Цонхыг нь хааж байшин барьдаг ажил үргэлжилсээр байна

2011-06-09

-ОДОО ХОТЫН ДАРГЫН ГЭРИЙН ЦОНХЫГ ХААЖ БАРИХ Л ҮЛДЭВ БОЛОЛТОЙ-

Орон сууцны цонх хааж барилга барих гэснээс үүдэн оршин суугчид болон барилга бариулах гэж буй иргэн хоёрын хооронд маргаан үүсчээ. Эл маргаан Баянзүрх дүүргийн 25 дугаар хорооны нутаг дэвсгэр 111 дүгээр сургууль 63 дугаар байрны хооронд дахь газарт барилга барих гэснээс үүссэн аж. Одоогоор 63 дугаар байрны оршин суугчид эсэргүүцэж барилгын ажлыг түр зогсоогоод байгаа юм байна. Газар дээрээ байдал ямар байгааг сурвалжиллаа.

Барилга барих гэж буй газар нь иргэн Ш.Уранчимэг гэх хүний хувийн эзэмшлийнх аж. Барилга барих гэж буй хоёр байшингийн хоорондох газрыг хашаалжээ. Хашааны зүүн хэсэгт манаачийн гэр байрлана. Барилгын ажил дөнгөж эхэлж байсан бололтой байшингийн суурийг хагас дутуу цутгасан байлаа. Газраа тойруулж хатгасан хашааны хоёр талд нь машин орох зориулалттай хаалга гаргажээ. Харин хаалганы гадна талд их хэмжээний шороо овоолж асгасан байлаа. Уг шороог 63 дугаар байрны оршин суугчид барилга бариулахгүй хэмээн эсэргүүцэн асгажээ. Баригдаж буй барилга 63 дугаар байр хоёрын дунд ердөө тав зургаахан алхмын зай л байв. Хэрэв барилга баригдвал хоёр байрны тагттай айлууд нэг нэгнийх рүүгээ дамжаад орчих шахам тийм л ойрхон байгаа харагдав. Гадна талын харагдах байдал ийм байлаа.

Биднийг очиход барилга бариулахыг эсэргүүцсэн 63 дугаар байрны оршин суугчид ид цугласан байв. Тус байрны оршин суугч Л.Гансүхээс цөөн асуултад хариулт авлаа. Л.Гансүхийн гэрийнх нь цонх хойшоо харсан байрлалтай, нар тусдаггүй гэнэ. Дээр нь нэмээд харалдаа хойд талд нь барилга барьчихвал таг харанхуй болох аж.

-Үүсээд байгаа нөхцөл байдлын талаар тодорхой тайлбар өгнө үү. Танай байрны харалдаа хойд талд барилга барих үйл ажиллагаа хэзээ эхэлсэн бэ?

-Өнгөрсөн оны наймдугаар сараас барилга барих ажил нь эхэлсэн. Газраа ухаж тэгшлээд суурийн хэсгийг цутгах ажил хийсээр аравдугаар сар хүртэл үргэлжилсэн юм. Тухайн үед дуу чимээ ихтэй, гэртээ амгалан тайван байх ямар ч нөхцөл байгаагүй. Оршин суугчид бид эсэргүүцэж Мэргэжлийн хяналтын дүгнэлт гаргуулан байж ажлыг нь зогсоосон.

-Тэгээд яав?

-Гэтэл энэ жилийн зургадугаар сарын 2-ны өдрөөс эхлэн дахиад үйл ажиллагаагаа эхлүүлсэн. Манай байрны оршин суугчид, тэр дундаа хойшоо харсан цонхтой айлуудын хүмүүс бид эсэргүүцэж машин ордог зам дээр нь шороо асган байж ажлыг нь зогсоолоо. Одоо эрх бүхий байгууллагуудад өргөдлөө гаргаад явж байна. Хэрэв энд барилга барьсан тохиолдолд хоорондын зай хэт ойр учир хойшоо харсан айлуудын цонхыг бүрэн хаана. Мөн манай байрны бат бэх байдалд нөлөөлнө. Нөлөөлөөд ч эхэлсэн байгаа. Хойшоо харсан цонхтой айлуудад нар тусахгүй, өдрийн цагаар гэрэл муу байдаг. Дээр нь нэмээд яг наалдуулаад барилга барих гэж байна. Цаашид бид байраа зарах шаардлага гарвал хэн ч авахгүй шүү дээ. Тэгэхээр оршин суугчид бид л хохироод үлдэнэ. Уг нь энэ асуудлыг мэргэжлийн байгууллагууд анхнаас нь зохицуулалт хийж гэрчилгээ олгох ёстой байсан байх. Хоорондоо тав зургаахан алхмын зайтай газар 10 гаруй давхар хоёр барилга барих зөвшөөрөл олгож л байдаг.

-Газрын эзэнтэй уулзсан уу. Ямар хариу өгч байна?

-Уулзсан. Газрын эзэн нь Ш.Уранчимэг гэдэг эмэгтэй бий. Тэрээр бидэнд нэг л зүйлийг хэлдэг. "Би өөрийн хувийн өмчийн газар дээрээ юу барих нь миний эрх. Та нарт хамаагүй. Барилга барих зөвшөөрөл, бичиг баримт нь гарчихсан байгаа" гэдэг.

-Барилга барих зөвшөөрлийн бичгийг нь үзсэн үү?

-Зөвшөөрөл, бичиг баримт байгаа, гарчихсан гэдэг хэрнээ бидэнд огт үзүүлдэггүй. Өнгөрсөн бүтэн сайн өдөр оршин суугчид эсэргүүцээд барилга барих ажлыг нь зогсоох үед маргаан үүссэн. Тухайн үед газрын эзэн Ш.Уранчимэг цагдаа дуудсан юм. Цагдаа нар ирээд Ш.Уранчимэгээс барилга барих зөвшөөрлөө үзүүл гэхэд "Одоо энд байхгүй гэрт байгаа" гэж байсан. Яг үнэндээ барилга барих зөвшөөрөл байгаа эсэх нь эргэлзээтэй.

-Энэ газарт хэдэн давхар барилга барих гэж байгаа юм бол?

-Өнгөрсөн жил лав 12 давхар барилга барина гэж байсан. Дараа нь таван давхрыг бариулна гэж дуулдсан. Харин энэ жил ажлаа эхлүүлэхдээ подвальтайгаа нийлээд гурван давхар барилга барина гэж байсан. Гэхдээ худлаа даа. Нэг, хоёр давхрыг барина гэж байгаад л дээш нь нэмээд байх байлгүй.

Мэдээллийг тэнцвэртэй хүргэх үүднээс газрын эзэн Ш.Уранчимэгээс цөөн асуултад хариулт авлаа.

-Одоо барилга барих гэж буй газраа хэдэн онд хувьчилж авсан юм бэ. Барилга барих зөвшөөрөл байгаа юм уу?

-Би газраа 2000 онд хувьчилж авсан. Тухайн үед тэр хавьд байшин барилга баригдаж эхлээ ч үгүй байсан. 63 дугаар байрны газрын эздүүд нь 2007 оны таван сард хятадуудад газраа зараад явчихсан юм билээ. Харин би болохоор 2007 оны хоёрдугаар сард 12 давхар барилга барих захирамжтай зөвшөөрлөө авчихсан байсан. Хятадууд бол хөрөнгө ихтэй хүмүүс шүү дээ. Нүд ирмэхийн зуур л 63 дугаар байрыг барьчихсан. Гэхдээ миний өмчилж авсан газраас гурван метр газар аваад барьчихсан байсан. Тухайн үед би Мэргэжлийн хяналт дуудаад барилга барих ажлыг нь зогсоолгоод акт тавиулж л байлаа. Тэгсэн ч хөрөнгө ихтэй гадны хүмүүс дээгүүр нь зохицуулаад 63 дугаар байрыг бариулж орхисон. Үндсэндээ 63 дугаар байрны хана, тагт нь манай газар дээр байгаа.

Би бол хувь иргэн хүн. Шууд л 12 давхар барилга барих хөрөнгө надад байхгүй.

Баригдаж буй барилга 63 дугаар байрны оршин суугчдын эрх ашгийг зөрчөөд байгаа юм биш үү. Мөн барилга хоорондын зай ойрхон, стандартад нийцэхгүй, барилгын ажлын үеэр дуу чимээ ихтэй гэж оршин суугчид эсэргүүцэж байгаа гэсэн?

-Эрх ашиг гэвэл миний ч эрх ашиг зөрчигдөж байна. Би Монгол Улсын иргэн. Өөрийн өмчилж авсан газартаа юу ч барьж байгуулж болно. Арван давхар байшинтай тэнцэх хашаа ч барьж болно. Тийм биш гэж үү.

-Яг хэдэн давхар байшин барих гэж байна. Ямар зориулалтаар ашиглах вэ?

-Уг нь 12 давхар орон сууцны зориулалттай барилга барина гэж зургийг нь хийлгэсэн. Дараа нь таван давхар болсон. Харин одоо бол хоёр давхар үйлчилгээний зориулалттай байшин барих гэж байна. Би уг нь анх 12 давхар барилга бариулах зургаа 15x27 хэмжээтэй хийлгэсэн. Гэтэл одоо багассаар 11x21 хэмжээтэй болсон. 63 дугаар байрны оршин суугчдад байрандаа ороход нь анхааруулж хэлж л байсан. Хойд талын энэ газарт 12 давхар байшин баригдана шүү гэж. Гэхдээ надад тэр хүмүүсийг хохироох бодол, сонирхол ч алга. Би зөвхөн өөрийн өмчийн газар дээрээ байшин барих гэж буй жирийн л нэг монгол эмэгтэй хүн гэв.

Орон сууцны цонх хааж барилга барина, бариулахгүй гэх иргэдийн маргаан эцэстээ ямар байдлаар төгсөх нь эргэлзээтэй байна. Одоо хотын дарга нарын гэрийн цонхыг хааж баривал л энэ асуудал нэг юм төр засгийн анхааралд очиж магадгүй гэж оршин суугчид ярьж байна лээ.

А.БИЛГҮҮН

"Мэдээ мн"