Урин дулаанд байгаль дэлхий өнгөө засаж ,цэцэг ,ногоо дэлгэрдэг болохоор би хаврын улиралд дуртай.

Ханш нээгдэх үеэр “Pro sound”студиэ Жаргалан хотхон руу нүүлгэлээ. Студийнхээ нээлтийг удахгүй хийх гэж байгаа тул амрахаа хойш тавиад ажиллаж байна. Эмэгтэй хүний мэдрэмжээр хандах ганц нэг чимхлүүр ажлыг эс тооцвол засварын ажил ерөнхийдөө дууслаа.Олон уран бүтээлч студийн маань босгоор алхах учираас тохь тухтай ,гэрэл гэгээтэй,өөдрөг сэтгэгдэл төрүүлж байхаар бодож тохижууллаа.Надад үүнээс гадна зорилго болгож буй нэг хүсэл бий.Урлагийн сургууль байгуулах бодлоо заавал биелүүлнэ хэмээн дуучин Ж.Алтанцэцэг ярилаа.Түүний шинээр төвхнүүлж буй студид бид ярилцлаа.

 -Таныг поп опера урсгалаар уран бүтээл туурвих тухай яриа чих дэлссэн?

-Урлаг бол миний амьдрал ,миний уран бүтээл ,даль жигүүр .Би дуу хөгжимгүйгээр энэ ертөнцийг,энэ амьдралыг хэзээ ч төсөөлж чадахгүй .Шувуу нисэхээрээ өндөрт дүүлэхийг хүсдэг бол би мөрөөдлийнхөө оргил руу хүрэхээр тэмүүлж байна. Студиэ нээсний дараа поп опера урсгалаар дуулах уран бүтээлдээ шаргуу орно.Дуурийн дуу дуулна гэдэг амаргүй л дээ.Надаас бэлтгэл сургуулилалт ,тодорхой цаг хугацаа шаардана.

Энэ урсгалаар гаргах уран бүтээлдээ олон зүйлийг шингээнэ. Монгол поп опера гэж ямар байдгийг олонд хүргэе гэж шийдсэн .Би уг нь СУИС-ийг дуурийн дуулаачийн мэргэжлээр дүүргэсэн шүү дээ.Сонгодог чиглэлээр дуулна гэхээр хүмүүс гайхаад байгаа нь анзаарагдсан.”Music”продакшн уран бүтээл дээр минь ажиллаж байгаа.Ирэх намараас поп опера концертоо толилуулна.

-Төрсөн өдрөөр чинь энэ студийг нөхөр тань бэлэглэсэн.Тэр үед ийм том бэлэг авна гэж төсөөлөөгүй байсан биз?

-Ханийн минь барьсан сюрприз их таалагдсан.Хоёр жилийн өмнө долдугаар сарын 31-нд студиэ анх нээж байлаа.Надад бүхэл бүтэн студийг өөрөө дааж авч явах үүрэг хариуцлага дагаад л ирэх шиг санагдсан.Яахаа ч мэдэхгүй сандарч тэвддэг байсан үеэ бодвол одоо туршлагатай боллоо.Би өмнө нь нягтлан ,няравын ажлыг ер ойлгодоггүй байсан .Гэтэл одоо уран бүтээлээсээ гадна дизайнер,нягтлан ,няравын ажлыг хийж байх жишээтэй.

Эхэндээ энэ бүхэн дарамттай санагдаж стресстдэг байлаа.Бүх ажлыг нэгэн зэрэг амжуулна гэдэг туршлагагүй надад хэцүү байсан .Бухимдсанаасаа болоод бүр уйлдаг байсан гээч.Жаахан асуудал гарахаар нөхөр рүүгээ залгачихна.Сүүлдээ “Надруу битгий утасдаад бай өөрийнхөө ухаанаар наад студиэ ажиллуул .Олсон мөнгөөрөө бүтээн байгуулалтаа хий “ гэдэг болсон.Сайхан зүйл бүтээхийн тулд хүн асар их хөдөлмөр ,ухаан ,мэдрэмж зарцуулдаг юм билээ.

-Урлагаар олон жил явсан танд бизнесийн ажил эхлүүлэх эхэндээ амар байгаагүй л байх .Ажил хэргийн шугамаар хүмүүстэй уулзаж байхад танд ямар бодол төрж байв?

-Ажил хэргийн асуудлаар олон хүнтэй уулзаж ярилцдаг.Өнөөгийн нийгэмд амар хялбар аргаар амьдрахыг хүссэн хүмүүсийн шунал ямар их айдас төрүүлж байна вэ.Мөнгө хүүлэх аргаар хэнийг ч хайрлах сэтгэлгүй болчихсон хүйтэн хүнийг олж харсан шүү.Ядуу хүнд дээрэнгүй хандаж ,ядарсан нэгнийхээ олсон жаахан зүйлээс ичихгүй хумслаж байгааг нь хараад өөрийн эрхгүй жигшсэн.

 -Таны нээсэн дэлгүүрээс хүүхнүүд юу сонирхож авдаг вэ?

-Би учиргүй их мөнгө олох гэж дэлгүүр нээгээгүй .Нэг үеэ бодвол одоо байнгын үйлчлүүлэгчидтэй болсон .Хавар болж байгаа болохоор хүүхнүүд цүнх ,гутал ,цув гоёлын зүүлт сонирхож байна.Миний хувьд хүмүүсийн сонирхлыг татсан өвөрмөц ,давтагдашгүй загвартай шинэ бараа оруулж ирэхийг боддог.Европын орнуудаар аялан тоглолт хийж явахад Швейцарь их таалагдсан.Швейцарийн ард түмэн гоё ганган ,чанартай брэнд хувцсыг жинхэнэ утгаар нь өмсдөг юм билээ.Монголчуудын сэтгэлгээ өдрөөс өдөрт хөгжиж ,юманд хандах хандлага өөр болж байна.Хүүхнүүд дэлгүүр хэсэхдээ хүртэл хулхи ,брэнд барааны тухай яриа өрнүүлдэг болсон.

-Нөхрийг тань дуу цөөтэй ,даруухан зантай гэж хүмүүс ярьдаг юм билээ.Ингэхэд сэтгэлийн тань юугаараа тэгтэл татсан юм бол?

-Манай гэр бүлийн хүнийг Г.Сүхбуян гэдэг.Намайг ухаалаг,хөдөлмөрч зангаараа татаж чадсан хүн дээ.Завгүй ажлыг маань ойлгон ,зовлон жаргалыг хамтдаа хуваалцаж яваа ханийхаа сайхан сэтгэлд баярладаг.Урлагийн хүний ар тал байна гэдэг амаргүй.Тэвчээр их шаарддаг.Намайг ямар ч үед хайр,халамжаар дутааж байгаагүй.

Үргэлж үглээд байхгүй ч хааяа жинтэйхэн үг хэлчихдэг.Би нөхрөө бодвол нээлттэй,сэтгэлийн хөдөлгөөнтэй.Зарим үед миний дутагдлыг шүүмжилж,зөвлөнө.Хэлсэн үг нь тухайн үед хатуу санагддаг ч эргээд бодоход миний сайн сайхны төлөө зөв үг хэлсэн байдаг.Ангийнх нь багш нэг удаа надад “Сүхээ бизнес хөөгөөгүй бол эрдэмтэн болох залуу байсан юм даа”гэж хэлж байсан.Хань маань хайртай гэдгээ үгээр илэрхийлэхээс илүү үйлдлээрээ харуулж чаддаг.Хүүхдүүдээ хайрлаад харж байгаа харц нь хүртэл надад сайхан санагддаг шүү.

-Таны мөрөөдөж байсан залуу нөхөр чинь мөн үү?

-“Эр хүн нүдээрээ харж дурладаг,эмэгтэй хүн чихээрээ сонсож дурладаг “гэдэг дээ.Арван хуруу тэгш хүн гэж байдаггүй .Нэг нэгнийхээ зөв талыг дэмжиж ,бурууг нь залж залруулж амьдрах амьдралын гол утга учир байх.Хайрлаж амьдрана гэдэг сайхан.Бие биедээ итгэж ,нэг нэгнээ ойлгож амьдрана гэдэг чинь амьдралыг утга учиртай болголдог.

-Гэрлээд олон жил болж байна уу?

-Бид хамтдаа амьдраад 16 жил болж байна.Одоо манайх хоёр хүүхэдтэй .Үр хүүхэд бол айл гэрийн хамгийн сайхан аз жаргал .Хүү охинтой болчихоод аав ээжийн хайрыг мэдэрч байсан тэр мөч бидний амьдралын мартагдашгүй сайхан үе юм даа.Ээж болсноосооо хойш их өөрчлөгдсөн .Алтаагийн өмнө нь хүсэж байсан мөрөөдөл ,амьдралын тэмүүлэл одоо үр хүүхдийнхээ сайн сайхны төлөө чиглэж байна.Эмэгтэй хүний тэр дундаа эх хүний үүрэг,хариуцлага ямар өндөр байдгийг сайн мэдэрсэн шүү.

-Эрчүүдийг муулсан үг таны амнаас гарч байхыг ер сонсоогүй юм байна?

--Манай зарим бүсгүй залуучуудыг залхуу,заваан гэж ярьдаг.Монгол эрчүүдээ би өөрийнхөө дуулсан “Монгол эр хүн” дууны шүлэг шиг төсөөлдөг.Хаана ч явсан манай эрчүүд хийморьлог байж чаддаг.Монгол бүсгүйчүүд эртнээс эр нөхрөө хүндэлж ирсэн уламжлалтай.Энэ уламжлалаа умарталгүй эрчүүдээ хайрлаж амьдрах хэрэгтэй.Эр хүний алсын бодол ,ухааны цар хүрээ эмэгтэй хүнээс хамаагүй илүү байдаг.Эр хүн даруухан,томоотой гээд арчаагүй байж болохгүй ,ухаантай хүчирхэг байх хэрэгтэй.

-“Миний муу сайн найзууд “нэвтрүүлэгт оролцсон найзууд чинь танд мөнгөтэй гахай бэлэглэсэн .Тэр их мөнгийг юунд зарцуулъя гэж бодож байна?

-“Талст” дэлгүүрийн захирал Мөнхгэрэл гэр бүлийнхээ хамт мөнгөтэй хоёр гахай бэлэглэсэн.Найз маань үйлчлүүлэгчдийнхээ худалдаж авсан барааны мөнгөний дээжээс гахай руу хийдэг байсан гэнэ лээ.Би сайн тоолж амжаагүй л дээ.Нэг гахайнд нь ойролцоогоор гурван сая төгрөг байсан санагдана.Надад найз маань “Алтаа чи сайн сайхан зүйлийн эхлэл болгож ,энэ гахайнд байгаа мөнгийг хэрэглээрэй”гэж захисан.

Олон жил нүүрс түлсэн хорт утааны уршиг одоо монголчуудад нүүрлэж байна.1995 оноос өмнө хүүхдүүд хорт хавдраар өвчилж байгаагүй.Би найзуудынхаа харамгүй бэлэглэсэн мөнгөөр нийгэмд тустай ,олон хүнд буян түгээх өөрийн гэсэн сан нээж,үйл ажиллагааг нь тун удахгүй эхлүүлнэ.

Уушигны эмнэлэг байгуулж чаддаггүй юмаа гэхэд уушигны өвчнийг оношилж эмчлэх сүүлийн үеийн өндөр чадалтай аппарат,эмнэлгийн багаэж хэрэгсэл Япон улсаас оруулж ирэх бодол бий .Хоёр настай хүүхэд амьгалын аппарат залгахын зуургүй хорвоогоос хальж байна гэхийг сонсчихоод миний зүрх их шимширсэн.Эх орныхоо хөгжлийг муу байна гэж бид зүхэх хэрэггүй .Монгол хүн бүр өөрсдийн оюун ухаан ,авьяас ,хөдөлмөрөөр юу бүтээж болохоор байна. Тэр болгоныг хийхийн төлөө миний сэтгэл тэмүүлж байна.

-Та гэрийн ажилд хэр эзэгтэй вэ?

-Өө,гэрийн ажилд тааруухан гэдгээ нуухгүй ээ.Би зарим бүсгүй шиг гэр бүлдээ анхаарал тавиад,үргэлж халамжлаад байж чаддаггүй л дээ.Ажил хөөцөлдөхөөр өглөө эрт гэрээсээ гарч орой гэрийн бараа хардаг.Надад амрах өдөр тун ховор.Өнөө цагийн эмэгтэйчүүдэд гэрийн мухар сахисан ажил хэзээ ч зохихгүй.Бидний амьдарч буй нийгэм асар хурдацтай хөгжиж байна.Амьдрах орчин маань хүртэл хөдөлгөөнтэй ,завгүй ажиллахыг шаардаж байна шүү дээ.Завгүй гүйдэг ч би гэрээ цэмцгэр ,гэр бүлээ сэтгэл тайван ,халуун дулаан уур амьсгалтай байлгаж чаддаг.

-“Танайхыг гэрийн үйлчлэгчтэй,хүүхэд асрагчтай гэж сонссон юм байна?

-Асрагч охин надаас илүү хүүхдүүдэд минь халамж анхаарал тавьдаг.Өнгөрсөн өвөл бид Европын орнуудаар явахдаа хүүхдүүдээ авч явсан юм.Үнэнийг хэлэхдээ би их ядарсан.Хэрээрээ л бөөцийлөөд байхад хүүхдүүд маань асрагч охины халамжийг үгүйлээд байсан.Тэгэхээр би ээжийн үүргийг муу гүйцэтгэсэн байгаа биз.Ажил их үед хоногийн 24 цаг ч надад хүрэлцдэггүй.Нэг ажлаа дөнгөж амжуулчихаад,дараагийнхаа ажил руу орж байхад өдөр гялс өнгөрчих юм.

 -Гадагшаа байсхийгээд л явчихдагийн чинь учрыг сая ойлголоо.Та бухимдал ,стрессээс түр боловч холдохыг хүсдэг байна шүү дээ?

-Яг үнэн.Манай өнөөгийн нийгэм заримдаа хар дарсан зүүд шиг санагддаг.Өндөр хөгжилтэй гадаадын орнуудад очихоор сэтгэл тайвширч, амар амгаланг мэдэрдэг.Нүд хужирлаж сонирхох зүйл ч их.Гадаадад хүний эрхийг бүх талаар дээдэлдэг.Нэг нэгнээ хүндэлж амьдардаг нь сайхан санагддаг.Гадныхны хэрэглээ энгийн.Өөрт нь таалагдаж байвал сэтгэл хангалуун амьдарч чаддаг.Хүмүүс нь хэдий эрх чөлөөтэй амьдардаг ч хууль дүрэмдээ захирагддаг юм билээ.

-Амьдралыг урагшлуулахад эмэгтэй хүний чимхлүүр ухаан ,нарийн мэдрэмж их нөлөөлдөг гэж айлын эзэгтэйчүүд ярьдаг юм билээ.Та санал нийлэх үү?

-Эмэгтэй хүн тэвчээртэй ,ухаантай ,хүлээцтэй ,санаачилгатай байх хэрэгтэй.Гэхдээ тэвчээртэй байнай гээд дарлуулж доромжлуулна гэсэн үг биш шүү дээ. Нөхрийнхөө олсныг зөв зарцуулж ,гэр бүлээ сайхан уур амьсгалтай байлгана гэдэг эмэгтэй хүний үүрэг.Өдөр бүр амьдралаа шинэлэг,сонирхолтой байлгахад эмэгтэй хүнээс нарийн чамбай ухаан шаардагддаг. Амьдрал үргэлж сайхнаараа байдаггүй.Харин хэрхэн утга учиртай болгож амьдарснаас л бүх зүйл шалтгаалдаг.Би эмэгтэй хүн цэцэг шиг амьдрах ёстой гэж хэлэх дуртай.

 -Хүмүүс нөхрийг тань санхүүгийн эрх чөлөөнд хэдийнэ хүрсэн.Харин таныг жаргалтай амьдралд умбасан эрх танхил гүнж мэтээр төсөөлөөд байдаг?

-Амьдралаа өдий зэрэгт хүгэхийн төлөө хоёулаа хөдөлмөрлөсөн.Хүмүүсийн төсөөлөөд байгаа шиг бидний амьдрал үргэлж дардан байгаагүй ээ. Хөлсний байрнаас амьдралаа эхэлсэн ч өгсөж ,уруудах цагт хамтдаа байсан.Хүн шуналтай гэдэг үнэн шүү. Тухайн үед гурван өрөө байртай болчихвол боллоо доо гэж боддог байлаа.Тэгсэн одоо бас л өөр зүйлийн тухай мөрөөдөөд сууж байна.Сайхан амьдрахыг хүн бүр хүсдэг хэрнээ тэвчээртэй хөдөлмөрлөж чаддаггүй.Зовлон бэрхшээлд амархан сөхөрдөг.Зарим хүн хангалуун амьдарч байгаагаа аз жаргал гэж боддог л байх.Харин миний хувьд гэр бүл маань эрүүл саруул,элэг бүтэн байвал аз жаргал.

 -Та аз жаргалыг энгийнээр ойлгодог хүн юм аа?

-Би жаргалыг холоос хайхыг боддоггүй ,дэргэдээсээ мэдрэхийг хүсдэг.Хүүхдүүдээ өдрөөс өдөрт өсөж байгааг нь хараад жаргалтай ээж гэдгээ мэдэрдэг.Хүн өөрийгөө боомилдог тэнэг сэтгэлгээ ,гунигтай бодлоосоо зоригтой салах хэрэгтэй.Тархиа чөлөөлж , өөртөө хэрэг болох зүйлд суралцах ёстой.Үргэлж уншиж ,бусдаас суралцаж байхгүй бол хөгжлөөс хоцорно.Миний хувьд мөрөөдлийг минь биелүүлэхэд хэрэг болдог учираас хэрэгтэй гэж боддог.

-Зарим үед хүүхдүүдээсээ суралцах шаардлага гардаг уу?

-Хоёр настай охиноосоо хүртэл суралцах асуудал надад хааяа гардаг шүү.Охин маань өөрийнхөө санаа бодлыг чөлөөтэй илэрхийлдэг.Нэгдүгээр ангид суралцаж байгаа хүүгээсээ компьютер дээр хэрхэн ажиллахыг заалгаж байна шүү дээ.Заримдаа юу болж байна вэ би чинвь хөгжиж байна уу,эсвэл хоцрогдож байна уу гэж хүртэл боддог.Саяхан хүү маань “Та хоёр чинь охиноо хайрлаад ,намайг тоохоо больчихсон юм уу” гээд сүрхий гомдоллсон шүү.

 -Эмэгтэйчүүд нэг уулзахаараа тойрч суугаад гоёл гангараа,хов жив ярих дуртай байдаг даа.Найзуудтайгаа хааяа ярьж суух зав өөртөө гаргадаг биз дээ?

--Найзуудтайгаа өдрийн од шиг уулздаг.”Талст “-ын фракц хүүхнүүдтэйгээ уулзвал өдөржин яриа өрнүүлдэг.Бодоод байсан чинь би дэлгүүрийн захирал бүсгүйчүүдтэй ойр дотно нөхөрлөдөг юм шиг байна шүү.Урлагийн хүн болоод ч тэрүү би ганган ,чамин зүйлд дурлаж ,дэлгүүр их хэсдэг.Найз бүсгүйчүүдийнхээ мөнгөнд хандаж байгаа хандлага ,биеэ авч яваа соёл ,гэр бүлтэйгээ харилцаж байгаа харилцаанаас нь хүртэл их зүйл суралцдаг. Зарим нэгнийх нь тайван,хүлээцтэй занд уусаад байгаа.Эхэн үедээ би гоёл гангараа ,гэр бүл ,аж амьдралаа ярьдаг байсан бол сүүлийн үед ярианы сэдэв өөрчлөгдөж ,ниймийн амьдрал ,олны сайн сайхны төлөө чиглэдэг болсон.

 -Алжаалаа яаж тайлдаг вэ?

-Саунд сууна,гоо сайхны салонд массасж хийлгэнэ.Хааяа найзуудтайгаа дарс, коньяк ууна,аятайхан газар орж бүжиглэнэ.Завтай үедээ дэлхийн сонгодог зохиол уншдаг.Би заримдаа хүүхэд шиг аашлах дуртай.Хүүхдүүдтэйгээ зэрэгцэж суугаад хүүхэлдэйн кино үзээд инээнэ.Нөхөр маань харчихаад “Ямар сонин ээж вэ.Хүүхдүүдтэйгээ нийлээд хүүхэлдэйн кино үзээд суучих юм “гэж шоолдог юм.Ханьдаа хааяа хүүхдүүд шигээ учиргүй эрхэлнэ, бухимдсан үедээ аргадуулах гэж уйлна.Манай нөхөр инээгээд “Яана даа Алтаа минь,чи удахгүй 40 хүрнэ .Хүүхэлдэйн кино үзээд ,уйлаад л байхуу.Ганцаараа үлдвэл яана”гэж толгой сэгсэрдэг юм.