УИХ-ын гишүүн асан, БНН-ын дарга Б.Жаргалсайхантай ярилцлаа.

 -Өчигдөр /даваа гаригт/ орой та МАХН-ын баяр дээр очиж харагдсан. М.Энхсайхан, Ц.Цолмон гээд ҮШН-ын дарга нартай. Яагаад тэнд очсон юм?

-Аль МАХН?


-Н.Энхбаярын МАХН л гэхээс. Монгол ардын хувьсгалт нам уу, Монголын алдартай хувьсгалт нам уу гэдгийг нь бол би байтугай өөрсдөө ч ялгахгүй байгаа байх. МАН-ын баярын өмнөх орой...?

-Аан, Н.Энхбаярын МАХН дээр үү. Очсоон, очсон. Энэ баяр чинь Монголын бүх улстөрчдийн баяр шүү дээ. Н.Энхбаяр ямар хадны мангаа биш, хүн урьж байхад би очихгүй бол болохгүй биз дээ. Баяр хүргэсэн. Өнөөдөр Ардын намынхан баяраа тэмдэглэж байна, би очно.

-Ардчилсан намын баярт бас очих уу?

-Очно оо. Өнгөрсөн жил Ардчиллын 20 жилийг тэмдэглэсэн. Намайг урьсан, би очсон. Би ч гэсэн Ардчилсан намыг байгуулахад хувь нэмрээ оруулсан хүн гэж боддог шүү.

-Бас энгэр цоолсон уу. МАХН-ын дарга нарыг бүгдийг нь шагнасан шүү дээ?

-Үгүй ээ, үгүй. Юм авахдаа гол нь биш шүү дээ. Манайхан нэг юм хийчихээд л хариу заавал авахыг боддог.

-МАХН-ыг шинээр байгуулсан нь МАН-ын зүгээс нэлээд эсэргүүцэлтэй тулаад байгаа. Харин та МАХН-ын талд байх шиг байна?

-Яах вэ дээ. Манайхан чинь нэгийгээ нэг юм байгуулахаар л дандаа ад үзэж байдаг юм чинь. Намайг анх БНН-ыг байгуулж байхад ч гэсэн шоронд хийж л байсан шүү дээ. Шоронгоос чөлөөгөөр гарч ирээд намынхаа анхны хурлыг хуралдуулж байсан. Тэгээд буцаад “Ганц худаг”-таа ороод сууж л байсан.

-Яасан гэж шоронд хорьсон юм?

-Мафи, коррупцитай тэмцэж байна гээд л аваачаад хийхгүй юу, 1991 онд. Эрх чөлөө, тусгаар тогтнол, ардчилал, илүү дутуу юм ярилаа л гэж айлгаж байгаа юм.

-МАН, МАХН-ын баяр ч яах вэ, дуусна. Залгаад манайхны “хаврын синдром” гэж нэрлэдэг улс төрийн их бужигнаан эхлэх нь. Шинэ нам, хөдөлгөөнүүд төрөөд, улс төр илт идэвхижээд эхэллээ. Та, танай нам үүний хаана нь явна?

-Ер нь үүнийг “хаврын синдром”, энэ тэр гэж нэрлэдгээ бид болих хэрэгтэй. Хүн төрөлхтөн, дэлхий нийт өнгөрсөн оныхоо ажлыг оны эхний улиралд дүгнэдэг юм. Өнгөрсөн онд бид юу хийж бүтээв ээ, бидний амьдрал яаж өөрчлөгдөв, дээшилж дэвшив гэж. Тэгээд амьдрал нь сайжирч, дээшилж дэвшээгүй бол төр засагтаа үгээ хэлдэг нь жам. Энэ чинь ардчилсан нийгмийн ёс. Үүнийг нэг их “улс төрийн синдром” энэ тэр гэж доош хийгээд, доромжлоод байх шаардлага байхгүй.

-Улс төрийн энэ эсэргүүцэл, хөдөлгөөнийг таны сайн мэдэх М.Энхсайхан, Н.Энхбаяр хоёр удирдах нь тодорхой болсон. Гэхдээ тэд төр засагтаа үгээ хэлэх биш, харин хувьсгал хийж засгийн эрх авах тухай ярьж байна. Та бас тийм хувьсгалч хүн үү?

-Төр засаг нь авлигад идэгдээд, ард түмнээ дарангуйлаад, цөөнх нь баяжаад, олонхи нь ядуураад байвал энэ ард түмэн чинь босно шүү дээ. Үүний тод жишээ Египет, Тунис болж байна. Дарга нар нь баяжаад, ард түмэн ядуураад байвал тэр лүү л явна. Үүнийг та бид хоёр удирдах гээд, үгүйсгэх гээд утга байхгүй. Болдог юм болдгоороо болно. Харин тийм юм гаргуулахгүйн тулд улс төрийн намууд, ялангуяа төр барьж байгаа намууд үйл ажиллагаагаа ил тод явуулах ёстой. Авлига, шударга бус явдлуудтайгаа ил тод тэмцэх ёстой. Улс орноо эрчимтэй хөгжүүлэх хэрэгтэй. Тэгж байж ард түмний итгэлийг авна. Түүнээс биш уриа лоозон хийсгээд, уран гоё яриад ард түмний амьдрал дээшлэхгүй.

-Гэхдээ нэг нь 13 жил Монголын төрийг хаанчилсан, нөгөө нь Ерөнхий сайд, Шадар сайд байсан хүмүүс гэнэт улс төрийн байр сууриа алдсаныхаа дараа л гэнэт сэрж, эргээд төр лүүгээ дайраад эхэлсэн нь улс төрийн өшөө авалт шиг харагдаад... Тэдний оронд иргэний хөдөлгөөнүүд, парламентын гаднах намууд ингэж ярьж байгаа бол өөр хэрэг?

-Английн Ерөнхий сайд байсан У.Черчель гуай 19 удаа унаж босч, Английн төрийг 40 жил засаглаж байсан юм даа. Тиймээс та Н.Энхбаярын тухай хэлж байгаа бол цагийн сайнд өнөөдрийн бүх улстөрчид бүгдээрээ Н.Энхбаяраас одон шагнал хүртэж, улс төрийн дэмжлэг авч байсан. Бүгд л Н.Энхбаярын дэмжлэгээр бизнесээ явуулж, өчнөөн нь албан тушаал дээр очсон. 1996 онд МАХН-ын байдал асар хүнд байсан. Ардчилсан нам ялж, МАХН-ын нэр хүнд газар унасан үед Н.Энхбаяр энэ намыг хүлээж авсан. Н.Энхбаярыг Ерөнхий сайд, УИХ-ын дарга, Ерөнхийлөгч байх үед Монгол Улсын эдийн засаг маш их өссөн. Үгүй гэж хэлэх хүн байхгүй. Н.Энхбаярыг Мянганы замыг эхлүүлж байхад нь “Мянгуужингийн зам” гэцгээж байсан. Гэтэл өнөөдөр бүх аймаг хоорондоо хатуу хучилттай замаар холбогдоод дуусч байна. Яасан, Н.Энхбаяр барьсан учраас тэр замаар явж болохгүй юу. Битгий яваарай, ялангуяа Баабар. Зүгээр хажуугаар нь давхиад явчих. Тиймээс ингэж туйлширч болохгүй. Н.Энхбаяр бол харьцангуй залуу хүн.

-Танаас дүү юм уу?

-Надаас хоёр ах, бид нэг сургууль төгссөн. Гэхдээ яагаад тэр хүнийг бүгдээрээ үзэн ядаад байгаа юм бэ. Яадаг юм, тэр хүн “Үзэл бодол нийлэхгүй байна аа” гээд намаа аваад л гараа биз. Юунаас нь айгаад байгаа юм. Орост ч гэсэн Коммунист намаа тусад нь гаргаад, Зюганов толгойлоод явж л байна шүү дээ.

-Та өмнө нь ИЗН-тай эвсч, нэгдэж, улс төрийн холбоотон болж, гуравдагч хүчин байгуулна гэж явсан. Харин одоо өөр чиг рүү явж байгаа юм байна, тийм үү?

-ИЗН энэ яваа болон хойд насандаа улс төрийн гуравдагч хүчин болж чадахгүй. Тэд нарт тийм чадал байхгүй, санаа бол байгаа л байх.

-Мөнгөгүй учраас уу?

-Мөнгөндөө биш, үзэл баримтлалгүй нам байхгүй юу. Зүгээр л нам нэртэй, гишүүнчлэл ч байхгүй. Улс төрийн гуравдагч хүчнийг би арай өөрөөр харж байна. Жишээлбэл, ҮШН. М.Энхсаяхан Монголын улстөрд гавьяатай хүн. Ардчилсан намыг хоёр удаа аварсан, сонгуульд авч орж ялалтад хүргэсэн. Тэрнийх нь хариуд элдвээр хэлээд, намын даргыг нь хүртэл аваад, хөөгөөд явуулсан шүү дээ. Хөөгдөж болно, гэхдээ энэ хүн чинь шинээр нам байгуулах эрхтэй юм байгаа биз дээ. Түүнийг нь яагаад буруутгаад байгаа юм.

-Гэхдээ таны энэ дэмжээд байгаа хүмүүс чинь нийгмийн баялгийг тэгш хуваарилах, хувьсгал хийж, өмчийг хураах тухай ярьж байна шүү дээ?

-Мэдэхгүй, би тэгж ярьж байхыг нь хараагүй. Мэдэхгүй юмаа би ярьдаггүй.

-Та илтгэл, ярилцлагуудыг нь үзээгүй юү?

-Үзээгүй. Тэгвэл үзсэн хойноо хариулья.

-МАН-ын 90 жилийн ойг хэн нь тэмдэглэх вэ гэж МАН, МАХН хоёр хэрэндээ л үзэлцлээ. Та харсан биз дээ?

-МАХН-ын өнгөрсөн 70 жилийн түүх бол Монголын ард түмний түүх. 1990 он хүртэл Монгол Улс ганцхан намтай байсан. Өнөөдрийг хүртэл бий болгосон бүтээн байгуулалт, энэ бүх юм чинь Монголын ард түмний өмч болохоос биш аль нэг намын өмч биш. Би лав үүнтэй санал нийлэхгүй. Монголын түүх бол Монголын ард түмний өмч. МАХН 1990 онд удирдагчид, Улс төрийн зөвлөлтэйгээ байхгүй болоо биз дээ. Шинээр байгуулагдсан МАХН шинэ үзэл баримтлал, шинэ хөтөлбөртэйгээр улс төрийн үйл ажиллагаагаа явуулсан. Үгүй гэл дээ. Социализм байгуулна гэж энэ намын мөрийн хөтөлбөрт байхгүй биз дээ. Тийм учраас 90 жилийн өмнөх МАХН-ын түүх бол БНН-ын ч түүх, Ардчилсан намын ч түүх. Миний аав, ээж ч гэсэн энэ улс орны төлөө өдөр шөнөгүй л ажиллаж байсан юм шүү. Тэр үед өнөөдрийн энэ У.Хүрэлсүх эд нар эхээс ч гараагүй байсан.

-Тэрийг чинь л харин энэ намын дарга нар ойлгохгүй байгаа л даа?

-Та нар сайн хэлэхгүй юу. МАН бол 1990 онд байгуулагдсан шинэ нам, МАХН ч гэсэн шинэ нам. 1990 онд бүгдээрээ л шинэ зорилго, шинэ мөрийн хөтбөлбөртэйгээр, шинэ нийгмийн төлөө яваа биз дээ. Тийм учраас аль ч намын хувьд түүхийг худлаа үнэн тайлбарлаад, булаацалдаад байх шаардлага байхгүй. МАН нь ч тэр, МАХН ч тэр.

Ер нь манай нийгэм чинь асар их идеологиор хүмүүжсэн нийгэм шүү дээ. Тэр нь юугаар илэрдэг вэ гээч. Магтаал сайшаал, нэр хүнд, алдар гавьяанд учиргүй дуртай. Энэ бол бидний хуучин нийгмээс олж авсан хамгийн муу зүйл. Төрөөр тэжээлгэж, төрд бүх ажил амьдралаа даатгаж, дандаа хүний гар харж ирсэн. Тэгээд нэг нь жаахан илүү гараад ирэнгүүт атаархана, муу хэлнэ, улыг нь шагайна. Одоо харин хүмүүс жаахан жаахан өмчтэй болоод, бага ч гэсэн өөрчлөгдөж байх шиг байна. Ерөн онд намайг юу гэдэг байсан, “муу панзчин, дамын наймаачин” л гэдэг байсан шүү дээ. Яах вэ, машинтай, хэдэн төгрөгтэй л байж л дээ. Гэтэл өнөөдөр бүгдээрээ л мөнгөтэй, эрх мэдэлтэй болох гэж зүтгэж байна. Гэхдээ их муухай нь зүгээр сууж байгаад мөнгө олох дуртай.

-Долдугаар сарын 1-нд таван хүн буудсан цагдаа нар, цагдаагийн дарга нарын хэргийг прокурор сэргээгээд, шийдэх шатандаа явж байна. Та ч гэсэн энэ хэргийн бас нэг гэрч, бас хохирогч. Одоо үгээ хэлэх цаг болсон биш үү?

-Яг үнэндээ би тэр үймээнд оролцоогүй, та нар зурагтаар харсан шүү дээ. Манай сонгуулийн штабын машин үймээн болж байгаа газар очсон байсан, тэрийг авах гээд очсон чинь л “зохион байгуулсан” гээд бариад хорьсон шүү дээ. Гэхдээ би долдугаар сарын 1-нд жагссан залуусыг дэмжиж байгаа. Ардчилсан нийгэмд хүн үзэл бодлоо илэрхийлэх, жагсч цуглах эрхтэй шүү дээ. Гэхдээ бусдын өмч хөрөнгийг сүйтгэнэ гэдэг бол буруу. Яах вэ, манай залуус хараахан эрх үүрэг, хариуцлага гэдэг зүйлийг бүрэн ухамсарлаж чадаагүйн улмаас алдаж эндсэн, буруу хазгай гишгэсэн байж болно. Гэхдээ үүнээс нь төр засаг тэднийг хамгаалж, зохицуулах ёстой шүү дээ. Яагаад чулуу шидсэнийх нь төлөө 10-20 жилийн ял өгч, яагаад гэм зэмгүй тавын таван сайхан залууг нохой шиг буудаж алж байгаа юм. Тэгээд бүх телевизийн амыг бариад дандаа иргэдээ буруутгасан, эрх баригчдыг өмгөөлсөн мэдээ явуулаа биз дээ. Яагаад тэр хүмүүст хариуцлагыг нь хүлээлгэхгүй, яагаад тэр үед эрх барьж байсан нөхдүүд хариуцлагаа хүлээхгүй байгаа юм.

Яг үнэндээ тэр чулуу шидсэн залуучуудыг хараарай, 200-300 хүүхэд л байна лээ шүү дээ. Гэтэл тэнд цагдаагийн 1000 гаруй ажилтан энгийн хувцас өмсөөд жагсаал дотор явж байсан байсан шүү дээ. Тэд яагаад чулуу шидэж байгаа залуусыг хоёр, хоёроороо дамжлаад аваад явчихаж болоогүй юм. Албаар тэднийгтурхирч, өдөж байгаад байшин шатаалгасан шүү дээ.

-МАХН-ын байрыг шатаалгах сонирхол хэнд байсан гэж?

-Жагсч байсан залууст бол байшин шатаах ямар ч шаардлага, ашиг байхгүй. Тухайн үеийн эрх баригчдад харин байсан юм биш үү. Сонгуулийнхаа булхай луйврыг нуухын тулд. Би бол тэгж ойлгож байгаа.

-Та өөрөө хэдэн өдөр хоригдсон бэ?

-Сар хоригдсон. УИХ-ын гишүүний бүрэн эрх дуусаагүй байсан учраас сарын дараа сулласан шүү дээ. Монгол Улс НҮБ-ын Хүний эрхийн конвенцид нэгдсэн орон. Конвенцийг зөрчих юм бол олон улсын шүүхээр хариуцлага хүлээх ёстой. Сая О.Магнай Ж.Батзандан гэсэн залуус долдугаар сарын 1-нд хүний эрх зөрчиж, өч төчнөөн сайхан залуусын эрүүл мэндээр тоглож, таван хүний амь хөнөөсөн тухайн үеийн албан тушаалтнууд, 13 хүний нэрсийг АНУ-ын ЭСЯ-нд аваачаад өгсөн байна лээ. Хамгийн дээд талд нь С.Баярын нэр байгаа. Тэднийг жишээ нь, АНУ-д нэвтрэхийг хориглож, нэвтрээд ороод ирсэн тохиолдолд шууд баривчлах ёстой. Яг Б.Хурц шиг. Тэгээд Гаагийн олон улсын шүүх дээр аваачиж шүүх хэрэгтэй.

-Таныг Н.Энхбаяр суллуулсан юм уу?

-Үгүй ээ, үгүй. Бүхэл бүтэн комисс гарч ажилласан шүү дээ, энэ хэрэг дээр. Н.Энхбаяр үүнд ямар хамаатай юм.

-Долдугаар сарын 1-ны хэрэгт тухайн үеийн Ерөнхийлөгч буруугүй юү?

-Н.Энхбаярын ганц буруу нь арга хэмжээ аваагүй л байхгүй юу.

-2009 оны Ерөнхийлөгчийн сонгуулийн дараа та “Би Н.Энхбаярт өрөө төлсөн, одоо энэ хүнтэй хамаагүй гэж байсан. Ямар өр вэ?

-Би тэгж хэлснээ санахгүй л байна. Сонгуулийн өмнө Н.Энхбаяр надтай уулзаад “Намайг дэмжээрэй” гэсэн юм. Би “дэмжинэ ээ” гэж хэлсэн. Би хэлсэндээ байдаг хүн. Энэ бол капиталистуудын зан. Хүн бүр өөр өөрийн чадамжийн хэрээр амьдардаг зарчимтай. Коммунистууд бол худлаа ярьдаг, зулгуйддаг, атаархдаг, үзэн яддаг.

-Энэ удаа ч гэсэн Н.Энхбаярыг дэмжиж байгаа юу?

-Н.Энхбаяр надаар дэмжүүлэхгүй гараад ирэх байлгүй дээ. Та нар ч гэсэн харж байгаа биз дээ. МАХН-ыг хүмүүс хэр их дэмжиж байгааг. Харин БНН сонгуульд ямар улс төрийн блок болж орох вэ гэдгийг бол цаг дээр нь шийднэ. Тэрэн дээр харин ёстой мэхээ хэрэглэнэ шүү. Ямар ч байсан он гараг.

-Өнгөрсөн гурван жил иргэн Б.Жаргалсайханы амьдрал хэр зэрэг дээшилсэн бэ. Сонгуулиас хойш нэг их улс төр, энэ тэр гэж яваагүй, цэвэр бизнесээ хөөсөн биз дээ?

-Би байтугай дэлхий нийтээрээ хямарлаа шүү дээ. Дэлхийн эдийн засагт хямрал нүүрлэж, том том биржүүд уналтад орж, Америк, Европгүй хямарсан. Монгол Улс ч дагаад хямарсан. Банкууд нь хямралд ороод төлбөр тооцоогоо хийж чадахаа больж, төрөөс банкуудаа аварч үлдэхийн тулд хадгаламж, зээлийн баталгаа хүртэл гаргаж, төсвөөс мөнгийг нь төлж, төв банк нь бодлогын хүүгээ нэмснээс болоод үйлдвэр аж ахуйнуудын үйл ажиллагаа бүгд хумигдсан.

-Танай компани ч бас уу?

-Манай компанид лав ямар ч өсөлт гараагүй. Монголын бүх ноолуур Хятадын зах зээл рүү гарсан. Одоо манайхан нүүрс, нүүрс л гээд үхэлдээд байна. Нэг тонн нүүрсний дэлхийн зах зээлийн үнэ 50 ам.доллар, нэг тонн нь шүү. Гэтэл нэг кг ноолуурын үнэ 120 ам.доллар, боловсруулаад гаргахад. Нүүрснээс 2400 дахин өндөр ашигтай байгаа биз. Жилд 6000-хан тонн ноолуур боловсруулаад гаргахад долоон тэрбум ам.доллар. Монголын нэр төрийг дэлхийн зах зээл дээр гаргасан экологийн цэвэр, брэнд бүтээгдэхүүн. Эндээс хэдэн хүн ажлын байртай болж, төсөвт хичнээн төгрөгийн ашиг орж ирэх вэ.Тэгэхэд Монголын төр ийм салбарыг гаргуунд нь хаясан. 

-Ямаанд мөнгө өглөө гэж адлуулан байж дотоодын ноолууранд нөхөн олговор өгдөг болсон. Энэ нь дотоодын үйлдвэрүүдэд дэм болоогүй гэж үү?

-Ямаанд л өгсөн болохоос биш, ноолууранд өгөөгүй шүү дээ. Тэгээд тэр мөнгөө бидний халааснаас авсан гээч. Одоо ч гэсэн Тавантолгойгоо хоёр хэсэг хувааж зарах тухай л яриад байна шүү дээ. Олон улсын бирж дээр хувьцаа гаргана л гэнэ. Түүнээс Монгол Улсад юу наалдах юм. Юу ч наалдахгүй.

-Таныхаар яах ёстой гэж?

-Дор хаяж тав хуваах ёстой. Хоёр хуваагаад хятадуудад өгчихлөө гэж бодьё. Ядончуудыг яах юм. Сүүлийн 20 жил Монгол Улсад тусалж дэмжиж, Улаанбаатар хөлдөхөд ДЦС-уудыг нь шинэчилж, нийтийн тээвэр нь зогсоход паркийг нь шинэчилж, сүүлийн 20 жилд хамгийн их  тусламж, дэмжлэг үзүүлсэн улс бол Япон улс. Одоо тэгээд япогчуудыг “Та нар хэрэггүй” гэж байгаа юм уу. Солонгосчуудыг яах юм. Монголын төр иргэдээ тэжээж чадахаа больж, үйлдвэр аж ахуйнууд нь таг зогсоод байхад манай 40 мянган залуусыг аваачиж сургаж боловсруулаад, ажил олгоод, жилд 360 сая давсан цалин өгч байна. Монгол Улс иргэддээ ингэж хандаж чадаж байгаа юм уу. Тэгээд одоо солонгосчуудыг “Та нар цаашаа” гэх үү. Америкчуудыг яа гэсэн юм. Ерэн онд монголчууд коммунизмаас ухарч, ардчилсан замыг сонголоо гэхэд хэн биднийг хүлээж авч, дэлхийн бусад орнуудтай холбосон юм, хэн япон, солонгосчуудыг шахсан юм, америкчууд л шүү дээ. Тэгээд одоо “Та нар хэрэггүй, Хятадтай нийлж коммунизм байгуулна” гэх үү. Орос, Хятад хоёр ч гэсэн манай хоёр том хөрш. Тиймээс Тавантолгойг дор хаяж тав хуваагаад энэ улсуудад бүгдээрэнд нь ашиглуулах хэрэгтэй. Өнөөдөр Европод ч, Азид ч үер ус, байгалийн гамшиг болж байна. Олон улсын томоохон нислэгүүд саатаж, буух будалгүй эргэж байна. Тэгэхэд бид япончуудыг Тавантолгойд оруулаад, оронд нь дэлхийн хамгийн том нисэх буудлыг Налайхад байгуулья, түүнийгээ гаднын том Аэропортуудад 20-30 жилээр түрээслүүлье. Эндээс хэдэн хүн ажлын байртай болох вэ, улсад хичнээн хэмжээний татвар түрээс төлөх вэ. Солонгосчуудыг Тавантолгой руу оруулаад тэдний хөнгөн үйлдвэрүүдийг оруулж ирье. Америкчуудаар Багануурт 5000 Мгвт-ын хүчин чадалтай цахилгаан станц, хятадуудаар 200 мянган айлын орон сууц бариулья л даа. Ингэж байж улс хөгжинө.

Чи цаад цонхоороо хар даа. Хотын төв талбай дээр яагаад Чингисийн хөшөө, Сүхбаатарын хөшөөг зэрэг байрлуулж байгаа юм. Чингисийн талбай юм уу, Сүхбаатарын талбай юм уу. Эсвэл “Чингис VS Сүхбаатарын талбай” гэж нэрлэх үү. Ийм хөгийн юм хийдгээ болих хэрэгтэй шүү дээ. Түүн шиг өргөн, нарийн хоёр төмөр зам тавина гэж яриад байна. Тийм юм байдаггүй юм. Тиймээс оросуудыг Тавантолгой руу оруулаад, оронд нь тэднээр өргөн төмөр замаа тавиулж, бүх аймгуудыг төмөр замаар холбох хэрэгтэй. Тэгж байж байгалийн баялаг чинь орж ирнэ, боловсруулах үйлдвэрүүд чинь ажиллана. Харамсалтай нь тийм бодлого энэ төрд алга. Хий хоосон л тоо яриад байна.

-Гэхдээ та энэ саналаа дэмжүүлэхийн тулд юу хийж байгаа юм. Зөвхөн таны хувийн байр суурь уу?  

-Бид энэ асуудлыг тодорхой түвшинд ярьж байгаа. Маргааш болох Эдийн засгийн форум дээр ч ярина. Монголд ямар үйлдвэрлэл хөгжүүлэх нь ашигтай вэ гэдэг талаар. Улс төрийн бүх намын удирдлагуудтай уулзаж, ярьж байна. МАН-ын дарга С.Батболдтой уулзсан. Н.Энхбаяртай уулзаж байна. Ардчилсан намын даргатай ч уулзана.

Б.СЭМҮҮН

news