байцаалтад буцжээ. Энэ хэрэгт одоогоор 20 гаруй хүний нэр холбогдоод байгаа бөгөөд банкны дампуурлыг тодруулах хэд, хэдэн үндэслэл байна гэж прокурор үзжээ. Тухайлбал, "Анод"-ыг дампуурахаас өмнө Санхүүгийн зохицуулах хороо тус банкнаас нийтэд санал болгон гаргах хувьцааг бүртгэж авсан асуудлаас эхлэн шалгаж, тодруулах зүйл багагүй гарсан гэнэ. Иймд "Анод"-ын гурван захирлыг цагдан хорих хугацааг энэ сарын 1-нээс дахин сараар сунгаж, дээрх хэрэгт нэмэлт мөрдөн байцаалт хийж эхэлсэн байна. Харин бидэнд Санхүүгийн зохицуулах хороо тухайн үед "Анод" банкинд хувьцаа арилжаалах эрхийг олгох үед хийсэн хуралдааны протокол олдсон юм. Протоколын гол хэсгээс товчлон нийтэлж байна.

Протокол "Санхүүгийн зохицуулах хорооны 2008 оны дөрөвдүгээр сарын 18-ны өдрийн хуралдааны тэмдэглэл. Тэмдэглэл хөтөлсөн мэргэжилтэн Ж.Өнөрболд....20 дугаар асуудал сонссон нь:" хэмээн эхэлжээ. Цаашлаад "Анод" ХХК-ийг нийтэд санал болгон гаргах хувьцааг бүртгэх тухай тогтоолын төсөл, танилцуулгыг Үнэт цаасны газрын орлогч дарга Б.Аюуш танилцуулав. Хуралдаанд "Анод" банкийг төлөөлж гүйцэтгэх захирал Л.Уламбаяр, дэд захирал Энхцэцэг, Санхүү удирдлагын газрын дарга Чинбат нар оролцжээ. Хуралдаанд СЗХ-ны дарга Д.Баярсайхан гишүүн Б.Шаравсамбуу, Д.Дүгэржав, Ц.Цэрэнжамц, Б.Лхагвасүрэн нар оролцов.

Д.Баярсайхан: Зах зээл дээр мэдээллийг нь өгье, хувьцааны үнэ өсвөл яах вэ, буувал яах вэ?

Б.Аюуш: Өгье гэвч бид бүртгэж чадахгүй л дээ. Монголбанк зөвшөөрөхгүй. Өөрөөр хэлбэл, бодитой хөрөнгө оруулалт байхгүй. Хөрөнгө гэж хүлээн зөвшөөрөгдөөгүй юмыг өмч гэдгийг нь хүлээн зөвшөөрнө гэдэг нь утгагүй байгаа юм л даа.

П.Уламбаяр: Яагаад бүртгэж болохгүй гэж. Нэг талдаа дүрмийн сан нөгөө талдаа бэлэн мөнгө байгаа шүү дээ. Хувьцааны борлуулалтаас банкинд мөнгө орж ирнэ.

Б.Лхагвасүрэн: Биш ээ, биш. Тэр чинь бол нэмж гаргах хувьцаанаас чинь орж ирнэ шүү дээ.

П.Уламбаяр: Оны эхнээс гурван сарын гучин нэгний байдлаар "Анод банк"-ны цэвэр ашиг 3.1 тэрбум төгрөг болсон байгаа.

Б.Аюуш: Тэгвэл болж байна, ямар ч асуудал байхгүй. Дөрвөн сарын 1-ний балансаар 20 тэрбум төгрөг болчихсон бол хамаа байхгүй. Тэр нь даанч өнөөдөр энд алга л даа.

Д.Баярсайхан: Аюуш гуай хурал дээр өнөөдөр ийм юм яримааргүй байна.

Б.Аюуш: Надад ийм юм үзүүлээгүй шүү дээ. Дарга нь ч үзүүлээгүй, хянаж байгаа мэргэжилтэн нь ч үзүүлээгүй. Тэгээд ч энэ бол манайд анх удаа гарч байгаа практик юм л даа. Одоо бид сайн танилцаж авахгүй бол явчихсан хойно арга байхгүй шүү дээ.

Б.Лхагвасүрэн: Танай дүрмийн сан 13 болтлоо яаж явсан бэ. 2006 оны гуравдугаар сард найман тэрбум төгрөг болсон тэр бол ойлгомжтой. Тэгээд дараа нь яаж нэмэгдсэн юм бэ?

Д.Баярсайхан: Аюуш гуайгаас асууя. Банкин дээр эд нар арай өөр юм яриад байх шиг байна. Манайд "Монфреш" ороод ирчихсэн байгаа энэ дээр яах вэ?

Б.Аюуш: Адилхан юм байна лээ, дарга аа. Сүүлийн хэд хоногт энэ асуудал дээр анхаарсан. Манайд баланст тусгагдаагүй хөрөнгийг бүртгэх анхны тохиолдол байгаа юм. Иймд олон улсын практикийг харсан.

Д.Баярсайхан: Баланст тусгагдаагүй хөрөнгийг хөрвүүлэх гэж байгаа анхны тохиолдол биш. Бүр тэр битгий хэл баланс байхгүй юмыг үнэлээд хөрвүүлээд өгчихөж байгаа шүү дээ.

Б.Аюуш: Тэр бол Оюуны өмчийн газарт бүртгэгдчихсэн биет бус хөрөнгө юм. "Анод"-д бол тийм асуудал байхгүй. Сонинд гаргасан нэгдүгээр улирлын балансаар өөрийн хөрөнгө нь 20 тэрбум төгрөг хүрсэн байна.

Д.Баярсайхан: Тооцоонд чинь өөрчлөлт орохгүй юу?

Б.Аюуш: Нарийвчилсан жаахан зөрүү л гарах юм байна. Энд өөрийн хөрөнгө нь 25.5 тэрбум төгрөг, хоёрдогч өглөг нь 5.2 тэрбум төгрөг, хасаад өөрийн хөрөнгө нь 20.3 тэрбум төгрөг байна.

Д.Баярсайхан: Одоо тэгэхээр "Анод"-ын хувьд хэдэн сарын тайлангаа оруулж ирэх вэ гэсэн асуудал үлдэж байх шив дээ.

Б.Лхагвасүрэн: Бид хэд энэ гуравдугаар сар хүртэлх ашгийг нь хийгээд өгчихье. Одоогийн 51 хувийг эзэмшиж байгаа улсуудад хуваарилаад өгчихье. Оны эцэс болоход ашиг дахин хуваарилах гэсэн асуудал гарахгүй нь байна шүү дээ. Яагаад гэвэл өссөн дүнгээр явчихна.

П.Уламбаяр: Тийм байна.

Д.Баярсайхан: Ингэж асуудлыг шийдэж болох юм уу. Та нарын жинхэнэ хувь нийлүүлэгч, ТУЗ болон эрх бүхий улсууд нь байхгүй байдаг. Гэрээгээр ажиллаж байгаа компанийн удирдлагуудаас асуусан болно гэж хэлдэг. Бид зарчмын хувьд өнөөдөр шийдлээ гэхэд хувь нийлүүлэгчдийн шийдвэрээ гаргаж өгөх шаардлагатай.

Чинбат: Хувь нийлүүлэгчид ТУЗ-ийн хурлаар гүйцэтгэх захиралд хэлэлцэх эрхийг нь өгсөн.

Д.Баярсайхан: Хэлэлцэх эрхдээ гол нь биш, хүний өмчлөх эрх рүү чинь хамаагүй халдах гээд байна шүү дээ.

Б.Лхагвасүрэн: Хуваарилагдаагүй ашиг гэж гурван тэрбум төгрөг байна шүү дээ. Үүнийгээ сандаа хуваарилачихаад орж ирсэн бол ойлгомжтой.

Д.Баярсайхан: За хоёр дахь асуудал, сая бол зарчмын хувьд шийдвэл яах вэ гэсэн асуудал яригдлаа. Яагаад хороонд өгсөн материал дээр стратегийн хөрөнгө оруулагч гэдэг асуудалд яригдаад дунд нь бүтцийн өөрчлөлт ороод ирэв. Би "Түшиг" компанийг стратегийн хөрөнгө оруулагч гэж үзмээргүй л байх юм. Үүний нарийн учрыг хэлж өгөөч.

Л.Уламбаяр: Стратегийн хөрөнгө оруулагч гэдэг чинь арай урт хугацаагаар манай хувьцааг авна. Банкны мененжмэнтэд арай түлхүү оролцоно. "Шинан" банкны хувьд ойлгомжтой. Дэлхийд топ 100-д ордог банк.

Д.Баярсайхан: Би Солонгосын банкны тухай яриагүй. Хаанаас гэнэт "Түшиг" ороод ирэв ээ? Уг нь бүгдийг нь "Шинан"-д өгнө гэж байсан шүү дээ. Одоо хоёр хуваачихаж байна.

Л.Уламбаяр: Том хэмжээний үндэсний компани байвал зүгээр гэж үзсэн. Тэгээд бид нар одоо байгаа хувь нийлүүлэгчдэд санал тавьсан. "Стратегийн хөрөнгө оруулагчаар ороод ирээч. Бид хувьцаа гаргах сонирхолтой байгаа" гээд "Түшиг" компанитай ярилцсан.

Б.Лхагвасүрэн: "Шинхан", "Түшиг"-т өгөлгүй байж байгаад одоо та нар 49 хувиа гаргана. Түүний 24.5 буюу тал хувь нь хоёр стратегийн хөрөнгө оруулагчид очно. Үлдсэн 24.5 хувь хувьцаагаа нийтэд гарга гэж байгаа шүү дээ. Нийтэд нэрлэсэн үнэ нь 1000 төгрөг гээд гаргалаа гэж бодъё. Тэгтэл энд болж байгаа үйл явдал шиг 2000 - 3000 төгрөг болоод өсвөл нөгөө стратегийн хөрөнгө оруулагчид чинь хувьцаагаа зараад гараад явчихвал яах вэ. Тэдэнд бол бүр амар ч юм билүү?

Л.Уламбаяр: Бид гэрээ хийнэ. "Шинхан" банктай 2-3 жилийн гэрээ хийж байгаа.

Д.Баярсайхан: Бид нар шууд хоригловол яах вэ? Өөрөөр хэлбэл, дансыг шууд хаачихна гэсэн үг.

Л.Уламбаяр: Болно, угаасаа бидний байгуулсан гэрээнд тусгаж болно.

Д.Баярсайхан: Бид нар сая "Зоос" банк дээр хийсэн шүү дээ. Яагаад гэхээр энэ чинь хаалттай захиалгаар шууд өгчихөж байгаа учраас хувьцааны зах зээлийн үнэд шууд нөлөөлдөг.

Б.Лхагвасүрэн: Энэ хоёр хүн чинь хаалттай л авчих байхгүй юу. Хувьцааны үнэ өссөн нь хамаарахгүй.

Б.Аюуш: Багцын арилжаанд энэ хоёроос өөр хэн ч орохгүй. Тэгэхээр ямар нэгэн үнэ өсөхгүй. Санал болгосон үнээр чинь авчихна гэсэн үг.

Ц.Баярсайхан: Тэгэхээр харин би асуугаад байна шүү дээ. Нэрлэсэн үнээр өгөх гээд байгаа юм уу, зах зээлийн үнээр өгөх гээд байна уу. Ямар тохиролцоо байна.

Л.Уламбаяр: Анх нэрлэсэн үнээр байсан. Бид бас жаахан хараад байна.

Ц.Баярсайхан: "Шинхан" яах вэ ойлгож байна. "Түшиг"-тэй ямар холбоотой байх юм бэ?

Л.Уламбаяр: Монголын худалдааны салбарт өөрийн гэсэн байр суурьтай компани тийм учраас худалдааны чиглэл дээр хамтарч ажиллах юм бидэнд байгаа.

Чинбат: Жишээлбэл шинэ баригдаж байгаа дэлгүүрийн барилгад нь манай банкны томоохон салбар үйл ажиллагаа явуулна.

Ц.Баярсайхан: "Зоос" дээр хийсэн нэрлэсэн хувьцааны заалтыг хийвэл яах вэ, Аюуш гуай?

Б.Аюуш: Болно. Гэхдээ эд нар "Түшиг" дээр ойлгомжтой биш байгаа юм шиг байна.

Л.Уламбаяр: Бид хувьцаагаа тодорхой хугацаанд зарахгүй гэж гэрээндээ оруулж өгнө.

Б.Лхагвасүрэн: Монгол-банк дээр очоод буцах асуудал гарах вий. Бүтэхгүй гэвэл хоёр шийдвэр зөрчилдөнө шүү.

Энэ мэтээр Санхүүгийн зохицуулах хорооны дээрх гишүүд ярилцаж байгаад 100 хувийн саналаар "Анод" банкийг нийтэд санал болгон гаргах хувьцааг бүртгэх шийдвэр гарчээ.

Г.ДЭЛГЭРЦЭЦЭГ

мэдээ