- Хэдэн онд энэ спортод хөл тавьсан бэ. Түүнээс хойш хамгийн хүчтэй өрсөлдөгч хэн байв.

 Өөрийн чинь жингийн тухайд?
- 2003 оноос эхлэн Замчин спорт клубт орсон. Хүчтэй өрсөлдөгчийн тухайд энэ тэр гээд онцлоод байхгүй. Бүгд жигд хүчтэй өрсөлдөгч байсан.

Дэлхийн аваргад оролцсон тамирчид бүгд бэлтгэл сургуулилтдаа гарчихсан уу. Оюунсүрэн, Отгонцэцэг, Чулуунбат нар?
Тиймээ бидний хувьд байнгын бэлтгэл сургуулилттай байгаа. Одоо урьд өмнөхөөсөө илүүтэй бэлтгэл сургуулилтдаа анхаарах цаг үе болоод байна. Тиймээс долоо хоногийн ням гаригт л амарч байгаа.

Монголын тамирчдаас Дэлхийн аваргаас анх удаа хос медаль авч анхдагч нь боллоо?  
Тиймээ сэтгэгдэл маш их өндөр байна.

Медалийн төлөө барилдаанаа дурсахгүй юу?
Манай жинд 45 тамирчин оролцсон. Би таван тойрог барилдаад хүрэл медаль хүртлээ. Ардчилсан Солонгосын бөхтэй барилдсан даа.

37 жилийн дараа манай охидууд чөлөөтийн тамирчдын амжилтыг давтлаа шүү дээ. Багаараа хүрэл медалийн тавцанд гарахад ямархуу сэтгэгдэл төрж байв?
Ер нь бол эмэгтэй чөлөөт бөх манай оронд 1999 оноос хөгжиж байгаа гэж хэлж болно. Тэгээд 2005 онд анх Энхжаргал эгч маань медаль авч байлаа. Түүнээс хойш медалийн буухиа тасарсангүй. Орсон тэмцээн болгондоо сайн барилдаж медалийнхаа буухиаг үргэлжлүүлсээр байна. Энэ жилийн дэлхийн аваргын хувьд их онцлог сайхан тэмцээн боллоо. Урьд нь Туркийн Стамбулын дэвжээнд гарч үзсэн гэдэг утгаараа танил дотно дэвжээ сайхан байлаа. Энэ дэвжээнээс анх удаа дэлхийд гуравдугаар байранд охидуудтайгаа хамтдаа орсондоо сэтгэгдэл их өндөр байна.

Монголын чөлөөт бөхийн холбоо ирэх аравдугаар сард 50 жилийнхээ ойн баярыг тэмдэглэнэ. Чиний хувьд ойдоо барьж буй маш том бэлэг боллоо шүү дээ. Холбооныхон та нарыг ямар сэтгэгдэлтэй хүлээж авав?
Шинэчлэгдсэн Чөлөөт бөхийн холбоо маань бидний амжилтын төлөө маш их зүйл хийж байгаа. Бидэнд байнга эм тариа, хүнс, хувцас бүх шаардлагатай зүйлсээр чадах ядахаараа хангадаг. Чөлөөт бөхийн холбоо, Үндэсний хөрөнгө оруулалтын банк, Гачуурт компанийн удирдлагууд бидэнд маш их тусладаг.

Олимпоос эрхээ авчихлаа. Айдгаа авдрандаа хийчихлээ гэж хэлж болох уу? Мөн олимпийн өмнөх ДАШТ гэдэг утгаараа дараа жил олимпийн медалийн төлөөх өрсөлдөөн ерөнхийдөө харагдсан болов уу?
Тэгэлгүй яахав энэ жиндээ хэн нь хэн бэ гэдэг нь ерөнхийдөө харагдлаа. Ингээд харж байхад олимпийн медалийн төлөөх өрсөлдөөнд хэн гарч ирэх магадлалтай вэ гэдэг нь ойлгомжтой л харагдаж байна. Одоогоор манай жинд 6 бөх олимпийн эрхээ аваад байна. Цаашдаа сайн сайн бөхчүүд олимпод оролцох эрхээ авах нь тодорхой. Барагцаагаар ирэх олимпод 18-22 бөх манай жинд орох болов уу.

Олимпоос медаль авах магадлал чиний хувьд өндөр байна гэж бодож байна? Ямар медаль авна гэж бодож байна?
Ер нь тэр өдрийн тэнгэр л мэднэ дээ. Өмнө урьдчилж сайн хэлж мэдэхгүй байна. Гэхдээ мэдээж ялахын төлөө л бүх барилдаандаа зүтгэнэ. Сайн барилдаж алтан медаль авна л гэж бодож байна.

- Дэлхийн аваргад ямар тактик барьж барилдсан бэ?
Өмнө нь гаргасан алдаагаа гаргахгүйг хичээж барилдсан. Багш нартайгаа ярилцаж зөвлөлдөж барилдсан. Урьд нь гаргасан алдаануудаа давтахгүйг хичээж багш нартайгаа ярилцсан. Батбаяр багш маань бичлэг хийж авчирч үзүүлээд тэр улсын тэр бөхтэй таарвал ингэж барилдана шүү тэгнэ шүү гэж их ярилцсан л даа.

Отгонцэцэгийн медаль баг тамирчдад их урам өгсөн болов уу?
Тэгэлгүй яахав Отгонцэцэг бид хоёр хар багаасаа л уралдаан тэмцээнд хамтдаа орж байсан. Анхны өдөр алтан медалийн төлөө гарлаа гэхэд бид нар бэлтгэл хийгээд үзэж амжаагүй ч маш их баяртай байсан. Гэхдээ Отгонцэцэгийн хувьд жаахан харамсалтай юм болсон, цаашдаа бэлтгэл сургуулилтаа сайн хийгээд явж байвал үүнээс илүү амжилтад хүрч чадна гэж би боддог.

 - Монгол эмэгтэй бөхчүүдийн тухайд бусад орны эмэгтэй бөхчүүдээс юугаараа ялгаатай бэ. Миний хувьд монгол эмэгтэйчүүд их бяртай, зоригтой юм шиг санагддаг? Чиний хувьд?
- Ер нь намайг их бяртай чадалтай гэж ярьдаг. Гэхдээ би өөрийгөө тэгж бяртай гэж боддоггүй ээ. Гадны бөхчүүд бол ер нь Монгол эмэгтэй бөхчүүдийг бяртай, хүчтэй шуурхай барилдаантай гэдэг л дээ. Тэгэхээр Монгол бүсгүйчүүд ер нь дайчин байдаг байх аа.

- Найз залуу бий юу. Чиний хувьд найз гэдэг ойлголт?
- Яг одоогоор надад найз залуу байхгүй. Найзын хувьд олон найз бий.

- Гэр бүлээ хэзээ зохиоё гэж бодож байна.
- Яг одоогоор төлөвлөсөн зүйл алга.

- Ямар залуу таалагддаг вэ?
- Яг одоо гадуур явж байгаа туранхай туранхай залуучууд таалагддаггүй. /инээв/

- Залуу хүний тухайд ямар хоббитой вэ?
- Юм юм сонирхдог. Чадахгүй ч юм байдаггүй хүн шүү. Юм юманд л хорхойсож сонирхож оролддог.

- Эмэгтэй хүн бөх гэж цоллуулахаар ямар сэтгэгдэл төрдөг вэ?
- Энэ миний ажил, багаасаа хөдөлмөрлөөд явсан болохоор их сайхан байдаг. Бөхийн амт шимтийг амтлаад үзчихсэн болохоор хүмүүсийн ярьдаг шиг сэтгэгдэл шиг эвгүй санагддаггүй ээ. Энэ бол миний л ажил.

- Ямар хоолонд дуртай вэ?
Хоол голдоггүй дээ. Шөлөнд дуртай болоод байгаа. Мөн цагаан мөөгтэй хоолонд дуртай. Амттанд ер нь дуртай даа.

- Хамгийн сайн хийдэг хоол?  
- Хуушуурнаас бусдыг нь хийж чадна. Хуушуурыг хайрч чаддаггүй юм аа. /инээв/

- Shopping хаанаас хийж байна.
- Монголоос, гадаадаас аль алинаас нь хийнэ.

- Олны танил боллоо. Хүмүүсийн хандлага ямар байна?
- 2008 онд Эрдэнэбаяр хурандаагаас дэслэгч цол авч байсан. Жаахан юм байж ямар олон медальтай юм бэ гээд цагдаа хувцастайгаа явахаар хүмүүс хардаг.

- Дараагийн Дэлхийн цом  Японд болно. Энэ тэмцээний талаар..
Дэлхийн цом  гоё тэмцээн байдаг юм билээ. Багийн ажиллагаа маш чухал. Нэг нэгийгээ дагадаг, амжилт гардаг тэмцээн гэж боддог.

Тэмцээн уралдаанд орж байхад тохиолдсон хөгжилтэй явдлуудаас дурсвал?   
- 2002 онд багаараа дэлхийн цомд явсан. Нүмүүс намайг хамгийн бага нь гэж өхөөрддөг байсан. Казахстаны Алма-Атад оччихоод орос хэл мэдэхгүй юм чинь шилэн хаалга байсныг сайн хараагүй. Тухайн үед орос хэл дээр анхааруулсан юм байна лээ. Би мэдэхгүй болохоороо гүйж очоод л шилийг нь мөргөчихсөн. Тэгэхэд цуг явж байсан хүмүүс намайг Шилэн Бурмаа Шилэн Бурмаа гэж шоолж байсан нь санаанаас гардаггүй.

- Тамирчин бүсгүйчүүд маань бялуу чимэглэх ч байдаг юм уу, нарийн зүйлийг муу хийдэг юм шиг байдаг ?
Би өөрийнхөө хэмжээнд хоол хийж чаддаг л гэж бодож байна. Гэхдээ тогоочийн курст суугаад үзэхэд болохгүй юмгүй л дээ.

- Залуучуудаас танилцах санал их ирдэг үү. Санал ирэхэд яаж хүлээж авдаг вэ?
- Санал хүлээж авдаггүй ээ. Таньдаг хүмүүстэйгээ л харьцдаг юм.

- Сэтгэлд тод үлдсэн тэмцээн?
Аварга болох л гоё байдаг. Ямар ч тэмцээнд орсон аварга болох л гэсэн зорилго тавьдаг.

-  Бөх барилдахад биед өөрчлөлт ордог уу?
Нэг их өөрчлөлт ордоггүй.  Бид бие гоё байх ёстой гэдэг үүднээс трико өмсөж барилддаг юм.

- Бэлтгэл дээр хүнд  жингийн штанг өргөдөг үү?  
- Бөхөөр хичээллэхээс өмнө би  хүндийг өргөлтөөр хичээллэдэг байсан. Цээжний шахалт 65 , суулт 150 кг-ийг шахаж байсан.

- Аль сургуулийг дүүргэсэн билээ. Цаашид боловсролдоо хэрхэн анхаарах вэ?
- ШУТИС-ийг дүүргэсэн. Магистрт сурах урилга ирж байсан.  2012 оноос магистртаа сурна гэж бодож байгаа.

- Гоо сайхандаа хэр анхаарч цаг зав гаргадаг вэ. Саун бассейн гоо сайхны салон орох цаг зав байдаг уу?      
- Саунд байнга ордог. Бассейнд нэг их орж чаддаггүй. Гоо сайхны тухайд миний үйлчлүүлдэг нэг гоо сайхны салон бий. Байнга очоод сурчихсан таньдаг эгч бий.

- Очсон орон болгоноосоо бэлэг дурсгалын зүйл худалдан авдаг байх. Ямар сувинер сонирхож авдаг вэ ?
- Урьд нь нэг их сонирхож авдаггүй байсан. Сүүлийн үед авдаг болоод байгаа. Тухайн орны онцлогийг харуулсан сувинер болон хөргөгчин дээр наадаг зүйлс.   

- Эмэгтэй хүнийхээ хувьд гоо сайхандаа хэр анхаарч байна?
- Саунд долоо хоногт гурваас дээш удаа ордог. Тольны өмнө байнга суугаад байж чадахгүй ч тодорхой хэмжээнд анхаардаг.

- Манай сургалтын давуу болоод дутагдалтай талууд таны бодлоор юу вэ?
- Морь яаж уядаг билээ яг тэрэн шиг багш нараас их шалтгаалдаг. Эмэгтэй тамирчдыг эрэгтэй тамирчидтай зүйрлэх аргагүй

- Сүхбаатар багш, Дүвчин багш нарын тухай ярихгүй юу?
Бид багш нарынхаа заавар, зөвлөгөөний дагуу явж байж л амжилтад хүрдэг. Бас багш гэсэн албан ёсны нэргүй ч багш нар байна шүү дээ. Ах нар, эгч нар, үе тэнгийн тамирчид гээд л 

- Сая эрэгтэй тамирчид маань амжилт гаргаж чадаагүйд олон нийт сэтгэл дундуур байгаа?
- Эрэгтэй эмэгтэй гэлтгүй, манай баг тамирчдын бүгдийнх нь амжилт шүү дээ.  Эмэгтэй тамирчдын амжилтыг  Монгол Улсын баг тамирчдын бүгдийнх нь амжилт гэж би хэлнэ.

- Хэр сүсэг бишрэлтэй вэ?
- Өө хүн чинь аяндаа тийм болчихдог юм билээ. Тэмцээнд орохдоо бэртэж гэмтчихгүй юмсан гэж боддог. Тэр утгаараа явахаасаа өмнө амжвал Гандангаар нэг орчихдог юм аа. Аав ээж ч гэсэн арц хүж уугиулдаг.

- Наадмын өмнө бөхийн галд эмэгтэй хүн очихыг хориглоод байдаг юм билээ. Бөхөөр хичээллэдэг эмэгтэй тамирчны хувьд үүнд ямар байдлаар ханддаг вэ?
- Хүмүүс гал дээрээ очуулдаггүй гэж сонссон. Би өөрөө бөх үздэг ч гэсэн энэ талаар сайн мэдэхгүй байна. Гэхдээ өөрсдөө эмэгтэй хүнээс төрсөн, бүгд л эхнэртэй бас охин хүүхэдтэй байж тийм зүйл гаргаад баймааргүй баймаар санагддаг.

- Анхны хайртайгаа учирсан уу?
Учирсан

- Хэзээ, хэн гэдэг залуу байв?
- Аль нь юм болоо /инээв/ За тоглосон юм аа.

- Одоо найз залуутай юу?
- 4-5 жил нэг хүүхэдтэй үерхсэн. Тэгээд саяхан салсан.

- Уучлаарай яагаад салсан юм бэ?
- Тэгээд л салсан даа.

- Хэдэн хүүхэдтэй больё гэж боддог вэ?
- Манайхан олуулаа. 3 ах, 3 эгчтэй. Тэгэхээр олуулаа болно. Ер нь 3-4 хүүхэдтэй болно доо.

- Олны танил болохоор ааш зан нь өөрчлөгддөг гэх хандлага бий. Энэ тал дээр юу хэлэх вэ?
Ер нь хүн тийм  байж болохгүй. Олны дунд хэлэх үг , хэлэхгүй үг гэж байна. Хүн хүнтэйгээ сайхан харьцах ёстой гэж боддог. Бухимдаад уурлаад байхгүй. Аль болох тайван байх ёстой л доо. Би уг нь хүнд ялагдах дургүй, ялагдах биш оноо алдах ч дургүй.

Өмнөх тэмцээнүүд дээр оноо алдчихаараа  хямраад уйлдаг байсан. Энэ жил тэр тал дээрээ их анхаарахыг чухалчилсан. Шар хөдөлж байгаа ч, сэтгэл санаагаа тайван уужуу байлгаж амжилтанд хүрье гэж бодсон. Багш нар маань ч тэгж зөвлөсөн.

- Спорт гэдэг хүний залуу насны л ажил, хэзээ нэгэн цагт барилдахаа болиод ямар нэгэн юм хийх нь гарцаагүй. Ер нь барилдахаа больсныхоо дараа хийх юмаа төлөвлөсөн үү?
- Цагдаагийн ерөнхий газрын “Хүч” спорт хороонд харъяалагддаг. Тэгээд сургуулиа төгсөөд хуулийн чиглэлээр явах байх. Магадгүй чөлөөт бөхөндөө дасгалжуулагч ч болж магадгүй.

- Тамирчдын хувьд доод тал нь 15 минут амраад дэвжээн дээр гарах ёстой байтал сая Дэлхийн аварга дээр  барилдаан хоорондын зай  минут л байсан гэсэн. Энэ нь амжилтад хэр нөлөөлдөг бол?
- Сая тийм байдал байсан. Дэмжээн дээр минут болоход удаан юм шиг хэрнээ  минут завсарлаад трикогоо солиод гарахад цаг маш хурдан өнгөрдөг.

- Ямар нэгэн далд авъяас байна уу. Дуулдаг уу?
- Дуулах маш дуртай. Харамсалтай нь дуулж чаддаггүй. Манай найз сая дэлхийн аваргаас мөнгөн медаль авдаг Оюунсүрэн маань маш гоё дуулдаг. Найзынхаа далбаан дор л намирна шүү дээ.

- Ямар нэг уралдаан тэмцээний дараа фенүүдээс нь хэр их мессэж ирж байна?
- Фэн гээд байх юм байхгүй. Найзуудаас маань их ирдэг. Найзууд маань “Миний найз сайн байна, чи шүү” гэх мэт мессэж илгээдэг. Тэгээд найзуудынхаа мессэжийг уншаад л хөөрөөд сууж байдаг даа.

- Батцэцэг өөрт чинь 2 удаа ялагдаад тэмцээнд явж чадаагүй. Та хоёр ямар харьцаатай байдаг вэ?
- Бид дэвжээн дээр өрсөлдөгч. Амьдрал дээр найзууд. Батцэцэгийг аварга болохоос нь   өмнө нэг удаа,  ер нь бол  гурван удаа барилдсан. Дэвжээн дээрээ ялж,  ялагдаад байгаа болохоос бие бие их дэмждэг. Тэмцээний дараа бие биедээ нөхөрсөг зөвлөгөө өгдөг найзууд шүү дээ.

- Гадаад яваад нэг улсаас хичнээн төгрөгийн бэлэг дурсгалын зүйл авдаг вэ?
- Байнга мөнгөтэй яваад байж чадахгүй. Халаасандаа 100-200 ам.доллартай л явдаг. Бэлэг сэлт нээх их аваад байдаггүй.

- Цагийг ухрааж болдог бол тэгээд хийчих байсандаа гэх харуусал дагуулдаг зүйл бий юү?
- Хувийн талаас тийм зүйл байхгүй.  Харин 2008 онд Залуучуудын Дэлхийн аваргад оролцож байхдаа 15 секундын дотор алтан медалиа алдсандаа л харамсдаг. Тэр л санаанаас гардаггүй юм.

- Гадаадад тэмцээн уралдаанд ороход хичнээн төгрөгийн бэлэг дурсгалын зүйл авдаг вэ?
- Байнга мөнгөтэй яваад байж чадахгүй. Халаасандаа 100-200 ам.доллартай л явдаг. Бэлэг сэлт нээх их аваад байдаггүй.

- Өөртэй чинь адилхан хүсэл мөрөөдөлтэй сайн тамирчин болохоор бэлтгэл хийж буй шинэ үеийнхэндээ анхаарах, зөвлөх зүйл?
- Ер нь тамирчин болъё гэж бодож байвал эхнээсээ хичээж өөрийгөө дайчлах хэрэгтэй. Энэ спорт их хэцүү. Энэ спортыг сонгоод ороод ирж байгаа хүүхдүүд их мундаг байна. Сайн хичээх хэрэгтэй. Няцаж шантрахгүй л зүтгэх хэрэгтэй гэмээр байна.

- Тэмцээн дөхөөд ирэхээр тамирчид их сэтгэл нь догдолж зүүдэлдэг гэсэн.
 Медаль зүүдэлсэн үү?
- Ер нь унтахынхаа өмнө тэмцээнийхээ талаар бодохгүйг хичээдэг. Саяны тэмцээн дээр ялагдаж байна гэж зүүдэлсэн. Тэгээд өглөө босчихоод түй түй гээд нулимсан. Өмнө нь нэг медаль авч байна гэж зүүдэлсэн юм байна.

- Цагийг ухрааж болдог бол тэгээд хийчих байсандаа гэх харуусал дагуулдаг зүйл бий юу?

- Бирд гарч ирээд нэг  хүслийг нь биелүүлье гэвэл юу хүсэх вэ?
- Байр, машин л хүснэ дээ.

- Яг  ямар машин?
- Креста унаж байгаад больсон. Надад Инфинити л гоё санагдаад байдаг юм. 

- Ер нь болъё доо гэж бодох тохиолдол бий юу?
- Энэ талаар бодож байгаагүй. Нэг удаа бэртэл авчихаад цаашид бэртэлтэй байгаад байх юм болов уу” гээд л их сэтгэлээр унасан. Тэр үед цаашид барилдаж чадах болов уу л гэж бодож байснаас болъё гэж бодож байгаагүй юм байна.

- Рекламанд тоглох, аль нэг брэндийн нүүр царай болооч ээ гэсэн санал ирж байна уу. Ирвэл хүлээж авах уу?
- Ямар нэгэн санал хүлээж авч байгаагүй. Хэрэв ирвэл би шийдэхгүй холбоо шийдвэр гаргана. Би “Алтай констракшн”-ы бөх болсон. Тус компанийн захирал Бат-Эрдэнэ спортыг ойлгодог, их элэгтэй хүн. Энэ дашрамд Бат-Эрдэнэ ахдаа баярласнаа илэхийлье.

- Шигшээ багаас цалин хэдийг авдаг вэ?
- Яг гар дээрээ 250 мянгийг авдаг. Цаанаас нь татваруудыг төлчихдөг гэсэн.

- Өвдөгнийх нь бэртэл одоо гайгүй юу?  
- ЦЕГ, Олимпийн хорооноос зардал мөнгө гаргаад бэртлээ эмчлүүлж хагалгаанд орсон. Тэнгэр муухайрахаар л жаахан өвддөг юм. Бэртлээ эмчлүүлсэн болохоор сайхан л байна. Бэлтгэлээ л хийе гэсэн эрмэлзэлтэй байна даа.

- Таны туйлын хүсэл мөрөөдөл юу вэ?
- Орсон бүх тэмцээнүүддээ амжилт гаргая гэж боддог.

- Ямар дуу сонсдог вэ?
- Ямар нэгэн урсгал хөөгөөд байдаггүй. Өөрт таалагдсан дуугаа л сонсдог. Тамирчны алдар дууг сонсохоор дотор огшоод явчихдаг.

- Жин хасахдаа яаж хасдаг вэ. Амаргүй байдаг байх?
- Их жин хасахаар хэцүү байдаг. Долоо хоногийн дотор 8 кг хасаж байсан удаа бий. Би ер нь бол 3-5 кг –ийн хооронд хасдаг. Сүүлдээ хөлс ч гарахаа больдог. 50-100 грамм хасах гэхэд хөлс ч гарахаа больдог гэхээр та нарын санаанд орохгүй байх л даа. Их тэсвэр тэвчээр шаарддаг.

- Өөрийгөө тодорхойлбол?
- Найзууд минь л намайг хэлнэ байх. Гэхдээ би их шартай. Санасандаа хүрч чадахгүй бол уурлана. Ер нь сэтгэлийн хөдөлгөөн ихтэй шүү.

- Тамирчны амьдрал ямар байна. Өөрийнхөө амьдралд сэтгэл хангалуун байна уу?
- Тамирчны амьдрал бүрхэг шүү дээ. Яг одоо миний үеийнхэн байр хөлслөөд л явж байна. Чадалтай нь хоёр өрөө байр, чадал муутай нь нэг өрөө байр хажуу өрөө  хөлсөлж амьдардаг. Миний хувьд байр хөлсөлж байгаад сая дэлхийн аваргад явахынхаа өмнө гарчихсан. Одоо ах дүүгийнхээрээ л байна.

- 2008 оны олимпоос хойш харьцангуй анхаардаг болсон л доо. Дэлхийн аваргад амжилттай оролцсон тамирчдыг санхүүгийн талаар дэмжих зүйл байгаа болов уу?
- Одоогоор тийм зүйл байхгүй л байна. Миний хувьд тэгж сонсоогүй байна.

- "Алтай констракшн"-ы бөх гэж дуудуулахаар ямар санагдаж байна вэ?
- Би яагаад ч юм Алтай констракшн-д  орох юмсан гэж боддог байсан. Нэг удаа найз Отгонцэцэгтээ нэг компани надад санал тавиад өөрийн тамирчин болгож авсан гэж тоглоод ярьж байсан юм. Гэтэл тэр яриа маань биеллээ олж  Алтай констракшн надад санал тавьсан шүү. Үүнд их баярлаж, билэгшээдэг.

- Их аварга Д.Дагвадорж нутгийн бөхчүүдээ Стамбулд очиж дэмжсэн. Сэтгэгдлээ хуваалцаач?
- Их аварга  маань  бидэнд маш их дэмийг өгсөн. Би тэр хүнийг зурагтаар л хараад ямар гоё хүн бэ гэж боддог байсан.  Гэтэл тэр хүн маань Дэлхийн аваргад бидний дэргэд байж  маш их дэмжиж, зааж, зөвлөж, спортыг ойлгодог жинхэнэ тамирчин хүн гэдэг нь харагдаж байлаа. Бүр өдрийн хоолоо ийм байдлаар ингэж идэх ёстой гэхчлэн маш их дэмжлэгийг үзүүлж байсанд баярлаж байна.

- Сүүлчийн асуултыг өөрт тань үлдээе?
- Намайг дэмждэг бүх хүмүүс болон аав, ээж, “Хүч” спорт хороо “Алтай констракшн”-ы н.Бат-Эрдэнэ ахдаа, олимпийн хороо, Засгийн газар, Биеийн тамир, спортын улсын газар, н.Баттуул ах, “Ганьт”-ийн н.Эрдэнэбат ах, “Россия клобса”-ийн Бүрнээ ах, Нийслэлийн цагдаагийн газрын н.Эрдэнэбаяр хурандаа, Цагдаагийн ерөнхий газрын хамт олондоо маш их баярлалаа гэж хэлье. Мөн энэ дашрамд биднийг Стамбулд дэлхийн аваргын дэвжээнд гарч байх үед нойр хоолоо хасан сууж өдөр шөнөгүй ажиллан ДАШТ-ын мэдээ мэдээллийг нийтэлж байсан танай сайтын хамт олонд баярлалаа гэж хэлмээр байна.