Ардын болон "ХУ" намыг толхилцуулж хүчгүйдүүлээд, АН-ыг ялалтад хүргэх ерөнхийлөгчийн төлөвлөгөө биелэлээ оллоо

2011-07-05

МАХН-ын нэрийг Улсын Дээд Шүүх баталж, улстөрийн нам хууль ёсны дагуу үйл ажиллагаагаа явуулах эрх нь

нээгдлээ. Хэдийгээр Үндсэн Хуулийн Цэцээс Улстөрийн намуудын тухай хуулийн 15.6-д заасан “нам энэ хуульд заасны дагуу нэрээ өөрчилсөн тохиолдолд түүний нэрийг дээрх шийдвэртэй санал нийлээгүй тус намын гишүүн болон бусад иргэн, хуулийн этгээд аливаа хэлбэрээр өмчлөх, үргэлжлүүлэн хэрэглэхийг хориглоно” гэсэн заалт нь Үндсэн хууль зөрчөөгүй гэсэн дүгнэлт гаргасан боловч энэ нь нэр булаацалдсан асуудалд цэг тавьсан хэрэг биш байжээ.

Дээрээ хөх тэнгэрээс өөр зүйлгүй гэж ярьдаг Цэцийн энэхүү дүгнэлтийг үл харгалзан МАХН хэмээх нэрийг албан ёсоор бүртгэж авсан Дээд шүүхийнхэн зөвхөн хуулиа баримталсан гэвэл эндүүрэл. Дээд шүүхийнхэн нэр хайрласан шалтгаанаа “хуулийн дээрх заалт нь өөр намын урд нь авч байсан нэрийг цоо шинээр байгуулагдаж байгаа нам дахин хэрэглэх тохиолдолд хамаагүй” гэж тогтоолдоо заасан аж.

Ингээд Н.Энхбаяр даргатай МАХН дахин мэндлээд үйл ажиллагаагаа явуулна хэмээн мэдэгдэж байна. Харин нөгөө талаас Ардын намын генсек У.Хүрэлсүх мэдэгдэл хийж, “МАХН бол хууль зөрчин байгуулагдсан. 90 жилийн түүх бол манайх шүү” гэдгээ хэлсэн. Хуульчид энэ хоёр намын нэр сонгосон, байгуулагдсан талаар байр сууриа илэрхийлдэг. Дээд шүүхээс гаргасан дээрх тайлбар нь МАН-д хамаатай. Уг нь 1992-2006 он хүртэл Ардын нам нэртэй төдийлөн олон гишүүн дэмжигчгүй жижиг нам оршин тогтнож байгаад таран бутарч, дарга нь албан ёсоор намуудын нэрийн бүртгэлээс хасуулсан байв. МАХН их хурлаараа намынхаа нэрийг МАН болгон өөрчлөх нь зүйтэй гэдэг шийдвэр гаргаад бүртгүүлсэн тул дээрх Ардын намд хамааралгүй. Энэ тохиолдолд намын нэрийг хэрэглэж болно гэж Дээд шүүхийн ах нар ч хэлсэн.

Гэтэл Н.Энхбаяр даргатай МАХН-ынхан бол хуучин намынхаа өөрчлөлтөд дургүйцсэн, үзэл бодол нийлээгүй, намаасаа салж өрх тусгаарласан нөхдийн нийлэмж шүү дээ. Тиймээс тэдэнд Улстөрийн намын тухай хуулийн 15.6 дахь заалт нь тохирч байгаа хэрэг юм. Харамсалтай нь Улсын хэмжээний хамгийн Дээд Шүүх нь энэхүү ялгааг “хайхралгүй” МАХН гэсэн нэрийг улсын бүртгэлд 19 дугаарт бүртгэж авлаа.

Хэдийгээр утга зохиолын ажилтан, сэтгүүлч, орчуулагч ч гэлээ Н.Энхбаяр төрийн гурван өндөрлөгийн албыг хашиж явсны хувьд хуулийн энэ жижиг ялгааг мэдмээр. Гэтэл батлалцаж байсан хуулиа зөрчин, Дээд шүүхийн тайлбарт сүслэж, “МАН ч гэсэн манайхтай адил байгуулагдсан. Унавал ч хамт, босвол ч хамт” гэж барьцаж байна. Түүгээр ч барахгүй намын нэрээ авсны дараах хэвлэлийн хуралд намдаа лидер гуйж, “2008 онд манай намын нэрээр сонгуульд оролцсон бүх хүн эргээд намдаа орох ёстой“ гэж мэдэгдэв.

Ху намынхаа төлөө үхтэлээ зүтгэнэ гэх хөгшчүүл голдуу гишүүнчлэлтэй МАХН-д дээрх мэдэгдэл нь хүнд цохилт болсон юм. Олигархуудаас арай гэж өрх тусгаарлачихаад, тэдний эсрэг тэмцэж, эрүүл нийгмийг бүтээн байгуулна гэж зорьсон хэрнээ эргээд тэднийгээ намдаа ор гэж гуйх шаардахын хооронд хэлсэн Н.Энхбаярын үгэнд гомдогсод олон байна. Тэд бүтэц нь ч тодорхой болж амжаагүй намынхаа удирдлагын эсрэг босоход бэлэн байгаа аж.

Гэтэл бас Хуулийн этгээдийн улсын бүртгэлийн тухай хууль гэж байнаа. Уг хуулийн 16 дугаар зүйлийн нэг дэх хэсэгт “хуулийн этгээдийн нэр өөр хуулийн этгээдийн нэртэй давхардсан эсэхийг холбогдох бүртгэх байгууллагаас шалгуулж баталгаажуулсан баримтыг үндэс болгож, шинэ намын нэрийг баталгаажуулна” гэчихсэн. Тэгэхээр Н.Энхбаяр МАХН-даа уг лавлагааг аваагүй байхад Улсын Дээд Шүүх бүртгэсэн нь бүр дээрээс өгсөн заавраар ажилласан гэж хардахад хүргээд байгаа юм. Энэ мэтчилэн хуулийн хүрээнд асуудлыг сөхөж харвал яах аргагүй Н.Энхбаярын намыг хуулиа зөрчин барин байж хүчээр бүртгэсэн нь тодорхой болоод байгаа юм.

Энэ алхмыг ажиглагчид янз бүрээр дүгнэдэг. Н.Энхбаярын нөлөө хууль хяналтынхан дунд байсаар байна гэж үзэх нэгэн байхад Ерөнхийлөгч Ц.Элбэгдорж өөрийн томилсон шүүхийнхэндээ заавар өгч, өрсөлдөгч намыг сандаргах нөхцлийг эхлүүл гэснийг ч үгүйсгэхгүй хүмүүс бий. Үнэхээр ч Ерөнхийлөгчийн тооцоолсон ёсоор МАХН-ын нэрийг бүртгэх хурал Улсын Дээд Шүүхэд болж байхад МАН-ын нөхөд гадна нь хүлээж байсан ба Мэдээллийн төвд хурал зарлахад нь Ардын намын Хэвлэлийн алба бүрэн бүрэлдэхүүнээрээ шахуу ирсэн байсан. “Үхсэн буурын толгойноос амьд ат айна” гэгчээр Ардын нам Н.Энхбаяраас үнэхээр айж сандарсан.

Сонгуулийн өмнөх жил ийнхүү улстөрд дахин орох шатаа тавьсан Н.Энхбаярын намд дагаар орох нууцхан хүсэлтэй гишүүд УИХ-д хэд хэд бий. Парламентад орж ирсэн арга нь, явуулсан үйл ажиллагаа нь бүгд буруудаж, ирэх жил яагаад ч ард түмнээс санал авч чадахгүй нь гэдгээ мэдэрсэн “Дүлзэн” царайтнууд удахгүй МАХН тийш цуврах нь. Учир нь Н.Энхбаяр одоогийн УИХ, Засгийн газрыг хурцаар шүүмжилж, буруу хийгдсэн Оюутолгойн гэрээг засах, Тавантолгойг зуун хувь ард түмний өмч болгох, олигархуудтай хариуцлага тооцох гэх мэт иргэдийн талд дуугарч байгаа тул сонгуулиар дэмжлэг авах магадлал өндөр.

Энэ аргаараа Ардын намаас “дундаж” голдуу гишүүдийг урвуулж, МАН-ын нэр хүндийг шороонд хутгах нь Н.Энхбаярын хувьд ялалтынхаа тал хувийг хийсэнтэй адил юм. Энэ тактикыг МАН-ынхан ч тааварласан. Гэхдээ тэд бүх гишүүдээ хянаж, толгой руу нь өнгийж чадахгүй.
Үүсэх энэхүү улстөрийн нөхцөл нь явж явж АН-д ашигтайгаар эргэх нь тодорхой. Ц.Элбэгдорж 2009 онд АН-аасаа нэр дэвших эрх олж, Монгол улсын Ерөнхийлөгч болгосон ачийг санаж ийнхүү улстөрийн нөхцөл байдлыг ардчилагчдад ашигтайгаар эргүүлэхэд нөлөөлсөн байхыг үгүйсгэхгүй.

Ямартай ч “Ху” нам, Ардын намынхантайгаа толхилцож, улстөрийн тавцанд өнгөлж яваа намыг хүчгүйдүүлэх нь сонгууль дөхсөн өнөө үед Ардчилсан Намд л ашигтай. МАХН-д, өөрөөр хэлбэл Н.Энхбаярын хар дэвтэрт Ардын намын лидерүүдийн эсрэг мянга мянган баримт байгаа. Тэрээр МАХН-ыг хүчирхэг болгож, сонгуулиар нэр нь танигдсан хүнийг өөрийн нэрээр сойхын тулд хэнийг “аварч”, хэнийг “унагахаа” мэднэ.

amidral.mn

Ардын болон "ХУ" намыг толхилцуулж хүчгүйдүүлээд, АН-ыг ялалтад хүргэх ерөнхийлөгчийн төлөвлөгөө биелэлээ оллоо
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
МАН ЗАЙЛ

2011-07-07 | 00:58:29 | 89.73.192.110 |

Зочин
Ерөнхийлөгч ер яасан юм бэ, баримттай ярьна шүү. Тэгэж амны зоргоор хуцахгүй шүү.

2011-07-05 | 17:49:37 | 121.161.243.24 |

Зочин
Элбэгдоржийг дахин согож хулихдуулахгүй байлгүй дээ Элбэгээ сайндаа биш нөгөө талд Загалмайлсан эцэг байсан учир ерөнхийлэгч болсон юм шүү дээ

2011-07-05 | 12:40:23 | 202.131.225.251 |