Хаврын гэгэлгэн салхитай өдөр Монгол Улсын гоо бүсгүй Б.Гантогоогийнд өнжихөөр шийдлээ.

 Өглөөний таван цагаас гараад үдшийн бүрийд гэрийн бараа хардаг бүсгүйтэй уулзана гэдэг тийм ч амар ажил биш юм. Тэнд энд явна гэсэн хэл чимээ авалцаад байсан ч машин тэрэгний түгжрэл гэсээр алдаж орхино.

Түүний хөлөглөсөн хаммер Н-3 жийпний хурдныг хэлэх үү, ард урдаа орж явсны эцэст телевизийн нэвтрүүлэгт орж байхад нь уулзлаа. Мисс хүүхэн гэхээр эгэмнийх нь яс гэрэлтэх дөхсөн туранхайвтар бүсгүй­чүүдээр төсөөлдөг дөө. Монгол Улсын гоо бүсгүй Б.Гантогоо тийм ч туранхай биш юм. Өөрт таарсан мах шөлтэй, нуруулаг бүсгүй тослоо.

Яриа хөөрөө тун энгийн. "Яана аа, би эмээгийндээ байгаа шүү дээ" гэлээ. Ерөнхийдөө бүсгүй өөрийн гэсэн төвхнөсөн гэр оронгүй гэдэгтээ санаа зовж байгаа бололтой. Бид заавал гэр оронд нь очих бус Б.Гантогоо гэдэг хүний үзэл бодол, амьдрах ухааныг таних, дотоод хүн нь хэн бэ гэдгийг нээхээр зорьсон юм.

Тэрээр UBS телевизийн "Но­гоон Ирээдүй" нэвтрүүлэгт оролцож байгаа аж. Дуучин болох мөрөө­дөлтэй хүүхдүүдэд өөрийн орчуул­сан номыг бэлэглэхийн сацуу бай­галь хамгаалах талаар ярьж байна. Яриа хөөрөө нь цэгцэрчихсэн, илэн далангүй, нээлттэй нэгэн юм. Яаж зураг авахуулах, телевизийн ка­мер­тай  харьцах зэрэгт үнэхээр гаргуун аж. Арга ч үгүй дээ. Дэл­хийн хорь гаруй орноор тогтмол "хэсч" гоо сайхнаа гайхуулж явдаг юм чинь.

Түүнийг нь нотолгоо дөрвөн гадаад паспортод визний тамганы зай үлдээгүй учир тав дахь пас­портоо нээчихсэн яваа аж.  Олон улсад Б.Гантогоогоор монгол бүс­гүйчүүлийг төсөөлдөг гэхээр энэ бүсгүй ямар их үүрэг хариуцлага хүлээсэн гэдэг нь илт. Гэхдээ энэ төлөөсөл, ойлголт алдаагүй гэдэг­тээ та ч гэсэн санал  нийлэх болно. Нөгөөтэйгүүр түүнд хүн төрөлхтөнд "Байгальд ээлтэй  эх дэлхийн элч" гэсэн нэрээр  нэрлэгдэх ховорхон аз завшаан  тохиожээ.

МОНГОЛ, СОЛОНГОС ХОЁР ЭМЭЭ

Айлын ууган хүүхэд голдуу л эмээ өвөө дээрээ өсдөг. Тэр жиш­гээр   аав, ээж нь ой гаруйтай охин Б.Гантогоог Өмнөговь аймгийн Ханбогд суманд суух эмээ, өвөө дээр нь орхижээ. Говийн шаргал элсэн дунд хамрын ханиад ч хүрэл­гүй зургаан нас хүрчихээд  Улаан­баатар хотод татагдан ирсэн бай­на. Аав, ээж нь сургууль соёлоо дүүргээд ажил төрөлтэй болоод охиноо авчирсан хэрэг.

Б.Гантогоо Нийслэлийн 23 дугаар сургуулийн солонгос хэлний ангид оржээ. Настай хүмүүс дээр өссөн болоод ч тэр үү Б.Гантогоо  хэвлүүхэн яриа хөөрөөтэй, онц  сурдаг нэгэн байжээ. Түүнийг дол­ду­гаар ангид байхад "Солонгос улсыг хэн сайн мэдэх вэ" гэсэн зохион бичлэгийн уралдаан улс да­яар зарлажээ. Нийгмийн идэвх сайтай Б.Гантогоо охин оролцоод орхитол тэргүүн байрт орсон бай­на. Зүгээр л нэг баярын бичиг эд бүхий зүйлс шагналд нь ирсэнгүй.

Харин ч бүр Монгол Улсын зардлаар БНСУ-д суралцах урилга хүлээн авчээ. Б.Гантогоо охин ямар ч эргэлзээгүйгээр гав ганцаар Солонгос улсыг зорьсон байна. Онгоцноос буухад хэн тосох, хаана байрлах зэрэг нь тодорхойгүй. Ямар ч байсан Сөүл хотын "Гёнсү" ахлах сургуульд суралцана гэдгээ л мэдэж байлаа. Ашгүй онгоцны буудал солонгосоор "Гандукий" гэсэн алдаатай бичиг барьсан хүн тосчээ.

"Гёнсү" нь маш хатуу дэг ёстой охидын  сургууль байлаа. Суниал­гах, алган дээр нь саваа модоор цохих юу ч биш. Энэ бүх дэглэлт, дэг ёсноос зугтах ганцхан арга бол сайн сурах. Тийм ч учраас Б.Ганто­гоо хамаг хүчээ дайчлан суралцсан гэдэг.  Тэрээр дотуур байранд бус 60 нас дөхөж байгаа Ким гэдэг эмээгийнд суудаг байв. Тэр эмээгийн нөхөр нь эрт нас барж, үр хүүхдүүд нь тусдаа амь­дар­на.

Хүүхдүүд нь АНУ, Япон улсад амьдардаг учир Ким эмээ ган­цаардана. Тэгээд Б.Гантогоо охи­ныг өөрийн хүүхэд шиг хайрлана. Б.Гантогоо охин Өмнөговийн эмээ шигээ Ким эмээд тусалдаг байв. Эмээ цэцэг ногоо тарьж, түүнийгээ заран амьжиргаандаа нэмэрлэнэ. Б.Гантогоог ажилд нь туслах бол­гонд Ким эмээ хэдэн арван вон өгнө. Өмнөговийн эмээ шиг нь тугал хариулах, аргал сайн түүвэл ааруул, чихрээр урамшуулдагтай адил. Хожим нь ойлгохноо Ким эмээ цагийн ажлын цалин олгодог бай­сан аж.

Б.Гантогоо эхэндээ гэрээ жиг­тэйхэн санан аав, ээждээ захиа бичдэг байж. Яруу найрагчдын шүлгүүдээр эвлүүлэг хийсэн  охи­ны­хоо захиаг ээж нь уншаад  өдөржин уйлж байсан удаатай гэнэ. Ким эмээ Б.Гантогоог гадуур гаргах тун дур­гүй. Магадгүй зайлуул урвуулаад авахыг боддог ч байж болох. Гэсэн хэдий ч  Б.Гантогоо загварын шоу, хэд хэдэн клип, киноны хэсэгт тоглоод авчээ.

АРВАН ТАВАН НАСТАЙ ГОО ОХИН

Монгол хүүхдүүд ямар ч газар дасан зохицох чадвартай учраас  зарим үед метрод "туулайчилдаг" ч болжээ. Ийнхүү хичээл ном гэж гүйж явтал 2001 оны есдүгээр сард "Солонгос-Монгол Улсын соёлын өдрүүд Сөүл хотод зохиогдсон байна. Б.Гантогоогийн хувьд "Ха­ран­га" хамтлагийн тоглолтыг үзэх гэж очив. Яг гэртээ очсон юм шиг санагдаж байжээ. Тэр наадмын үеэр тэнд сурч ажиллаж байгаа монголчуудын дунд "Гоо охин шалгаруулах тэмцээн" болно гэсэн зарлал байсан байна.

"Гёнсү" ахлах сургуулийн сурагч Б.Гантогоо юу ч бодолгүй бүртгүүлж орхижээ. Тайзан дээр гарч шавай­гаа ханатал дуулж бүжиглээд буу­жээ. Уралдааны дүн гарахад Б.Ган­тогоо түрүүлж хоёр сая төгрөгийн хэртэй мөнгөн шагнал, бүтэн жил утсаар ярих урамшуулал зэргийг хүртжээ. Ким эмээгийн цэцгийн хүлэмжинд ажиллахаас хэд дахин их мөнгө байлаа. Үүнээс эхлэн алдарт загвар зохион бүтээгч Андре Ки­мийн загварын агентлагт суралцах боломж нээгдсэн аж.

15 настай гоо охинд үерхэх, дурлах боломж байсангүй. Ким эмээ нь түүнийг гадагш нь гаргадаггүй байсан гэнэ. Ингээд 18 настайдаа дунд сургуулиа төгсөөд Солонгос улсын их дээд сургуульд суралцах боломж байсан ч эх орноо жигтэйхэн санаж байсан учир гэр рүүгээ яарчээ. Гэртээ ирээд нэг сар  найз нөхдүүдтэйгээ диско­дож, Өмнөговийн нам гүмийн туйл элсэн дундуур хөл нүцгэн гүйв. Энэ байдлаасаа хэдхэн сарын дараа уйдсан учир англи хэлний мэдлэгээ сайжруулахын тулд Сингапур ул­сад сурахаар явжээ.

ТАНЗАНИ УЛСЫН ЕРӨНХИЙЛӨГЧТЭЙ УУЛЗСАН НЬ

Солонгос улсад ажиллаж цуг­луулсан мөнгөөрөө Сингапурт сурах зардлаа хийсэн аж. Дөрвөн сарын дараа Улаанбаатар хотдоо эргээд ирсэн байна. Ямар ч байсан зах зээлд өрсөлдөх хэмжээний боловсрол мэдлэгтэй болохоор мэрийж байж. Ингээд дүүгээ цэцэр­лэгт хүргэдэг ажилтай байж байтал зурагтаар "Miss international Mon­golia-2005" тэмцээн болох тухай мэдээ гарчээ.

Тэр тэмцээнд оролцохоор бүрт­­гүүлтэл тухайн үеийнхэн нь түүнийг таатай хүлээн авсангүй. Ээж нь "Нарантуул" зах гарч 20 гаруй метр ногоон торго авч хувцас хунарыг нь бэлдсэн гэнэ. Англи, япон, солонгос хэлтэй Б.Ган­тогоо­той өрсөлдөхөөс эмээсэн бүс­гүйчүүл хэвлэлийн бага хурал хийн зохион байгуулалттайгаар түүн рүү дайрчээ. Тухайн жил загвар өмсдөг бүсгүйг  түрүүлнэ гэсэн яриа байсан аж. Иймэрхүү гүтгэлэг дайрал­туудыг туучин олон арван тэмцээн уралдаанд амжилттай оролцжээ.

Энэ үеэс эхлэн Б.Гантогоо сайхан бүсгүй гэдэг ойлголтыг өөрчлөх зорилт тавьжээ. Гадаа­дын 20 гаруй орноор явахад түү­нийг Ерөнхийлөгч, Ерөнхий сайд нь хүртэл хүлээн авч уулздаг байж. Канад улсын гоо бүсгүй өөд боло­ход улс орон даяараа гашуудаж байх жишээтэй. Гэтэл Монгол Улсад болохоор "Урт үстэй ухаан богино" гэсэн уламжлалт сэтгэл­гээтэй хэвээр байсан аж.

Тийм учраас Б.Гантогоо энэ ойлголтыг дэлхийн улс орнуу­дын бодлогоор өөрчлөхөөр шийд­сэн гэнэ. Тэр нь юу вэ гэвэл гад­наасаа ч, дотроосоо ч гэрэлтэж явахыг хүссэн байна. Энэ гэрэл гэгээгээрээ Монгол Улсаа суртал­члахын тулд алтан соёмбот дал­баагаа барин зүтгэж яваа нэгэн.

Итали, Грек, Энэтхэг, Танзани, Африк олон орноор Монгол Улсаа сурталчилж загварын шоу, гоо бүсгүйн тэмцээнд оролцож явжээ. Тэрээр 2006 онд Танзани улсын Ерөнхийлөгтэй уулзах өдрийн өглөө  Африкийн халуун уур амьс­гал, ажлын ачааллаа дийлэлгүй ухаан алдаад уначихжээ.

Нэг мэдэхнээ орон дээр хэвт­чихсэн, цуг явсан  бүсгүйчүүл нь тойроод зогсчихсон байсан гэнэ. Бүгд л түүнийг нас барчихлаа гэж бодоод уйлцгааж байжээ. Ингээд бүсгүйчүүд Танзани улсын Ерөн­хийлөгчтэй уулзахаар шуугилдаж эхлэв. Зочид буудлын эмч Б.Ган­тогоог өрөөндөө үлдэхийг санал болгосон ч үндэснийхээ хувцас, хэдэн ширхэг календарь, суви­нерээ аваад босчээ. Яагаад гэвэл түүний зүрх сэтгэлд "Монгол Улсын төлөөлөл" гэсэн бодол байсаар байж.

Танзани улсын Ерөн­хийлөгч­тэй уулзахдаа Монгол Улсынхаа  ту­гийг өгөхдөө англиар "Төв Азийн цээжин дээрх Их Монгол Улс байгуулагдсаны 800 зуун жилийн ой тохиож байна. Танай ард тү­мэнд баярын мэнд хүргэе" гэсэн аж. Энэ мэндчилгээ Танзани улсын тэргүүн хатагтайд ихэд  таалагдсан учир Африк тивийн бахархал мөнх цаст Килиманжаро уулынхаа нэ­рэм­­жит шагналыг өгчээ. Тэргүүн хатаг­тай нь "800 жилийнхээ ойг тэм­дэглэж байгаа Монгол Улсын ухаан төгөлдөр бүсгүйг шагнах болсон­доо баяртай байна. Би Мон­гол Улсын охид бүсгүйчүүлийг Гантогоо шиг ухаалаг, үзэс­гэлэн­тэйгээр төсөөлсөн" гэжээ.

ХҮР ХОРХОЙГООР ТОРГО НЭХҮҮЛЭХ ХҮСЭЛ

Б.Гантогоо тийм ч нервтэй жо­лооч биш. Түгжрэлд орохоороо бүр тайвширч утасдаж гарна. Англи, солонгос, япон хэлээр чөлөөтэй ярина. Дандаа ажил. Улс төр, бизнес, шашин, байгаль хам­гаалах, төсөл энэ тэр ярина. Зарим­даа бүр "Засгийн газар хийхгүй бол би хийнэ" гэх аж. Өөртөө тийм итгэлтэй. Рашаан хамгаалах та­лаар яриад авав. Мөн улсынхаа 21 аймаг хотоор явж гоо бүсгүйг тод­руулах талаар хүн хартай яриад амжсан. Зүгээр нэг ярихгүй хөрөнгө санхүү, хөтлөлт, зураг авалт гээд төлөвлөгөө хэлэлцэж байсан юм. Бид явсаар "Bella" гэдэг хотхонд ирлээ. Нэлээд тансаг зэрэглэлийн хотхон юм. Б.Гантогоо эндхийн  зочид буудалд байрлаж байгаа аж.

Монгол Улсад 7-10 хоног байж байгаад аль нэг улс руу ниснэ. Тийм учраас орон сууцтай болохыг яарахгүй байгаа гэнэ. Дэлхийн олон улс оронд найз нөхөд байдаг учраас гэр оронтой л гэж ойлгодог аж. Ингээд бид тэр буудлын рес­торанд хоол идэхээр боллоо. Мань бүсгүй цагаан хоолтон аж. Яагаад цагаан хоолтон болчихов гэхэд "Байгальд ээлтэй эх дэлхийн элч" гэсэн цол өргөмжлөл хүртсэнээс хойш аяндаа ийм болсон гэнэ.

Б.Гантогоо энэ цол өргөмжлөл хүртсэний дараагаар арав гаруй улс оронд мод тарих, байгаль хамгаалах талаар сурталчилгаа хийсэн. Дандаа л гадны улсын зардлаар шүү. Хэдхэн хоногийн өмнө Энэтхэг улсад урлаг соёлын одууд, гоо бүсгүйчүүлийн хамт байгаль хамгаалах хандивын арга хэмжээнд оролцжээ. Хандивын арга хэмжээнд хоёр тэрбум ам.доллар цугларсан аж. Энэ мөн­гөөрөө байгалийн бохирдлоос бо­лоод төрөлхийн согогтой төрсөн хүүхдүүдэд туслахаар болжээ. Хам­гийн гайхалтай нь олон төлөөлөгч Монгол Улс гэж байдгийг мэддэггүй байсан гэнэ.

Энэтхэг улсад хоногийн зуун сая төгрөгийн зочид буудал байхад гэр оронгүй ядуус гудамж тал­байгаар нэг хөглөрнө. Цэвэр усны хомсдолоос болоод өдөрт дөрвөн мянган хүн нас бардаг гэсэн аймаар тоог Б.Гантогоо ярьж бай­на. Монгол Улс байгаль дэлхийгээ хайрлахгүй бол цэвэр усны хомс­долд ойрхон гэж дүгнэв. Тэрээр "Энэтхэг улс үхэр олонтой юм. Үхэр нь голдуу гялгар уут, хог новшоо иднэ. Би үүнийг хараад юу бодсон  гэвэл хүн төрөлхтөн өөрсдөө био­ло­гийн зэвсэг бэлдэж байна гэж. Монгол Улсын олон гол горхи цианит натри гэх мэт хорт бодист хордсон. Тэгэхээр бид ч ялгаагүй өөрсдөө биологийн зэвсэг бэлдсэн байна" гэлээ.

Гоо бүсгүй маань хамгийн тү­рүүнд хэрэглээний гялгар уутыг устгах бодолтой байгаа аж. Тийм ч учраас хүр хорхойн шүлсээр хий­сэн торго, даавуун уут үйлдвэрлэх бодолтой байгаа гэнэ. Хүр хорхой хэмээх зунгаараалдсан өтний тухай ном, зураг цуглуулчихсан харагдана. Монгол Улсад хүр хорхой өсгөх, аж ахуй байгуулах бодолтой дог. Олон цагаар интернэт ухаж ихэнх цагаа бардаг нь илт.

ЛОНДОНГИЙН САЯТНЫ ХОРООЛЛООС ӨМНИЙН ГОВИЙГ ЗОРЬСОН БҮСГҮЙ

Энэ дэлхийн хүн ардын амьд­рал хар цагаан гэсэн хоёрхон өнгөөр л солигдсон юм шиг санаг­даж байжээ. Лондон хотод АНУ-ын алдарт дуучин Маддонатай хөрш хүртэл амьдарч үзсэн гэнэ. Үнэтэй харш, алтан эмблемтэй машинд сууж дээдсийн зэрэглэлд алхаж үзжээ. Уйлагнасан бороотой Лон­дон хотын дээрээс харж зогсохдоо алтан шаргал элстэй өмнийн цэн­хэр говь, Улаанбаатар хот, 23 дугаар сургууль, эмээ, өвөөгөө жиг­тэйхэн санаж тэр тансаг орчноос татгалзсан аж.

Б.Гантогоо Англи улсын нэр хүндтэй сургуульд урилгаар сурал­цах  бололцоо байсан ч ийнхүү татгалзсан юмсанж. Дахиад дэл­хийгээр аялав. Түүнд хэдэн арван тэмцээн, арга хэмжээнд орол­цуулах хүсэлт, урилга ирнэ. Зарим­даа тал зардлыг нь ч өөрөөсөө гаргана. Италийн алдарт ferrari машины рекламанд тоглох ч юм уу, загварын шоунд оролцоход хөлс авна. Тэр мөнгөнийхөө талыг нь буяны байгууллагад хандив­лачих­даг гэнэ.

ТҮҮНИЙ ТӨЛӨВЛӨГӨӨНД ДУРЛАХААС БУСАД БҮХ ЗҮЙЛ БАГТСАН

Тэрээр энэ жил мод тарина, номын сан байгуулна. Номын сангаа Өмнөговь аймгийн Ханбогд суманд байгуулахаар болжээ. Шаргаморьтын зусланд контейнер дүүрэн ном цуглуулчихсан байгаа аж. Харин мод тарих асуудал дээр гадна дотны эрдэмтэдтэй зөвлөж байгаа гэнэ. Тухайлбал Канад улсын эрдэмтэд чийг багатай говьд ургах чадвартай хэд хэдэн мод, ургамал санал болгожээ. Энэ жил ганц нэгээс нь турших бодолтой байгаа аж.

Б.Гантогоо жил бүр үр ашиггүй мод тарьдаг дарга нарыг ч шүүмж­лээд авчээ. Уг нь бол мань бүсгүй байгаль хамгаалагч бус Японы нисэхийн академийг удирдлагын менежер мэргэжлээр төгссөн. Энэ чиглэлээрээ зүгээр нэг ажиллах бус хийх төлөвлөгөө бий. Монгол Улс гадаадаас онгоц түрээслэж бай­хын оронд хямдхан худалдаад авчих боломж бий талаар ч яри­лаа. Ерөнхийдөө олон орноор яваад ирэхээр боломжийг их хар­даг бололтой.

Амжилт ялалтыг дагаж атаар­хал, хар цагаан хэл ам сүүдэр шиг дагадаг. Б.Гантогоогийн хувьд бие даах чадвартай учраас тэр бүр эмзэглээд байдаггүй. Нэгнийхээ амжилт, ялалтад баяр хүргэхийн оронд атаархдаг явдал гоо бүсгүй­чүүлийн дунд цөөнгүй байдаг гэнэ. Юу хийгээгүй, бүтээгээгүй байж том хаустай, хоёр гурван машинтай болчихсон охидууд ч байдаг аж.

Б.Гантогоо  ирээдүйн ханиа дэлхийн аль нэг газар байгаа гэж төсөөлдөг. "Сайхан хайртай учир­вал алдаж болохгүй" гэж бодож яваа гэнэ. Одоохондоо дэлхийн цаг уурын өөрчлөлт, байгаль дэлхий­гээ хамгаалах гээд дурлах завгүй яваа аж. "Энэ их ажлын хажуугаар дурлах гэж яршиг" гээд хөхөр­нө. Улаанбаатар хотод ирээд гол­дуу эмээ, өвөө дээрээ очно. Гур­ван биедээ эрхлээд ажил төрлөө март­даг учир зочид буудал сон­годог гэж байгаа. Зочид буудалд "Алдаатай оноотой 25 нас минь" гэсэн ном эхлүүлж байгаагаа дуул­гав. Мөн зураг зурсан цаас, будаг хөлөөр нэг хөглөрнө.

Тэгээд нэг их удалгүй Швед улсын хүмүүстэй уулзах болсон учир нүүр амаа будахаар болсон юм. Тэр болгон нүүрээ будаад байдаггүй аж. Б.Гантогоо хэзээ ч хамаагүй бэлэн, хоол, пиццаны зах зэргийг өлссөн үедээ идчихдэг байна. Идэвхтэй амьдрал түүнд жин барих шаардлага бий болго­дог­гүй аж. Швед улсын хүмүүстэй уулзсаны дараагаар  Баянзүрх дүүрэгт барьж буй цэвэр усны үйлдвэр дээрээ очсон юм. Япон улсын тоног төхөөрөмж бүхий "Kilimanjaro" нэртэй цэвэр ус гаргах гэж байгаа аж.

Тэрээр тун удахгүй гадаад явна. Мөн л Монгол Улсаа сурталчлах зорилготой. Ирэх зургадугаар сард БНСУ-ын Сөүл хотод  Ази, Номхон далайн улс орнуудын гоо бүсгүй­чүүл цуглаж үндэсний өв соёлоо сурталчилна. Үүнд Б.Гантогоо оролцох бодол бий. Бүтэн сарын арга хэмжээнд нэг улсаас 200 мянган ам.доллар гарах учиртай. Ардын хувьсгалын 90, үндэсний хувьсгалын 100, Хүннү гүрэн бай­гуу­лагдсаны 2220 жилийн ойг то­хиол­дуулан улс орноо сурталчлах бодол бий.

Дэлхийн гоо бүсгүйчүүлийг да­ган бүх орны хэвлэл мэдээллээс гадна BBC, CNN гэх мэт хүчирхэг телевизүүд ирнэ. Нэг цагийн эфи­рээ төлбөртэйгээр цацах юм гэсэн. Б.Гантогоо "Би тэр телевизээр гарах гэж байгаадаа гол биш. Монгол Улсын ойн баяр наадам, үндэсний өв уламжлал цуг явах учраас төр засаг анхаараасай. Би хувиасаа 40 мянган ам.доллар гаргаж болох ч үлдсэн хэдийг нь олох ухаанаа олоогүй байна" гэлээ.

Тэрээр энэ арга хэмжээ Монгол Улсын томоохон сурталчилгаа болох учраас наадмын өмнө  жуулч­дыг татах юмсан гэж ярьж байна лээ. Гоо бүсгүйчүүлийг дагаж хэвлэл мэдээлэл, улс төр, бизнес явдаг гэнэ шүү. "Зорилготой бү­тээлч" хандивын сан байгуулж байгаа юм байна. Туг логоныхоо зургийг зураад сууж байсан юм. Хэд хэдэн хувилбар үзүүлэв. Гараа алдлан зогсож байгаа нь өөрөө гэнэ. Бороо хуртай цэнхэр дэлхий, бүхний анхдагч өндөг, эрдэм мэд­лийг бэлэглэгч ном уншиж буй хүнийг зурсан байна. Энэ сан­гаараа дамжуулан дэлхийн гай­халтай номын санг Ханбогд суман­даа барих гэнэ.

"Гүйдэг" Сэр-Од гэдэг шиг гоо бүсгүй Б.Гантогоо улс орныхоо нэрийг гаргахын тулд яваад л байна. Түүний ээж нь "Шөнийн дөрвөн цаг гэхэд л охиноо (Гэрийн­хэн нь Гантогоог ингэж дуудна) интернэт шагайгаад сууж байдаг. Би хийнэ, чадна гэсэн эрмэлзлэл, залуу насны зориг хүчээр л явж байгаа хүүхэд" гэсэн юм. Тэгээд ч аав, ээж, эмээ, өвөө нар нь Б.Ган­тогоог зочид буудалд буухад дур­гүйцдэггүй. Гэртээ байвал ажилдаа төвлөрч чадахгүй гэж үздэг байна.

Монгол Улс спортын арга хэм­жээнд чамгүй мөнгө цацдаг. Тамирчид амжилт гаргасан, гар­гаагүй байсан ч улс орноо сур­талчилж байгаа хэрэг гэдэг юм. Тэгвэл 24 настай энэ бүсгүй улс орныхоо нэрийг дэлхийн хорь гаруй оронд дуудуулж загвар бо­лоод сайхан бүсгүйн тэмцээнүүдэд амжилт үзүүлсээр явна. Гоо бүсгүй улс орны нүүр царай учраас  Мон­гол Улсаа сурталчилна гэж "хэн­хэглэх" аж. Ингэлээ гээд хэдэн хүн түүнд баяр хүргэдэг бол. Дуучин Хаянаатай хамтран дуулсан "Аз жаргалын дуу"-гаа сонсох дуртай. Мөн "Гоо сайхан заяахгүй бол төрөөд ч яахав, гуньж баярлахгүй бол амьд яваад яахав" гэсэн шүл­гийг уншиж сонирхуулсан юм.

Дунд сургуулийн сурагч бай­хаасаа сурлага, урлагаараа тод байж чадсан Б.Гантогоо богинохон хугацаанд монголчуудын уламж­лалт сэтгэлгээнд цоо шинэ өөрч­лөлтийг бий болгосон.  Амжилт, аз жаргал, хүсэл мөрөөдөл, итгэл найдвараар жигүүрлэсэн тэрээр яг л шувуу шиг нисэж явна.

Т.ЦОГТ-ЭРДЭНЭ

15 настайдаа гоо охин шалгаруулах тэмцээнд түрүүлсэн нь

24 насандаа Японы нисэхийн академийг төгссөн нь

Эко элч нартай уулзсан нь

"Өдрийн сонин"