байна. Энэхүү тоглолт нь хип хоп, поп урсгалынхны анхны хамтарсан тоглолт гэдгээрээ онцлог. Ингээд “Sync” хамтлагийн гишүүн Б.Амартүвшинтэй ярилцсанаа толилуулъя.

-Танай хамтлаг “Чи шүү” реалити шоунаас гараагаа эхэлж байсан. Хамтлаг оршин тогтноход бэрхшээлтэй зүйл зөндөө л байсан байлгүй?
-Тэгэлгүй яахав. Бүгд насанд хүрчихсэн өөр өөрийн гэсэн дотоод ертөнцтэй дөрвөн хувь хүн хоорондоо нэгдэхэд хэцүү байсан. Анхны тоглолтоо зохион байгуулахаар ярилцахад бүгд л өөрийнхөөрөө зүтгэн маргалдаж, хамтлагийн хувь заяа хүндхэн байсан үе ч бий. Гэхдээ өнөөдөр энэ бүхнийг эргээд бодоход сайхан дурсамж болон үлдсэн байдаг. Анх бид дөрвүүлээ байсан. Удалгүй Дөлөө хувийн уран бүтээл хийхээр хамтлагаас гарсан. Манай Оргил ганцаараа СУИС-ийн дуулаачийн анги төгссөн. Энхүүш бид хоёр бол тэс ондоо мэргэжилтэй. Гэвч хүн бүхэнд ялангуяа, Монгол хүнд дуулах нэг тийм гэж хэлэхийн аргагүй унаган авьяас байдаг гэж би боддог. Тиймээс ч бид өнөөдрийг хүртэл тэр авьяас, хүсэл мөрөөдлөөрөө жигүүрлэн явна.

-Хамтлагийн гишүүд хэдэн оных вэ. Гэр бүлтэй юу?
-Манайхан 27, 28 насны залуучууд. Миний хувьд найз бүсгүйтэй. Бид нэлээн удаан хугацаанд үерхэж байгаа. Цаашид гэр бүл болох төлөвлөгөөтэй байгаа. Харин манай хоёрын хувьд сайхан ганц бие нөхдүүд л явах юм.

-Уг нь гэр бүлтэй байхаар л нас байна. Эмэгтэйчүүдийн талаар ямар нэгэн сөрөг бодолтой явцгаадаг юм болов уу?
-Яалаа гэж дээ. Манай хоёр охидуудтай үерхэж дотносож л байдаг. Сэтгэлд нь нийцдэггүй юм байлгүй. Тэгээд ч нэг насаараа амьдрах ханиа сонгоно гэдэг чухал асуудал. Тиймээс л нухацтай ханддаг байх.

-Танай хамтлаг ихэвчлэн хайрын тухай дуулдаг. Яагаад энэ сэдвийг онцолдог юм бэ?
-(инээв) Бид залуу хүмүүс. Тэгээд ч хайр бол мөнхийн сэдэв. Бидний дуу бидэнд таалагдахаас гадна Монголын олон залууст таалагддаг гэж боддог. Дуунаасаа бид хайрыг мэдэрдэг. Энэ сайхан биш гэж үү. Цаашдаа ээж, аав, эх орны сэдэвтэй олон сайхан дуу хийхийг зорин хөдөлмөрлөж байна.

-Та гурвыг сүүлийн үед дуунаасаа илүү хувцаслалтандаа анхаардаг болсон гэх юм. Нууц биш бол удахгүй болох тоглолтын чинь хувцасны загвар хийгээд өртгийг сонирхвол?
-Инээдтэй юм. Стиль имиждээ дуунаасаа илүү анхаардаг гэх нь хаашаа юм. Гэхдээ биеийн пропорцийн хувьд шал өөр гурван нөхөр ижилхэн хувцас өмсвөл үнэн мангар харагдана гэж бид бие биенээ шоолдог юм. Энэ удаагийн тоглолтондоо бид өндөр хариуцлага өгч байгаа. Хоёрт урлагийн алтан тайз гэдэг бидний хамгийн том хүндлэл байх ёстой. Тэр утгаараа “Mila Moda” салонтой хамтарч хувцаснуудаа хийлгээд бараг дууссан байгаа.

-Энэ удаагийн тоглолтын онцлог?
-“D45” хамтлагтай хамтраад “Чамд зориулъя” нэртэй тоглолтоо Хүүхдийн баяраар хийнэ. Бидний тоглолт Монголдоо анх удаа хип хоп, поп рок урсгал хамтран тоглож байгаа гэдгээрээ онцлог. Тэрнээс гадна үнийн хувьд харьцангуй хямд. Учир нь хүүхдийн баяр тохиож байгаа. Тоглолтыг маань ихэвчлэн өсвөр үеийнхэн үзнэ. Тэгэхээр тэдний халаасанд байх мөнгө хэдий хэмжээтэй байх нь ойлгомжтой. Аль болох олон хүн үзээсэй гэж хүсч байна. Залуучууд маань тэр оройг л сэтгэлдээ хүртэл гоё өнгөрүүлээсэй л гэдгийг чухалчилж байгаа.

-Хамтлаг байгуулагдаад дөрвөн жил болжээ. Амьдралд тань хэр өөрчлөлт гарав. Бүр тодруулбал та гурав хувьдаа байр, машин, дансандаа мөнгөтэй юу?
-Би өөрөө техникт сонирхолгүй нэгэн. Одоо хүртэл жолооны курст ч сууж үзээгүй. Яагаад ч юм машин барина гэхээс их айдаг. Харин манай Оргил машинд үнэн дуртай. Тэгээд ч багаасаа машин барьсан. Энхүүш бол бас л миний өрөөсөн дугуй. Гэхдээ намайг бодвол жолооны үнэмлэхтэй. Байртай юу гэл үү. Манайхан одоохондоо бүгд гэр бүлтэй болж амжаагүй учраас ээж, аавтайгаа амьдардаг. Аавынхаа байранд амьдардаг гэсэн үг. Гэвч бүгд тодорхой хэмжээгээр мөнгөн хуримтлалтай. Их хурлын гишүүн хөрөнгөө бүртгүүлж байгаа юм шиг санагдчихлаа. (Инээв)

За мэдээж хэрэг бид хэдийгээр уран бүтээлчид ч гэсэн бусдын л адил амьдрахын төлөө зүтгэж яваа. Тодорхой хэмжээгээр мөнгө ололгүй л яахав. Түүгээрээ жижигхэн хэмжээний эрсдэлийг даваад гарчихаж дөнгөнө. Гэхдээ үнэндээ бол хамтлаг уран бүтээлээрээ мөнгө олно гэдэг маш хэцүү. Тэр тусмаа залуу хамтлаг дуучид. Гэхдээ үүнд хамгийн түрүүн мөнгө гэхээсээ илүүгээр чи Монгол хүн болж төрсөн бол эх орондоо өөрийн чадах юугаар ч болов тус дэм болох хэрэгтэй л дээ. Тэр үүднээсээ бид өөрсдийн уран бүтээлээр урлагийн салбартаа ямар хэмжээний хөрөнгө оруулж байгаа нь чухал. Тиймээс дан ганц хамтлагийн орлогоор хангалуун амьдарна гэж байхгүй л болов уу.

-Тэгэхээр та хэд хамтлагаас гадуур бизнес эрхэлдэг гэсэн үг үү?
-Энхүүш ч тэр би ч гэсэн хувьдаа нэг жижигхэн бизнес эрхэлдэг. Гэхдээ тийм том мундаг бизнес биш шүү. Хамтлагийн ахлагч Оргил маань Таеквондогийн ОУХМ хүн. Энэ спортоороо мундаг амжилттай яваа. Олон мянгаар тоологдох шавьтай хүн шүү дээ цаадах чинь. Энэ жилийн Таеквондогийн Улсын аваргад түрүүлсэн. Мөн түүний дараагаар Улан-Үдэд болсон Олон Улсын тэмцээнд багаараа оролцож олон алт, мөнгөн медалиуд эх орондоо авчирсан.

-Өөрийнхөө эрхэлдэг бизнесийг тодруулаач?
-За би аав, ээж, ах, эгчтэйгээ нийлээд жижиг хэмжээний гэр бүлийн бизнес эрхэлдэг. Гэхдээ яг юу гэдгийг нь нууцалчихъя.

-“Од” гэдэг үгийг тодорхойлвол?
-Энэ үг надад их эвгүй санагддаг. Од хүн гэж ярих юм. Манай Монголын нөхцөлд миний бодлоор од гэж лав байхгүй байх. Байлаа ч тэгж нэрлэх нь зөв буруу эсэхийг хэлж мэдэхгүй байна. Мундаг сайн хүмүүс байлгүй л яахав. Зөндөө бий. Гэхдээ тэднийг хүндлэх ёстой болохоос биш од гэж нэрлэх нь зохимжгүй байх. Олон зуун сая хүний хайр хүндэтгэлийг хүлээсэн хэн ч халдаж чадахааргүй карьертай тухайлбал, М.Жексонг магадгүй од гэж хэлэх байх. Би бол “Backstreet boys”-ыг шүтдэг.

-“Sync” хамтлагийн залуус чөлөөт цагаа хэрхэн өнгөрүүлдэг вэ?
-Бид сүүлийн үед цаг зав гарвал заал авч сагс их тоглодог болсон. Бас боулинг тоглож сурч байгаа. Мөн теннис гоё спорт. Сүүлийн үед төрөл бүрийн сэдэвтэй сонирхолтой кино ихээр гарах болсон. Дээр нь хөл бөмбөгийн талбай энд тэндгүй нээгдэж, тэнд цагаа өнгөрүүлэх нь элбэгшсэн. Залуучууд тэр бүр мэдэхгүй байх их хямдхан юм билээ. Энэ бүхнээр юу хэлэх гээд байна гэхээр өнөөгийн залууст чөлөөт цагаа зөв өнгөрөөх ийм олон боломжууд байдаг шүү гэдгийг л ойлгуулах гэсэн юм.

-Таны гангараа юу вэ. Үүнийг ямар ч утгаар ойлгож болно?
-Сайн мэдэхгүй юм. Би хувцасны тал дээр ямар нэг хэлбэр хөөж чаддаггүй. Бусад залуус гоё цаг, нүдний шил, гинжээр гангардаг гэж ярьдаг шиг би тэгдэггүй. Өдийг хүртэл би цаг зүүж чаддаггүй. Нүдний шил л зүүж үзээгүй, сураагүй. Яахав онцгой тохиолдолд нүд өвдөхөд ч юм уу зүүсэн байж магад.

Н.Оюундалай