Тэрбээр бүжгийн уян налархай, эвсэг хөдөлгөөн цоглог хэмнэлттэй өвөрмөц дуугаараа үзэгч сонсогчдыг хэдийнээ байлдан дагуулж чадсан билээ. Ингээд энэ удаагийнхаа “Нууцгүй” буландаа өөрийн гэсэн стиль имижээрээ бусдаасаа ялгарч чаддаг дуучин Соког урьж, үзэл бодлынх нь талаар дэлгэрэнгүй ярилцсан юм.

-Таны бага насны талаар яриагаа эхлье. Бүжигчин байсан гэж сонссон юм байна?

-Бага нас маань Хэнтий аймгийн Бор-Өндөр хотод өнгөрсөн. Тэнд Орос хүүхдүүдтэй тоглож, найзлан өсч хүмүүжсэндээ баярлаж явдаг. Дуучин болох миний багын мөрөөдөл байлаа. Бүжиг бол яахав. Дуучин хүний эзэмших ёстой чадваруудын нэг юм. Тэр утгаар нь хөдөлгөөний эвслээ сайжруулж, нэмэгдүүлэх үүднээс бүжгийн багшийн мэргэжлийг 2003 онд, дараа нь дуучны мэргэжлийг эзэмшсэн.

Одоо энэ хоёр мэргэжлийнхээ үр дүнг харахаар хөдөлмөрлөж явна. Дуугаа амьдруулахын тудд бүжиглэдэг. Миний сонгосон стиль имидж бол “Рор danсе” учраас бүжгийн хөдөлгөөнөөр дууныхаа утга санааг илэрхийлж гаргахыг хичээдэг.

-Урлагийн тайз, энгийн амьдрал дээрх Соко хоёрын дунд хэр ялгаа байдаг вэ?
-Би уран бүтээлч хүнийхээ хувьд би тайзан дээр юу чаддагаа харуулахыг хүсдэг. Харин амьдрал дээр аль болох олны анхаарал татахгүй, энгийн байхыг хичээдэг. Олны дунд явахдаа ч гэсэн даруухан байхыг боддог.

-Эмэгтэй хүн бүрт байх ёстой эрхэм чанар гэвэл…

-Эмэгтэй хүн гэлтгүй ер нь бүх хүн сайхан сэтгэлтэй, аливаа асуудлыг бүх талаас нь эргэцүүлэн, тунгаан бодож, зөв шийдвэр гаргадаг байх ёстой гэж бодцог. Тэр тусмаа гэр бүлийн амьдрал, хайр сэтгэлийн асуудалд нарийн нандин ухаанаар ханддаг байх хэрэгтэй юм болов уу. Ер нь амьдралыг эмэгтэй хүний чамбай ухаан чимдэг гэдэг шүү дээ.

-Амьдрал араншинтай юу?
-Байгаа. Амьдрал бол тэмцэх тэмцлийн талбар шүү дээ. Араншингаа янз янзаар л гаргана.Зовлон, жаргал гээд аль аль нь бий. Аливааг болж бүтэхгүй байна гээд хемсгөө зангидаж, уурлаж бухимдаад байвал амьдралаа аз жаргалгүй, уйтгартай там болгож хувиргана. Тиймээс аливаа зүйлд цухалдаж, бачимдахаасаа илүү тайван, уужуу ухаанаар ханддаг байвал зүгээр. Уурыг чинь хүргэж байгаа хүнийг элдэв үгээр доромжлохын оронд өөрт нь хэрэг болох ухаантай үг хэлдэг байх хэрэгтэй.

-Өөрөө хэр ууртай вэ?
-Би өөрийгөө их тайван хүн гэж боддог. Гэхдээ хүн л юм хойно уурлаж, бухимдах үе гарч л таарна. Тэглээ гээд өөрийгөө их нервтүүлээд байдаггүй. Асуудалд уурлаж хандахаасаа өмнө шийдвэрлэх гарцыг эхлээд өөрөөсөө хайдаг даа.

-Гоо сайханг юу илтгэх вэ?
-Гоё сайханг царай илтгэхгүй гэж боддог. Хэрэв үзэсгэлэн төгс зүс, царайтай байлаа гээд ухаан заяагаагүй бол түүнийг хэн ч сайхан гэж хэлэхгүй биз дээ. Би бурханд итгэдэг, хаир ивээлийг нь хүртэхийг хүсдэг. Тиймдээ ч гоо сайхны гол утга учрыг дотоод сэтгэлийн гэрэл гэгээнээс эрж хайдаг.

-Гэхдээ одоогийн залуусын харилцаанд царай зүс чухал болсон юм шиг ээ. Энэ тал дээр ямар бодолтой явдаг вэ?

-Зарим нэгний хувьд тийм байх. Хааяа гадуур явж байхад царайлаг залуу, харц булаахаар бус, энгийн нэгэн эмэгтэйтэй аз жаргалтайгаар инээлдэн, хөтлөлцөөд явж байгаа харагддаг. Магадгүй тэр залуу, бүсгүйнхээ дотоод сэтгэлийн сайханд татагдсан байж болох. Аливааг өөдрөг, сайн талаас нь боддог хүн сэтгэл сайхантай байдаг гэдэгтэй санал нийлдэг. Мөн залуус маань царай зүс гэлтгүй сүүлийн үед боловсролдоо нэлээд анхаардаг болсон ажиглагддаг.

-Танд ямар эрчүүд таалагддаг вэ?

-Эр хүн амьдралын ухаантай, мэдрэмжтэй байх ёстой. Миний хувьд хамт байхад хөгжилтэй, ухаалаг, соёлтой, эмэгтэй хүнийг хүндэлж чаддаг эрчүүд таалагддаг.

-Эрчүүдийг гадаад өнгө үзэмжийг нь чухалчилж харьцдаг уу? Эсвэл…
-Аливаад хандаж байгаа хандлага, хүнтэй харилцаж байгаа харилцаагаар нь ямар хүн болохыг дүгнэдэг.

-Найз залуутай юу?
-Байгаа.

-Ямар занд нь илүү татагдсан бэ?

-Хүнийг сорьж сонжин, хардаж сэрдээд байдаггүй энгийн зан нь таалагдсан. Найзын минь бүх зүйл таалагддаг болохоор би сэтгэл хангалуун байдаг. Урлагийн хүний амжилт, бүтээл ар гэрийнх нь хүмүүсийн ойлгож, дэмждэг сэтгэлтэй холбоотой. Түүний адил миний уран бүтээлийн ард найз залуугийн минь сэтгэл, тус дэм, үүрэг, оролцоо их байдаг.

-Таны хувьд хайр гэж юу вэ?

-Хайр хүнийг хөдөлгөгч хүч, энерги юм болов уу даа. Хүн зүрх сэтгэлээрээ тэжээгдэж амьдардаг шүү дээ. Тийм болохоор хүний амьдралын гоё гэгээлэг, өөдрөг зүйл нь хайр сэтгэлд байдаг. Мөн хязгааргүй ойлголт, маш олон талтай. Тэр дундаас янаг хосуудын хаир дурлал хамгийн хүчтэй нь. Хүнийг бүрэн өөрчлөн, үхэл,хорьж болдоггүй болохоор жолоогүй гэж ярьдаг даа. Хааяа нэг төрсөн сэтгэлийн хөөрлөө ухаанаараа зохицуулахыг хичээдэг.

-Хэр дурламтгай вэ?
-Би нэг их дурламтгай биш ээ. (инээв.сур)

-Цаг хугацааг юутай зүйрлэх бол?
-Салхи мэт үл гүйцэгдэх хоромхон агшин. Надад цаг хугацаа алтнаас илүү үнэтэй санагддаг. “Алдсан цаг хугацаа эргэж олдохгүй” гэдэг үг байдаг даа. Үүнийг үнэн үг гэж боддог .

-Сексийн талаар ямар бодолтой явдаг вэ?
-Хүний амьдралд бусадтай хуваалцаж, дэлгэж болохгүй нандин зүйл гэж байдаг. Зарим хүмүүс үүнийг хэрэгцээ мэтээр өрөөсгөл ойлгодог. Би хувьдаа хайртай хосууд нэг нэгэндээ ариун байлгах нандин зүйл гэж боддог.

-Урлагийн хүмүүс их сэтгэлийн хөдөлгөөнтэй байдаг гэлцдэг. Таны хувьд хэр их сэтгэлийн хөдлөлтэй вэ?
-Бусадтай л адилхан хүн учраас баярлаж, гомдох олон зүйл тохиолддог. Хүн гэдэг амьтан өөртөө аль болох баяр баясгаланг авч амьдрах хэрэгтэй юм шиг санагддаг. Наад зах нь ,өглөө эрт босоод цэлмэг тэнгэр хараад өөртөө сайхан энерги авах чинь жаргал юм даа.

-Сүүлийн үеийн охидын хамтлаг секси имижийг уран бүтээл болоод өөрийн хэв маягтаа их тусгадаг болжээ. Та өөрийгөө ямар имижтэй гэж тодорхойлох вэ?
-Имиж болгон секси байх албагүй. Гэхдээ ямар ч эмэгтэй хүн өөрийнхөө гоо сайхныг илүү тод харагдуулахын тулд тодорхой хэмжээгээр секси төрхтэй байх ёстой. Гэхдээ нөгөө талаар би секси имижтэй байх ёстой гээд хэмжээгээ алдвал утгагүй л дээ. Миний хувьд анхнаасаа өөрийн имиж, дүр төрхтэй байсан. Хүн бүхэн давтагдашгүй гэдэг.

-Тэгвэл ямар бүсгүйг секси төрхтэй гэх бол?. Та өөрийгөө тэдний тоонд зүй ёсоор оруулж чадах уу?
-Чадна. Секси гэхээр л заавал нүцгэн байхдаа биш шүү дээ. Тэгэхээр нууцлаг хэрнээ секси харагддаг хүн ч байдаг. Эмэгтэйлэг чанараа элдэв хэтрүүлэггүйгээр гаргаж чадвал секси харагдаж чадна.

-Сүүлийн үед охид бүсгүйчүүд маань материаллаг зүйлийг илүүд үздэг болжээ. Энэ тал дээр таны бодол юу вэ?
-Тэр бүхэн чинь хуурамч шүү дээ. Жинхэнэ амьдралын утга учир, сайн сайхан бүхэн хайр дээр тогтдог. Хүн хайраас маш их аз жаргал, сайхан энерги, мэдрэмжийг авдаг.

-Мөнгийг юунд хамгийн их зарцуулдаг вэ?

-Өөрт хэрэгцээтэй зүйлдээ л зөв зарцуулахыг хичээдэг. Ер нь номын дэлгүүр ороод шинэ ном худалдан авч уншдаг. Залуу хүмүүс ном уншиж байх хэрэгтэй.

-Хэр төлөвлөгөөтэй амьдардаг вэ?
-Төлөвлөж амьдрах нь зөв. Зан араншингаа сайн танилгүй гэр бүл болчихоод хоёр тийш болохоор хүүхэд өнчрөөд үлддэг. Тэгэхээр гэр бүл болох эсэхээ харилцан сайн ярилцаж, үүрэг, хариуцлагаа ухамсарлаж байж, хамтын амьдралд хөл тавих хэрэгтэй. Нэгэндээ үл итгэдэг байвал ирээдүйн амьдрал нь ч гэсэн баталгаагүй байна шүү дээ.

-Ирээдүйгээ ямраар төсөөлж байна вэ?
-Эрүүл саруул, элэг бүтэн, аз жаргалтай, өнөр өтгөн, сэтгэл дүүрэн, сайхан амьдрал сэтгэлд минь илүү төсөөлөгдөж байна. Хүн амьдарч байгаа хором, мөч бүхнээ аз жаргалтай байлгаж чадвал тэр жаргал юм. Түүнээс биш, далайн эрэг дээр үнэтэй орд харш барьчихаад, тансаг машин унаад явахыг жаргал гэж хэлэхгүй ээ. Энэ бүхэн зөвхөн амьдралын баталгаа, хэрэглээ. Бодоод байхад сэтгэлдээ ямар нэгэн зовлон, харамсал тээж амьдрахгүй байна гэдэг амар амгалан юм шиг ээ.

-Ярилцсанд баярлалаа.

Эх сурвалж: “Хүмүүсийн амьдрал”