хэрэгт яллагдагчаар татагдсан DJ Өөжийг холбогдох хэргийг Чингэлтэй дүүргийн анхан шатны шүүхээр өчигдөр хянан хэлэлцлээ. Шүүх хуралд даргалагч шүүгчээр Б.Цогт, Зоригоо, улсын яллагч Г.Мижиддорж, шүүгчдгэгч О.Ганболд /Өөжий/, шүүгдэгчийн өмгөөлөгч Б.Манлайжав нар оролцлоо. Мөн О.Ганболдын аав С.Одон, ах, найз нөхөд нь хүрэлцэн ирсэн байв. Шүүх хурал 14.10 цагт эхэлж, хоёр цаг орчим хэлэлцсэний эцэст шийдвэрээ гаргасан юм. Улсын яллагч Г.Мижиддорж эрүүгийн хуулийн 188.3-т зааснаар 15 жилийн хорих ялыг чанга дэглэмтэй хорих ангид эдлүүлэх саналаа шүүх бүрэлдэхүүнд тавьсан бол шүүгчдэгчийн өмгөөлөгч Б.Манлайжав хэрэгт н.Мөнхбаяр гэх залууг холбогдуулан дахин шалгаж, хэргийг нэмэлт мөрдөн байцаалтад буцаах санал оруулсан юм. Харин шүүх бүрэлдэхүүн хэлэлцээд О.Ганболдод 12 жилийн хорих ялыг чанга дэглэмтэй хорих ангид эдлүүлэх шийдвэр гаргалаа.

Шүүх хурал нээллтэй болсон бөгөөд хурлын үеэр яригдсан зүйлсийг тоймлон хүргэе.

Шүүгч хурлыг нээсний дараа улсын яллагч Г.Мижиддорж, О.Ганболдын цүнхэнд хийсэн нэгжлэгийн тэмдэглэл, гаалийн улсын байцаагчийн тодорхойлолт, шүүгдэгчийн тайлбар, эд мөрийн баримт, эд мөрийн баримтад хийсэн шинжээчийн дүгнэлт, гэрчүүдийн мэдүүлэг, шүүгдэгчийн тайлбар, хэрэгт холбогдогч н.Мөнхбаярын хэргийг хэрэгсэхгүй болгосон талаарх тайлбар зэргийг шүүх бүрэлдэхүүнд уншиж танилцуулав. Үүний дараа шүүгдэгч О.Ганболд биеийн байцаалтаа шүүх бүрэлдэхүүнд өглөө. Тэрбээр 1977 онд төрсөн, 34 настай, бүрэн дунд боловсролтой, мэргэжилгүй. Хэрэгт холбогдох үедээ “Доргио” шөнийн цэнгээний газарт шоу менежрээр ажиллаж байжээ. Өмнө нь буюу 2007 онд Баянзүрх дүүргийн шүүхээс эрүүгийн хуулийн 188.3-т зааснаар хар тамхи мансууруулах төрлийн бодис хилээр нэвтрүүлэхийг завдсан хэргээр 10 жилийн хорих ял сонсч байсан аж. Түүний ялнаас 2006 онп гарсан Өршөөлийн хуулиар хоёр жил нь хасагдаж найман жил ял эдлэхээр болжээ. Харин 2010 оны дөрөвдүгээр сард Ерөнхийлөгчийн уучлалд хамрагдаж, дөрвөн жилийн хорих ял хасагдан 2010 оны тавдугаар сарын 19-нд суллагдсан байна. тэрбээр шүүх бүрэлдэхүүнд “Би телевизийн найруулагч, хөтлөгч мэргэжилтэй” гэж нэмж танилцуулав. Шүүгдэгчийн биеийн байцаалттай танилцсаны дараа түүний өмгөөлөгч шүүх хуралд шинээр шүүгдэгчийн эрүүл мэндийг тодорхойлсон карт, оршин суугаа хорооны Засаг даргын тодорхойлолт, бүрэн дунд боловсролын гэрчилгээ зэргийг нотлох баримтаар оруулж буйгаа мэдэгдэв. Өмгөөлөгч шүүх хуралд ялыг хөнгөрүүлэх байр суурьтай оролцож байгаа гэлээ.

Каннибисын төрлийн 0.6 грамм мансууруулах бодис авч гарахыг завджээ

2011 оны тавдугаар сарын 18-ны өдөр Замын-Үүд боомтоор 1.8х1.1 см хэмжээтэй, 2 мм орчим зузаантай 0.6 грамм хар бараан өнгийн зунгаг шинжтэй зүйлийг хятад тамхины хайрцагт хийн цүнхэндээ авч гарахыг завджээ. Замын-Үүдийн гаалиар нэвтрэхээс өмнө цүнхийг үүрч явсан О.Ганболд, түүний найз Мөнхбаяр нарыг саатуулан нэгжлэг хийж, дээрх зүйлийг илрүүлсэн байна. Уг зүйлийг Замын-Үүдийн гаалийн лаборатори, Химийн шинжилгээний хүрээлэнд шинжлүүлэхэд Делта-9, Тетрохетроканабил бүхий мансууруулах сэтгэцэд нөлөөлөх бодис болох нь тогтоогдсон байна.

DJ Өөжий Бээжин рүү баарны тоног төхөөрөмж авахаар явсан гэнэ

Тэрбээр Ерөнхийлөгчийн уучлалаар суллагдаж гарч ирээд “Доргио” шөнийн цэнгээний газарт шоу менежрээр ажилд оржээ. Улмаар тус клубын ажилтан Мөнхбаяр, захирал н.Нямжав нарын хамт шинэ техник тоног төхөөрөмж оруулж ирэхээр Бээжин явсан байна. Тоног төхөөрөмжөө аваад захирал Нямжав онгоцоор Монгол руу нисч, харин О.Ганболд, н.Мөнхбаяр нар галт тэргээр ирэхээр болжээ. Тэд Хятадын хилээр 69 машинаар, бусад зорчигчдын хамт гарчээ. Энэ үеэр О.Ганболд цүнхнээсээ огт салахгүй байсан. Тэр Монгол Улсын хилээр гарах гэж байхдаа УАЗ 469 машинаас тамхи авахаар буусан аж.

О.Ганболд /Өөжий”:Хар тамхи минийх биш, намайг зориуд хорлосон

Шүүх хурлын үеэр О.Ганболд “Миний цүнхнээс гарсан мансууруулах бодис минийх биш. Хилээр орж гарахдаа н.Мөнхбаярын нэвтрэх хуудсыг би бөглөж байсан. Учир нь тэр хэл мэдэхгүй гэсэн юм. Миний цүнхэнд н.Мөнхбаяр бид хоёрын дундын зүйлс байсан. Тэр ямар ч цүнхгүй, минийн цүнхэнд юмаа хийж явсан юм. Хэдийгээр миний цүнхнээс илэрсэн ч гэлээ Мөнхбаяр санаатай цүнхэнд хийсэн байж болно.

Үүнийг шалгаж өгөхийг хүсье.

Шүүгч: - Таны цүнхэнд санаатай мансууруулах бодис хийх ямар шалтгаан байгаа гэж үзэж байгаа юм бэ?

-О.Ганболд: “Доргио” шөнийн клуб бол их мөнгө олдог газар. Тэнд ажилладаг хүмүүс цалингаасаа гадна тоног төхөөрөмжөө зарах ч юм уу янз бүрийн аргаар мөнгө олдог. Би гуравдугаар сард Нямжав захиралтай Бээжин рүү тоног төхөөрөмж авахаар яваад дөрөвдүгээр сард шоу менежрээр ажилд орсон. Энэ үед тэднийд цахилгаанчин хийдэг байсан Баяраа/Чинбаяр/ ажлаасаа халагдсан юм. Тиймээс тэд намайг энэ ажлаас зайлуулахын тулд ийм зүйл хийсэн байхыг үгүйсгэхгүй. Тиймээс н.Мөнхбаярын хурууны хээ мансуурлах бодис хийсэн уут, тамхиын хайрцагт байсан эсэх, миний цүнхнээс гарсан бодис хүн хэрэглэж байсан эсэхийг дахин шалгаж өгөхийг хүсч байна. Миний бодлоор тэр бодис ямар нэг зүйлийн үлдэгдэл, хүн хэрэглэж байсан байж магадгүй. Бид хоёрыг саатуулагдсаны дараа Эрүүгийн цагдаагийнхан ирээд “Намайг хар тамхины хэргээр ял эдэлж байсан, Мөнхбаярыг сүүлийн үед хар тамхи хэрэглэдэг залуусын тоонд ордог учраас шалгасан” гэх утгатай юм хэлж байсан. Өнөөдөр монголд хар тамхины хэрэглээ улам их болсон нь шоронгоос гарсны дараа ажиглагдсан. Би суллагдаад хар тамхины эсрэг залуусыг нэгдэхийг уриалж ярилцлага өгч байсан. Мөн монголдоо боловсон, соёлтой, залуусын шөнийн клуб байгуулах зорилго өвөрлөж, “Доргио” клубд ажилд ороод байсан юм.

Шүүгч: -Цүнхэнд тугалган цаас бас байсан. Тэр цаасаыг ямар зорилгоор авч явсан юм бэ?

-Гуанжугаас тахиа аваад түүнийгээ хөргөхгүй гэж тугалган цаас авсан. 0.6-хан грамм зүйлийг зарах, хэрэглэх гээд авч явахгүй.

Шүүгч: - Хар тамхи хэрэглэж байсан уу?

-О.Ганболд:

-2005 онд сонирхох журмаар хэрэглэж байсан. Гэхдээ би донтон биш. Ял эдэлж гарч ирснээсээ хойш нэг ч удаа хэрэглээгүй.

Шүүгч: -Чиний цүнхнээс илэрсэн бодисыг яаж хэрэглэдэг юм бэ?

-Тамхинд ороон шатааж хэрэглэдэг. Мөнгөлөг цаастай хамт хэрэглэдэг эсэхийг сайн мэдэхгүй байна. 2005 оны үед л би сонирхож ганц нэг хэрэглэж байсан.

Шүүгч: -Та н.Мөнхбаярыг санаатайгаар чиний цүнхэнд мансууруулах бодис хийсэн гэх ямар нотлох баримт байгаа юм бэ?

-Замын-Үүдэд баригдаад байхад тэр “Түрүүвчинд нэг болохгүй мөнгөн тэмдэгт байгаа. тэрийг яана аа хэмээн сандарч байсан. Бас хилээр хурдан гарая гэж намайг яаруулж байсан. Бас “Доргио”-гийн цахилгаанчин Баяраа, DJ Сүмбээ гээд найзуудтайгаа нийлж тамхи татдаг гэдгийг мэднэ. Тэрнийг найзуудтайгээ хэрэглэж, зарж, нөөцөлдөг байж магадгүй гэж бодож байна. Намайг “Доргио”-д ажилд ороход тиймэрхүү уур амьсгал байсан гэх мэтээр шүүгчдийн асуултад хариулж байлаа.

Харин түүний өмгөөлөгч Б.Манлайжав нотлох баримт болох тугалган цаасыг ач холбогдолгүй тул нотлох баримтаас хасах, хэргийг нэмэлт мөрдөн байцаалтад буцаах саналаа илэрхийлсэн бол тугалган цаас нь мэдрэгч төхөөрөмжөөр ороход мэдэгддэггүй, хэрэг мөрдөн байцаалтын шатанд хангалттай нотлогдсон талаар хэлсэн юм. Харин шүүх бүрэлдэхүүн 30 орчим минут хэлэлцэж О.Ганболд нь мансууруулах, сэтгэцэд нөлөөлөх бодисыг МУ-ын хилээр нэвтрүүлэхийг завдсан, энэ үйлдлээ давтан үйлдсэн болох нь тогтоогдсон учир Эрүүгийн хуулийн 188.3-т зааснаар 12 жилийн хорих ялыг чанга дэглэмтэй хорих анги эдлүүлэх, энэхүү хэргээ давтан үйлдсэн тул онц аюултай гэмт хэрэгтэнд тооцох, цагдан хоригдсон 101 хоногийг ял эдлэх хугацаанд оруулах, нотлох баримтаар хураагдсан мансууруулах бодисыг устгах, цагдан хорих, таслан сэргийлэх арга хэмжээг хэвээр үлдээх, ял эдлүүлэх хугацааг өнөөдрөөс /өчигдрөөс/ эхлэн тооцох шийдвэр гаргалаа. Хуулийн заалтаараа түүнийг онцгой дэглэмтэй хорих ангид ял эдлүүлэх байсан ч түүний хувь хүнийх нь зан чанарын байдлыг харгалзан үзэж, чанга дэглэмтэй хорих анги болгон хөнгөрүүлжээ. Шүүхийн тогтоол хүчин төгөлдөр болсноос хойш 14 хоногийн дотор давж заалдах эрхтэй. Шүүх хуралдааны дараа түүний ар гэрийнхэн ярилцлага өгөхөөс татгалзаж байлаа. Харин өмгөөлөгч Б.Манлайжав давж заалдахаа мэдэгдсэн юм.