Хятадын төмөр замыг хөл дээр нь босгосон сайд хэрэгт татагджээ

2011-02-16

Хятадын Төмөр замын сайд Лиу Зижинг тус улсын хууль сахиулагчид шалгаж эхэлжээ. Энэ талаар уржигдар "Синхуа"

агентлаг албан ёсоор мэдээлсэн байна.

Манай хойд, урд хоёр хөрш сүүлийн үед улс орныг нь хэрсэн авлигын сүлжээг арилгахын тулд нэлээд хөөцөлдөж байгаа. ОХУ-ын Ерөнхийлөгч Дмитрий Медведев гэхэд эдийн засгаа бүрэн шинэчлэхийн тулд авлигатай хатуу тэмцэхээ анхааруулж, "Оросод авлига, хээл хахуулийн сүлжээ хаант засгийн үеийнх шиг газар авч байна" хэмээн мэдэгдсэн юм.

Тус улсын хууль сахиулагчид өнгөрсөн онд төрийн өндөр албан тушаалтай олон хүнийг авлигын хэрэгт холбогдуулан шалгаснаас 2000 гаруйд нь тохирох ял, шийтгэлийг нь ногдуулжээ. Үүнтэй адил Хятадын Засгийн газар ч авлига авах явдал газар авч буйтай ширүүн тэмцэж байгаа билээ. Үүнийг нотлох мэт "Синхуа" агентлагаас өнгөрсөн онд Хятадад төрийн өндөр албан тушаалаа урвуулан ашиглаж, хууль зөрчин, улсын мөнгө идэж шамшигдуулсан нь тогтоогдож, шүүхээр хэргийг нь шийдвэрлэсэн авлигын 10 том хэргийг зарласан юм.

Мөн авлигын хэрэгт орооцолдсон хүмүүст цаазаар авах ял оноосон нь энэ төрлийн гэмт хэрэгтэй тэмцэх Хятадын хууль хатуу байгааг илтгэж байна.

Харин сүүлийн үед Хятадын Төмөр замын сайд Лиу Зижингийн хэрэг олны анхаарлыг татаад байгаа юм. Түүнийг тус улсын эрх баригч хүчин болох Коммунист намын хянан шалгах хорооноос албан тушаалаа ашиглан их хэмжээний хахууль авсан хэмээн буруутгаад байна. Энэ талаар Хятадын Хянан шалгах төв хороо, Төмөр замын хянан шалгах газраас албан ёсоор мэдээлжээ.

Лиу Зижин нь 2003 оны гуравдугаар сараас сайдын албыг хашиж эхэлсэн байна. Тэрбээр Хятадын төмөр замын системийг орчин үеийн хэв загвартай болгож, эрс өөрчлөн шинэчлэлт хийсэн гэдгээрээ нэлээд алдартай. Тиймээс түүнийг "Өөрчлөгч Лиу" гэж нэрлэдэг аж. Тэрбээр төмөр замын сүлжээтэй холбоотой олон тэрбум ам.долларын хөрөнгө оруулалтын төслүүдийг ахалж байжээ.

"Өөрчлөгч Лиу" 2006 оны зургадугаар сард Чинхай, Төвдийг холбосон, далайн түвшнээс дээш асар өндөрт байрлах дэлхийн хамгийн анхны төмөр замыг байгуулсан байна. Энэ мэтээр тэрбээр Хятадын төмөр замын системийг олон улсын стандартад нийцсэн орчин үеийн болоход томоохон хувь нэмэр оруулсан байна.

Чинхай, Төвдийг холбосон төмөр зам байгуулсан нь шинэ технологи, өндөр чадвар бүхий мэргэжилтнүүд, хамгийн хурдан галт тэрэг явах боломж бүхий асар нь том бүтээн байгуулалт болж, өөрөөр хэлбэл, дэлхийн төмөр замын салбар дахь Хятадын гэх тодотголтой брэндийг бий болгожээ.

Хятадын Төмөр замын сайдын албыг хашиж байх үед Лиу Зижинг тойрсон шүүмжлэл ч цөөнгүй гарч байв. Түүнийг ашиг сонирхлын зөрчилтэй. Мөн Чунъян мужийнханд ажиллах таатай нөхцөл бүрдүүлээгүй томоохон компанийн төлөөлөгчидтэй хувийн харилцаатай гэх мэтээр буруутгадаг байсан аж. Тэдгээр компанийг 2008 онд Шандонгод болсон төмөр замын осол, 2009 онд Хунанд болсон галт тэрэгний мөргөлдөөн зэрэгт буруутгаж үздэг.

Түүнчлэн Лиу Зижингийн өөрийнх нь хувийн амьдрал ч нэлээд шүүмжлэл дагуулдаг байна. Өдгөө 58 настай тэрбээр анхны эхнэрээсээ салж, хоёр дахь удаагаа гэрлэсэн. Лиу Зижингийн ах Лиу Зисянг нь Вухан мужид төвтэй бага зэрэглэлийн төмөр замын газрын ажилтан юм. Түүнийг 2006 онд хээл хахууль авсан хэрэгт буруутгаж, цаазаар авах ял ногдуулж байв. Лиу Зижин өмнө нь Хятадын Коммунист намын Ерөнхий нарийн бичгийн даргаар ажиллаж байсан юм.

Лиу Зижингийн хэрэг энэ сарын эхээр мөрдөгдөж эхэлсэн гэж зарим эх сурвалж мэдээлжээ. Ямартай ч энэ сарын 12-ноос Төмөр замын сайдын албанаас нь чөлөөлжээ. Түүний оронд Хятадын Гаалийн газрын дарга Шенг Гуанжу томилогдсон байна.

Лиу Зижинг одоогийн байдлаар "Boyou Investment Management" группийн тэргүүн, Шанси мужийн томоохон бизнес эрхлэгч Динг Юсинээс хээл хахууль авсан хэмээн буруутгаад байна. "Boyou Investment Management" компани нь Хятадын хурдны төмөр зам байгуулах хэд хэдэн төслийн үүрэг гүйцэтгэгчээр ажиллаж байжээ. Лиу Зижингийн хувьд хэрэгт холбогдохынхоо өмнө Чунъян мужаар хөндлөн гулд явж, төмөр замын үйл ажиллагааг шалган ард иргэдтэй уулзаж, нэг ёсондоо "баярын маршрут"-аар ажиллаж байжээ. Тиймээс түүний хэрэг шалгагдах болсон нь маш гэнэтийн зүйл болсон байна.

Лиу Зижин Хятадын Төмөр замын сайд байх хугацаандаа ойрын жилүүдэд хурдны төмөр зам байгуулах ажилд зориулж 800 тэрбум юань буюу 121 сая ам. доллар зарцуулахаар төсөвлөж байжээ. Бээжин дэх "Renmin" их сургуулийн профессор Мао Шаулонг Лиу Зижинг маш амжилттай яваа улстөрч хэмээн тодорхойлжээ.

Тэрбээр "Хятадын төмөр замын салбарыг хариуцсан, энэ салбарыг өөд нь татаж яваа, маш хариуцлагатай өндөр албан тушаалтан бол Лиу Зижинг. Магадгүй Хятадын Ерөнхийлөгч Ху Жинтаогийн авлигатай тэмцэх "аян"-аас илүү Лиу Зижин өөрөө чухал хүн байж болох юм. Гэтэл одоо түүнийг авлигын хэргээр албанаас нь чөлөөлсөн явдал төмөр замын салбарынханд хүнд цохилт болно. Магадгүй хэтдээ энэ салбарын хөгжил зогсонги байдалд орж магадгүй" гэжээ.

Хятадын салбарын сайд асан Лиу Зижин гэгч гэмт хэрэгтэн ийм л чухал хүн байж. Ямартай ч одоогоор тэрбээр авлигын хэрэгт холбогдон шалгуулж байгаа өндөр албан тушаалтай хамгийн сүүлийн хүн болж байна.

Үүнээс сар орчмын өмнө Хятадын хүнс, эмийн хангамж хариуцсан дарга асан Жанг Жинглиг авлигын хэрэгт холбогдуулан шалгаж, албан тушаалаас нь чөлөөлсөн юм.

"Синхуа" агентлагийн мэдээлснээр өнгөрсөн онд Хятадын төрийн албаны 146517 ажилтан хэрэгт татагдаж, засан хүмүүжүүлэх газар хоригдсон байна. Тэднээс 5098 нь дунд болон дээд шатны удирдах албан тушаал хашдаг хүн байж. Харин хэрэгт холбогдсон хүмүүсээс ердөө 804 нь хуучин хашиж байсан албаа хэвээр үргэлжлүүлэн хийж байгаа аж.

Т.Элиса