Дуучин Т.Ариунаа, С.Жавхлан нар татвар төлдөггүй оддын жагсаалтыг тэргүүлэв

2011-04-22

Урлаг, соёлынхны 80 гаруй хувь нь татвар огт өгдөггүй гэж Татварын ерөнхий газраас мэдээллээ.

Үлдсэн цөөн хэд нь орлогоо үнэн зөвөөр мэдүүлж, тоглолт, цомог, “хаагаа”-наасаа олсон хэдээсээ зохих хувийг улсдаа өгдөг юм байна.

Гэхдээ урлагийнхан рок поп, нийтийн дуу, хошин шог, хамтлаг гэдгээсээ шалтгаалж татвар төлөх нь харилцан адилгүй. Хошин шогийн хамтлаг, продакшнууд компани гэдэг утгаараа татвараа дор бүрт нь өгчихнө. Тэд татвар төлөлтийн тал дээр нэг их асуудал үүсгэхгүй. Харин рок поп, нийтийн дууныхан Бөхийн өргөө, “UB” паласыг хоёр, гурван өдөр дүүртэл үзэгчтэй тоглолт хийчихээд хамаг орлогоо нуун дарагдуулж “ганц ч цент газар унагахгүй” гээд бултаж орхино. Харьяа дүүргийнх нь байцаагчид татвараа төлөхийг сануулахад “Тийм хүн байдаггүй, та андуурсан байна” гэж хээвнэг өгүүлээд утсаа салгачихдаг зантай.

Татварын ерөнхий газраас иргэд рүү чиглэсэн олон талт ажлууд хийж шилдэг татвар төлөгч иргэдийг хүртэл шалгаруулж урамшуулдаг болж. Нэг үеэ бодвол хүмүүс татвараа цаг тухайд нь төлдөг болсон талаар тус газрын татвар төлөгчтэй харилцах хэлтсийн хэвлэл мэдээллийн ажилтан А.Эрдэнэбаяр дуулгасан юм.

Гэтэл рок поп, урлагийнхaн татвар гэж үг сонсонгуутаа нуугдчихдаг муу зангаа тавьдаггүй нь татварынхны ажлыг цалгардуулж орхидог байна.

Тоглолтыг минь үзсэн хүний бараг тал хувь нь урилгаар ирсэн болохоор орлого олсонгүй. Олсон хэдээ заал, танхимын түрээсэндээ өгчихлөө гээд хоосон халаасаа сэгсэрч үзүүлдэг урлагийнхан ч байдаг гэнэ. Татвар төлдөггүй талаар нь хэвлэл мэдээллийн хэрэгслээр зарлачихвал өнөө одод нь татварын газар руу утасдаад “Танай шинэ жилээр очиж дуулахгүй” гэж бяцхан заналхийлэл, тунирхлын үг шидэлдэг байна.

Гадаадад олны танил эрхмүүдээс татвар хураадаг тусгай байцаагчид бий. Татварын байцаагч нэгэн эмэгтэй татвараас зугтааж, их хэмжээний мөнгө нуусан эрийг хамаг арга чаргаа хэрэглэн илчилдэг тийм нэг япон кино байдаг даа. Яг л тэгж уйгагүй ажилладаг чадварлаг орон тооны бус байцаагчид манайд үгүйлэгдэж буй. Хэрэв орон тооны байцаагчид манай энэ хэдэн од нэр зүүсэн хүмүүсийг өдөр шөнөгүй дагаад байвал хэрхэн хүлээж авах бол гэж төсөөлөхөд хөгжилтэй.

Урлагийнхан татвараас зугтдаг хамгийн гол шалтгаан нь татвар төлөх нь эх орон, улс, нийгэм, бидний ирээдүй, үр хүүхдэд маань хэрэгтэй гэдгийг мэддэггүйтэй холбоотой. Хоёрдугаарт, зүгээр л хармын сэтгэлээр хэдэн төгрөгөө цааш хийх сонирхол нь нөлөөлсөн хэрэг.

Урлагийнхан дундаас төрийн шагналт, гавьяат жүжигчин Д.Сосорбарам шилдэг татвар төлөгч гэнэ шүү. Нийтийн дуучдаас Д.Хишигбаяр, Р.Дэлгэрмаа хоёр хоршиж дуулдаг болохоор ч тэгдэг юм уу, компани гэдэг нэрийн дор жаахан орлого олсон ч түүнээсээ татвараа өгчихдөг гэнэ. Энэ мэтээр нэрлэвэл татвар төлдөг урлагийнхан нэг их биш.

Харин татвар өгдөггүй оддын жагсаалт тун урт юм болно. НҮБ-ын Хүүхдийн сангийн элч дуучин, гавьяат жүжигчин Т.Ариунаа, гавьяат жүжигчин С.Жавхлан, поп хатагтай Б.Сарантуяа, нийтийн дууны Л.Болдбаатар, Д.Бурмаа, Л.Банзрагч тэргүүтэй олон уран бүтээлч татвар төлөхдөө хойрго аж.

Дуучин С.Жавхлан Бөхийн өргөөнд олон хоног тоглолт хийчихээд татвар төлөөгүй. “Миний тоглолт хандивынх байсан” гэж татварын байцаагчдын амыг тагласан удаатай ажээ.

Гадны дуучид нэг дуунаас орлого олох бүртээ хөгжмийн зохиолч, яруу найрагч зэрэг хүмүүстээ хувь хүртээж, үлдсэнээс нь татвартаа өгдөг юм байна. Гэхдээ саар зүйлс байлгүй яахав. Татвар төлөхөөс зайлсхийсэн хэргээр Холливудын одод шүүхийн танхимд дуудагдаж шуугиан тарьж л байгаа сонсогддог.

Урлагийнхныг тойрсон татварын асуудал сөхөгдөхөөр дуучид, хамтлагууд гэнэт ухаан орж татварт хэд гурван юм шидчихээд “Та татвараа төлнө үү” хэмээн сурталчилгаанд инээмсэглэн тоглоод асуудлыг намжаачихдаг аргатай.

Рок попын “бяцхан”-ууд бол тайзан дээр дуулж олсон орлогоос татварт арван хувийг нь өгдөг гэдгийг ч ойлгодоггүй. Үүний тод жишээ бол “Universe best songs” уралдааны ялагчид гэнэ. Тэд энд тэндхийн тоглолт, шоунд оролцож гайгүй хэдэн юм халаасалчихдаг ч ах эгч оддоо дуурайн татвараас зугтагчдын жагсаалтад орж ирж байгаа гэсэн.

Урлагийнхнаас гадна спортын алдартнууд, бөхчүүд татвар төлөлтийн тал дээр жинхэнэ тэг заадаг хүмүүс юм байх. Харьяа яам, газраас мөнгөн урамшууллыг нь өгөхдөө татвараа суутгачихдаг. Гэвч пүүс, компани, реклам сурталчилгаа, ивээн тэтгэгчээсээ авсан мөнгөнөөсөө татвар төлдөг гэдгийг огтхон ч мэддэггүй аж. Хөдөлмөрийн баатар, гавьяатууд, бөхчүүдийг “Татвараа төлнө үү” гэхээр гайхах нь энүүхэнд гэсэн.

Тавдугаар сарын 9-13-ны хооронд татвар төлөгчдийн өдрүүд тохионо. Татварын газраас олны танил хүмүүст татвараа төлнө үү хэмээн байнга сануулдаг ч нэг их үр дүн гардаггүйд урам нь жаахан хугардаг гэсэн шүү.

Д.ГАНСАРУУЛ

"Өдрийн сонин"

Дуучин Т.Ариунаа, С.Жавхлан нар татвар төлдөггүй оддын жагсаалтыг тэргүүлэв
Tweet
Bolod.mn

Сэтгэгдэл (4)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Жавхлан

2019-01-28 | 11:36:30 | 59.153.87.57 |

Зочин
ээ ингэж тэнэгтэхээ боливол яасын ямарч сайнаар үзүүлэх үлгэр дуурайлалгүй байхдаа яадаг байнаа татвараа төлөөчээ ичдэггүй юмуу

2012-03-01 | 13:08:10 | 203.91.118.42 |

Зочин
тэнэг одонтсорууд.өөрсдийгөө юу гэж боддог байнаа ялангуяа тэнэг Жавхлан

2011-04-22 | 11:19:07 | 202.70.36.130 |

Зочин
тэнэг одонтсорууд.өөрсдийгөө юу гэж боддог байнаа ялангуяа тэнэг Жавхлан

2011-04-22 | 11:17:39 | 202.70.36.130 |