Гэтэл Монголын эрүүл мэндийн ажилтны үйлдвэрчний эвлэлийн холбооныхон үүнийг эсэргүүцэж, өнөөдрөөс жагсаал, цуглаан хийхээ мэдэгдээд байна. Эрүүл мэндийн тухай шинэ хуулийн ямар заалтаас болж эмч, эмнэлгийн ажилчид бухимдаж, ажил халх болов. Энэ талаар Эрүүл мэндийн сайд С.Ламбаагаас тодрууллаа.
-Зарим эмч, эмнэлгийн ажилчдад шинэ хууль таалагдсангүй. Харин Эрүүл мэндийн сайд ямар бодолтой байгааг сонирхмоор байна?

Би хувьдаа үйлдвэрчний байгууллагаас зохион байгуулаад байгаа ажил хаялт, суулт зэрэгтэй санал нийлэхгүй байна. Монгол Улсын Их хурлаас батлагдсан Эрүүл мэндийн тухай шинэ хуульд эмч нарын эрхийг боомилсон заалт ороогүй. Гэтэл тэр суулт зарлана, ажил хаяна гээд байгаа хүмүүс эмч нарт оногдуулах торгууль өндөр байна гэсэн.
-Тэгэхээр "Эрүүл мэндийн тухай хууль"-ийн шинэ заалтад чухам юу гэж тусгагдсан бэ. Эмч нарт оногдуулах торгууль тэдний хариуцлагатай холбоотой гэж ойлгож болох уу?

-Жишээ нь эмч хүн өөрийнхөө мэргэжлийг буруу зүйлд ашиглаж болохгүй. Нэг жишээ хэлье л дээ. Өнөөдөр үр хөндөлтийн тухай асуудал яригдсаар л байна. Мэргэжлээ ашиглаад, мөнгө олохын тулд үр хөндөлт хийгээд явж бай-гаа бол юун цалингийн 10-15 хувиар торгох манатай.Тэрнээс илүү өндөр хувиар торгож л таарна.Торгохоос ч өөр аргагүй. Эрүүгийн хэрэг үүсээгүй, шүүхээр шийдэгдээгүй тохиолдолд торгодог тогтолцоо нь байж байдаг. Би хувьдаа торгуулийн тогтолцоо гэдэг бол эмч нарын хариуцлагатай байх тухай асуудлыг л өөрсдөд нь ногдуулж буй хэрэг гэж ойлгож байгаа.Тэрнээс нэг буруу юм хийнгүүт л торгоод байна гэсэн үг биш. Өнөөдрийн мөрдөгдөж ирсэн Эрүүл мэндийн тухай хууль 10.000 60.000 төгрөгийн хэмжээ-тэй торгуультай байсан. Энэ хууль 1994 онд батлагдсан. Тухайн үеийн тогтоосон 10-60 мянган төгрөгийн торгууль одоо юу юм бэ. Өнөөдрийнхөөр энэ торгууль 10-60 сая төгрөг байх ёстой.

Торгуулийн хэмжээг Эрүүл мэндийн яам, Засгийн газарт оруулахдаа уг нь мөнгөөр оруулсан. Ингэхдээ 150-200 мянга, 300-400 мянган төгрөг гэж оруулсан. УИХ дээр яригдаад торгуулийг хөдөлмөрийн хөлсний доод хэмжээтэй уялдуулсан. Одоо ер нь бүх хууль тэгж гардаг болсон л доо.Тэрэнтээ уялдуулаад хөдөлмөрийн хөлсний доод хэмжээг тав, арав, 15, 20, 25 дахин гэж хуульчилсан. Үүнийг эсэргүүцээд байгаа хүмүүс бол зүгээр л эмч, сувилагчдыг торгох юм шиг яриад байх юм. Уг нь хариуцлага алдах юм бол эмч нь ч, байгууллага нь ч торгуулна.Тэр байтугай иргэн хүн эрүүл мэндийн салбарын тавьсан шаардлагыг хэрэгжүүлээгүй байхад хөдөлмөрийн хөлсний доод хэмжээний 10-20 хувиар торгуулахаар л байсан байгаа шүү дээ.

Үүнийг өвчтөний түүх, оношны тал дээр жаахан л алдаа гаргахад торгох гэж байна гээд яриад байх юм. Уг нь тэр жаахан алдаанаас болж хүн амь насаа алдахыг үгүйсгэх аргагүй.Тийм учраас миний хувьд УИХ-ын гишүүдийн эмчийн хариуцлагын торгуулийн хэмжээг өндөр тогтоосныг дэмжиж байгаа. Ер нь хийж байгаа юмыг эсэргүүцэж болно. Өөрсдийн хариуцлагын тухай асуудлыг мөн л хүлээж авч сурах хэрэгтэй юм.
-Тэгвэл олон улсын жишигтэй хэр нийцсэн хууль болсон гэж?

-Олон улсын түвшинд хийгдсэн хууль мөн үү гэвэл мөн. Гэхдээ Монгол Улсад цалин хөлс нь бага юм чинь өвчтөний оношилгоог буруу тавьж, олон улсын хэмжээний тоног төхөөрөмж байхгүйгээс муу эмчилж, алдаа гаргаж, цалин бага учраас хариуцлагагүй ажиллаж болно гэсэн юм байхгүй. Өнөөдөр эрүүл мэндийн салбарт ажиллаж байгаа хүмүүс хүний амь насыг хамгаалж байгаа гэдэг утгаараа хариуцлагатай байх ёстой. Одоо бодит амьдрал дээр эмчийн хариуцлагагүйгээс үүдэлтэй зөрчлүүд зөндөө гардаг болж. Үр хөндөлт хийж байгаад хүний аминд хүрсэн тохиолдол хоёр ч удаа давтагдсан.Үүнээс гадна онош буруу тавьснаас болж ингэлээ, тэглээ гэсэн өргөдөл, гомдол тасардаггүй.
-Монголын эрүүл мэндийн ажилтны үйлдвэрчний эвлэлийн холбооныхон зарим заалтууд хэт хатуудсан хууль болсон гэж байна. Үүнд ямар хариулт өгөх вэ?

-Жагсаал, цуглаан хийнэ гээд байгаа хүмүүс Эрүүл мэндийн тухай хуульд эмчилгээ, сувилгаа хийнэ гэсэн мөртлөө түүнийгээ зөрчсөн бол торгоно гэсэн заалтыг буруу гээд байгаа байхгүй юу. Мөн гудамжинд хүн ухаан алдсан байлаа гэхэд эмч аваад ирсний төлөө торгуулна гэж хуульд заасан мэтээр хүмүүсийн тархийг угаагаад байна. Юу ярьж байгаа юм бэ. Заалт нь тов тодорхой байгаа.Төрөх, гэнэтийн осол, гэмтэл, хүн ухаан алдаж унасан байхад иргэн хүн ч, эмч ч ямар нэгэн байдлаар эмнэлгийн тусламж үзүүлсэн байх ёстойг заасан. Харин тэр заалтан дотор тухайн өвчтөн буруу эмчилгээ хийлгэх гээд шаардаад байвал татгалзах л заалт тусгасан.Тийм учраас би энэ хуулийг маш чухал хууль болсон гэж үзэж байна.Тэрнээс шинээр батлагдсан хуульд эмч нарыг боомилсон юм байхгүй. Хариуцлагатай эмч нарын хувьд энэ хууль ямар нэгэн бэрхшээлгүй. Харин хариуцлагагүй, ард түмний өмнө хүлээсэн тангарагтаа үнэнч бус эмч нарт энэ хууль хатуудсан байж магадгүй л юм.

С.Ламбаа: Тангарагтаа үнэнч бус эмч нарт шинэ хууль хатуудсан байж магадгүй
Tweet
Bolod.mn