Монгол улсын Татварын ерөнхий газраас энэ сарын 15-25-ныг дуустал зарласан “Соёлтой харилцаа-Инээмсэглэл” аяны хүрээнд аймгийн Татварын хэлтсээс байцаагчдынхаа харилцааны ур чадвар, үйлчилгээний талаархи санал асуулга, үнэлгээг 380 татвар төлөгчдөөс авч дүнг холбогдох газарт хүргүүлсэн байна.

Мөн тус хэлтсээс аймгийн ТХОХЗАлбаны Дорнод салбартай хамтран шинэчлэгдсэн авто тээврийн болон өөрөө явагч хэрэгслэлийн албан татварын хууль, шинээр батлагдсан “Агаарын бохирдлын тухай хууль”-ийг сурталчилах, татвар төлөгчдийн бүртгэл, ногдуулалт, хураалтын ажлыг эрчимжүүлэх, хуулийн хугацаанд татварыг бүрэн хураан барагдуулах ажлыг зохион байгуулжээ.

Уг ажлын хүрээнд аймгийн төвд 4468 татвар төлөгчөөс 152.8 сая төгрөгийн, Гурванзагал, Чойбалсан, Сэргэлэн сумын 432 татвар төлөгчөөс 7.5 сая төгрөгийн татварыг хураан авч төсөвт төвлөрүүлснээс гадна татварын хуулийн талаархи гарын авлага зөвлөмжийг иргэдэд түгээжээ.

Хэмжил зүйчид ажил өрнүүлжээ

Аймгийн Стандарчилал хэмжил зүйн төвийн хамт олон аймаг байгуулагдсаны 80 жилийн ой угтаж байгууллагынхаа гаднах өнгө үзэмжийг сайжруулах зорилгоор гэртүүлэг нэмж, цэцгийн мандал байгуулан, 35 ширхэг мод тарьсан бол ажилтан албан хаагчдын нэг өдрийн цалинг “Аймаг хөгжүүлэх сан”-д төвлөрүүлжээ.

Түүнчлэн шефийн холбоотой Гурванзагал суманд удахгүй зохион байгуулагдах Манлайбаатар Дамдинсүрэнгийн 140 жилийн ойг тэмдэглэн өнгөрүүлэх ажлын комисст багтан ажиллаж байна.

Тус хэлтэс энэ онд шинээр улсын шалгагч 1, техникч 1 хүнийг авч ажлын байр нэмэгдүүлэн стандартчилал хэмжил зүйн үйлчилгээг иргэдэд чирэгдэлгүй, түргэн шуурхай үзүүлүүлэх зорилт тавин ажиллаж байна.

Цэнгэлдэх хүрээлэнг засварлаж байна

Ирэх 07 дугаар сарын 29-30-ны өдрүүдэд Дорнодчууд бид аймгийхаа түүт 80 жилийн ойг ёслол төгөлдөр тэмдэглэн өнгөрүүлэхээр иргэн бүр бүхий л хүч бололцоогоо дайчлан ажиллаж байна. Жилдээ наадамчин олны хуран чуулдаг төв цэнгэлдэх хүрээлэн анх баригдсан цагаасаа хойш олон арван зуны дэлгэр наадмыг олны хөлд дарагдан үдсээр ирсэн билээ.

Энэ онд түүхэн ой тохиож буйтай холбогдуулан аймгийн төсвөөс баталсан 144 сая төгрөгийн өртөг бүхий сэргээн засварлах ажлыг “Аригүн”-ХХК-ны хамт олон 20 гаруй хүний бүрэлдэхүүнтэй хийж гүйцэтгэж байна. Ажлын явц 85 хувьтай явагдаж байгаа бөгөөд ирэх сарын 25-ны дотор аймгийн комисст хүлээлгэн өгөхөөр амралтын өдрүүдээр ч өдөр бүр өглөө 06-аас орой 22 цаг хүртэл уртасгасан цагаар ажиллаж байгаа тухайгаа тус компаны захирал бидэнд мэдээллээ.

Их засварын дүнд цэнгэлдэх хүрээлэнгийн үзэгчдийн судал бетоноор цутгагдан, гадна ханыг шинээр өрж, суудлын доод хэсэгт 18 худалдаа үйлчилгээний цэгүүдийг байгуулахаар зураг төсөл нь гарч графикийн дагуу ажлууд хийгдэж байна.

Бооёо Дорнодын нутгийн зөвлөлийн дарга болжээ

Авъяас чадвараараа өөрийн байтугай хамтлагийнхаа нэлээд хэдэн хүний амьдралыг хэнээс ч гуйхгүй аваад явчихдаг хэмээн бардам хэлдэг “Шинэ үе” продакшны захирал Бооёо саяхан Дорнод аймгийн нутгийн зөвлөлийн дарга болжээ.

Хошин урлагийнхан дундаа гайгүй сайн менежменттэй гэгддэг түүнийг хувьдаа компанитай хөрөнгө мөнгөтэй хүмүүсээр удирдуулаад нутгийн хөгжлийн төлөө гавьтай ажил хийгээгүй урьдын дарга нартай жишиж үзээд Дорнодчууд даргаараа сонгосон гэнэ.

Харин Бооёо өөрөө төдийлөн дуртай байгаагүй ч аавынх нь нутгийнханы түүнд үзүүлж байгаа итгэл зүтгэлийг бодоод аргагүй зөвшөөрсөн аж. Дашрамд хэлэхэд урлагийн хүнээр нутгийн зөвлөлөө удирдуулж байгаа аймаг одоогоор Дорнодоос өөр байхгүй гэнэ.

Шоу бизнесийн талд толгой өвтгөдөггүй түүний сэргэлэн толгойг нутгийнхаа хөгжлийн төлөө зүтгүүлээд үзье гэсэн Дорнодчууд хүн танихдаа муугүй бололтой.

Ургац алдах аюул нүүрлээд байна

Энэ онд газар тариалангийн салбарт техник технологийн бүрэн шинэчлэл хийгдэж “Халх буудайн цацал” ХХК 1000 га-д усалгаатай тариалангийн VALLEY фермийн 5 услалтын системд 1.9 тэрбум, техник тоног төхөөрөмжийн шинэчлэлд 2.1 тэр бум, 800 га-д усалгаагүй тариалан эрхэлж орон нутгаас үндсэн болон туслах ажилчнаар 52 хүнийг, Алтай групп ХХК техник тоног төхөөрөмжийн шинэчлэлд 4.0 тэрбум төгрөгийн хөрөнгө оруулалтыг хийжээ.

Хаврын тариалалтын чанарыг соёололтоор нь хүлээн авах ажлыг зохион байгуулах ажлын хүрээнд ХХААЖДҮГазрын даргын баталсан удирдамжийн дагуу 2011 оны 6 сарын 18-22 хооронд Халх гол сумын 5 аж ахуй нэгж, Цагаан овоо сумын Зүүн дөрөө, Чойбалсан сумын Хавиргийн тариа бригадуудыг 9520 га талбайд 53 цэгээс тоололт хийж дүнг нэгтгэн гаргасан байна.

Энэ жилийн соёололт өмнөх оны уриншийн чанар сайн байсан аж ахуй нэгжүүдэд 250-310 ш/м2 байсан бол хаврын хагалгаа болон цэвдэгш боловсруулалтын талбайд хийсэн аж ахуй нэгжүүдэд 100-150 ш/м2 байгаа нь тариалангийн технологи болон тариалалтын хугацаа алдсантай холбон дүгнэж байна. Халх голын районд тариалсан улаан буудайн соёололт жигд байгаа ч 2011 оны 04 дүгээр сарын 10-ны өдрийн 4.2 мм, 2011 оны 06 дугаар сарын 2-ны өдрийн 2.9 мм тунадаснаас өөр чийг байхгүй хаврын чигээрээ соёолсон байгаа нь цаашид агаарын болон хөрсний гандалт 7-14 хоног үргэлжилвэл ургац бүрэн алдах аюул нүүрлээд байна.

2011 оны 6 дугаар сарын 22 өдрийн хур тунадасны үүлэнд УЦУОШТөвөөс явуулын ексипидиз очиж нөлөөлсөн боловч агаарын болон хөрсний хэт халалтаас үүлний хуйлралын чиглэл өөрчлөгдөж 5 удаа сум тавьсан боловч огт үр дүн өгсөнгүй. Тухайн үед Халх гол суманд 17 тал хээрийн түймэр байсан нь агаарын болон хөрсний хэт халалт үзүүлж үүлэнд зориудаар нөлөөлөхөд эсрэг үр дүн өгсөн.

Цаашид дээрх асуудлыг орон нутгаас УЦУОШГазар, ХХААХҮЯамны түвшинд уламжлан Халхгол суманд ойрын хугацаанд үүлэнд зориудаар нөлөөлөх экспидиз байгуулах саналыг Засгийн газрын түвшинд шийдвэрлүүлэх шаардлагатай байна. Үүний үндэслэл нь аймгийн УЦУОШ Төвөөс үүлэнд тандалт хийн, газар дээрээ очиход аймгийн төвөөс 360 км зайд 5-6 цаг явж очин зардал цаг хугацаа ихээр алдаж байгаатай холбон тайлбарлаж байна.

Хууль зүйн хэлтсээс мэдээлэл хийв

Өнөөдөр буюу 06 дугаар сарын 27-ны өдрийн аймгийн удирдах ажилтны “Шуурхай хурал”-д аймгийн ЗДТГ-ын ХЗХ-ээс мэдээлэл хийв. Мэдээлэлдээ Чойбалсан хотноо энэ сарын 23-24-ний өдрүүдэд зохион байгуулагдсан “Гэмт хэргээс урьдчилан сэргийлэх ажилд олон нийт цагдаагийн хамтын ажиллагааг идэвхижүүлэх” сэдэвт ажлын хүрээнд Монгол улсын Хууль зүй, дотоод хэргийн яам, Цагдаагийн ерөнхий газар, Хууль зүйн хэлтэс хамтран сумдын Засаг дарга, Хяналт шинжилгээний ажилтан, хэсгийн төлөөлөгч, олон нийтийн байцаагч, ухуулагч нарт сургалт зохион байгуулагдсан тухай багтаасан байна.

Мөн энэ үеэр агентлагуудын удирдлагуудад улсын хэмжээнд дагаж мөрдөж буй хэм хэмжээний шийдвэрийн хүчин төгдөлдөр мөрдөгдөж буй жагсаалтыг танилцуулав. Үүнд:

-Монгол улсын сайд нарын хэм хэмжээ тогтоосон хүчин төгөлдөр шийдвэрийн жагсаалт 233

-Засгийн газрын агентлагийн дарга нарын хэм хэмжээ тогтоосон хүчин төгөлдөр шийдвэрийн жагсаалт 305

-Аймаг, нийслэлийн Засаг дарга нарын хэм хэмжээ тогтоосон хүчин төгөлдөр шийдвэрийн жагсаалт 331 байгааг танилцууллаа.

Мөн “Төрийн мэдээлэл сэтгүүл”-ийн 22 дугаарт хэвлэгдсэн:

-Гамшгаас хамгаалах талаар төрөөс баримтлах бодлго, хөтөлбөр батлах тухай Засгийн газрын 2011 оны 22 дугаар тогтоол

-Үндэсний үйлдвэрлэлийг дэмжих талаар авах арга хэмжээний тухай Засгийн газрын 2011 оны 103 дугаар тогтоол

-Журам, чиглэл батлах тухай Засгийн газрын 2011 оны 104 дүгээр тогтоол зэргийн талаар дэлгэрэнгүй мэдээлэл өглөө.

Аймгийнхаа ойд бүтээн байгуулалтаар бэлэг барьж байна

Аймаг байгуулагдсаны түүхт 80 жилийн ойн хүрээнд тус аймгийн байгууллага аж ахуй нэгж, хувь хүмүүс олон талт бүтээн байгуулалтын ажлуудыг өрнүүлсээр байгаа.

Үүний нэг томоохон жишээ болох “Дорнод бүсийн эрчим хүчний систем”-ТӨХК-ний хамт олон дараах үндсэн 3 томоохон ажлуудыг төлөвлөн ажиллаж байна. Үүнд:

1. Компанийн нийт ажиллагсдын 1 өдрийн цалинг “Аймаг хөгжүүлэх сан”-д хандивлах;

2. 800 метр замыг засварлаж, замын гэрэлтүүлэг шинээр хийх

3. 200 ширхэг мод хотын төв зам дагуу тарьж, ургуулах гэсэн ажлуудыг эхлүүлэн дуусах шатандаа оржээ.

Дээрх зорилтынхоо хүрээнд 54-р байрнаас “Чандмань тал” ХХК хүртэлх төв зам дагуу улиас мод тарих ажлын хүрээнд 5-р сарын 31-нд тус компаний хамт олон мод суулгасан бөгөөд 520 мянган төгрөгийн өртөг бүхий 200 ширхэг улиас мод тарьж хайсжуулахад 400 гаруй ажиллагсад оролцжээ.

Мөн ажиллагсдын 1 өдрийн цалин буюу 8 сая төгрөгийг хандивлан, 6-р сарын 04-23-ны хооронд зам засах ажлыг хийж гүйцэтгэсэн бөгөөд 1000 метр.куб шороо, хайрга зөөвөрлөн тээвэрлэж, 800 метр замыг засварлан 3,8 сая төгрөг, замын гэрэлтүүлгийн ажилд 20 ком гэрэлтүүлгийн шон суулгаж, 1200 метр кабель монтажлан 3,5 сая төгрөг тус тус зарцуулжээ.

Дээрх бүх үйл ажиллагаанд тус хамт олон нийт 15.8 сая гаруй төгрөг зарцуулан их ойдоо томоохон бүтээн байгуулалтын ажлаар бэлэг барьж байна.