Сүхбаатар дүүргийн VI хорооны нутаг дахь 47 дугаар байрны 100 гаруй иргэдийн гэр орон нь аюултай бүс болжээ. Учир нь ойролцоох байр, аж ахуйн нэгжүүдийг дулаанаар хангадаг халаалтын цогц төхөөрөмж (ЦТП)-ийн байр, газрыг төрийн албаныхан хууль бусаар “Гачуурт” компанийн захирал Л.Чинбатад өгчээ. Улмаар ЦТП-ийн зарим тоног төхөөрөмжийг 47 дугаар байрны хонгилд байрлуулснаар орон сууц нэлэнхүйдээ хөгц, мөөгөнцөрт баригдаж, өвөлдөө цан савсаж байх болжээ. Муугаар төсөөлөхөд, зориулалтын бус газарт, стандарт зөрчиж байрлуулсан ЦТП нэг өдөр дэлбэрэхэд 100 гаруй иргэн гэр оронгүй болох юм. Үүнээс гадна ойр орчмын арав гаруй орон сууц, цэцэрлэг сургууль хөлдөх эрсдэлтэй аж. Гэвч тус газрыг эзэмшсэн гэх нэрийдлээр “Гачуурт” компанийн захирал Л.Чинбат ЦТП байрлаж байсан газрыг ухаж, эсэргүүцсэн иргэдийг хүчээр тарааж байсан удаатай. Энэ талаар нэхэн сурвалжлахаар тус газрыг зорилоо. Төрийн ордны хойд тал, арктай хуучны байрнуудын дунд шахуу барилга барьж машин бүү хэл хүн чөлөөтэй холхих зайгүй шахам болжээ. ЦТП-г байрлуулж байсан нэг давхар байшингийн буурин дээр том нүх ухжээ. Өнгөрсөн жилээс хойш нүхний хэмжээ ихэсч байгааг орчны оршин суугчид ярьж байсан. Оршин суугчид болон Л.Чинбат нарын хоорондох газрын маргааныг шүүх өнгөрсөн жил эцэслэн шийджээ. Гэвч Л.Чинбат шүүхийн шийдвэрийг биелүүлэхгүй, харин ч хэзээ мөдгүй хууль бусаар барилга барихаар бэлтгэж байгаа аж. Шүүхийн шийдвэрийг төрийн албаныхан хэрхэн үнэгүйдүүлж, иргэдийг хохироосоор байгааг хүргэе.

Л.Чинбатын хаяан дахь газраасаа хумсалсан түүх

Л.Чинбат 2002 онд ЦТП-ийн ойролцоо 222.3 метр.кв барилгыг худалдаж авчээ. Үүнээс хоёр жилийн дараа ЦТП-ийн дэргэд агуулах, гараашийн 88 метр.кв талбайтай обьектыг мөн худалдаж авчээ. Ингэхдээ хувьчлагдаагүй үлдсэн, нийслэлийн өмч болох 67.4 газрыг хумсалж эхэлсэн байна. Нийслэлийн Засаг дарга Л.Чинбатад газар эзэмшүүлэх шийдвэр гаргахдаа нийслэлийн өмч болох 67.4 метр.кв газрыг оролцуулан өгчээ. Үүнээс болж ЦТП-г хаана байрлуулах нь тодорхойгүй болсон байна. Л.Чинбат дээрх газрыг өөртөө авахын тулд 2007 онд ЦТП-г суурилуулж байсан барилгыг VI хорооны орон сууц ашиглалтын “Опен хаус” компанийн захирал асан Д.Дорждагваас 55 сая төгрөгөөр худалдаж авчээ. Л.Чинбат барихаар төлөвлөж буй 14 давхар орон сууцны нэгдүгээр давхарт ЦТП-ийн тоног төхөөрөмжийг суурилуулах талаар Д.Дорждагватай тохиролцож, түр зуур 47 дугаар байрны хонгилд нууцаар оруулсан аж. Хонгилд бүх тоног төхөөрөмж багтаагүйгээс бол ус, уур алдаж иргэдийн амар тайван байдал, эрүүл мэндэд сөргөөр нөлөөлөх болжээ. Оршин суугчид эрхээ хамгаалуулахын тулд 2004 оноос хойш мэргэжлийн байгууллагуудаас гадна Ерөнхий сайд асан С.Баярт хоёр удаа, Ерөнхий сайд Сү.Батболдод гурван удаа хандаж, тусламж хүсчээ. Засгийн газраас нийслэлийн Засаг дарга Г.Мөнхбаярт асуудлыг шийдэж өгөхийг даалгахад “ЦТП-ийн хуучин барилгыг иж бүрэн засварлах зураг гарган, 47 дугаар байрны хонгилоос төхөөрөмжүүдийг нүүлгэх болно” гэсэн хариуг өгсөн ч өнөөг хүртэл биелүүлээгүй баримт байна.

Шүүх нийслэлийн өмчийн хэсэгт хамаарах газрыг Л.Чинбат буцааж өгөх нь зөв гэж шийджээ. Гэвч…

Нийслэлийн захиргааны хэргийн шүүх дээрх маргааныг 2010 оны нэгдүгээр сарын 22-нд хэлэлцэж, шийдвэрээ гаргажээ. Шүүх “ЦТП байрлаж байсан газрыг Л.Чинбатад эзэмшүүлснээр дулааны төхөөрөмжийг байрлуулах боломжгүй болж оршин суугчдын эрх зөрчигдөж байна” гээд нийслэлийн өмчийн газрыг буцаан олгох, ЦТП-г суурилуулах барилгын суурь, ашиглахад шаардлагатай орц гарцын хэмжээг тогтоож, сарын дотор дахин акт гаргахыг нийслэлийн Засаг даргад даалгажээ. Гэвч шүүхийн шийдвэрийг нийслэлийн Засаг дарга биелүүлсэнгүй. Бүр нийслэлийн газрын албаны дарга Ц.Сандуйтай хамтран нүглийн нүдийг гурилаар хуурахын үлгэрээр ажилласан гэж оршин суугчид ярьж байсан юм. Тодруулбал, шүүхийн шийдвэр гарснаас таван сарын дараа нийслэлийн Засаг дарга Г.Мөнхбаяр Л.Чинбатад газар эзэмшүүлсэн шийдвэрийг хүчингүй болгох тухай захирамжид гарын үсэг зуржээ. Гэтэл хавсралтад нь Л.Чинбатад үйлчилгээний зориулалттай газар эзэмшүүлсэн шийдвэрээ хэвээр үлдээсэн баримт оруулсан байна. Бүр Нийслэлийн газрын албаны дарга Ц.Сандуй Л.Чинбатад хамаарах газрын кадастрын зураг гаргаж өгчээ. Түүнээс хойш Л.Чинбат дээрх кадастрын зургийг хууль ёсных гэж оршин суугчдыг даапаалж, барилга барих нүхээ томруулсаар байгаа гэнэ.

АТГ: Авлигаа буцааж өгсөн, асуудал шийдэгдлээ

“Опен хаус” компанийн захирал нийслэлийн өмчийг дур мэдэн 55 сая төгрөгөөр Л.Чинбатад зарсан талаар дээр дурдсан. Газрын маргаанаас болж эрх нь зөрчигдөж буй “Эрдэм” сууц өмчлөгчдийн холбооны удирдах зөвлөлийн дарга Н.Бумбар дээрх асуудлыг шалгуулахаар Авлигатай тэмцэх газар (АТГ)-д ханджээ. Тус компанийн захирал Д.Дорждагва Л.Чинбатаас авсан 55 сая төгрөгөө хувьдаа авсан баримтыг АТГ-т гаргаж өгчээ. АТГ-ын мөрдөн байцаагч Л.Сүх-Очир мэдээллийн дагуу Д.Дорждагвад холбогдох эрүүгийн хэрэг үүсгэсэн гэдэг. Гэтэл Л.Сүх-Очир уржигдар гомдол гаргагчид “Таны өргөдлийг судаллаа. Хэрэгт холбогдогчдод Эрүүгийн хуулийн 256.2, 150.3-т зааснаар хэрэг үүсгэсэн. Гэтэл Д.Дорждагва 55 сая төгрөгөө Л.Чинбатад буцаагаад өгчихсөн байна. Асуудал шийдэгдлээ” гэсэн хариу өгчээ. Н.Бумбар энэ талаар “Би хэн нэгэнд мөнгө өгүүлэх гэж АТГ-т хандаггүй. АТГ авлигыг зогсоох биш зохицуулах гэж ажилладаг болсон юмуу, ойлгохгүй байна. Ер нь хууль биелүүлэх үүрэгтэй төрийн албаныхан Л.Чинбатын “албат” шиг ажиллаж иргэдийг хохироосоор байна” гэсэн юм.

Зам таглаж ЦТП байрлуулна гэв үү, Засаг дарга аа

Нийслэлийн ИТХ-ын шийдвэр гаргаж 120 сая төгрөгөөр Сүхбаатар дүүргийн VI хорооны нутаг, “Бага тойруу” дахь байрнуудыг дулаанаар хангах тоног төхөөрөмж байрлуулах байгууламж бариулахаар болжээ. Бүр уг барилгыг өнгөрсөн оны есдүгээр сард дуусгаж, тоног төхөөрөмжийг шилжүүлэх шийдвэр гаргажээ. Энэ дагуу гүйцэтгэгчээр шалгарсан компани ажлаа эхлэх гэтэл Л.Чинбат хүчээр саатуулж, шүүхээр буцааж өгөхийг даалгасан газраа өөрийнх мэтээр аашилсан байна. Л.Чинбатын хууль бус үйлдлийг дэмжиж байгаа мэт Нийслэлийн газрын алба, нийслэлийн Засаг дарга ЦТП-г үндсэн газар дээр нь биш зам таглаж барих зураг гаргасан байна. Үүнээс болж гүйцэтгэгч компани ажлаа хийж чадахгүй, иргэд ус, чийг болсон байранд амьдарсаар байгаа аж.

Л.Чинбат тоног төхөөрөмжийг барилгынхаа доор байрлуулж өмчлөх төлөвлөгөөтэй гэнэ

Л.Чинбат өөрийн эзэмшлийн гэх газартаа 14 даврах барилга барихаар төлөвлөж буй аж. Улмаар барилгынхаа нэг давхарт байрлуулахаар хөөцөлдөж буй аж. Нийслэлийн өмч хувь хүний мэдэлд очвол ойролцоох байрны дулаан хангамж алдагдана гэж мэргэжилтнүүд оршин суугчдад хэлсэн аж. Иргэд эсэргүүцэж байгаа ч Л.Чинбат өнөө, маргаашгүй барилгын ажлаа эхлүүлэхээр бэлтгэж байгааг оршин суугчид хэлсэн юм. Барилгын ажил эхлэхэд хүрвэл төрийн байгууллагууд шүүхийн шийдвэрийг хэрхэн биелүүлэхийг эргэн сурвалжлах болно.

"Мэдээ мн"

Шүүхээс давсан мэдэлтэй Л.Чинбатын “албат” төрийн албаныхан иргэдийг хохироосоор байна гэв
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Чинбат гжэж балиар амитан худлаа шт

2011-04-01 | 19:22:00 | 182.160.28.233 |

Зочин
Хэн хэдээр худалдсаныг олход хэцүү байгаа байх л даа.Улаанбаатрын газрыг зарчихсан гуравхан хүн байхад шоронд аваачаад хийчихэж чадахгүй байж.

2011-04-01 | 18:15:09 | 66.218.47.209 |

Мэдээ
Гадаад мэдээ
Видео