-Жүжигчин гэхэд би дуугүй, дотогшоо талдаа. Дотоод ертөнцдөө бол тийм ч нээлттэй биш. Найзуудаас маань намайг асуувал надаас илүү сайн тодорхойлж хэлэх болов уу.

-Драмын дөрвөн залууг харахаар сайхан найз нөхөрлөлийн утга учир ийм л байдаг болов уу гэсэн сэтгэгдэл төрдөг шүү…

-Бид ажил, амьдрал дээр ч сайхан найзууд. Оюутан байхаасаа өнөөг хүртэл нөхөрлөж яваа. Цугтаа байсан он жилүүд бидэнд гоё дурсамж үлдээсэн. Одоо бол нэг нэгнийхээ зан чанарыг сайн мэддэг болсон.

-Сайн найз, жинхэнэ эр хүн гэдгийг өөрийнхөө бодлоор хэлээч…

-Сайн найз гээд хамаг зовлонгоо нөхдөдөө нялзаагаад байхыг хэлдэггүй байх. Зовсон цагт тусалсан нөхрийн тус хэзээ ч мартагддаггүй гэдэг дээ. “Никитон” хамтлагийн дуулсан нэг дуунд “…Сайн явахдаа намайг мартаарай Зовох цагтаа санаарай” гээд үг байдаг. Энэ үгтэй санал нэг байдаг.

-Юманд хэр хүлээцтэй ханддаг вэ?

-Сайн, муу үгийн аль алинд нь хүлээцтэй ханддаг. Магтууллаа гээд учиргүй баярлаж хөөрдөггүй, зэмлүүллээ гээд уурлаж, гомддоггүй, бас сэтгэлээр унаж, гутардаггүй. Биднийг үг даах чадвартай хүмүүжүүлсэн аав, ээждээ баярлаж явдаг.

-Эр хүнийхээ хувьд амьдралыг авч явах ухаанаар хэр вэ?

-Үнэнийг хэлэхэд сайн хэлж мэдэхгүй байна. Одоохондоо гэр, ажил гэж гүйгээд, театрынхаа ягаан байшингаас гарч чадахгүй л байна шүү дээ. Чадлаа гэхэд сайндаа кино руу хөл тавьж байна. Эр хүнийхээ хувьд сэргэлэн зан гаргаад, хувийн бизнес хөөх овсгоо, самбааны тал дээр дутагдалтай.

-Зөв гэсэн зүйлийг чинь буруутгаад байвал яадаг вэ?

-Би өөрийн зөв гэсэн зүйлдээ бат зогсдог. Миний амьдралд орж ирээд, садаа болоод дургүйг минь үнэхээр хүргээд байвал мэдээж эрчүүдийн ёсоор асуудлыг шийднэ. Түүнээс биш хэн нэгний ярьсан хов живийг чихнийхээ хажуугаар сонсоогүй юм шиг тоохгүй өнгөрөөнө.

-Амьдралд ямархуу өнгө аясаар ханддаг хүн бэ?

-Өөрийнхөө зөв гэж бодсон бодлоор хандахыг хичээдэг. Ухаанаараа амьдралаа шийдье гэж боддог. Би жинлүүрийн ордод төрсөн. Орддоо итгээд юм болгоныг хянаж, цэгнээд бодоод байсан чинь учир дутагдалтай юм билээ.

-Та гаднаасаа их ширүүн дүр төрхтэй харагддаг...

- Эби дотоод ертөнцдөө уг нь зөөлөн хүн шүү дээ. Тоглосон ганц нэг дүрээсээ болж хүмүүст ширүүн юм шиг харагддаг байж магадгүй л юм. Найз нөхөд, ойр дотнынхоо хүмүүсээс “Чи хатуу сэтгэлтэй, ширүүн хүн” гэх гомдлын үг одоохондоо сонсоогүй явна. Бусадтай аль болох эвтэй явахыг хичээдэг. Өөгүй төрдөг хүн гэж байдаггүй биз дээ. Хааяа нөхдийнхөө дутагдлыг нүүрэн дээр нь үнэнээр нь шударга хэлчихдэг. Тэглээ гээд бид муудаагүй, тангараг тасраагүй.

-30 нас хүрчихлээ. Хэзээ амьдралаа босгоё гэж бодож байна вэ?

-Надад найз бүсгүй бий. Одоогоор Германд суралцаж байгаа. Таньдаг, мэддэг хүмүүс надаас “Чи гэрлэх болоогүй юм уу, хэзээ амьдрал бүтээж, аав болох гэж байна” гээд залхтал асуудаг. Би энэ чигээрээ үргэлж байгаад байхгүй шүү дээ. Хэзээ нэгэн цагт өөрийн амьдралаа босгож, бүтээж л таараа.

-Хайр, дурлал ялгаатай юу?

-Ялгаатай. Хайр зүрхний асуудал, харин дурлал сэтгэлийн хөдлөл болов уу. Дурласан хүнийг зүрх сэтгэлээрээ шаналж, зовдог гэж ярьдаг юм билээ. Тэр шаналал нь харин цагаан байдаг байх. Хайрласан бүсгүйгээ санаж үгүйлээд, хариу ирэх болов уу, яах бол гэсэн эргэлзээг сэтгэлдээ тээж байгаа нь хүртэл амттай санагддаг. Бодоод байхад хайрлаж, дурлана гэдэг мэдрэмж юм биш үү.

Анхны харцаар бие биедээ дурлаад, амьдрал болсон нь зөндөө байдаг. Хайр дурлал хүний амьдралын мөнхийн сэдэв. Түүнтэй хэн ч маргахгүй. Уран бүтээлч хүнийхээ хувьд хайр дурлалын асуудлыг дүрээрээ янз бүрээр илэрхийлж гаргадаг. Атаархаж өширхөх, харамлаж хардах, хүчээр хайрлах гээд хайр дотроо олон янз шүү дээ. Олон өнцгөөс хардаг байх хэрэгтэй. Тухайлбал, “Парисын дарь эхийн сүм” жүжигт Форолла лам Эсмеральда бүсгүйг хүчээр хайрладаг бол Квазедимо чин сэтгэлээсээ хайрлаж байгаа гардаг.

-Хүн хайрыг юугаараа эмзэг хүлээж авдаг юм бол…

-Зүрхээрээ гэж бодож байна. Гүн гүнзгий дурласан хүн сэтгэлээсээ илүү зүрхээрээ шаналдаг байх. Нэг жишээ хэлье л дээ. Сэтгэл хөдлөлөөсөө болоод Үрлээ Дэлгэрт “Би чамд хайртай” гээд хэлчихдэг шүү дээ. Түүнийг Дэлгэр чин сэтгэлээсээ хэлсэн гэж ойлгодог. Үүнээс болж хайрын гурвалжин өрнөдөг биз дээ. .

-Өөрт чинь хэн нэгэн бүсгүй хайраа илэрхийлээд байвал та яах вэ?

-Би одоо л амьдралд хөл тавих насандаа явж байна. Хайр дурлал ийм, тийм байдаг гэж яримааргүй байна. Магадгүй намайг 60 настай байхад энэ тухай асуувал амьдрал, хайрынхаа тухай сонирхолтой зүйл өгүүлэх болов уу.

-Амьдралаа төлөвлөчихсөн үү?

-Үгүй ээ. Амьдралыг төлөвлөж, тооцоолох сонирхолтой санагддаггүй. Хэтийн тухай бодох бүр ч дургүй. Надад өнөөдөртөө амьдрах сайхан санагддаг. Тиймдээ ч аль болох зовлонгүй амьдрахыг хүсдэг.

-Эмэгтэй хүний ямар зан чанар таалагддаг вэ?

-Ухаалаг, цэвэрч нямбай зан. Эмэгтэй хүний ухаан амьдралыг чимдэг гэж боддог. Эр нөхөртөө найдаж, эмэгтэй хүн өөрийгөө зөнд нь орхиж болохгүй. Гадаад үзэмжээ сайхан, дотоод ертөнцөө хиргүй, ариун байлгах хэрэгтэй. “Хувцсаар нь угтаж, ухаанаар нь үд” гэдэг үг байдаг даа. Миний хувьд бүсгүйчүүдтэй ярилцаад сууж байхдаа энэ талаас нь дүгнэдэг.

-Тэгвэл хүний ямар занд дургүй вэ?

-Худлаа ярьдаг хүнд үнэхээр дургүй. Хийж, бүтээж чадахгүй бол нэрэлхэлгүй үнэнээ хэлчихдэг байх хэрэгтэй. Чадна гэж амлачихаад олон хүний итгэл найдварыг хөсөрдүүлж болохгүй. Манайхан цаг хэзээ ч барьж чаддаггүй шүү дээ. Ядаж дээр нь худлаа ярьдгаа болчихвол зүгээр гэж боддог.

-Залуус гадагшаа гарч ажиллаад, олон жил болж байна. Үүнийг хэр дэмждэг вэ?

-Эх орон нь хөгжилтэй, сайхан амьдралтай байсан бол тэд хаанаас харийн орныг зорих вэ дээ. Өнөөдөр эх орноо хэрхэн хөгжөөд байгааг нэг л сайн ойлгохгүй байгаа. Манайхан хөгжлөө буруу тодорхойлоод байх шиг санагддаг. Ардчилсан нийгэмд амьдарч байгаа нэрээр хүн болгон амь амиа боддог болчихсон. Монголд хоёр сая хүнийг боломжийн сайхан амьдруулах эрдэс баялаг, боломж байна. Алт, нүүрсээ гадагш нь хамаагүй цацсаар байгаад харийнхны хэтэвчийг зузаалаад дууслаа. Шатахууны үнэ жаахан нэмэгдэхээр бүх юмны үнэ дагаад өсчихдөг муухай зуршил ганцхан Монголд байна. Дэд бүтэц сайн хөгжөөгүй болохоор машины бөглөрөл, замын асуудал олон хүнийг бухимдуулдаг. Наад зах нь замаа хөгжүүлж чадаагүй улс яаж хөгжих юм бэ. Энэ сэдвийг ингэсгээд орхиё. Би улс төрийн яриа руу орчихоороо хамаг бухимдлаа ярьчих гээд байдаг юм. Залуу хүнийхээ хувьд газар үзэж, нүд тайлж, номын дуу сонсож, мэдлэгээ дээшлүүлье гэсэн бодол байдаг. Надад уран бүтээлээс өөр хийж чадах ажил байхгүй. Даанч Монголын маань нийгэм ямар билээ. Эргээд ирэхэд орон зай, байр суурь маань одоогийнх шигээ байх уу гэдэг бүрхэг.

-Мөнгийг юунд харамгүй зарцуулдаг вэ?

-Би мөнгөнд учиргүй тооцоотой ханддаггүй. Хэрэгцээтэй зүйлдээ зарцуулж амьдардаг. Магадгүй хайнга ханддаг ч байж болох.

-Зураг зурдаг байсан гэл үү…

-Тийм ээ. Зурахаа болиод удаж байна. Ид сонирхож байхдаа зурсан хэдэн хөрөг гэрт маань байдаг юм.

-Бокс сонирхож хичээллэдэг хэвээрээ юү?

-Хүүхэд байхдаа сонирхдог байлаа. Спортын төрлүүдээс хамгийн эрсдэл ихтэй нь шүү дээ. Жүжигчин болоод дуртай ч байсан өөрийн эрхгүй орхисон. Хааяа зав гарсан үедээ “Ширэн бээлий” клуб дээр очиж, бэлтгэл хийдэг. Сая манай боксын тамирчид дэлхийн аварга шалгаруулах тэмцээнээс алт, мөнгө, хүрэл медаль хүртлээ. Тоглолтыг нь үзэж амжаагүй ч амжилттай тоглож, эх орныхоо нэрийг гаргаж чадсанд нь баярлаж байлаа.

-Сонгодог жүжигт хэдэн удаа тоглосон бэ?

-Тоолбол нэлээн болсон байх шүү. Жүжигчин болчихоод анх У. Шекспирийн “Зуны шөнийн зүүд”, дараа нь “Ромьео, Жульетта” жүжигт тоглосон. Энэ жил миний хувьд уран бүтээлийн ургац арвин байлаа. “Би чамд хайртай-2” кинонд Хангай хэмээх залуугийн дүрийг бүтээхийнхээ хажуугаар туслах найруулагчаар ажиллалаа. Амьдрал дээр байдаг Эрдэнэбилэгийн зан чанараас энэ дүр тэс өөр л дөө.

Хайр дурлалдаа хүндэтгэлгүй ханддаг бүдүүлэг зан авиртай залуугийн дүрийг бүтээх гэж хэрэндээ хичээсэн. Гэхдээ дүрээ өмөөрмөөр байна. Хэдийгээр муухай зантай ч хүн шүү гэдгийг харуулахыг зорьсон. Би ямарваа жүжигт тоглохдоо өөрөөсөө хол дүрд тоглохыг хичээдэг. Эрдэнэбилэг энэ чигээрээ тоглоод байвал сонирхолгүй, уйтгартай байна биз дээ.

Ням гариг сэтгүүл

Жүжигчин Эби:Дургүйг минь үнэхээр хүргээд байвал эрчүүдийн ёсоор асуудлыг шийднэ
Tweet
Bolod.mn