үйлдвэрийн хувьчлалын асуудал энэ хаврын сезоны хамгийн дуулиантай асуудлаар тодорлоо. Эл хэрэгт холбогдож хэд хэдэн удаа байцаалт өгсөн “Улаанбаатар таймс” сонины эрхлэгч асан Ж.Саруулбуян цус харваж сэхээний тасагт хүргэгдсэн. Харин хувьчлалтай холбоотой ажлын гол “ноён нуруу” болсон Нийслэлийн өмч хувьчлалын комиссын нарийн бичгийн дарга Г.Маналжав зүрх өвдсөн гэх шалтгаанаар мөрдөн байцаалтын дундуур хилийн дээс алхжээ.

Гэсэн ч энэ хэргийн сэжүүрийг атгасан Улсын мөрдөн байцаах газрын Эдийн засгийн гэмт хэрэгтэй тэмцэх хэлтэс лавшруулан шалгаж НИТХ-ын дарга Т.Билэгтэд эрүүгийн хэрэг үүсгэжээ. Тухайн үед НИТХ-ын даргаар ажиллаж байсан тэрээр Д.Сүхбаатарын нэрэмжит хэвлэх үйлдвэр болон "Улаанбаатар" сониныг хувьчлах шийдвэрийг голлон гаргасан гэх хэргээр байцаалт өгч эхэлжээ. Т.Билэгт даргыг “Ганц худаг”-т урьдчилан хорьж байцаах байсан ч өөрөө гадуур байцаагдах хүсэлт тавьсан байна.

Энэ хэргийн гол холбогдогч Ерөнхийлөгч асан Н.Энхбаяр, Улаанбаатар хотын ерөнхий менежер Т.Бадамжунай, Улаанбаатар хотын захирагч М.Энхболд, До.Чулуунбаатар, “Улаанбаатар таймс” сонины эрхлэгч асан Ж.Саруулбуян, Нийслэлийн өмч хувьчлалын комиссын нарийн бичгийн дарга Г.Маналжав нар хэргийн учгийг тайлах ёстой. Гэвч мөрдөн байцаалтын явцад тодорхой бус зүйл ярьж байгаа учраас хэрэгт холбоотой хүмүүс аажмаар цар хүрээгээ тэлж өдгөө 20 гаруй хүний “бүрэлдэхүүн”-тэй болоод байгаа.

Нийслэлийн өмчийн харилцааны газар, Нийслэлийн өмч хувьчлалын комиссыг ахалж байсан болон хувьчлалын менежментийн багт ажиллаж байсан хорь гаруй хүнээс тайлбар, мэдүүлэг авч найман хүнд эрүүгийн хэрэг үүсгэн шалгаж байгаа. Эдгээрээс цөөнгүй хүн “Ганц худаг”-т хоригдож байгаа юм. Мөн хэд хэдэн хүн хахууль авсан хэргээр АТГ дуудагдах болсон аж. “Д.Сүхбаатар”-ын нэрэмжит хэвлэх үйлдвэрийн хувьчлал тойрсон хэргийн өнөөгийн явц иймэрхүү дүр зурагтай байна.

Хэргийг сөхсөн Л.Сэргэлэн гэж хэн бэ?

“Д.Сүхбаатар”-ын нэрэмжит хэвлэх үйлдвэрийн хууль бус хувьчлалын талаарх хэргийг анх дэлгэсэн Л.Сэргэлэн гэгч нь хувьчлалын асуудал ид яригдаж эхлэх үеэр ТУЗ-д орсон байдаг. Нөлөөтэй бас чамгүй мөнгөтэй тэрээр Монгол улсын баатар, хурандаа генерал Ж.Лхагвасүрэнгийн ач хүү. Курсийн сонсогч байх үедээ Маршал Х.Чойбалсангийн анхаарлыг татаж улмаар Монгол ардын хувьсгалт цэргийн Улс төрийн газрын орлогч даргаар томилигдсон. 27 настай Ж.Лхагвасvрэн энэ их хариуцлагыг дааж чадахаа нотолсон учир таван сарын дараа МАХЦ-ийн Улс төрийн газрын дарга, гурван сарын дараа Цэргийн явдлын яамны сайд бөгөөд Бүх цэргийн жанжны орлогчоор томилогдож, одоогийнхоор хурандаа, генерал цол хүртсэн. Мөн фронтод Монголын цэргийг удирдан монгол, зөвлөлтийн цэргийн анги нэгтгэлүүдийг нэгтгэсэн армийн нэгдүгээр бүлгийн командлагч домогт маршал Г.К.Жуковын орлогчоор ажиллаж байсан гэхчилэн түүний өвөөгийн байгуулсан гавъяа их. Их хүний нөмөр нөөлөгт эдүгээгийн өндөрлөгт хүрч “Хангарьд авиа” компанийн захирлын суудалд тухалсан тэрээр МАН-ын нөлөө бүхий гишүүдийн нэг. Түүний албан тушаал, хөрөнгө мөнгө “Д.Сүхбаатар”-ын нэрэмжит хэвлэх үйлдвэрийн хувьчлалын асуудалд оролцох боломж олгосон боловч төдийлөн үр дүн гараагүй. Менежментийн багийн гишүүд тус бүр найман хувь эзэмших боломжтой. Гэтэл Л.Сэргэлэн ганцаараа 40 хувийг нь эзэмших эрхтэй болсон төдийгүй гол хөрөнгө оруулагч нь болж байв. Түүний 40 хувь эзэмших саналыг хүлээн авсан “нөхөд”-үүд нь удалгүй хувьчлалын тоглоомоос хассанаар асуудал эхэлсэн.

Түүх түүхийрдэггүй
Төрийн ордны зүүн талд байрлах Д.Сүхбаатарын нэрэмжит хэвлэх үйлдвэрийн байр эдүгээ балгас болж гэмт хэргийн үүр уурхай болсон. Бүр хүчингийн хэрэг гарч байсан объект гэдгээр нь хүмүүс жийрхдэг. Уг нь анх Монголчуудад оюуны талхыг түгээж байсан энэ байр яагаад ийм болов.

Анх 2004 онд уг объектын хувьчилж эрт галавын үеийн энэ байшинг буулгаж газрыг нь үнэд хүргэх эсвэл дээр нь давхар байшин барьж хувь эзэмшүүлэх гэсэн хоёр хувилбартай төлөвлөгөөг тухайн үед Улаанбаатар хотын ерөнхий менежер байсан Т.Бадамжунай санаачлан гаргажээ. Түүний санааг Улаанбаатар хотын захирагч бөгөөд Нийслэлийн Засаг дарга М.Энхболд, НИТХ-ын дарга Т.Билэгт нар дэмжиж шийдвэр гаргасан байдаг. Гэхдээ тэд хэвлэх үйлдвэрийг дангаар нь хувьчилсангүй. “Улаанбаатар таймс” сониныг хамтад нь хувьчлах шийдвэр гаргаснаар даруй хэрэгжиж “Улаанбаатар таймс” нэртэй менежментийн баг 2004 оны тавдугаар сарын 7-ны өдөр Нийслэлийн өмчийн харилцааны газартай менежментийн хувьчлалын гэрээ байгуулжээ.

Менежментийн багийн гишүүд

“Улаанбаатар таймс” нэртэй менежментийн багийн гишүүдийн ахлагчаар “Улаанбаатар таймс” сонины эрхлэгч Ж.Саруулбуян, тус сонины ажилтан Ш.Ундармаа, Н.Ариунтуяа, “Сэрүүлэг” сонины эрхлэгч С.Баярмөнх, одоогийн Зам тээвэр, барилга хот байгуулалтын дэд сайд А.Гансүх, “Хангарьд” авиа компанийн захирал Л.Сэргэлэн, О.Алтан, Б.Согоосүрэн нарын хүмүүс байжээ.

Хувьчлал хэрхэн явагдав

“Улаанбаатар таймс” менежментийн баг Нийслэлийн өмчийн харилцааны газартай менежментийн хувьчлалын гэрээ байгуулснаас хойш 4 жилийн дараа Өмч хувьчлалын комисс гэнэтхэн хуралдаж 2008 оны наймдугаар сарын 8-ны өдрийн тогтоол гарган хэвлэх үйлдвэрийн байр болон сонинг хувьчилсан. Гэрээ байгуулахаас эхлээд хувьчлал хүртэлх 4 жилийн хугацаанд Л.Сэргэлэнг менежментийн багаас хассан, Ж.Саруулбуянг До.Чулуунбаатараар сольсон, хэвлэх үйлдвэрийн байрыг давхарлах боломжгүй гэх мэргэжлийн хяналтын дүгнэлт гарсан гээд чамгүй олон асуудал үүссэн байв. Ингээд хувьчлал болж бялуу хуваахад Л.Сэргэлэн гэдэг хүн хэвлэх үйлдвэрийн 40 хувийг эзэмших нь бүү хэл 500 сая төгрөг ч үгүй хоосон хоцорч, хохирогч болсон юм.

Хувьчлагдсан үйлдвэрийн балгасыг хэн эзэмшдэг вэ?

Хувьчлагдсан цагаасаа хойш “Улаанбаатар таймс” менежментийн багийн гишүүдийн нэр дээр данслагдсан энэ байр одоог хүртэл хэн нэгэнд зарагдсангүй. Нэг хэсэг О.Цолмонгийн нэр дээр байгаа хэмээгдсэн эл балгас олон жил Ерөнхийлөгч асан Н.Энхбаяраар “овоглогдож” яваа гэдгийг ард түмэн андахгүй.

Гадныхан түүхийн өв болсон барилгыг “цаазалдаггүй”

Засгийн газрын ордны бэл бараадсан навсайсан хуучны байшин хотын өнгө үзэмжийг гутаасан “хэрэгт” тулгагдан “цаазын ял” сонссон нь энэ. Уг нь дэлхийн түүхэнд “түүх өгүүлэх” хуучны байшингаа засаж сэлбэнэ үү л гэхээс “цаазалдаг” улс байдаггүй бололтой.

Хөгжлөөрөө дэлхийд толгой цохиж яваа урд хөршийн нийслэл Бээжин хотын “Тянь Ань Мэн”-ий талбай хааны ордон гэх өнгө муутай улаан хүрэн байшингийн өмнө байдаг. Түүнчлэн Орос ах нарын Улаан талбай хэдэн зууны түүх өгүүлдэг Кремлийн ордныхоо дэргэд он цагийг элээж байгаа бол Австрийн Вена хотын төв хэсэг орчин үеийн ганц ч барилгагүй гэдэг. Гэтэл Монгол улс Гадаад яамны дэргэдэх “Хүүхдийн төлөө төв фонд”-ын хуучин барилга, Д.Сүхбаатарын нэрэмжит хэвлэх үйлдвэрийн барилга зэрэг түүх соёлын өвийг “цаазал”-саар байна.

Ж.Ану

"Шууд мн"

Ж.Саруулбуян, Г.Маналжав нарыг эмнэлэгт илгээсэн хэрэг Т.Билэгтэд эрүү үүсгэхэд хүргэв
Tweet
Bolod.mn