Тавтай морил Beta Gen- Шинэ зууныг үзэх шинэ үеийнхэн

2025-01-20

Он солигдож, цаг эргэснээр зарим зүйл өөрчлөгдөж, зарим нь бүр мартагддаг. энэ жишгээр 2024 онтой хамт үлдсэн нэг

чухал, нэн сонирхолтой хүчин зүйл бол уугуул дижитал иргэд хэмээн шагшигдаж ирсэн альфачуудын төрөлт дууссанд юм. Учир нь 2025 оны нэгдүгээр сарын 1-ний өдрөөс хойш төрсөн хүүхдүүд альфа хэмээх хүн ам зүйн бүлэгт багтахгүй бөгөөд тэд бета гэх шинэ бүлгийг түүчээлэх юм.

Виртуал орчинд амьдрах анхны үеийнхэн

Төрсөн цагаас нь ухаалаг тоос сорогч, автомат аяга, таваг угаагч “өлгийдөж” буй энэ үеийнхнийг хиймэл оюун ухаанаар “ажилладаг” дэлхийд насан туршдаа амьдрах анхны хүмүүс гэж судлаачид үзэж буй. Гэсэн ч эхийн хэвлийд байхаасаа “танилцсан” технологийн дэвшил, өнгөт дэлгэц тэдний хувьд шинэлэг, соньхон санагдахгүй бөгөөд дэлгэцийн хэрэглээ нь ч өмнөх үеийнхнээс бага байх магадлалтай аж. Түүнчлэн олонх нь XXII зуунд ажиллаж, амьдрах бөгөөд бүхэлдээ XXI зуунд төрсөн хоёр дахь үеийнхэн юм. Тэд дэлхийн дулаарал, хотжилт, экологийн тэнцвэрт бус байдал зэрэг нийгмийн асуудлуудын бэрхийг биеэр мэдрэх учир илүү байгальд ээлтэй болох магадлалтай гэж эрдэмтэд таамагласан байна.

Нийгэм судлаач Марк МакКриндл

"Бета үеийн хүүхдүүд нийгмийн томоохон сорилтуудтай тэмцэж буй ертөнцийг өвлөн авна. Тиймээс илүү байгальд ээлтэй болж төлөвших магадлалтай. Тэд ямар ч саадгүй дижитал ертөнцөд ажиллаж, амьдарна. Боловсрол, ажлын байр, эрүүл мэнд, зугаа цэнгэл гээд амьдралын бүхий л талбарт нь хиймэл оюун ухаан, автоматжуулалт бүрэн шингэсэн байна. Бидний төсөөлж ч чадахгүй виртуал орчинг мэдрэх анхны үеийнхэн ч байх магадлалтай. Гэхдээ дэлгэцийн хэрэглээ, цахим орчин зэрэг нь тэдний хувьд шинэлэг санагдахгүй бөгөөд эцэг, эхчүүдийн нөлөөгөөр цахим хэрэглээ ч бага байх магадлалтай."

Бета үеийнхэн 2025-2039 оны хооронд төрөх бөгөөд 2035 он гэхэд тэд дэлхийн хүн амын 16 хувийг бүрдүүлнэ гэж судлаачид тооцоолсон байна. Түүнчлэн хиймэл оюун ухааны алгоритмууд тэдний амьдралын бүхий л үе шатуудад оролцсоноор бодит ертөнц, амьд харилцаа болон виртуал орчин хоёрын тэнцвэрийг хадгалахад багагүй хүч зарцуулах магадлалтай. Энэ нь магадгүй сэтгэл зүйн эрүүл мэндэд нь сөргөөр нөлөөлж, ганцаардал, сэтгэл гутрал зэрэг өртүүлэх эрсдэлтэй.

Бета үеийн хүүхдүүдийг шинэ мянганыхан буюу Y үеийнхэн болон Z үеийн эцэг, эхчүүд төрүүлж, өсгөнө. Тэдний олонх нь дасан зохицох чадвар, тэгш байдлыг эрхэмлэдэг. Мөн байгаль орчин, экологийн тэнцвэрт байдалд анхаарлаа хандуулдаг. Энэ нь бета үеийнхнийг эх дэлхийд ээлтэй, дасан зохицох чадвартай, асуудлыг шийдвэрлэх чадамжтай болгож өсгөнө. Мөн технологийг хоёр иртэй хутга гэдгийг бусад үеийнхнээс илүү сайн мэднэ. Тиймээс эцэг, эхийн ухамсар хүүхдийн хүмүүжилд нөлөөлнө.
Нийгэм судлаач Марк МакКриндл

Шинэ мянганыхан ээж, аав боллоо

Бетачуудын олонх нь Z (1997-2009) болон Миллениал (1981-1996) үеийнхний хүүхдүүд байна. Тэгэхээр өнгөрсөн хугацаанд шинэ үе гэх тодотгол доор судлагдахуун байсаар ирсэн эдгээр насныхан ээж, аав гэх бүлэгт харьяалагдаад эхэлсэн гэсэн үг. Бета үеийнхний үзэл бодол, үнэ цэн, ертөнцийг харах өнцөг, амьдралын хэв маяг зэрэг нь ямар байхыг одоо яв цав тодорхойлоход эрт. Гэхдээ эцэг, эхчүүдийнх нь үзэл бодол, үр хүүхдээ өсгөх жанжин шугамаар нь баримжаалах боломжтой юм. Судлаачдын үзэж буйгаар залуу ээж, аавууд хүүхдээ алдар нэр, амжилт, алт мөнгөнд “аргамжихаас” илүү сэтгэл зүйн эрүүл мэнд, амьдралын тэнцвэр зэрэгт нь анхаарч, төрсөн цагаас нь бие хүн болохыг нь хүлээн зөвшөөрөх хандлагатай байгаа аж. АНУ-ын нэгэн судалгааны хүрээлэнгээс явуулсан судалгаанд оролцсон залуу аав, ээжийн олонх нь гэр бүлийн шийдвэр гаргалтад хүүхдийн байр суурийг сонсдог гэж хариулсан байна. Харин идэр, дунд насны ээж, аавуудын дийлэнх хүүхэд шийдвэр гаргахад бэлэн биш субъект гэх хариулт өгчээ. Эндээс залуу ээж, аавууд хүүхдээ зурсан зам, гаргасан жимээр нь ёстой бодьгал гэж үздэггүй болохыг харж болохоор байна.

Өөр нэг сайн тал нь, шинэ үеийн эцэг, эхчүүд цахим хэрэглээг хоёр иртэй хутга болохыг сайн мэднэ. Тиймээс хүүхдийнхээ дэлгэцийн хэрэглээг хязгаарлаж, цахим орчинд автахаас сэргийлэх магадлал илүү өндөр аж. Нийгэм судлаач Марк МакКриндлийн өгүүлснээр залуу эцэг, эхчүүд хүүхдийнхээ дэлгэцийн цагийг хязгаарлах нь магадлал бусдаасаа 10 орчим хувиар өндөр аж.

Альфагаас ялгарах онцлог

Бетагийн өмнөх хүн ам зүйн бүлэг бол альфа юм. Мөн л төрсөн цагаасаа утас, зурагттай нөхөрлөсөн, олонх нь XXII зууныг үзэх тэд энэ оноос төрж эхлэх дүү нараасаа юугаараа ялгаатай болохыг нийтлэлийн энэ хэсэгт өгүүлье.Уугуул дижитал иргэд гэх тодотголтой альфа үед 2010-2025 онд төрсөн хүүхдүүд хамаарна. Тэднийг төрж эхлэхэд буюу 2010 онд “Apple” компани шинэ төхөөрөмж болох IPad-аа танилцуулж, өдгөө дэлхий нийтийн хэрэглээ болсон Instagram нээлтээ хийж байв. Тэд интернэт, гар утас, ухаалаг төхөөрөмжүүдийг төрсөн цагаасаа бүрэн ашиглаж ирсэн бөгөөд шинэ технологиудтай ойрхон өсөж буй. Харин бета үеийнхний хэрэглэгдэхүүн интернэт, гар утас зэргээр хязгаарлагдахгүй аж. Энэ үеийнхэн хамгийн дэвшилтэт технологиудыг ашиглаж өсөх бөгөөд хиймэл оюун ухаан, роботын үйл ажиллагаа амьдралынх нь нэг хэсэг болно. Боловсролын тухайд, альфа үеийнхэнд цахим сургалт, дугуйланд хамрагдах боломж нээгдэж буй ч олонх нь танхимаар хичээллэдэг. Харин бетачуудыг суралцах үед виртуал сургалт давамгайлах бөгөөд тэд ихэнх цагийг цахим хичээл үзэхэд зарцуулах магадлалтай аж. Хоёр үеийн төвлөрөх зүйл нь ч ялгаатай. Альфачууд цахим орчинд илүү төвлөрч, их цагийг тэнд өнгөрөөх магадлалтай бол шинэ үеийнхэн байгаль орчин, нийгмийн асуудалд илүү оролцоотой байх аж. Хэдийгээр олон насны зөрүүгүй ч альфа болон бета үеийнхний амьдралын хэв маяг, үзэл бодол, харилцаа төлөвшил, үзэл бодол харилцан адилгүй байх аж. Түүнчлэн бета үеийнхэн амьдралаа ах, эгч нараасаа өөрөөр эхлүүлнэ. Тэд альфагийнхан шиг цар тахал, хөл хориотой цаг үед амьдралынхаа эхний жилүүдийг өнгөрөөхгүй бөгөөд амны хаалт, гар ариутгагчийг агшин тутам хэрэглэхгүй. Харин тэр тухай түүхийн хичээл дээрээ үзэх магадлалтай гэдгийг хүн ам зүйчид онцолжээ. Бета үеийнхэн 2025-2039 онд төрнө. Үүний дараа буюу 2040-оноос төрөх хүн ам зүйн бүлгийг Гамма гэж нэрлэх магадлалтай бөгөөд тэд 2040 2054 оны хооронд мэндлэх аж. Альфа, бета, гамма гэх нэршлийн хувьд, грек цагаан толгойн дараалал юм.

Бета бол шинэ зууны, шинэ эриний төлөөлөл. Тэд дараагийн дараагийн эринд зуун, одоог төлөөлж амьдарна. Тэдний хэрэгцээ, үнэ цэн, давуу тал, амьдралын голчийг тодорхойлж, таамаглах нь нийгмийн ирээдүйг зураглах хамгийн чухал хүчин зүйл аж. Тиймээс энэ чиглэлийн судлаач нар бета гэх нэн шинэ судлагдахууныг төнхөж, илүү сайн ирээдүй бэлтгэх “гарын авлага” бэлтгэхээр мэрийж байна.

Эх сурвалж: Үндэстний ТОЙМ сэтгүүл