Гадаах зогсоол машинаар дүүрч, нэг давхрын хүлээлгийн танхимд хүмүүс олноор ирсэн байлаа. Энэ үед Сөүл-Улаанбаатар, Бээжин-Улаанбаатарын нислэгүүд буув. Арван минутын дараа буюу 03.10 цагт Токио-Улаанбаатарын нислэг газардсан юм. Токио хотын “Нарита” нисэх онгоцны буудлаас МИАТ компанийн онгоцонд 162 хүн ирсний 11 нь гадаадын иргэн, найм нь бага насны хүүхэд, бусад нь насанд хүрсэн монгол иргэд байв.

Зорчигчдын олонх нь газар хөдлөлт бага мэдрэгдсэн Токио, Чиба, Осака хотуудаас ирсэн гэцгээж байлаа. Тэдний ярьж буйгаар далайн эргийн хотуудаас бусад газар гамшгийн хэмжээнд хүрсэн зүйлгүй, байдал тайван, харин газар хөдлөлт, дэлбэрэлт болсон зүүн хойд хэсгийн мужуудад нөхцөл байдал хүнд байгаа гэх мэдээлэл өгч байна. Эх орондоо газардсан монголчуудын 43 нь газар хөдлөлтийн улмаас саатсан эхний онгоцноос хоцорч үлдсэн иргэд бол бусад нь Японд үүссэн нөхцөл байдлаас үүдэн эх орондоо түр болон бүрмөсөн ирэхээр шийдсэн иргэд байлаа. Тэдний дунд айж сандарсан, түгшсэн хүн харагдсангүй. Зорчигчдыг нисэх буудлаас гарах үед хэд хэдэн хүнтэй уулзаж, газар дээрх нөхцөл байдал болоод монголчуудад ямар хүндрэл бэрхшээл тулгарч байгаа талаар тодруулав. Токио хотод хэлний бэлтгэлд сурдаг н.Наранбаатар бидэнд “Токио хотод худалдаа үйлчилгээний газрууд хэвийн ажиллаж байна. Миний хувьд онгоц нисэхээс дөрвөн цагийн өмнө гэнэтийн шийдвэр гаргаад ирсэн. Аюултай бүсэд байгаа хүмүүст түгшүүртэй байгаа нь гарцаагүй. Гэхдээ Японы ихэнх хотод нөхцөл байдал харьцангуй тайван байгаа учир айж сандрах нь бага байна. Энэ талаарх мэдээллийг монголд хэрхэн дамжуулж байгааг мэдэхгүй юм. Японы телевизээр бол ард иргэдээ тайван байхыг сануулсан мэдээллийг эрх баригчдын зүгээс байнга өгч байгаа” гэсэн мэдээлэл өглөө.

Газар хөдлөлт бага мэдрэгдсэн хот, Нарита олон улсын нисэх онгоцны буудал хооронд метро явж байгаа ч цаг хугацаа алдаж байгаа гэнэ. Галт тэргээр нэг цаг явдаг байсан бол, одоо гурван цаг зарцуулж байгаа тухай зорчигчид ярьж байна.
Гамшгийн бүсэд хорогдож байгаа хэдэн мянган хүн бий. Харин Сендай хотод хэдэн монгол иргэн байгаа талаар албан ёсны мэдээлэл алга байна. Японоос эх орондоо ирсэн иргэдийн ярьж буйгаар гамшгийн бүсэд байгаа иргэд олон хүний багтаамжтай газруудад олноороо хорогдож байгаа тул ус, хоол хүнсээр гачигдаж буй гэнэ. Газар хөдлөлт, цунами, дэлбэрэлт болсон газруудын хүнсний дэлгүүрийн хүнс дуусч, гэрэл цахилгаан, цэвэр ус тасарчээ. Сукуга хотоос ирсэн нэгэн иргэний өгсөн мэдээллээр Японы орон нутгийн телевизүүд хорогдох байранд хоол хүнсээ хувааж хэрэглэх, далайн эргийн ойролцоо ойртохгүй байхыг анхааруулсан байна. Ингээд Токио-Улаанбаатарын нислэгээр ирсэн монгол иргэдийн яриаг хүргэе.

Чиба хотоос ирсэн иргэн Энхээ:

-Далайн эргийн газраар л ноцтой байдал үүсээд байгаа болохоос бусад газраас харьцангуй гайгүй байгаа. Газар хөдлөлтийн чичиргээ бол ихэнх хотод мэдрэгдэж байгаа. Харин монголд байгаа мэдээллээр тэр чигтээ сүйрч байгаа мэт мэдээлэл гарч байгаа гэж сонслоо. Японд байгаа хүмүүсийн ар гэрийнхэн санаа нь их зовсон байдалтай хүүхдүүдтэйгээ холбогдож, хурдан ирэхийг шаардаж байна лээ. Монгол Улсын засгийн газраас томилогдсон ажлын хэсгийнхэнд хандаж хэлэхэд Японд байгаа хүмүүсийнхээ тоог хурдан гаргаач ээ. Гаргаж ядаад байх зүйл байхгүй шүү дээ.

Сендай хотоос ирсэн Б.Мягмарсүрэн:

Сендай хот руу хүрэх бүх хурдны зам эвдэрч гэмтсэн учир тэнд байгаа иргээд өөрсдөө Токиод ирэх боломжгүй . Гагцхүү онгоцоор иргэдээ авах арга зам байгаа юм. Тэнд байгаа зарим хүнтэй холбогдоход онгоц явуулж, эндээс аваачээ гэх хүсэлт хэлж байсан. Миний хувьд хоёр талдаа тасалбар авсан, дээрээс нь газар хөдлөхөөс өмнө Токио руу явсан болохоор машинаар ирж чадсан.

Золбаяр:

-Газар хөдлөлт болсон газраас амжиж гарч чадсан. 70 км газрыг хоёр өдөр явж тууллаа. Миний буцах хугацаа болоогүй ч билетээ үзүүлээд явж байна гэсэн мэдээлэл аваад шууд нисэх буудал руу явсан. Биднийг замдаа явж байхад биеийн тамирын том заалуудад олноор нь оруулж байсан. Нэг ёсондоо хорогдох байр юм уу даа.

Иргэд ийнхүү ярьж байна. МИАТ компанийн Токио-Улаанбаатарын чиглэлийн онгоц “Чингис хаан” онгоцны буудалд газардсанаас 30-40 минутын дараа 162 зорчигч онгоцноос бууж дууссан юм. Энэ үеэр Токиогоос ирэхээр бүртгүүлсэн хоёр ч хүн ирээгүй байна гэх мэдээлэл тархаад байв. Энэ талаар МИАТ компанийн албаны эх сурвалжаас тодруулахыг хүссэн боловч хариулт өгөх хүн олдоогүй юм. Харин хувиарт нислэгээр зорчин ирээгүй эмэгтэйн төрсөн эгч Л.Наранчимэг “Миний дүү Токиод найман жил амьдарсан. Өчигдөр 06.00 цагаас хойш холбоо барьж чадсангүй. Одоогоор МИАТ компанийн холбогдох албанынхнаас тодруулах гэсэн боловч хариулт өгөх хүн алга. Урд өдөр нь дүүтэйгээ холбогдоход бие тааруу, толгой хүчтэй өвдөж байна гэж хэлсэн” хэмээн бидэнд ярьсан юм.

Мөн энэ үеэр Токиод байдаг охин нь ирсэнгүй гэх эмэгтэйтэй таарав. Тэрбээр ихэд сандарсан байдалтай ярилцлага өгөхөөс татгалзсан юм. Түүний охин эхний ээлжний онгоцонд суусан хүмүүсийн нэрсийн жагсаалтад нэр нь багтсан байжээ. Тэрбээр МИАТ компанийн бүртгэлийн ажилтнаас лавлахад охиных нь нэр зорчигчдын дунд алга гэсэн хариулт сонссон юм.

Зорчигчдын ярьж буйгаар газар хөдлөлт, цунами, цахилгаан станцын дэлбэрэлтэд өртсөн Сендай хот, Мияга, Фукушима, Ибараки, Иватте мужуудад л нөхцөл байдал хүнд байгаа. Харин бусад хотуудад газар хөдлөлтийн чичиргээ мэдрэгдэж, үйлчилгээ, зам харилцаа хэвийн байгаа гэж Японы хот хотоос ирсэн монголчууд ярьж байна. Иргэдийн дунд Токио дахь монголын элчин сайдын яамтай холбоотой гомдол олонтаа гарч байв. Гамшгийн бүсэд тусламж хүсч элчин сайдын яамтай иргэд холбоо тогтоохыг оролдож байгаа ч автомат хариулагч ажиллаж, “Ажлын өдөр залгана уу” гэсэн хариу өгч байгаад ихэд бухидсан гэцгээж байлаа. Мөн японд байгаа монголчууд хаана, хэрхэн хандахаа мэдэхгүй оюутны холбоо, найз нөхөд, танил талаараа дамжуулан мэдээлэл солилцох төдий байсан тухайгаа хэлж байв. Нөгөө талаар Монголд газар хөдлөлт, цунами, дэлбэрэлтийг хэтэрхий дэвэргэн мэдээлж, Японд байгаа хүмүүсийг түгшээж байна гэх шүүмжлэл ч сонсогдсон юм. Токио хотын Нарита олон улсын нисэх онгоцны буудал дээр дараагийн онгоцонд амжихаар 100 гаруй хүн хүлээж буй. Хамгийн гол нь аюултай бүсэд байгаа иргэдээ хэрхэн аврах вэ гэх асуудал бүрхэг хэвээр байна. Учир нь хаана, хэдэн монгол хүн хорогдож байгааг албан ёсоор тогтоож дуусаагүй байна.

С.Отгон Н.Түвшин

Японоос ирсэн монголчууд юу ярив
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Эх орноо голж хїний нутаг руу явсан хїмїїс ичихгїй аврал эрж байх юм аа. Монгол їнэн миа байнаа гадаадад гарч амьдарна гэж явсан хїмїїс шїї дээ

2011-03-14 | 12:46:51 | 182.160.13.160 |

Зочин
энэ тэнэг юу бичээд байгаа юм.Ямар ч утгагүй сэтгэгдэл бичих юм

2011-03-14 | 09:24:42 | 180.235.181.44 |

Зочин
муу лалрууд монголчуудийг доромжилж зодог шуудаг омсгож гомонуудаараа доромжилуулаад бсийн ухэлээ ирж бж хохи н тэнд бга монголчууд л хайран бн ядаж бхад монголоор дуууууууууууууууууууууууууурэн хужа бугдийг н алийлда мглчуудаа тэдний хоолийг идэж бсан их а. яж бга бол ккк

2011-03-14 | 08:42:06 | 122.201.18.129 |

Мэдээ
Гадаад мэдээ
Видео