үзүүлэлтийг гаргажээ.

Хүүхдийн эндэгдэл 31.4 хувиар буурчээ
Эрүүл мэндийн яамны мэдээгээр улсын хэмжээнд өнгөрөгч нэгдүгээр сард 5163 эх амаржиж, өмнөх оны мөн үеийнхээс 934 эхээр, төрсөн хүүхдийн тоо (амьд төрөлтөөр) 5190 болж, 937 хүүхдээр буюу 15.3 хувиар тус тус буурлаа.

Энэ хугацаанд 1-5 хүртэлх насны 16 хүүхэд эндсэн нь өмнөх оны мөн үеийнхээс 14 хүүхэд буюу 46.7 хувиар, нэг хүртэлх насандаа 94 хүүхэд эндэж, 43 хүүхдээр буюу 31.4 хувиар буурсан байна.

Ажил хайж буй иргэдийн тоо 5.6 хувиар өсчээ
Аймаг, нийслэлийн хөдөлмөр, халамжийн үйлчилгээний хэлтэс (ХХҮХ)-т бүртгэлтэй, ажил идэвхтэй хайж байгаа ажилгүй иргэдийн тоо өнгөрөгч сарын эцэст 38.3 мянга болж, өмнөх оны мөн үеийнхээс 2024 хүнээр буюу 5.6 хувиар өсчээ.

Бүртгэлтэй ажилгүй иргэдийн тоо өмнөх оны мөн үеийнхээс Улаанбаатар хотод (1526), Булган (912), Өмнөговь (443), Завхан (438), Төв (392), Архангай (372), Дундговь (324 ), Ховд (186) аймагт өссөн нь ажилгүй нийт иргэдийн тооны өсөлтөд голлон нөлөөлжээ.

Хүний хөгжил” сангаас 49.2 тэрбум төгрөгийг 2.3 сая иргэнд олгоод байна
Улсын нийгмийн даатгалын ерөнхий газрын мэдээгээр нийгмийн даатгалд мөн сард 75.1 мянган хүн шимтгэл төлөгч, даатгуулагчаар бүртгэгдсэний 44.4 мянга буюу 59.2 хувь нь аж ахуйн нэгж, байгууллагаас, 30.7 мянга буюу 40.8 хувь нь төсөвт байгууллагаас шимтгэл төлжээ.

Нийгмийн даатгалын сангаас олгосон тэтгэврийн хэмжээ 49.8 тэрбум төг болж, үүний 73.7 хувийг өндөр настны, 12.8 хувийг хөгжлийн бэрхшээлтэй иргэдийн, 7.7 хувийг тэжээгчээ алдсаны, 5.8 хувийг цэргийн тэтгэвэр эзэлж байна. Харин “Хүний хөгжил” сангаас 49.2 тэрбум төгрөгийг давхардсан дүнгээр 2.3 сая иргэнд олгосон аж.

Халдварт өвчнөөр өвчлөгсөдийн тоо 28.5 хувиар өсчээ
Халдварт өвчнөөр 3050 хүн өвчилж, өмнөх оны мөн үеийнхээс 677 хүн буюу 28.5 хувиар өссөн нь цусан суулгаар өвчлөгчдийн тоо 32 хүн буюу 22.5 хувь, тэмбүүгээр өвчлөгчдийн тоо 75 хүн буюу 22.5 хувь, гонококкт халдвараар өвчлөгчдийн тоо 83 хүн буюу 18.4 хувь, трихомониазаар өвчлөгчдийн тоо 52 хүн буюу 15.8 хувь, сүрьеэгээр өвчлөгчдийн тоо 38 хүн буюу 12.4 хувиар буурсан хэдий ч салхин цэцгээр өвчлөгчдийн тоо 214 хүн буюу 4.3 дахин, вирүст хепатитаар өвчлөгчдийн тоо 734 хүн буюу 2.3 дахин өссөнөөс шалтгаалсан байна.

Эхний сарын байдлаар 1852 гэмт хэрэг бүртгэгдэж 179 хүн нас баржээ
Улсын хэмжээнд оны эхний сарын байдлаар 1852 гэмт хэрэг бүртгэгдсэн нь өмнөх оны мөн үеийнхээс 228 хэрэг буюу 14.0 хувиар нэмэгджээ. Гэмт хэргийн улмаас 646 хүн гэмтэж, 179 хүн нас барсан нь өмнөх оны мөн үеийнхээс гэмтсэн хүний тоо 35 буюу 5.7 хувиар өсч, нас барсан хүний тоо 9 буюу 4.8 хувиар буурсан үзүүлэлттэй байна.

Хэрэглээний үнийн улсын индекс13.8 хувиар өсчээ
Хэрэглээний үнийн улсын индекс (ХҮУИ) өмнөх сарынхаас 3.0 хувь, өмнөх оны мөн үеийнхээс 13.8 хувиар тус тус өссөн байна. Ерөнхий индекс өмнөх сарынхаас өсөхөд хүнсний бараа, ундаа, усны бүлгийн дүн 6.3 хувиар өссөн нь голлон нөлөөлжээ.

Mонголбанкны мэдээгээр мөнгөний нийлүүлэлт (M2) нэгдүгээр сарын эцэст 4805.5 тэрбум төг болж, 2010 оны арванхоёрдугаар сарынхаас 125.5 тэрбум төг буюу 2.7 хувь, өмнөх оны мөн үеийнхээс 1934.5 тэрбум төг буюу 67.4 хувиар өсчээ. Гүйлгээнд байгаа бэлэн мөнгө сарын эцэст 565.7 тэрбум төг болж, 2010 оны 12 дугаар сарынхаас 46.0 тэрбум төг буюу 8.9 хувь, өмнөх оны мөн үеийнхээс 214.9 тэрбум төг буюу 61.2 хувиар өссөн үзүүлэлттэй байна.

Төсвийн урсгал орлого 218.9 тэрбум төг, урсгал зардал 228.1 тэрбум төг болж, урсгал тэнцэл 9.2 тэрбум төгрөгийн алдагдалтай байна. Татварын нийт орлого өмнөх оны мөн үеийнхээс 78.6 тэрбум төг буюу 62.5 хувиар нэмэгдэхэд зарим бүтээгдэхүүний үнийн өсөлтийн албан татварын орлого 13.3 тэрбум төг буюу 50.7 хувиар буурсан ч нэмэгдсэн өртгийн албан татварын орлого 44.1 тэрбум төг буюу 2.7 дахин, аж ахуйн нэгжийн орлогын албан татварын орлого 13.2 тэрбум төг буюу 2.5 дахин, онцгой албан татварын орлого 8.5 тэрбум төг буюу 77.9 хувиар өссөн нь голлон нөлөөлжээ.

64.5 мянган толгой мал хорогджээ
Улсын хэмжээгээр 2011 оны нэгдүгээр сард оны эхэнд тоологдсон нийт малын 0.2 хувьтай тэнцэх 64.5 мян.толгой мал зүй бусаар хорогдсоноос 2.3 мян.толгой адуу, 5.2 мян.толгой үхэр, 0.1 мян.толгой тэмээ, 22.2 мян.толгой хонь, 34.7 мян.толгой ямаа байна. Нийт хорогдсон малын 53.8 хувийг ямаа эзэлж байна.

Аюулт үзэгдэл, ослын улмаас 14 хүн амь насаа алдав
Аюулт үзэгдэл, осол өнгөрөгч сард 329 удаа гарсны улмаас 14 хүн амь насаа алдаж, 36.7 мян.толгой мал, амьтан хорогджээ. Түүнчлэн объектын түймэр 312 удаа, бичил уурхай, нурангины осол зургаан удаа, мал, амьтны галзуу өвчин дөрөв удаа, гол, нуурын усанд унасан осол хоёр удаа тус тус бүртгэгдсэн аж. Аюулт үзэгдэл, ослын улмаас 0.3 тэрбум төгрөгийн хохирол учирсан байна.

Г.Од