3х3: Азид Австрали дахин ноёрхож, улсууд олимпийн энэ төрөлд анхаарч эхэлжээ

2025-03-31

3×3 сагсан бөмбөгийн Азийн аварга шалгаруулах тэмцээн Сингапурт болж, өндөрлөлөө. Найм дахь удаагийн тэмцээнд 25 улсын эрэгтэй шигшээ баг, 23 улсын эмэгтэй шигшээ баг тамирчид өрсөлдөж, Австрали улс хос алтан медаль хүртэв. Тэмцээн гуравдугаар сарын 26-ны өдөр урьдчилсан шатны тоглолтуудаар эхэлсэн бөгөөд гуравдугаар сарын 28-ны өдөр үндсэн хэсгийн шат эхэлсэн юм. Монголын эрэгтэй шигшээ баг чансааг тэргүүлэгч учир А хэсгийг толгойлсон бол эмэгтэй шигшээ чансаагаараа Хятадын ард бичигдэж, В хэсгийг толгойлжээ.

МОНГОЛЫН ШИГШЭЭ БАГУУД ХАСАГДАХ ШАТАНД ХҮРЭВ

Монголын эрэгтэй шигшээ багийн тухайд энэ онд Улаанбаатар хотноо болох дэлхийн аваргын бэлтгэлдээ эртнээс орж, тамирчид нь дээд лигт тоглоогүй. Тэр ч утгаараа энэ удаагийн Азийн аваргад бэлтгэл сайтай, бэртэл гэмтэл багатай оролцоно гэх хүлээлт байв. Бүрэлдэхүүнийг зарлах үед Д.Дэлгэрням бага зэргийн бэртэлтэй, О.Энхбаатар аав болоод удаагүй байгаа гэх шалтгаанаар 2023 оны түрүүлсэн баг дахин Сингапурыг зорих боломжгүй болсон. Тэдний оронд туршлагатай Ц.Отгонжаргал, ирээдүйтэй Г.Дөлгөөн нар А.Ананд, Э.Дөлгөөн хоёртой хамт дөрөө харшуулсан.

Хэсгийн эхний тоглолтдоо Сингапурыг 22-10-аар, дараа нь Хонг Конгийг 22-8-аар тус тус хожиж, чансааг тэргүүлэгч гэдгээ хангалттай харуулжээ. А.Ананд ч тэмцээн уралдаанаар цангасан нь мэдэгдэж, дээрх хоёр тоглолтод оноо авалтаар багаа тэргүүлсэн. Мөн 3х3 шигшээ багийн хамт Азийн аваргын дебютээ хийсэн Г.Дөлгөөнийг олон улсын тайлбарлагчид онцолж байв. Түүний будагтай талбайн тоглолт, биеийн хүч, нурууны өндөр нь Монголын багийн давуу тал болсон.

Харамсалтай нь хасагдах шатанд тун хүчтэй өрсөлдөгч болох Австралийн шигшээ баг учраа таарсан. Аваргуудын цомоор АНУ-ын хүчирхэг багийг хоёр ч удаа хожиж, хүрэл медалийн эзэд болсон тэд хэсэгтээ Японд хожигдож, хоёрдугаар байрт шалгарчээ. Ерөнхийдөө Монгол болон Австралийг финалд учраа таарна гэх хүлээлт байв. Гэвч Япон таамаг эвдэж, тэмцээний үр дүнг өөрчилсөн гэхэд хилсдэхгүй. Шидэлт, тэсрэлттэй Австралийн шигшээ баг Монголыг 21-7 гэсэн харьцаатай хожиж, ганзага хоосон нутаг буцаасан.

Харин эмэгтэй багийн тухайд өнгөрсөн жил Улаанбаатар хотноо болсон дэлхийн Гран пригийн цувралд тэмцээнд түрүүлсэн багаа илгээсэн аж. Өөрөөр хэлбэл, хамгийн өндөр амжилт гаргасан, формтой бүрэлдэхүүнээ дахин илгээсэн гэхэд хилсдэхгүй. Мэдээж эмэгтэй дээд лиг өндөрлөөд удаагүй байсан учир тамирчдад ачаалалтай байсан нь лавтай. Тэд хэсэгтээ Тайванийг 21-14 гэсэн харьцаатай хожсон ч удаах тоглолтдоо Тайландад 11-17 гэсэн харьцаатай хожигдсон. Улмаар гурван баг бие биенээ тойрон хожсон учир оноо тоолоход Монголын баг чансаа илүү гэдгээрээ хэсгээ тэргүүлж, Тайланд хоёрдугаар байр эзэлжээ. Гэвч хасагдах шатанд гурван хүнтэй Филиппинд хожигдож, тэмцээнээ өндөрлүүлжээ.

Филиппинийн 21 дугаартай тамирчин Камил Кларин хэсэгтээ Австралийн эсрэг тоглож байх үеэрээ гэмтэл авч, тэмцээнийг үргэлжлүүлэх боломжгүй болсон юм.

ӨРСӨЛДӨГЧ БАГУУДЫН ЧАНАР, ЧАНСАА

3х3 сагсан бөмбөгийн спорт олимпийн наадмын хөтөлбөрт багтаж эхэлсэн цагаас улс, орнууд онцгой анхаарах болсон. Шигшээ болон мэргэжлийн багуудаа ч бүрдүүлэхдээ сайтар анхаарч, өрсөлдөгчдийн судалгаа, тоглолт зэргийг мэргэжлийн түвшинд хийдэг гэхэд хилсдэхгүй. Энэ удаагийн Азийн аварга ч үүнийг дахин гэрчлэв. Эрэгтэйчүүдийн ангилалд түрүүлсэн Австралийн шигшээ баг өнгөрсөн жилийнхээс цоо шинэ бүрэлдэхүүнийг танилцуулсан. Саяхан Аваргуудын цомд Сербитэй эн тэнцүү үзэж, АНУ-ыг хоёр ч удаа хожиж, хүрэл медаль хүртсэн багаа дахин тивийн аваргадаа сойлоо. Японд хэсэгтээ хожигдсоныг нь эс тооцвол тивийнхээ бүхий л хүчирхэг багуудыг буулган авчээ.

Өнгөрсөн жил Австралийн бүрэлдэхүүнд тоглож, аварга авч байсан Уиллиам Хики энэ жил нутгийнхаа лигт түрүүлж, финалын "MVP" болох хэмжээний тоглолт үзүүлсэн. NBA-ийн аварга Мэттью Деллаведова түүнд финалын "MVP" цомоо өгч буй бичлэг хүртэл цахим орчинд шуурсан билээ. Эндээс харахад Австрали улс 3х3 сагсан бөмбөгтөө анхаарч байна. Тэдний эмэгтэй шигшээ баг сүүлийн гурван жил тивдээ босоо, дэлхийн бусад томчуудтай тэнцүүхэн хүч үздэг гэдгийг сагсан бөмбөг сонирхогчид сайн мэднэ.

Хятадын эрэгтэй шигшээ баг түүхэндээ анх удаа тивийн аваргадаа финалдаж, мөнгөн медаль хүртсэн. Удаан сойсон тамирчид нь эцэст нь амжилт үзүүллээ. Энэ амжилтыг үзүүлэх гэж Хятад улс чамгүй хөрөнгө мөнгө зарцуулж, олон ч оролдлого хийсэн гэдгийг дурдах илүүц биз. Энэтхэг ч сайн тоглосон. NBA-ийн академийн бүтээгдэхүүнүүд, 5х5 шигшээ багтаа тоглодог тамирчид нь ирж, шөвгийн наймд шалгарав.

Эмэгтэй багууд дээр хамгийн анхаарал татсан нь Вьетнам байв. Тэдний бүрэлдэхүүнд WNBA-д драфтаар сонгогдож, NCAA-д шуугиулж явсан Кайлин Труон байсан юм. Өдгөө 23 настай тэрбээр АНУ-д төрсөн бөгөөд ихрийн хамтаар коллежийн сагсан бөмбөгт цахиур хагалж, 2024 оны WNBA-ийн драфтын хоёрдугаар тойргийн 21 дэх сонголтоор Вашингтон Мистигс багт сонгогдсон түүхтэй. Түүний хувьд одоо Грекийн ПАОК багт тоглож байна.

Вьетнамын эмэгтэй баг урьдчилсан шатнаас тэмцээнээ эхлүүлж, ганц ч хожигдолгүй үндсэн шатанд шалгарсан. Хэсэгтээ ч Сингапурыг хожиж, Японд хожигдон хасагдах шатанд Хятадад 17-15 гэсэн харьцаатай тахим буулгажээ. Хятадын эсрэг Кайлин Труон 11 оноо авсан аж.

2025 ОНЫ АЗИЙН АВАРГЫН ҮР ДҮН

Эрэгтэй шилдэг тамирчнаар Австралийн Диллон Стит тодорчээ. Түүнтэй хамт бэлгэдлийн багт Шинэ Зеаландын Те Тухи Льюис, Японы Рёо Озава нар багтсан аж. Рёо Озава энэ Азийн аваргаар багийнхаа 21 онооны 20-г авч, дээд амжилт тогтоосон билээ. Харин эмэгтэй шилдэг тамирчнаар мөн Австралийн Алекс Уилсон тодров. Түүний хамтаар бэлгэдлийн багт Японы Фүюүко Такахаши, Хятадын Мэньюн Жоу нар багтжээ.

Эрэгтэй медалийн хүснэгт

Алт – Австрали
Мөнгө – Хятад
Хүрэл – Шинэ Зеаланд
Хагас шигшээ – Япон

Эмэгтэй медалийн хүснэгт

Алт – Австрали
Мөнгө – Япон
Хүрэл – Хятад
Хагас шигшээ – Филиппин