээгүй, ажлаа хийж чадаагүйгээс бид хэцүү байдалтай нүүр тулж байна. Барилга хүлээн авах комиссын гишүүдэд ч мөн хариуцлага хүлээлгэдэг байх хэрэгтэй. Үүссэн асуудлын талаар “Сүмт-Өргөө” ХХК-д албан тоот явуулдаг. Хариуд янзалж өгнө гэхээс өөр зүйл хэлдэггүй. 100-300 сая төгрөгөөр ийм байранд орчихоод харамсаж сууна. Бид асуудалл хурцадвал БХБЯ болон бусад мэргэжлийн байгууллагад хандана” гэдгээ илэрхийлэв.

Эрчим хүчний шугам дор, буюу хамгаалалтын зурвастай ойр баригдсан “Москва Апартмент” хотхон нь Монгол банкны Ерөнхийлөгч Б.Лхагвасүрэнгийн “Сүмт-Өргөө” ХХК-ийнх.

“Сүмт-Өргөө” ХХК Монголбанкны Ерөнхийлөгч Б.Лхагвасүрэнгийн төрсөн дүү Б.Лхагвадоржийнх

Ах нь дүүгээ, дүү нь ахыгаа татаж, татагдсан нь хүргэн бэрүүдээ татаж, хүргэн бэрүүд нь цаашхи ургийн замаа, бизнесийн мөрөө тэлдэг бадррангуй тогтолцоо энэ улсын аль ч давхаргад байдгийн нэгэн жишээ нь Б.Лхагвасүрэн.Түүний дүү Б.Лхагвадоржийн “Сүмт-Өргөө” ХХК нь “Хан-Уул товер”, “Сан роуд”, “Рояаль маунтин” зэрэг оффис, зочид буудлын барилгыг барьсан томоохон компани. Тэгвэл саяхан Б.Лхагвадоржийн эзэмшил Сүмт-Өргөө ХХК 1000 орчим айлын “Москва Апартмент” хотхоныг бариад байгаа нь энэ. "Сүмт-Өргөө" ХХК-ийн Гүйцэтгэх захирлаар Б.Өсөхжаргал ажилладаг гэлцдэг. Монголбанкны ерөнхийлөгч Б.Лхагвасүрэнгийн хамаарал бүхий “Москва Апартмент” хотхоны хана цуурч, дусаал гоожих болжээ. 1994 оноос хойш өнөөг хүртэл Монголбанктай амьдралаа холбосон Б.Лхагвасүрэн ерөнхийлөгчийн ах, дүүсийн бизнес ихэд өргөжин дэвжиж Монголын толгой баячуудын эгнээнд зүй ёсоор багтах болсон. Харин тэдний хийсэн булхай луйвар нэгэн үед өдөр илчлэгдэж нэг хэсэг хэвлэлээр шуугиулж байсан удаатай . Тэгвэл энэ удаад Эрчим хүчний шугам дор баригдсан “Москва Апартмент” хотхоныг барихдаа хэний амыг хэдэн төгрөгөөр таглаж газрын зөвшөөрөл авч, өндөр барилга сүндэрлүүлж барилгын комисст хүлээлгэж өгөв гэдэг нь асуудал. “Сүмт-Өргөө” ХХК-ний барьсан энэ барилгын хана, тааз цуурч, дусаал гоожиж байгаа нь чанаргүй материалаар баригдсаны тод жишээ гэдгийг оршин суугчид хэллээ.

Монголбанкны Ерөнхийлөгч Б.Лхагвасүрэнгийн төрсөн дүү Б.Лхагвадорж ахынхаа нөмөр нөөлөгт багтсны хүчинд барилгын салбарт хүч үзээж байгаа ч харамсалтай нь барьсан барилгууд нь хүний амь нас, эрүүл мэндэд нөлөөлж болзошгүйд хүрчээ. Ан цав гарсан “Москва Апартмент” хотхон ашиглалтад ороод гурван жил болж байгаа. Цаашид оршин суугчид 10 жил байрандаа амьдарч чадах эсэх нь эргэлзээ төрүүлж буй.

“Сүмт-Өргөө” ХХК оршин суугчдад хүүхдийн тоглоом барих талбайг харамлав уу

Хэрвээ уншигчид санаж буй бол 2020.09.14-ний өдөр Сонгинохайрхан дүүргийн "Москва" хороолол дунд байрлах Ерөнхий боловсролын 153 дугаар сургуулийн хаалгыг гаднаас нь түгжих даалгаврыг өгсөн хүн нь Б.Лхагвадорж. Тэрбээр анх сургууль, цэцэрлэг барьсан газрыг хувь хүнээс худалдан авч, авсныхаа дараа өөрсдийн хөрөнгөөрөө барьж Архангайн гишүүдээр лобби хийлгүүлж барилга баригдах явцад тендер зарлуулж, төсөвт 15 тэрбумыг суулгуулж чадсан сүйхээтэй эр. Лобби хэрэглэж төсөвт 15 тэрбумыг хүчээр суулгуулсан учраас Сангийн сайд асан Ч.Хүрэлбаатар ижил төстэй барилга байгууламж 8-9 тэрбумын өртөгтэй байхад Б.Лхагвадоржийн барьсан 960 хүүхдийн сургууль, 280 хүүхэд хүлээн авах чадалтай хоёр байгууламж яагаад ч 15 тэрбум төгрөг болохгүй гэж тус компанийн санхүүд аудитын шалгалт оруулахаар болж байв.
Өөрөөр хэлбэл, 960 хүүхдийн сургууль, 280 хүүхдийн цэцэрлэг болох тус цогцолборыг хүчин чадлаар нь авч үзээд харьцуулахад өмнө нь 2018, 2019 онд ашиглалтад орсон сургууль, цэцэрлэг болон одоо баригдаж буй сургууль цэцэрлэгээс өртөг нь хамаагүй өндөр байсан гэсэн үг. Тухайлбал, 2019 онд ашиглалтад орсон 960 хүүхдийн сургууль 4.3-5.4 тэрбум, 280 хүүхдийн хүчин чадалтай цэцэрлэг 2-2.3 тэрбум төгрөгөөр баригдсан байдаг. Гэтэл Б.Лхагвадорж хэд дахин нугалсан үнийг төсөвт лобби хэрэглэн суулгаж, сургууль цэцэрлэгийг гаднаас нь дангинатал түгжиж мөнгөнд шуналтай нэгэн гэдгээ харуулсан юм.

Тэгвэл яг энэ сургуулийн хажууд “Москва Апартмент” хотхон баригдсан зүгээрч нэг тохиолдод биш биз. Эрчим хүчний шугам дор газар авч барилга барихдаа ах дүү хоёр ямар замналаар явсныг таашгүй. Ийн одоо 1000 орчим айл “Москва Апартмент” хотхон зураг төслийн дагуу баригдаагүйд годмдолтой байгаа юм. Анх хүүхдийн тоглоомын талбайтай баригдана гэж захиалга авсан ч бодит байдал дээр байхгүй. Харин энэ талаар “Сүмт-Өргөө” ХХК-д уламжлахад “Автомашины зогсоолын талбайгаас хасаад хүүхдийн тоглоомын талбай барьж өгч болох юм” гэх тайлбарыг өгчээ.

https://time.mn/uXT.html

Монголбанкны ерөнхийлөгч Б.Лхагвасүрэнгийн хамаарал бүхий “Москва Апартмент” хотхоны хана цуурч, дусаал гоожих болжээ
Tweet
Bolod.mn