Женнифер Энистон: Бүгд л намайг жирэмсэн болохыг хүсэх юм

2011-04-02

Холливудын жүжигчин бүсгүй Женнифер Энистоны тухай дурссан материал бүрт шахуу

"Анжелина Жолид сайхан нөхөр Брэд Питтээ алдсан" гэсэн тодотгол холбодог. Женнифер одоо хүртэл гэрлээгүй, бүр сүүлийн хэдэн cap найз залуугүй яваа нь ийнхүү хуучныг нь сөхөхөд хүргэдэг байх. Энистон амьдралдаа хөнгөхөн сэтгэж, хөгжилтэй байхыг илүүд үздэг. Түүний сүүлд өгсөн нэгэн ярилцлагыг хөрвүүлэн хүргэж байна.

-Таны тухай хов жив, цуу яриа тасарна гэж байхгүй юм аа. Сүүлийн үед бүр ч ихээр цуурах болж...
-Хэвлэлийнхний зохион бичлэгүүдийг би аль болох уншихгүй, харахгүй байхыг эрхэмлэдэг. Гэтэл ээж маань над руу бараг өдөр бүр хэвлэлд гарсан мэдээллийг танилцуулж буй юм шиг залгаж, асуултаар булдаг. "Чи хүүхэд үрчлэх гэж байгаа юм уу?" - "Үгүй ээ, би Мексикээс хүүхэд үрчлэх гээгүй" гэх юм уу эсвэл "Чи Опрагийн шоунд орох үеэрээ гэрлэх юм уу?" - "Үгүй ээ, ээжээ. Би таныг хэвлэлд битгий итгэ гэж хэлсэн шүү дээ" гэх мэтээр бараг өдөр бүр би ээжид тайлбар хийдэг. Харамсалтай нь ээж хэвлэлийн үг үсэг бүрийг үнэн гэж бодчихоод, лавлаад байдаг юм.

Харин би энгийн л амьдралаар амьдарсаар л явна. Амьдралаас аль болох таашаал амсахыг л хичээдэг. Магадгүй хошин шогийн мэдрэмж минь намайг хөнгөн сэтгэж, хөгжилтэй амьдрахад нөлөөлдөг байх. Бүгд л намайг гэр бүлтэй болж, жирэмсэн болохыг харахыг хүсэх юм. Харин би хүмүүст хандан "Хүмүүс ээ, тайван бай. Та бүхний хүссэн бүхэн заавал биелнэ ээ!" гэж хашгирмаар санагддаг (инээв).

-"Миний эхнэрийн дүрд тоглооч" хэмээх шинэ кинонд та хайртай хүндээ анзаарагддаггүй хамтран ажиллах бүсгүйн дүрийг бүтээсэн. Ийм дүрд тоглосноор дахиад олны хэл амны бай болно гэж айсангүй юу?
-Дүрээ сонгохдоо энэ дүрд тогловол хүмүүс намайг шоолно гэж бодвол жинхэнэ тэнэг амьтан болно биз дээ. Тийм ээ, хүмүүс намайг шоолж, доог тохуу болгож их ярьдгийг би мэднэ. Заримдаа яагаад тэгдгийг нь ойлгодог, заримдаа ойлгодоггүй. Харин би өөрөө амьдралыг хөгжилтэй өнцгөөс нь харахыг хичээдэг. Инээд бол эм гэж хэлэх нь хэтэрхий хуучинсаг байх. Гэхдээ ямар ч байсан инээд бол таагүй байдлаас гарах боломж олгодог. Энэ кинонд миний бүтээсэн бүсгүй гэр бүлгүй хирнээ хоёр хүүхэдтэй. Энэ чинь бас амжилт шүү дээ! (инээв).

-Та жинхэнэ хайр бай-даг гэдэгт итгэдэг үү?
-Хамтдаа насаараа амьдарч, хамтдаа нэг өдөр үхэх агуу хайр уу. Та надаар тоглоогүй биз дээ. Надаас ийм юм асуугаад яахав дээ. Уучлаарай, танд миний хэлсэн үг бүдүүлэг сонсогдсон бол. Би хагас жилийн турш нэг ч залуутай уулзаагүй болохоороо ингээд хэлчихлээ. Жерард Батлер, Жон Мэйертэй холбоотой мэтээр бичсэн нь оргүй цуу яриа. Батлер бол миний сайн найз. Найзаас илүү харилцаагүй.

-Та эрчүүдийг өөрийнхөө энгийн найз мэтээр ярих юм. Эрэгтэй, эмэгтэй хоёр энгийн сайхан найзууд байж чаддаг гэдэгт итгэдэг гэж үү?
-Эрчүүдтэй найзалдаг юм чинь итгэлгүй яахав. Гэхдээ амар биш л дээ. Ялангуяа эрчүүдэд бүр ч амаргүй байх.

-Таны сүүлийн тоглосон кинонд Николь Кидман инээдмийн гэмээр дүр бүтээсэн. Николь инээдмийн дүр бүтээнэ гэдэг төсөөлөхөд бас бэрх санагдаж байсан...
-Тийм ээ, Адам Сэндлер бид хоёр Николийг энэ кинонд дүр бүтээнэ гэхэд эхэндээ гайхсан. Би урьд нь Никольтой танил байсны хувьд энгийн, хөгжилтэй хүн гэдгийг нь мэднэ л дээ. Тийм болохоор инээдтэй, хөгжилтэй дүр бүтээж чадна гэдгийг нь мэдэж байсан.

-Улаан хивсэн дээгүүр алхах, олны өмнө гарахынхаа өмнө та гоо сайхандаа ямар хугацаа зарцуулдаг вэ?
-Өө, надад таван минут л байхад хангалттай (инээв). Улаан хивсэн дээгүүр алхахын өмнөхөн жаахан сандардаг. Тэгээд бага зэрэг аз жаргал, сэтгэл хөдлөл мэдэрдэг гэвэл онох байх. Мөн театрын тайзнаа гарахад ч жаахан сандарч айдаг. Иймэрхүү айдас мөдхөн арилна гэж би найддаг шүү.

-Таныг Калифорнид байдаг харшаа зарах гэж байгааг дууллаа. Та чинь жилийн өмнө "Энэ миний мөрөөдлийн гэр" гэж ярьж байсан. Яагаад гэнэт зарах болчихов?
-Уг нь тийм. Гэхдээ нэг шөнө гэнэт бодол минь өөрчлөгдсөн. Тэр шөнө бүр унтаж чадаагүй. Би амьдралаа их энгийн болгох хэрэгтэй гэдгээ ойлгосон юм. Энгийн болгохын тулд энэ байшингаа зарах ёстой. Ганцхан надад хэтэрхий том байшин шүү дээ, үнэндээ. Ийм том байшин хэрэг ч үгүй. Харин хаа нэггээ жижигхэн, тохилог байшинд л амьдарсан нь дээр. Нью-Йорк бол бүхэнд таарсан хот. Зугаалж, бусад шиг байхад тохирсон газар. Тиймээс тэнд жижиг байшин авна даа.

-"Миний эхнэрийн дүрд тоглооч" кинонд хамтран тоглосон Адам Сэндлер таныг усны хувцастай гардаг хэсгийг хамгийн харууштай хэсэг гэж хэлсэн байсан. Үнэхээр ч таны бие сайхан харагдаж байна лээ...
-Адам их хөгжилтэй, наргианч хүн. Кино зураг авалтын үеэр бид хоёр биеэ барьж чадахгүй инээж, зураг авалтыг хэчнээн ч удаа хойшлуулж байв даа. Бид хоёр чинь уг нь мэргэжлийн хүмүүс. Зураг авалтын үеэр мэргэжлийнхэн шиг л байх ёстой. Харин галбирын тухайд бол би тусгай дасгал, хөдөлгөөн хийгээгүй, байгаагаараа байгаа минь л тэр. Дандаа л тэгж харагддаг гэж найдаад байгаа шүү дээ. Ялангуяа сүүлийн жилүүдэд дажгүй харагдаж байгаа байх аа. Өсвөр насандаа, 30 хүрээгүй байхдаа өөрийнхөө биеийг харахаар л уур хүрээд байдаг байж билээ. Харин одоо гайгүй шүү. Би бусдын адил сайн амарч унтаж аваад, өглөөдөө гүйдэг. Хамгийн гол нь өдөр бүр 20 минут гүйж, ойр зуур дасгалаа л таслахгүй хийчихдэг байхад болоод байгаа юм.

-Холливудын одод гоо сайхны мэс засал хийлгэх нь элбэг болжээ. Гоо сайхны мэс засал хийлгэснээр сайхан харагддаг гэж яагаад боддог юм бол. Өөртөө сайхан харагдах гэж хийлгэдэг юм болов уу өрөөл бусдад сайхан харагдах гэдэг юм болов уу?
-Харамсалтай нь олон хүн гоо сайхны мэс заслыг зөвхөн Холливудын одод хийлгэдэг гэж ойлгох юм. Гэтэл хаа сайгүй л үүнийг хийлгэдэг шүү дээ. Үргэлжийн залуу сайхан байх хүсэл л хүмүүсийг ийм алхам хийхэд хүргэж байгаа нь маргаангүй. Харамсалтай нь олон хүн байгалийн жам ёсоороо сайхан нас тогтож, хөгшрөхийг хүсэхгүй байна. Үүнээс болоод зарим эмэгтэй наснаасаа залуу харагдах гээд бүр наснаасаа хөгшин харагдах болчихож. Харин намайг мэс засал хийлгэх тухай ярих гэж буй бол арван жилийн дараа асуугаад нэг үзээрэй.

Р.Гэгээ