тоглолтоороо хүүхэд багачууддаа бэлэг барих гэж байгаа. Түүнтэй ярилцаж хүүхэд насны дурсамжаас нь хуваалцсанаа хүргэе.

-“Хүүхэд насны дурсамж” тоглолтоо хийх гэж байна. Харин таны хүүхэд насны дурсамжаас уншигчидтайгаа хуваалцъя гэсэн юм.
-Би багадаа Налайх дүүрэгт байсан л даа. Бүтэн жилийн мөрөөдөл минь хүүхдийн паркаар зугаалж, усан завин дээр сууж, мангасын амаар гулгаж, амттай зайрмаг, алим, мандарин, баавгайтай чихэр авч идэх л байлаа шүү дээ. Тэр үеийн хүүхдүүдийн мөрөөдөл ийм л байсан. Бас хэрдээ их гангарна аа. Гоё даашинз, гутал, трико өмсөөд, үсний тууз зүүгээд аав, ээжтэйгээ вагон юм уу, автобусаар хотод ирж нэг өдөр тоглоод л буцдаг байсан. Тэр үед чинь дэг журамтай байлаа шүү дээ. Бүгд дугаарлаж зогсож байгаад л тоглоно, Жилд нэг удаа л ийм боломж олддог байсан. Тэр үе үнэхээр аз жаргалтай. Хүүхэд насны минь хамгийн амттай дурсамж байж дээ.

-Тоглолтын бэлтгэл ажил дуусч байна уу?
-Олон улсын хүүхдийн эрхийг хамгаалах өдөр буюу зургадугаар сарын 1-нд Монголын ирээдүй хойч үе болсон хүүхэд багачууддаа зориулаад “Хүүхэд насны дурсамж” тоглолтоо хийхээр төлөвлөөд бэлтгэл ажил дуусч байна. Тоглолт “Монголын хүүхдийн ордон”-д 15 цагаас болно. Надтай хамтраад Монголын хүүхдийн ордны авъяаслаг найрал дуучид болон хүүдийн “Segno”, “Magic”, “Angels” хамтлагууд, “Anemone” хамтлаг оролцоно.

-Тоглолтод хүүхдийн дуунууд дуулна гэсэн үү?
-Намайг жаахан байхад дуулагдаж байсан болон одоо дуулагдаж байгаа хүүхдийн дуунуудыг дуулна. “Галт тэрэг”, “Тагтаа”, “Өнчин цагаан ботго” гээд олон сайхан дууг хүүхдүүдтэй хамтарч дуулна.

-Та хүмүүнлэгийн үйлсэд хандив туслалцаа үзүүлдэг. Ялангуяа хүүхэд багачуудад. Энэ удаагийн тоглолт хандивын тоглолт гэдгээрээ онцлогтой байх?
-Тиймээ. Энэ бол хүүхдүүдийнхээ сайн сайхан ирээдүйн төлөө хийж байгаа хандивын тоглолт юм. ЭНЭШТ-ийн амьсгалийн тасагт эмчлүүлж байгаа хүүхдүүдэд дуслын шахуурга, амьсгалийн аппаратыг худалдан авахад хандив тусламж үзүүлэх зорилготой юм. Эх нялхаст ганцхан аппарат байдаг юм билээ.

Өвөл утаа униараас болоод амьсгалын аппарат их хэрэг болдог. Үнэхээр ч тус эмнэлгээр очиход хүүхдүүд нь өрөө хүрэлцэхгүй шалан дээр хэвтчихсэн байгааг харахад эх хүний хувьд үнэхээр элэг зүрх эмтэрч байсан. Хорт утаанаас болоод хүүхдүүд амьсгалын замын өвчтэй болж байгаа нь маш их харамсалтай байна. Тиймээс би улс орны ирээдүй болсон хүүхэд багачуудаа өвчтэй ирээдүй болгохгүйн төлөө олны дуу хоолой болж, жаахан ч болтугай дохио өгөх үүднээс энэхүү тоглолтыг зохион байгуулж байна.

-Та урлаг, бизнес, хүмүүнлэгийн үйл ажиллагаа гээд ажил ихтэй байдаг хүн. Ер нь гэр бүлдээ цаг зав хэр гаргадаг вэ?
-Сүүлийн үед хүүхдүүддээ цаг зав гаргахаа бүр больсон. Тоглолтын бэлтгэл хийгээд шөнө дунд гэртээ ирдэг болоод байгаа. Том хүүг минь жолооч сургуульд нь хүргэж өгөөд аваад байдаг. Бага нь гэртээ. Хэзээд би өөрийнхөө үр хүүхдэд анхаарал тавьж чадна. Харин энэ хийж байгаа зүйл маань олон нийтэд ач тусаа өгч, буян болох л чухал гэж боддог юм. Бид уул, уурхай, газар дэлхийгээ аваръя гээд л яриад байдаг.

Харин хүүхдүүдийнхээ ирээдүйн төлөө, тэдний эрүүл мэндийн төлөө анхаардаггүй. Утаанаас болоод тэгнэ ингэнэ гээд л яриад байдаг. Бодитой арга хэмжээ авахгүй байсаар байтал, хэдийнэ хорт хавдартай хүүхэд төрөөд эхэлсэн байна. Эх хүний хувьд би хүүхдүүд минь яах бол гэхээс айдастай байна. Бас эмзэглэж байна. Үүнийг сонсоод тайзан дээр гараад дуулах хэцүү санагдаж байна л даа. Саяхан нэг сонин дээр хүүхдийнхээ хоёр гарыг хугалаад муруй эдгээчихсэн ээжийн талаар гарсан байна лээ. Ингээд бодохоор Монголд хичнээн хүүхэд далд дарамтанд амьдарч хичнээн хүүхэд эрхээ эдэлж чадахгүй байгаа бол гэж бодохоор хэцүү санагддаг юм.

Тиймээс эх хүнийхээ хувьд иргэн хүнийхээ хувьд урлагийн хүнийхээ хувьд нүдээ аниад, чихээ дараад тайзан дээр гоё сайхан хувцас өмсөж дуулаад байх зохимжгүй. Мэдээж сайн нь муугаа дийлдэг хорвоод муу зүйлийг гаргаж ирэн шүүмжлээд, хамтдаа дуу хоолойгоо нэгтгээд, тэмцэх нь зүйтэй юм биш үү гэх үүднээс энэхүү тоглолтыг зохион байгуулж байна.

-Сүүлийн үед хатан ухаан, хаан ухаан гэж их ярьдаг болсон. Энэ нь ч үнэн юм шиг. Таны бодлоор гэр бүлээ бат авч явахад эмэгтэй хүнээс хэр нарийн ухаан шаардах бол?
-Найз нөхдийн минь дунд “Нөхөртэй хүн нөр их хөдөлмөр” гэж ярьдаг болчихоод байна шүү дээ. Энэ гэр бүлийг сайн сайхан авч явахад эмэгтэй хүнээс асар их хөдөлмөр шаарддаг. Хатан ухаанаас ч илүү эр хүний ухаан хэрэг болдог. Энгийн жишээнээс харахад гэр орон өнгөтэй өөдтэй явах, хүүхдүүдээ хичээл сургуульд нь явуулах, гэр бүлийн хүний ажил төрөл нь хэр байна, амьдрал нь уруудаад байгаа юм уу, дэвшээд байгаа юм уу гэдгийг эмэгтэй хүн л олж хардаг.

-Бизнесийн салбарт хөл тавиад багагүй хугацаа өнгөрлөө. Студи байгуулж, Дива дэлгүүр нээсэн. Урлагийн салбар, бизнесийн салбар хоёрт ижил тестэй чанар байна уу?
-Энэ хоёр тэс ондоо зүйл юм билээ. Урлагийн хүмүүс бол өөрт байгаа бүхнээ хүнд өгч чаддаг. Инээж хөхөрч хүмүүст аз жаргал өгдөг. Гэрэл, гэгээтэй дээд тэнгэрээс заяасан элч нар гэж би хувьдаа боддог юм. Бизнесийн салбар бол хахир хатуу, өөрийн зүйлийг хаяж, урагшилж байж тэр их өрсөлдөөнөөс шалгаран амжилтад хүрдэг юм билээ. Би өөрийгөө бизнесмен гэж хэлэхгүй л дээ. Зүгээр бизнес хийх гэж сонирхож байгаа. Бизнес эрхлэгчид маш их хөдөлмөрч байх хэрэгтэй. Тэдэнд хэзээ ч аз гэж байдаггүй, харин бизнесийн ухаанаараа л амжилтад хүрдэг юм билээ.

-Нөхрөөсөө авсан хамгийн том бэлэг юу вэ?
-”Pro sound” студи авч өгсөн гэх зэргээр уншигчид мэдэж байгаа байх. Гэхдээ миний ажлыг ойлгож намайг дэмжиж, ар талын баталгаа болж өгдөг ханьдаа маш их баярлаж явдаг. Хань, хоёр хүүхдийн минь аав, амьдралын багана болсон хүн миний амьдралын хамгийн том бэлэг юм.

-Алтан толгойн чимэг бэлэглэж, энэ ч урлагийнхан дотроос хамгийн үнэтэй чимэглэлд тооцогдож байгаа гэж үнэн үү?
-Хань минь надад алтаар бүрсэн зүүлт бэлэглэсэн. Тэр үед тэр зүүлтийг 70 сая төгрөгийн үнэтэй гээд л шуугиад байсан. Тэр үед би нэг зүйл бодсон. Би чинь урлагийн хүн. 20-иод жил дууллаа. Тэгэхээр тийм хэмжээний зүйлийг эдэлж хэрэглэх эрхтэй гэж бодож байгаа.

-Гоёл чимэглэлийн зүйлд хэр анхаардаг вэ?
-Би өөрөө жижигхэн дэлгүүртэй шүү дээ. Түүнийхээ бараанд явах, мөн найз нөхдийнхөө дэлгүүрээр орж гарахдаа санаанд таарсан зүйлээ худалдаж авдаг, Нээрээ би дэлгүүр нээснээс хойш их олон дэлгүүртэй найзтай болсон шүү.

-Эмэгтэй хүний чимэг юу байж болох вэ?
-Эмэгтэй хүн бол цэцэг шиг амьдрах хэрэгтэй. Цэцгийг услаад тордоод байхаар ямар сайхан болдог билээ. Түүнтэй адилхан шүү дээ. Хайр, энхрийллээр дүүрэн байвал цэцэг шиг ургаад, дэлгэрээд л байна.

-Эмэгтэй хүн гоо сайхнаа хэд хүртлээ хадгалж чадах бол?
-Эмэгтэй хүнийг гучин нас хүрэхээр л хөгширлөө гэж яриад байдаг. Тэгэхээр нь уур их хүрдэг. Энэ бол цэл залуу нас шүү дээ. 30, 40 нас хүрсэн ч залуу сайхан хэвээрээ л байдаг шүү дээ. Эмэгтэйчүүд хэдэн настай болсон ч гоо сайхан нь үргэлж хэвээрээ үлддэг. Миний хувьд би одоо л сайхан цэцэглэж , хөгжих насандаа явж байна.

-Танд уран бүтээлийн өндөр амжилт хүсье.

Х.Соёл-Эрдэнэ

нийслэл таймс

Ж.Алтанцэцэг: Эмэгтэй хүн цэцэг шиг амьдрах хэрэгтэй
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Хувцаслалт, имижээ анхаарах хэрэгтэй. Нэг л хөдөө стилтэй. шинэ баян цээж баян маягийн ярилцлага болж....

2011-06-01 | 20:30:03 | 77.6.149.237 |

Зочин
ПАНАЛТАЙ ПАНТАЗ ХҮҮХЭН

2011-06-01 | 16:02:43 | 202.179.13.126 |

Мэдээ
Гадаад мэдээ
Видео